1. ¿Tlenon kijtoua Biblia itech titemelajkatlalis?

¿ITECH tlenon titlanemilia ijkuak tijkaki tlajtojli titemelajkatlalis? Kanaj nimantsin tiknemilia ika kijtosneki titetlajtlakolmakas, san ika, xsan yejon kijtosneki. Miyekpa Biblia kuajli tlajtoua itech titemelajkatlalis, niman ijkuak itech tlajtoua iuan kiteneua tlaixmatilistli, tlamachilistli, tlasojtlalistli niman nemilistli (Prov. 1:2-7; 4:11-13). Ken toTajtsin techmelajkatlalia techititia ika yejua techtlasojtla niman ika kineki matinemikan nochipa (Heb. 12:6, TNM). Melauak, ijkuak yejua temelajkatlalia noijki uelis itech itlaj tetlajtlakolmakas, san ika, xkeman chikauak kichiua nion xika tetlajyouiltia. Niman xsan yejon, itech tlajtojli titemelajkatlalis ompa kalaki tlajtojli titemachtis, ijkon ken se tajtli kimachtia ikoneuj akin kitlasojtla.

2, 3. ¿Tlenon ome tlemach kalaki ijkuak titemelajkatlalis? (Xkita tlaixkopinaltin kampa peua tlen tomachtijtokej).

² Matikitakan se neskayotl. Se konetl akin itoka Carlos nauiltijtika kalijtik. Inan kijlia: “Carlitos, itikmatstika ika xkipiya timauiltis ika pelota nikan kalijtik pampa uelis itlaj tiktlapanas”. San ika, yejua xkitlakamati inan niman xkikajkaua ika nauiltia. Kuakon, ipelota kimailia se kontli niman kitlapana. ¿Kenon kimelajkatlalis inan? Kimachtis niman kichiuas makimachili ika xkuajli tlen okichiuj. Pampa kineki kimachtis, inan kitomilis tleka xkuajli tlen  okichiuj. Kineki ika ikoneuj makasikamati ika kintlakamatis intajuan kipaleuiya, niman ika tlen kitlajtlaniliaj melak noneki niman uelis kichiuas. Pampa kineki ika ikoneuj maueli itlaj itech yejuin, yejua kinemilia ika noijki kuajli yes kikuilis ipelota seki tonaltin niman ijkon ikoneuj makimachili ika xkuajli tlen okichiuj. Maski yejuin Carlos xkuelitas, kasikamatis ika ijkuak se xtetlakamati kixnamiki tlen xkuajli.

³ Akin tikchiuaj ken Cristo tinemij ipan “ichan Dios” (1 Tim. 3:15). Ika yejon, tiktlakaitaj ika Jehová kinamiki makijto tlenon noneki tikchiuaskej niman matechmelajkatlali ika tlasojtlalistli ijkuak xtiktlakamatij. Noijki, tikixnamikiskej tlen xkuajli ipampa tlen tikchiuaj niman tikseliskej ken techmelajkatlalis techilnamiktis ika melak noneki matiktlakamatikan toTaj Jehová (Gál. 6:7). Yejua melak techtlasojtla niman xkineki matitlajyouikan (1 Ped. 5:6, 7).

4. a) ¿Katlejua tlamachtijli kiteochiua Jehová? b) ¿Tlenon tikitaskej ipan yejuin tlamachtijli?

⁴ Ijkuak titemelajkatlaliaj ika itlajtolyekanalisuan Biblia, uelis tikinpaleuiskej tokoneuan niman akin nomachtijtokej itech Biblia manochiuakan inomachtijkauan Cristo. ITlajtol toTajtsin yejua tlen melak tiktekitiltiaj ijkuak titemachtiaj, niman techpaleuiya matitemelajkatlalikan ika melajkayotl. Ika yejuin, uelis tikinpaleuiskej tokoneuan noso tonomachtijkauan itech Biblia makasikamatikan niman makitlakamatikan nochi tlen Jesús otlanauati (2 Tim. 3:16; Mat. 28:19, 20, TNM). Jehová kiteochiua yejuin tlamachtijli pampa yejuin kinpaleuiya nomachtijkej ika yejuamej noijki makinmachtikan oksekimej (xpoua Tito 2:11, 12). Aman, matikitakan kenon nonankiliaj yeyi tlajtoltilistin tlen ueyi kijtosnekij: 1) ¿Tleka tikijtouaj ika ken techmelajkatlalia toTajtsin techititia ika techtlasojtla? 2) ¿Tlenon tiuelij itech inneskayo tlaltikpakchanejkej akin toTajtsin okinmelajkatlali? 3) ¿Kenon uelis tikixkopinaskej Jehová niman Jesús ijkuak titemelajkatlaliskej?

