1. Kon Beibel ta papia hopi bes di disiplina?

KIKO ta bin na bo mente ora bo tende e palabra “disiplina”? Kisas mesora bo ta pensa riba kastigu, pero disiplina ta enserá muchu mas ku esei. Hopi bes, Beibel ta papia di disiplina na un manera positivo, i algun biaha, e ta menshoná disiplina, òf instrukshon, huntu ku konosementu, sabiduria, amor i bida. (Pro. 1:2-7; 4:11-13) Esei ta asina, pasobra disiplina ku ta bini di Dios ta duna prueba ku Dios ta stima nos i ku e ke pa nos biba pa semper. (Heb. 12:6) Aunke tin biaha su disiplina por enserá kastigu, nunka esaki ta di mas ni kruel. De echo, e nifikashon di “disiplina” ta prinsipalmente relashoná ku edukashon, manera esun ku un mayor ta duna su yu ku e ta stima.

2, 3. Kiko disiplina ta enserá? (Wak e promé plachi.)

² Pensa riba e ehèmpel akí: Un mucha hòmber chikitu ku yama Johnny ta hunga bala den kas. Su mama ta bis’é: “Johnny, bo sa ku bo no tin mag di hunga bala den kas pasobra bo por kibra kos aki den.” Pero Johnny no ta wòri ku loke su mama a bis’é i ta sigui hunga bala. Anto sin ku e por yuda, e ta kibra un vas. Kon su mama lo disiplin’é? Kisas su mama  lo papia kuné i dun’é sierto kastigu, òf straf. Pa siña Johnny, su mama ta splik’é dikon loke el a hasi ta malu. E mama ke pa Johnny komprondé dikon ta sabí pa obedesé su mayornan i ku e reglanan ku nan a pone ta nesesario i rasonabel. I despues, pa yuda Johnny siña su lès, kisas e mama ta kita e bala for di Johnny pa un tempu. Esei por yuda Johnny komprondé i kòrda ku desobedensia na su mayornan tin konsekuensia.

³ Komo miembro di e kongregashon kristian, nos ta forma parti di e kas di Dios. (1 Tim. 3:15) P’esei, Yehova tin e derecho di pone norma i di disipliná nos ku amor ora nos desobedes’é. Ademas, su disiplina i kualke konsekuensia desagradabel di nos akshonnan ta kòrda nos ku ta importante pa obedesé nos Tata selestial. (Gal. 6:7) Dios ta stima nos i e no ke pa nos sufri.—1 Ped. 5:6, 7.

4. (a) Ki manera di siña nos yu òf studiante Yehova ta bendishoná? (b) Kiko nos lo trata den e artíkulo akí?

⁴ Ora nos ta duna nos yu òf studiante di Beibel disiplina basá riba Beibel, nos por yuda nan bira disipel di Kristu. E Palabra di Dios, e hèrmènt prinsipal ku nos ta usa pa siña nos yu òf studiante di Beibel, ta yuda nos “disipliná den hustisia.” Asina nos por yuda nan komprondé i ‘kumpli ku tur loke Hesus a manda nos.’ (2 Tim. 3:16; Mat. 28:19, 20) Yehova ta bendishoná e manera di siña akí, ku na su turno ta prepará studiantenan pa nan yuda otro hende bira disipel di Hesus. (Lesa Tito 2:11-14.) Awor, laga nos trata tres pregunta importante: (1) Dikon Dios su disiplina ta prueba di su amor pa nos? (2) Kiko nos por siña for di hende ku Dios a disipliná den pasado? (3)  Kon nos por imitá Yehova i Hesus ora di duna disiplina?

5. Den ki manera Dios su disiplina ta demostrá ku Dios ta stima nos?

⁵ Yehova ta korigí, siña i entrená nos pasobra e ta stima nos. E ke pa nos keda den su amor i biba pa semper. (1 Huan 4:16) Nunka e ta rebahá ni insultá nos i pone nos sinti ku nos no ta bal nada. (Pro. 12:18) Mas bien, Yehova ta enfoká riba nos bon kualidatnan i ta respetá nos boluntat liber. Abo ta sinti ku e manera ku Dios ta duna disiplina mediante Beibel, nos publikashonnan, mayornan kristian òf e ansianonan ta prueba di su amor pa nos? De echo, ora un ansiano ta purba di korigí nos na un manera suave i ku amor asta promé ku nos realisá ku nos a “dal un paso robes,” e ta imitá e amor ku Yehova tin pa nos.—Gal. 6:1.

