1. Anni i kagian na Biblia meyannung ta disiplina?

NU MAGINNAM i uvovug nga “disiplina,” anni i manono mu? Awayyana nga insigidam manono i pangastigu, ngem ari laman tu yatun. Kagian na Biblia nga makasta para nittam i disiplina anna nu mittan natukoy yatun kavulu i pakannammu, kinasirib, aya, anna inango. (Prov. 1:2-7; 4:11-13) Megafu yatun ta i disiplina na Dios ay pangipasinganna tu aya nittam anna i pakkaragana nga mattolay ittam tu mannanayun. (Heb. 12:6) Ngem maski nu nelagum ta disiplina i pakkastigu, ari vuluvuga nga pangabuso onu vayolente yaw. Yatutta i primeru nga kebalinan na “disiplina” ay konektadu ta panuddu, gittana pamadakal ta meddu nga ana.

2, 3. Kunnasi nga parehu nga panuddu anna pangastigu i panisiplina? (Innan i letratu ta gafu na artikulo.)

² Ikonsidera yaw nga ilustrasion: Gaya-gayaman na mabbing nga lalaki nga mangngagan tu Johnny i bola ta unag na baleda. Tapus kinagi na yenana: “Johnny, ari kari nga nekagi nikaw nga ariammu maggayang tu bola ta unag na balay! Baka makabakka ka.” Ngem arianna gigginnan i yenana, nitulu-tuloyna lagapa nga gayaman i bola anna aksidente nga nabakkana i florera. Kunnasi yayya disiplinan na yenana? Puede nga gukaban na panuddu anna pangastigu. Ta panuddu sa, awayyana nga iperaddam kani  Johnny nu ngatta mali i kingnguana. Kayàna ipalippawa sa i kinasirib ta pagginna ta magana anna iyesplika nga mepangngo anna rasonable i ipakuada. Tapenu moffunan i anana nga mala i leksion, puede nga kastiguanna yayya. Angngariganna, puede nga apanna labbi sa i bola. Metuddu naw sa nga marake i resulta na ari pagginna.

³ Megafu ta miembro ittam na Cristiano nga kongregasion, parte ittam na familia na Dios. (1 Tim. 3:15) Yatutta, irespeto tam nakuan i kepangngattan ni Jehova nga mangipay tu estandarte anna meddu nga manisiplina nu ariattam matuttul yatun. Nu marake i resulta na kingngua tam, iperaddam nittam na panisiplinana nu kunnasi ka-importante i pagginna ta nelangitan nga Yama tam. (Gal. 6:7) Talaga ikavurungan ittam na Dios anna manakina nga marraddam ittam.​—1 Ped. 5:6, 7.

4. (a) Anni nga klase na passanay i bendisionan ni Jehova? (b) Anni i ikonsidera tam taw nga artikulo?

⁴ Gukaban na nebase-Biblia nga panisiplina, moffunattam i ana tam onu i Bible study tam nga maddetan i bawtismo. I Uvovug na Dios, i primeru nga rimienta ta passanay, nga manguffun nittam ta “pangituddu [panisiplina, NW] ta matunung nga attolay.” Yatutta matudduan i ana tam onu i estudiante ta Biblia nga malippawa anna ‘parulattad-da ngamin i bili-bilin ni Jesus nittam.’ (2 Tim. 3:16; Mat. 28:19, 20) Bendisionan ni Jehova i kunnaw nga passanay, nga manguffun ta estudiante ira nga mangngua tu mas aru paga nga disipulo ni Cristo. (Bibbigan i Tito 2:11-14.) Ikonsidera tam ngana i tabbag ta tallu nga importante nga pakkiavu: (1) Kunnasi ipasingan na panisiplina na Dios i ayana nittam? (2) Anni i magigiammu tam turi ta dinisiplina na Dios gari? (3) Nu manisiplina ittam, kunnasi tam maparigan si Jehova anna i Anana?

5. Kunnasi ipasingan na disiplina ni Jehova i ayana nittam?

⁵ Megafu ta aya, itunung, tudduan, anna sanayan ni Jehova ittam tapenu makapattalupaddiattam ta ayana anna ta dalan mappange ta inango. (1 Juan 4:16) Arianna pasiranan onu insultuan ittam nga makegafu nga kuestionan i balor tam. (Prov. 12:18) Iddan ittam lallagu ni Jehova tu dignidad, anna mangurug yayya ta kinapia na futu tam anna irespetona i lallaguretam. Imammatammu kari tu kunnatun i disiplina na Dios, maski nu maggafu yatun ta Uvovugna, nebase-Biblia ira nga publikasion, Cristiano nga magana, onu ta elder ira ta kongregasion? Wan, danuri elder nga masippo anna meddu nga manunung ta “pattagaruli” nga ariattam ammu nga nakua tam ay refleksion na aya ni Jehova nittam.​—Gal. 6:1.

