1. Dala barak Bíblia hatete saida kona-ba dixiplina?

BAINHIRA Ita rona liafuan “dixiplina”, Ita hanoin kona-ba saida? Ema barak hanoin kedas kona-ba kastigu, maibé dixiplina envolve buat barak. Bíblia hatete katak dixiplina diʼak ba ita, no dala ruma eskritura temi liafuan neʼe hamutuk ho koñesimentu, matenek, domin, no moris. (Provérbios [Amsal] 1:2-7; 4:11-13) Neʼe tanba bainhira Maromak fó dixiplina, neʼe hatudu katak nia hadomi ita no hakarak ita atu moris ba nafatin. (Ebreu 12:6) Maski dala ruma dixiplina neʼebé Maromak fó inklui kastigu, maibé kastigu neʼe la todan liu ka estraga ita. Tuir loloos signifika importante liu hotu husi liafuan “dixiplina” envolve edukasaun, hanesan edukasaun neʼebé inan-aman fó ba oan.

2, 3. Oinsá mak dixiplina inklui mós hanorin no kastigu? (Haree dezeñu iha leten.)

² Hanoin toʼok kona-ba ezemplu neʼe. Labarik ida naran Johnny halimar bola iha uma laran. Ninia inan hatete: “Johnny, ó hatene la bele halimar bola iha uma laran, se lae bola bele kona sasán.” Maibé nia la rona no kontinua halimar toʼo bola neʼe halo nakfera vazu ida! Johnny nia inan halo saida hodi fó dixiplina ba nia? Nia esplika ba Johnny tanbasá mak buat neʼebé nia halo la loos. Nia hakarak Johnny aprende katak presiza duni iha lei iha uma laran, no lei sira-neʼe diʼak no la todan. Tuirmai nia hadau tiha Johnny nia bola hodi hatudu katak, tanba lakohi halo tuir, neʼe mak Johnny nia kastigu. Maski Johnny la kontente, maibé neʼe ajuda  Johnny hodi hanoin-hetan katak, la halo tuir inan-aman sei lori konsekuénsia ruma.

³ Nuʼudar ema kristaun, ita mós parte ida husi Maromak nia umakain. (1 Timóteo 3:15) Ita-nia Aman Jeová iha direitu atu halo lei kona-ba saida mak loos no saida mak sala, no se ita la halo tuir, nia sei fó dixiplina ho domin ba ita. No mós, se buat neʼebé ita halo mak lori konsekuénsia ruma neʼebé ladiʼak, Jeová nia dixiplina bele ajuda ita atu hanoin-hetan katak importante duni atu halo tuir nia. (Galásia 6:7) Maromak hadomi tebes ita no nia lakohi ita atu hetan terus.​—1 Pedro 5:6, 7.

4. (a) Oinsá mak Jeová hakarak ita atu fó treinu ba ema? (b) Ita sei koʼalia kona-ba saida iha lisaun neʼe?

⁴ Se ita fó dixiplina tuir Bíblia nia matadalan, ita bele ajuda ita-nia oan ka estudante Bíblia atu sai Kristu nia dixípulu. Ita uza Bíblia hodi hanorin ita-nia estudante sira kona-ba saida mak loos no ajuda sira komprende no ‘halo tuir buat hotu neʼebé Jesus haruka ba ita’. (Mateus 28:19, 20; 2 Timóteo 3:16) Jeová hakarak sira hetan treinu iha dalan hanesan neʼe hodi sira mós bele fó fali ajuda ba ema seluk atu sai Kristu nia dixípulu. (Lee Tito 2:11-14.) Agora mai ita koʼalia kona-ba pergunta importante tolu: (1) Oinsá mak dixiplina husi Maromak hatudu katak nia hadomi ita? (2) Saida mak ita bele aprende husi ema neʼebé simu ona dixiplina husi Maromak? (3) Oinsá mak ita bele banati-tuir dalan neʼebé Jeová no ninia Oan-Mane fó dixiplina?