6. Dikon disiplina ta prueba di Dios su amor asta ora un ruman pèrdè su privilegionan òf ser ekspulsá?

⁶ Sinembargo, tin biaha disiplina ta enserá mas ku konseho òf korekshon. Si un ruman kometé un piká serio, e por pèrdè sierto privilegionan den kongregashon. Asta e ora ei, e disiplina ei ta mustra nos ku Dios ta stima nos. Kon asina? Wèl, ora un ruman pèrdè su privilegionan, esei por yud’é komprondé, ku ta importante pa tuma mas tempu pa hasi estudio personal, meditá i hasi orashon. E kosnan akí lo yud’é fortalesé su relashon ku Yehova. (Sal. 19:7) Ku tempu, e por haña su privilegionan bèk. Asta ekspulshon ta un prueba di Yehova su amor pasobra e ta protehá e kongregashon di mal influensia. (1 Kor. 5:6, 7, 11) Komo Dios su disiplina semper ta hustu, e por yuda un hende ekspulsá komprondé kon  serio su piká ta i motiv’é pa arepentí.—Echo. 3:19.

7. Ken Sebna tabata, i ki mal kualidat el a desaroyá?

⁷ Pa nos por komprondé e importansia di disiplina, laga nos papia di dos hende ku Yehova a disipliná: Sebna, kende a biba den tempu di Rei Ezekías, i Graham, un ruman hòmber den nos tempu. Sebna tabata e mayordomo ku aparentemente tabata na “enkargo di e kas” di Rei Ezekías; p’esei, e tabatin hopi outoridat. (Isa. 22:15) Pero, lamentablemente el a bira orguyoso i a kuminsá buska gloria pa su mes. El a asta laga traha un tumba, òf graf, impreshonante pa su mes, i e tabata kore den “garoshinan luhoso.”—Isa. 22:16-18.

8. Kon Yehova a disipliná Sebna, i kiko tabata e resultado?

⁸ Komo ku Sebna a kuminsá buska gloria pa su mes, Dios a ‘rank’é bah’é for di su puesto’ i a laga Eliakim remplas’é. (Isa. 22:19-21) E kambio akí a tuma lugá ora ku Rei Senakerib di Asiria tabata purba di ataká Herúsalèm. Algun tempu despues, Senakerib a manda algun ofisial haltu i un ehérsito grandi Herúsalèm pa intimidá e hudiunan i pone Ezekías entregá. (2 Rei. 18:17-25) Ezekías a manda Eliakim bai papia ku e ofisialnan, pero Eliakim no tabata su so. Huntu kuné tabatin dos hòmber mas; un di nan tabata Sebna, kende awor tabata sekretario. Esaki ta mustra ku probablemente Sebna no a bira amargá ni a karga renkor, pero ku mas bien, humildemente el a aseptá un puesto ménos importante. Awor, ki lès nos por siña for di e relato akí? Laga nos analisá tres.

9-11. (a) Ki lèsnan importante nos por siña for di e relato di Sebna? (b) Kon bo ta sinti ora bo pensa riba e manera ku Yehova a trata ku Sebna?

⁹ Di promé, e echo ku Sebna a pèrdè su puesto ta kòrda nos ku “orguyo ta bin promé ku destrukshon, i un spiritu arogante promé ku kaida.” (Pro. 16:18) Si e responsabilidatnan ku bo tin den kongregashon ta pone otronan pensa ku bo ta importante, abo ta hasi esfuerso pa keda humilde? Bo ta duna onor na Yehova pa tur bo abilidat- i logronan? (1 Kor. 4:7) Apòstel Pablo a skirbi: “Mi ta bisa kada un di boso pa no pensa mas di su mes di loke ta nesesario; sino pensa di tal manera ku boso ta demostrá ku boso tin sano huisio.”—Rom. 12:3.