5. ¿Kenon kiteititia Jehová ika techtlasojtla itech ken techmelajkatlalia?

⁵ Jehová techyektlalia niman techmachtia pampa techtlasojtla. Kineki iuan matouikakan niman nochipa matinemikan (1 Juan 4:16). Xkeman techpijpinaujtia nion xkichiua matikmachilikan ika xitlaj ika titepaleuiyaj (Prov. 12:18). Jehová techtlakaita, pampa san kitejtemoua kitas tokualneskayouan niman kitlakaita ika tejuamej uelis tiktlapejpeniskej tlen tikchiuaskej. ¿Ijkin tikita tejua ken techmelajkatlalia Jehová itechkopa Biblia, toamatlajkuiloluan, tajtin niman tlayekankej ipan tlanechikojli? Ijkuak nion xtikmatij kenon otikchiujkej “itlaj tlajtlakojli”, tlayekankej kiyejyekouaj techyektlaliskej ika tlasojtlalistli niman ijyouilistli. Ijkuak ijkon kichiuaj, yejuamej kiteititijtokej itlasojtlalis Jehová (Gál. 6:1).

6. Maski uelis tikpoloskej seki tekitl ipan ikalpan toTajtsin ijkuak techmelajkatlaliaj, ¿tleka uelis tikijtoskej ika yejuin kiteititia ika toTajtsin techtlasojtla?

⁶ Kemantika, tikmelajkatlalis yakaj xsan kijtosnekis tiknonotsas. Tla se tlaltikpakchane okichiuj se ueyi tlajtlakojli, kanaj uelis kipolos seki tekitl ipan ikalpan toTajtsin. San ika, maski ijkon panos, ijkuak kimelajkatlaliaj kititiaj ika Jehová kitlasojtla. Kipolos tekitl ipan tlanechikojli uelis kipaleuis akin otlajtlako makita ika melak noneki makixelo itiempo niman ijkon iselti nomachtis, tlanemilis niman kichiuas teoyotl. Nochi yejuin kipaleuis machikaui ken nouika iuan Jehová (Sal. 19:7). Sakin, kanaj oksejpa kimakaskej tekitl ipan ikalpan toTajtsin. Niman ijkuak yakaj kikixtiaj itech tlanechikojli ijkuakon noijki noteititia itlasojtlalis Jehová, pampa notlajpiya tlanechikojli itech tlen uelis kijtlakos (1 Cor. 5:6, 7, 11). Niman pampa ken  techmelajkatlalia Jehová nochipa melajki, ijkuak yakaj kikixtiaj, yejon uelis kipaleuis makasikamati kenon ueyi otlajtlako niman kiyolmapeuas manoyolkuepa (Hech. 3:19).

7. a) ¿Akinon katka Sebná? b) ¿Tlenon xkuajli opeuj kichiua Sebná?

⁷ Tikitaskej kenon melak ueyi kijtosneki matechmelajkatlalikan ijkuak tomachtiskej itech omemej tlaltikpakchanejkej akin Jehová okinmelajkatlali: Sebná, akin onen ipan itonaluan Ezequías, niman Graham, se tokniuj itech yejuin tonaltin. Matitlajtokan kachtopa itech Sebná. Nesi ika yejua kitlajpiaya ichan Ezequías, kuakon ueyixtoya (Is. 22:15). Teajman ika opeuj noueyimati niman opeuj kitejtemoua sa no yejua noueyilis. Hasta onochijchiuili kampa kitokaskej tlen melak patioj katka niman kistinemiya ipan temojkatlachialtijkej carros tlen caballos kintilanayaj (Is. 22:16-18).

8. ¿Kenon Jehová okimelajkatlali Sebná, niman kenon otlamito?