6. Nu egga i kavulu tu restriksion na disiplina, kunnasi mepasingan natun i aya na Dios?

⁶ Ngem, nu mittan, ari laman tu nelagum ta disiplina i basta pangiyawa ta tabarang onu pangivuya ta nakkamalian. Nu mas madammo i liwa, puede nga malsa i pribilehio ira ta kongregasion. Maski paga nu kunnatun, pangipasingan lagapa yatun tu aya na Dios nittam. Angngariganna, i kalsa ta pribilehio ay makoffun ta tadday tapenu malippawana nu ngatta importante nga mas maffokus ta personal nga paggigiammu tu Biblia, monag nga pannono, anna pakimallo. Mapatuyag natun i espiritualidadna. (Sal. 19:7) Egga lagapa tiempo nga metoli i pribilehio ira. Maski i paddisfellowship ay pangipasingan tu aya ni Jehova, megafu ta maprotektan i kongregasion ta marake ira nga influwensia. (1 Cor. 5:6, 7, 11) Megafu gapa ta kanayun nga patas i disiplina na Dios, mepatalatto ta nadisfellow i kinaserioso na liwana anna mapaguyu yayya nga mabbabawi.​—King. 3:19.

7. Sinni si Sebna, anna anni i marake nga ugali nga nakultibana?

⁷ Tapenu malippawa tam i balor na disiplina, ikonsidera tam i dua nga indibidual nga dinisiplina ni Jehova: Si Sebna, nga nattolay ta tiempo ni Patul Hezekias, anna si Graham nga brother ta kaggawattam. Megafu ta si Sebna i “mayordomo” ta balay ni Hezekias, egga i dakal nga pakapangnguana. (Isa. 22:15) Ngem kaddaraddam, nappakatannang yayya anna inalegna i mismu nga gloriana. Nappapadday paga yayya tu mangini-ngina nga attanamman para ta baggina, anna nattakay yayya ta ‘maraya-rayaw nga karuahe’!​—Isa. 22:16-18.

8. Kunnasi dinisiplina ni Jehova si Sebna, anna kunnasi tam nammuan nga posible nga nabbenefisio yayya ta kadisiplinana?

⁸ Megafu ta nappursigi si Sebna para ta makasarili nga gloria, pinapanaw yayya na Dios ta posisionna anna nitalina si Eliakim. (Isa. 22:19-21) Nesimmu yaw nga panguli turi ta pinlano ni Patul Senakerib na Asiria nga atakeyan i Jerusalem. Tapus, naddog yatun nga patul tu atannang ira nga ofisial ta Jerusalem, kavulu i dakal nga armada, tapenu pakkafian i nono na Judio ira anna ananassingan si Hezekias tapenu sumuku. (2 Pat. 18:17-25) Nedog si Eliakim nga makibbida ta ofisiales, ngem ari yayya nga magitetadday. Egga i dua nga kavuluna, si Sebna i tadday tatun, nga masserbi ngana tu sekretario. Kayà kari kagian naw nga ari nallussaw si Sebna anna ari nattaki i nonona, nu ari, mapakalinnona lallagu nga inaksepta i mas alinno nga posision? Nu kunnatun, anni i magigiammu tam taw nga rekord? Ikonsidera tam i tallu.

9-11. (a) Anni ira nga importante nga leksion i magigiammu tam ta ekspiriensa ni Sebna? (b) Kunnasi ka napagaram na pinattratu ni Jehova kani Sebna?

⁹ Ollu, nawawan ni Sebna i posisionna. Pakurugan na nesimmu sa nga “i pappakatannang ay mappollu ta kadaral, anna i palagopog nga espiritu ay mappollu ta kesiddukal.” (Prov. 16:18) Nu egga i pribilehiom ta kongregasion, baka nonopan na tanakuan nga importante ittam, ngem mattalupaddiakka kari nga minappakalinno? Iyawa mu kari i dayaw kani Jehova ta anni laman nga abilidad onu ta maski anni nga netuppal mu? (1 Cor. 4:7) Nitura ni apostol Pablo: “Kiddawak-ku ta kataggi-tadday nikamu: arian nu nga ikwenta i baggi nu tu mas atannang anne ta mepangngo. Ngem mappakalinno kamu lallagu ta appana-panono.”​—Roma 12:3.