¹⁰ Di dos, podisé e echo ku Yehova a reprendé Sebna fuertemente ta mustra  ku Yehova a pensa ku Sebna por a kambia. (Pro. 3:11, 12) Ki un bunita lès esei ta pa rumannan ku pèrdè nan privilegio den kongregashon. En bes di rabia i karga renkor, ta bon pa e rumannan akí sigui sirbi Yehova lo mihó ku nan por den nan situashon nobo i mira e disiplina ku nan a risibí komo prueba di Yehova su amor. Kòrda, si nos ta humilde, nos Tata lo rekompensá nos. (Lesa 1 Pedro 5:6, 7.) P’esei, laga nos ta suave manera klei pa Yehova por moldia nos mediante su disiplina duná ku amor.

¹¹ Di tres, e manera ku Yehova a trata ku Sebna ta siña e rumannan ku tin outoridat pa duna disiplina, manera mayornan i ansianonan den kongregashon un lès importante. Ki lès esaki ta? Wèl, aunke e disiplina di Yehova ta mustra ku Yehova ta odia piká, e ta mustra tambe ku Yehova ta stima e persona ku a peka. Sí, Yehova ta enfoká riba e bon kualidatnan di hende. Si bo ta un mayor òf un ansiano, bo ta imitá Yehova ora di duna disiplina?—Hudas 22, 23.

12-14. (a) Kon algun ruman ta reakshoná ora Yehova disipliná nan? (b) Kon Beibel a yuda un ruman hòmber kambia su aktitut, i kiko tabata e resultado?

¹² Lamentablemente, algun hende ku a ser disipliná a sinti nan asina di hùrt ku nan a alehá for di Yehova i for di su kongregashon. (Heb. 3:12, 13) Esei ta nifiká ku un hende asina no por ser yudá mas? Pa kontestá e pregunta ei, laga nos wak e ehèmpel di Graham. El a ser ekspulsá i ku tempu a ser restorá, pero despues el a bira inaktivo. Despues di algun aña, el a pidi un ansiano ku tabata su amigu pa studia Beibel kuné.

¹³ E ansiano a konta: “Graham tabatin problema ku orguyo. E tabata kritiká e ansianonan ku a trata su kaso ora el a ser ekspulsá. Pues durante e siguiente estudionan, nos a analisá tekstonan ku ta papia tokante orguyo i su resultado. Graham a kuminsá mira su mes den spil di e Palabra di Dios, i e no a gusta loke el a mira! E efekto tabata remarkabel! Despues ku el a rekonosé ku su orguyo tabata manera un ‘balki’ ku a strob’é di mira ku ta su aktitut krítiko tabata su problema, masha lihé el a kuminsá hasi kambio. El a kuminsá asistí regularmente na e reunionnan kristian, studia Beibel sinseramente i hasi orashon tur dia. Ademas, el a asumí su responsabilidat spiritual komo kabes di famia, i esei a hasi su kasá i su yu muhénan masha kontentu.”—Luk. 6:41, 42; Sant. 1:23-25.

¹⁴ E ansiano a agregá: “Un dia, Graham a bisa mi algu ku a konmové mi. El a bisa mi: ‘Mi tabata konosé e bèrdat pa hopi aña, i asta mi a sirbi komo pionero. Pero ta awor mi por bisa onestamente ku mi ta stima Yehova.’ No a dura muchu ku el a ser pidí pa yuda ku mikrofon na e reunionnan. El a apresiá e privilegio akí mashá. Su ehèmpel a siña mi ku ora un persona humiá su mes dilanti di Dios i aseptá disiplina, e ta haña masha hopi bendishon.”

15. Kiko nos mester hasi pa otro hende aseptá nos disiplina?

¹⁵ Si nos ke ta bon maestro, nos mester ta bon studiante promé. (1 Tim. 4:15, 16) Di mes manera, si Yehova ta usa bo pa disipliná otro hende, bo mes mester ta humilde i laga Yehova guia bo. Ora bo ta humilde, otro hende lo respetá bo i lo ta mas fásil pa nan aseptá bo konseho òf disiplina. Ban wak e ehèmpel di Hesus.