⁸ Pampa Sebná san yejua noueyiliaya, toTajtsin okikuili itekiyo niman okimakak Eliaquim (Is. 22:19-21). Yejuin opanok ijkuak tekiuaj asirio Senaquerib kinemilijtoya konixnamikis Jerusalén. Sakin, Senaquerib okomintitlan uejueyixtokej tlakamej akin itech tekitiyaj niman noijki miyekej tlaixnamijkej niman ijkon kinmojtis judíos niman kichiuas ika tekiuaj Ezequías manotemaka (2 Rey. 18:17-25). Ezequías okititlan Eliaquim niman omemej tlakamej makinnamikitij yejon uejueyixtokej tlakamej asirios. Se akin okititlanka katka Sebná, akin aman tekititoya ken isecretario tekiuaj. Yejuin uelis techititis ika Sebná xokikauilijka ika ajmantli nion itlauel makiyekanakan niman noijki ika yonoyolyemanilijka, pampa okiselijka se tekitl tlen xijkon ueyixtoya ken okse tlen kipiaya. ¿Tlenon tiuelij itech yejuin? Matikitakan yeyi.

9-11. a) ¿Tlenon tiuelij itech tlen ipan onochiuj Sebná? b) ¿Kenon timomachilia tejua ijkuak titlanemilia itech ken Jehová okipaleui Sebná?

⁹ Kachtopa, Sebná okipolo itekiyo. Yejuin techilnamiktia ika akin noueyimati kixnamikis tlen xkuajli niman akin noueyilia uetsis (Prov. 16:18). Kanaj tejua tikpiya tekitl ipan tlanechikojli niman kanaj oksekimej kinemiliaj ika tiueyixtika. Tla ijkon mopan nochiua, ¿timokojtilis nochipa tiyolyemanki yes? ¿Tiktlasojkamachilis Jehová ipampa tlen tiueli noso tlen youel yotikchiuj? (1 Cor. 4:7). Pablo okijkuilo: “Nemechijlia nochimej nemejuamej, ma ka sa no nemejuamej xnemilikan ika más nenuejueyixtokej hasta kampa xok kitocaroua. Yej ikan nemotlamachilis xnemilikan melajki ken noneki nennemiskej” (Rom. 12:3).

¹⁰ Ika ome, ken chikauak okimelajkatlalijkej Sebná kanaj techititia ika Jehová  kineltokaya ika ueliskia nopatlas (Prov. 3:11, 12). Yejuin se kuajli tlamachtijli tlen kinpaleuiya akin yokipolojkej se tekitl ipan tlanechikojli. Xkinamikiskia makualanikan noso nochipa makilnamiktokan, yejuamej nonekiskia makitekichiuilikan toTajtsin hasta kampa ueliskej niman makitakan ika okinmelajkatlalijkej pampa Jehová kintlasojtla. Matikilnamikikan ika toTaj Jehová techteochiuas tla tiyolyemankej (xpoua 1 Pedro 5:6, 7). Tiknekij tiyeskej ken sokitl tlen yemanki ipan ima Jehová niman tokauiliskej ika matechmelajkatlali ika tlasojtlalistli.

¹¹ Ika yeyi, ken Jehová okipaleui Sebná kinmachtia itlaj akin kipiyaj tekitl ika temelajkatlaliskej, ken akin tajtin niman tlayekankej ipan tlanechikojli. Maski ken temelajkatlalia Jehová kiteititia ika yejua kitlauelita tlajtlakojli, noijki kiteititia ika ok kintlasojtla akin otlajtlakojkej. Jehová noijki kita tlen kuajli intech tlaltikpakchanejkej. Tla noneki yakaj tikmelajkatlalis, ¿tikchiuas ken Jehová kichiua? (Jud. 22, 23).

12-14. a) ¿Tlenon kichiuaj sekimej ijkuak Jehová kinmelajkatlalia? b) ¿Kenon Biblia okipaleui se tokniuj makipatla inemilis, niman kenon otlamito?