5. Oinsá mak dixiplina husi Jeová hatudu katak nia hadomi ita?

⁵ Jeová korrije, hanorin, no fó treinu ba ita tanba nia hadomi ita. Nia hakarak ita hakbesik nafatin ba nia no iha moris neʼebé rohan-laek. (1 João 4:16) Nia nunka hakanek ita-nia laran ka halo ita sente folin-laek. (Provérbios [Amsal] 12:18) Jeová sempre tau fokus ba ita-nia hahalok diʼak sira no husik ita atu uza ita-nia liberdade. Ita rasik bele haree ka lae, oinsá Jeová hatudu ninia domin ba ita liuhusi dixiplina neʼebé nia fó husi Bíblia, ita-nia livru sira, ita-nia inan-aman, ka katuas kongregasaun? Bainhira katuas sira koko atu korrije ita iha dalan neʼebé diʼak no domin antes ita halo buat neʼebé sala, tuir loloos sira banati-tuir Jeová nia domin ba ita.​—Galásia 6:1.

6. Oinsá mak dixiplina hatudu sai Maromak nia domin maski ema ida lakon ninia priviléjiu?

⁶ Dixiplina laʼós envolve fó konsellu ka korrije deʼit, dala ruma envolve buat seluk tan. Se ema ida monu ba sala neʼebé sériu tebes, karik ema neʼe bele lakon priviléjiu ruma iha kongregasaun. Maski nuneʼe, dixiplina neʼebé nia simu hatudu sai Maromak nia domin ba nia. Porezemplu, karik dixiplina neʼe bele ajuda nia atu haree katak importante tebes atu uza tempu barak liután hodi estuda Bíblia, medita, no halo orasaun. Halo buat sira-neʼe bele ajuda hametin ninia relasaun ho Jeová. (Salmo [Mazmur] 19:7) Liutiha tempu balu, karik nia sei hetan fali priviléjiu ka knaar neʼebé nia lakon. Maski ema ida tenkesér hasai husi kongregasaun, neʼe hatudu sai Jeová nia domin tanba neʼe atu proteje kongregasaun husi hahalok neʼebé aat. (1 Korinto 5:6, 7, 11) Maromak sempre fó dixiplina iha dalan neʼebé justu, tan neʼe ema neʼebé hasai husi kongregasaun bele haree katak sala neʼebé nia halo sériu tebes no neʼe bele book nia atu arrepende an.​—Apóstolu 3:19.

7. Sé mak Sebna, no nia haburas hahalok aat saida?

⁷ Atu komprende tansá mak dixiplina importante tebes, mai ita haree toʼok ezemplu rua husi ema neʼebé Jeová fó dixiplina. Ida  mak Sebna, ema Izraél ida neʼebé moris iha tempu Liurai Ezekias ukun. Ida seluk mak Graham, irmaun ida iha tempu modernu. Sebna “tau matan ba liurai nia uma”, no nia iha podér boot. (Isaías [Yesaya] 22:15) Maibé Sebna sai foti-an no hakarak halo ema seluk haree katak nia mak ema neʼebé importante tebes. Nia mós halo rate ida neʼebé karun tebes ba ninia an no nia saʼe “kuda-karreta neʼebé kmanek”.​—Isaías (Yesaya) 22:16-18.