¹⁰ Mekadua, i madammo nga panisiplina ni Jehova kani Sebna ay mangipasingan nga puede paga yayya nga manguli. (Prov. 3:11, 12) Talaga makakkasta nga leksion yatun turi ira ta nawawan i pribilehioda  ta kongregasion! Imbes nga mapporay anna mattaki i nono, ibala-balayudda nakuan i masserbi ta Dios adde ta awayyada ta nanguli nga situasiodda, anna imammatan nga ebidensia na aya ni Jehova i disiplina. Daddamman, ari ittam ikonsidera na Yama tam nga awan tu iddanamana nu mappakalinno ittam sa. (Bibbigan i 1 Pedro 5:6, 7.) Moldeyan ittam na Dios gukaban na meddu nga disiplina, yatutta malapo ittam nakuan nga mamolde na limi-limana.

¹¹ Mekatallu, iddan tu leksion na pinattratu ni Jehova kani Sebna danuri autorisadu nga manisiplina, gittana magana anna elder ira. Anni i leksion? Maski mepasingan i pallussaw ni Jehova ta liwa, mepasingan gapa tatun i pangikavurunna ta tadday nga nakaliwa. Nu tadday ka nga magana onu mangirollu nga mangiyawa tu disiplina, parigammu kari si Jehova, nga ikalussaw i kamali ngem innan i kapianan ta ana mu onu ta kapangngurug mu?​—Jud. 22, 23.

12-14. (a) Anni i reaksion na karuan ta disiplina? (b) Kunnasi nakoffun i Uvovug na Dios ta tadday nga brother tapenu ulianna i ugalina, anna anni i resultana?

¹² Kaddaraddam, kabalin nga nadisiplina i karuan, sobra lagapa ira nga natakitan yatutta minarayyu ira ta Dios anna ta kongregasion. (Heb. 3:12, 13) Ngem kayà kari kagian natun nga awan ngana tu makoffun nira? Ari. Ikonsidera si Graham, nga nadisfellow ngem nakatoli gabbalaman, tapus nagimmang yayya nga maki-study anna mallayyagayya. Ta pappasa na piga ragun, nikiddona ta kofunna nga elder nga mab-Bible study ira.

¹³ Kinagi na elder: “Egga i problema ni Graham ta pappakatannang. Kritikanna i elder ira nga nangasikasu ta paddisfellowship sa. Yatutta ta nappasa ira nga pagistudy, naguvovugammi i teksto ira meyannung ta pappakatannang anna i efektona ira. Manawag ngana nga masingan ni Graham i baggina ta ispehu na Uvovug na Dios, ngem arianna nikayà i nasinganna! Kakkasta i efektona! Turi ta nalippawana nga vinuling yayya na ‘troso’ na pappakatannang anna i pabbalin tu minangngivuya i mismu nga problema, insigida yayya nanguli. Regular ngana uli yayya nga magatende tu study, malappo nga maggigiammu tu Uvovug na Dios, anna niyugalina nga makimallo kada aggaw. Inalawana gapa i espiritual ira nga responsibilidad kwenta ulu na familia, nga talaga namagayayya ta atawa anna ánana.”​—Luc. 6:41, 42; Sant. 1:23-25.

¹⁴ Kunna paga na elder: “Tadday aggaw, egga i nisikka ni Graham niakan nga talaga nakatukkal ta futù. ‘Nabayag ku ngana ammu i kinakurug,’ kunna, ‘anna nasserbi ngà paga nga payunir. Ngem sangaw ku laman talaga makagi nga iddukakku si Jehova.’ Ari nabbayag, neyasayn yayya nga mangipasa tu mikropono ta Kingdom Hall​—pribilehio nga talaga inappresiana. Sinudduannà na ehemplona nga nu mappakalinno i tadday ta arubang na Dios gukaban na pangaksepta ta disiplina, mevuvvu i bendision!”

15. Nu ikayà tam nga mepafutu i disiplina nittam, anni nakuan i kuattam?

¹⁵ Tapenu mabbalin tu mapia nga mestru anna mestra, mawag tam labbi nga mabbalin tu mapia nga estudiante. (1 Tim. 4:15, 16) Nu kunnatun gafu, danuri niddan na Dios tu autoridad nga manisiplina ay mawag nga kanayun nga napafutuan nga mappasakup ta giya ni Jehova. Mala danatun i respeto na wawwaragi anna mas egga i lallagureda nga sanayan onu tunungan i tanakuan. Innattam i ehemplo ni Jesus.