¹² Teajman ika sekimej melak noyolkokouaj ijkuak kinmelajkatlalia Jehová niman hasta kikauaj, niman kitlalkauiyaj tlanechikojli (Heb. 3:12, 13). ¿Uelis tikinpaleuiskej akin ijkon kichiuaj? Tiknankiliskej yejuin ika se neskayotl. Matikitakan tlen ipan onochiuj Graham. Yejua okikixtijkej itech tlanechikojli, sakin oksejpa okiselijkej, san ika, opeuj kikajkaua ika tenojnotsa. Seki xiujtin sakin, okijli se tlayekanketl, akin opeuj iuan nouika, ika kinekiya makimachti Biblia.

¹³ Yejon tlayekanketl kilnamiki: “Graham noueyimatiya, yejon tlen kijtlakotoya. Xkuajli tlajtouaya intech tokniuan tlayekankej akin okijtokej ika nonekiya kisas itech tlanechikojli. Ika yejon, opeuj tomachtiaj tlen Biblia kijtoua itech ueyimatilistli niman kenon teijtlakoua. Graham opeuj noita itech tlen Biblia kijtoua, kentla ipan se teskatl yeskia, niman xokuelitak tlen okitak. Tlen okichiuj, melak temojkatlachialti. Okasikamat ika ueyimatilistli ken se kojtli tlen yokixtlapachojka, niman pampa tetejteneuaya yejon tlen yemelak kijtlakotoya. Nimantsin opeuj nopatla. Opeuj nochipa yauj ipan tlanechikoltin, ika iyojlo opeuj nomachtia Biblia niman kichiuaya teoyotl mojmostla. Noijki okichiuj tlen toTajtsin kintlajtlanilia makichiuakan akin kiyekanaj ichanejkauan, niman yejuin melak okinpakti isiuauj niman iichpokauan” (Luc. 6:41, 42; Sant. 1:23-25).

¹⁴ Tlayekanketl aman techijlia: “Se tonajli, Graham onechijli itlaj tlen oajsik ipan noyojlo: ‘Youejkauj ika nikixmati tlen melauak niman hasta yoninochiujka precursor. San ika, hasta aman ueli nikijtoua ika nochi noyojlo ika niktlasojtla Jehová’. Nion xouejkauj, ipan tlanechikojli okitlajtlanilijkej matlapaleui ipan micrófonos, niman yejua melak okitlasojkaitak yejuin tekitl. Ineskayo nechititia ika ijkuak yakaj noyolyemanilia ixpan Jehová niman kiselia ken kimelajkatlalia, kiselia miyek tlateochiualistin”.

15. ¿Tlenon noneki tikchiuaskej niman ijkon oksekimej makiselikan ken tikinmelajkatlaliaj?

¹⁵ Tla tiknekij kuajli titemachtiskej, kachtopa noneki tejuamej tokauiliskej matechmachtikan (1 Tim. 4:15, 16). Ijkon tej, tla Jehová niman Jesús mitstekitiltiaj niman ijkon xtemelajkatlali, noneki tiyolyemanki yes niman tijkauilis Jehová mamitsyekana. Tla oksekimej kitaj ika tejua tiyolyemanki, mitstlakaitaskej niman xouijtika mitskakiskej ijkuak tikinnonotsas. Matikitakan neskayotl tlen Jesús otechkauili.

16. ¿Tlenon uelis tomachtiskej itech ken Jesús temachtiaya niman temelajkatlaliaya?

¹⁶ Jesús okitlakamat iTaj ipan nochi, maski ijkuak melak ouijtika katka (Mat. 26:39).  Niman nochipa okijto ika itlamachilis niman itlamachtiluan ualeuayaj itech toTajtsin (Juan 5:19, 30). Pampa yejua yolyemanki katka niman tetlakamatiya, onochiuj se temachtijketl akin yolkuajli niman teiknelia, niman tlaltikpakchanejkej akin kuajli inyojlo kinekiyaj kinisiuiskej (xpoua Mateo 11:29). Itlajtoluan kinyolseuiaya akin noyolajmanayaj niman akin nomachiliayaj xkojtikej ken se akatl tlen yopostek noso se tlauijli tlen iseujtika (Mat. 12:20, TNM). Maski ijkuak itlatitlankauan san itech tlanemiliayaj niman kinekiyaj uejueyixtoskiaj, Jesús xonosiaujkauj. Ka, yejua okinyektlali ika tlasojtlalistli (Mar. 9:33-37; Luc. 22:24-27).