16. Ki lès nos por saka for di e manera ku Hesus a siña i disipliná hende?

 ¹⁶ Hesus semper a obedesé su Tata, asta ora tabata difísil pa hasi esei. (Mat. 26:39) I semper el a rekonosé ku su siñansanan i sabiduria ta bini di su Tata. (Huan 5:19, 30) Komo ku Hesus tabata humilde i obediente, e tabata un maestro amoroso i kompasivo, i hende sinsero tabata sinti nan atraí na dje. (Lesa Lukas 4:22.) Su palabranan kariñoso tabata konsolá esnan ku tabata desanimá i ku tabata débil manera un kaña kibrá òf un mecha ku ta huma i ku ta serka di paga. (Mat. 12:20) Asta ora Hesus su apòstelnan tabata mustra un aktitut egoista i ambisioso, e no a pèrdè pasenshi, ma a korigí nan ku amor.—Mar. 9:33-37; Luk. 22:24-27.

17. Kiko ansianonan mester hasi pa nan kuida e tou di Dios?

¹⁷ Kada biaha ku ansianonan mester disipliná un ruman a base di prinsipionan di Beibel, nan mester imitá e ehèmpel di Kristu. Ora nan ta hasi esei, nan ta demostrá ku nan ta sabí i ku nan ke pa Dios i su Yu moldia nan. Apòstel Pedro a skirbi: “Pastoriá e tou di Dios ku ta bou di boso kuido, no obligá, sino di buena gana; no pa amor pa ganashi desonesto, sino ku entusiasmo; no manera hende ku ta manda riba esnan ku ta propiedat di Dios, sino mas bien, bira ehèmpel pa e tou.” (1 Ped. 5:2-4) Sin duda, ansianonan ku ta someté nan mes di buena gana na Yehova i Kristu, e kabes di e kongregashon, lo benefisiá nan mes i esnan ku ta bou di nan kuido.—Isa. 32:1, 2, 17, 18.

18. (a) Kiko Yehova ta ferwagt di mayornan? (b) Kon Dios ta yuda mayornan kumpli ku nan responsabilidat?

¹⁸ Ki nos por bisa di disiplina den famia? Beibel ta bisa kabesnan di famia: “No iritá boso yunan, ma sigui lanta nan den e disiplina di Yehova i inkulká su manera di pensa den nan.” (Efe. 6:4) Esei ta un asuntu masha serio. Proverbionan 19:18 ta mustra ku dunamentu di disiplina por ta un kuestion di bida òf morto. Sí, mayornan kristian ku no ta disipliná nan yu mester rindi kuenta na Yehova. (1 Sam. 3:12-14) Sinembargo, Yehova ta duna mayornan e sabiduria i e forsa ku nan mester ora ku humildemente nan ta pidié yudansa i ta laga Beibel i spiritu santu guia nan.—Lesa Santiago 1:5.

19, 20. (a) Ki bendishon nos ta haña ora nos ta aseptá e disiplina di Dios? (b) Kiko nos lo siña den e siguiente artíkulo?

¹⁹ Ora nos ta aseptá e disiplina di Yehova i nos ta imitá Yehova i Hesus ora di disipliná otro hende, nos ta haña hopi bendishon. Nos ta disfrutá di pas den nos famia i kongregashon. Nos tur ta sinti nos stimá, balorá i sigur. Eseinan ta djis un muestra di tur e bendishonnan ku nos lo haña den futuro. (Sal. 72:7) Sí, mediante disiplina, Yehova ta prepará nos pa biba pa semper den pas i union manera un famia bou di su kuido amoroso. (Lesa Isaías 11:9.) Si nos tene esei na mente, nos por mira e disiplina di Yehova manera e ta realmente, esta, un prueba bunita di Dios su amor sin igual.

²⁰ Den e siguiente artíkulo, nos lo siña mas tokante disiplina den famia i den kongregashon. Tambe nos lo siña kon pa disipliná nos mes i kon pa evitá algu ku ta muchu mas doloroso ku kualke disiplina ku nos por haña.