16. Anni ira nga leksion meyannung ta mepangngo nga disiplina anna efektibo nga panuddu i magigiammu tam kani Jesus?

¹⁶ Kanayun nga tuttulan ni Jesus i Yamana,  maski nu mariga yatun nga kuan. (Mat. 26:39) Iyawana i dayaw ta Yamana ta ituttuddu anna siribna. (Juan 5:19, 30) Megafu ta kinapakalinno anna pamarulo ni Jesus aru nga totolay nga mapia giffutuadda i minaranni sa anna nabbalin yayya nga minangngikabbi anna minakkikofun nga mestru. (Bibbigan i Mateo 4:22.) Pinasikan na masippo ira nga uvovugna danuri nakkafi i nonoda anna nadismaya. (Mat. 12:20) Maski nu napurueban i appasensia ni Jesus, masippo anna meddu yayya. Manawag yaw turi ta kinorektana i apostolesna turi nangipasingan ira tu pappakatannang, anna ambisioso nga espiritu.​—Mar. 9:33-37; Luc. 22:24-27.

17. Anni ira nga makasta nga kualidad i makoffun ta elder ira tapenu mabbalin tu efektibo nga pastor ta karneru na Dios?

¹⁷ Ngamin danuri autorisadu nga mangiyawa tu nebase-Biblia nga disiplina ay masirib nu parigadda i ehemplo ni Cristo. Wan, ipasingadda i pakkaragada nga moldeyan ira na Dios anna na Anana nu kuadda yatun. Nitura ni apostol Pedro: “Mappastor ta karneru ira na Dios, tu tangngallan nu danaw nga nekargo nikamu. Tangngallan nu ira, ari ta nafeffersa nga nono, nu ari ta mapia nga agguru-uray ta yaw i ikaya na Dios. Kuan nu i annungan nu, ari tu megafu ta mataddanak-kamu, nu ari megafu ta pangaya nu nga masserbi. Arian nu nga kuan i baggi nu tu pakiyafuan na totolay ira nga tangngallan nu, ngem sikamu i mepangngo nga apparigad-da.” (1 Ped. 5:2-4) Danuri elder nga sigga-pagayayya nga makimoray ta Dios anna ta Cristo, i ulu na kongregasion, ay mabbenefisio gapa ira kunne na gapa danuri tangngalladda.​—Isa. 32:1, 2, 17, 18.

18. (a) Anni i ikiddaw ni Jehova ta mappagana? (b) Kunnasi uffunan na Dios i mappagana tapenu tuppaladda i responsibilidadda?

¹⁸ Meyaplika gapa yatun nga prinsipio ta familia. Mekagi ta ulu na familia: “Arian nu nga pallussawan i ána nu ta pappoporay nga ari nga mepangngo; padakallan nu lallagu ira ta tuddu anna tabarang nga meyannung ta Yafu.” (Efe. 6:4) Kunnasi kaserioso yaw nga gannug? Kunna Proverbio 19:18: “Disiplinammu i ana mu durante nga egga paga iddanama, tapenu ariammu mabbalin tu responsable ta patena.” Wan, panabbagan ni Jehova i magana ira nu ariadda meyawa i kawagan nga disiplina ta anada! (1 Sam. 3:12-14) Ngem, iddan ni Jehova danuri mappagana tu sirib anna sikan nu sigga-pakalinno ira nga mappoffun ta pakimallo anna mappegiya ta Uvovug anna masanto nga espirituna.​—Bibbigan i Santiago 1:5.

19, 20. (a) Anni ira i bendision ta pangaksepta ta disiplina na Dios? (b) Anni i ikonsidera tam ta tumunug nga artikulo?

¹⁹ Mariga taggi-taraddayan i ngamin nga bendision megafu ta pangaksepta ta panisiplina nga naggafu ta Dios anna ta pamarig kani Jehova anna kani Jesus nu manisiplina tu tanakuan. Siguradu nga mabbalin tu lugar na imammo i familia anna i kongregasion. Matageno gapa na kataggi-tadday i aya, importansia, anna seguridad​—indikasion na mesimmu paga ta mappange. (Sal. 72:7) Wan, ari tu passossobra nga kagian nga uffunan ittam na disiplina ni Jehova nu kunnasi mattolay noka nga memammo anna egga i pattaradday kwenta familia ta panangngalna bilang yama tam. (Bibbigan i Isaias 11:9.) Nu kunnatuttam imammatan i disiplina nga naggafu ta Dios, mas maappresia tam yaw nga makakkasta nga ebidensia na awan tu kagittana nga aya na Dios nittam.

²⁰ Ta tumunug nga artikulo, gigiammuattam paga i aspeto ira na disiplina ta unag na familia anna ta kongregasion. Ikonsidera tam gapa i panisiplina ta baggi kunne na gapa i gannug nga mas marake anne ta temporario nga taki nga irattal na disiplina.