17. ¿Tlenon noneki kichiuaskej tlayekankej niman ijkon kuajli kitlajpiyaskej tlanechikojli?

¹⁷ Tlayekankej noneki kixkopinaskej Jesús ijkuak temelajkatlaliskej ika Biblia. Tla ijkon kichiuaj, kiteititiaj ika kinekij ika Jehová niman Jesús makinyekanakan. Pedro, itlatitlankauj Cristo, okijkuilo: “Xkintlajpiakan ikoneuan Dios yejuan yejua omechmaktilij para nenkincuidaroskej. Xkimpiakan ken se tlajpixki kimpia iborreguitos. Ma ka xchiuakan pampa tla yakaj mechchiualtia, yej ikan kuajli nemoyojlo ken Dios kineki. Ma ka xchiuakan pampa nenkinekij nenkitlaniskej tomin, yej san pampa nenkinekij nentekitiskej para Dios. Ma ka xkimpiakan ken nemotlaktiuan on yejuan Dios omechmaktilij para nenkintlajpiaskej, yej xkinyekanakan ikan kuajli ejemplo” (1 Ped. 5:2-4). Kuakon, ijkuak tlayekankej ika inyojlo kitlakamatij Jehová niman Cristo, akin tlayekanketl itech tlanechikojli, kuajli onkisaj yejuamej niman noijki akin kintlajpiyaj (Is. 32:1, 2, 17, 18).

18. a) ¿Tlenon kinnauatia Jehová makichiuakan tajtin? b) ¿Kenon Jehová kinpaleuiya tajtin niman ijkon makichiuakan tlen yokinnauati?

¹⁸ Yejuin tlajtolyekanalistin noijki noneki matikchiuakan iuan tochanejkauan. Jehová kinnauatia akin kiyekanaj inchanejkauan: “Ma ka xkinkuajkualanikan nemokoneuan, yej kuajli xkimiskaltikan ipan on melajkatlalilistli de innemilis niman ikan machtilistli itech  ika on toTeko” (Efes. 6:4). Yejuin itlaj tlen melak ueyi kijtosneki. Proverbios 19:18 techititia ika tajtin uelis kipiyaskej tlajtlakojli tla mikij inkoneuan pampa xkinmelajkatlaliaj. Jehová kintlajtlakolmakas yejon tajtin (1 Sam. 3:12-14). San ika, tajtin akin kitlajtlaniliaj Jehová makinpaleui niman noyekanaj ika iTlajtol niman iespíritu santo, yejua kinmaka tlamachilistli niman kojtilistli (xpoua Santiago 1:5).

19, 20. a) ¿Tlen tlateochiualistin tikpiyaj ijkuak tikseliaj matechmelajkatlali Jehová? b) ¿Tlenon tikitaskej ipan okse tlamachtijli?

¹⁹ Ijkuak tikseliaj ken techmelajkatlalia Jehová niman titemelajkatlaliaj ken yejua niman Jesús kichiuaj, tikseliaj miyek tlateochiualistin. Tikpiyaj yolseuilistli iuan tochanejkauan niman ipan tlanechikojli. Tinochimej tikmachiliaj ika techtlasojtlaj, techpatiokaitaj niman xtomojtiaj, yejuin san seki tlateochiualistin tlen tikpiyaskej tlayekapan (Sal. 72:7). Kuakon, uelis tikijtoskej ika ken techmelajkatlalia Jehová techmachtia kenon tinemiskej san sekan ika yolseuilistli ken se familia tlen yejua kitlajpiya (xpoua Isaías 11:9). * Tla xkeman tikilkauaj yejuin, uelis tikitaskej ken techmelajkatlalia Jehová ijkon ken kinamiki: ika Jehová techmelajkatlalia pampa techtlasojtla.

²⁰ Ipan okse tlamachtijli, tiueliskej okseki itech kenon temelajkatlalilo ipan tlanechikojli niman tochan. Noijki tikitaskej kenon sa no tejuamej tomelajkatlaliskej niman kenon tiktlalkauiskej itlaj tlen melak tekoko xijkon ken ijkuak mitsmelajkatlaliskej.