8. Jeová fó dixiplina saida ba Sebna, no neʼe lori rezultadu saida?

⁸ Tanba Sebna koko atu buka glória ba ninia an, Maromak fó fali ninia knaar ba ema ida naran Eliakim. (Isaías [Yesaya] 22:19-21) Ida-neʼe akontese iha tempu neʼebé Liurai Senaquerib husi Asíria halo planu atu ataka Jeruzalein. Ikusmai, Senaquerib haruka ema-boot sira ho tropa lubun boot bá atu halo taʼuk ema judeu sira no haruka Liurai Ezekias rende an. (2 Reis [Raja-Raja] 18:17-25) Ezekias haruka Eliakim ho ema naʼin-rua tan hodi bá hasoru ema-boot sira-neʼe. Husi ema naʼin-rua neʼe, ida mak Sebna, neʼebé serbí fali nuʼudar sekretáriu. Nia simu fali pozisaun neʼebé ladún importante. Neʼe hatudu katak, karik Sebna sai haraik-an no la sente laran-kanek ka rai hirus. Ita bele aprende lisaun tolu husi buat neʼebé akontese ba Sebna.

9-11. (a) Ita bele aprende lisaun importante saida deʼit husi Sebna? (b) Ita sente oinsá kona-ba dixiplina neʼebé Jeová fó ba Sebna?

⁹ Primeiru, Sebna lakon ninia pozisaun. Neʼe hanorin ita katak “foti an sei halo ema monu”. (Provérbios [Amsal] 16:18) Karik ita kaer knaar espesiál ruma iha kongregasaun, no karik ema seluk hanoin katak ita mak ema neʼebé importante. Se nuneʼe, ita hatudu haraik-an nafatin ka lae? Ita fó glória ba Jeová ka lae tanba ita hatene katak abilidade neʼebé ita iha no buat diʼak hotu neʼebé ita halo mai husi Jeová? (1 Korinto 4:7) Apóstolu Paulo hatete: “Haʼu koʼalia ba ema hotu iha imi-nia leet atu la hanoin nia an diʼak liu fali buat neʼebé loos; maibé atu hanoin ho neon neʼebé loos.”​—Roma 12:3.

¹⁰ Segundu, konsellu makaʼas neʼebé Jeová fó ba Sebna karik hatudu sai Jeová nia konfiansa ba Sebna katak nia sei troka. (Provérbios [Amsal] 3:11, 12) Neʼe mak lisaun neʼebé diʼak tebes ba ema neʼebé lakon knaar espesiál ruma. Duké sai hirus ka sente laran-kanek, diʼak atu kontinua serbí Jeová ho ita-nia kbiit tomak, no haree dixiplina neʼebé ita simu hanesan Jeová hatudu domin ba ita. Presiza  hanoin-hetan katak, ikusmai Jeová sei fó bensaun ba ema neʼebé hatudu haraik-an. (Lee 1 Pedro 5:6, 7.) Dixiplina husi Jeová bele troka ita se ita hatudu haraik-an no sai hanesan rai-mean neʼebé mamar iha ninia liman.

¹¹ Terseiru, ita bele aprende lisaun importante husi dixiplina neʼebé Jeová fó ba Sebna. Maski Jeová nia dixiplina hatudu katak nia odi hahalok neʼebé sala, maibé neʼe mós hatudu katak nia hadomi ema neʼebé halo sala. Nia sempre buka hahalok diʼak husi ema. Se Ita mak inan-aman ka katuas kongregasaun, Ita hakarak banati-tuir dalan neʼebé Jeová fó dixiplina ka lae?​—Judas 22, 23.

12-14. (a) Ema balu sente oinsá bainhira simu dixiplina husi Jeová? (b) Oinsá mak Maromak nia Liafuan ajuda irmaun ida troka ninia atitude, no neʼe lori rezultadu saida?

¹² Triste katak, bainhira simu dixiplina, ema balu bele sente laran-kanek tebes toʼo sira hasees an husi Maromak no ninia kongregasaun. (Ebreu 3:12, 13) Maibé neʼe dehan katak ema neʼe la iha ona esperansa ka lae? Lae. Ezemplu ida mak kona-ba Graham neʼebé kongregasaun hasai no liutiha tempu balu kongregasaun simu fali nia. Maibé, tuirmai nia la haklaken no la tuir tan reuniaun sira. Irmaun katuas ida koko dalan oioin hodi sai Graham nia belun, no ikusmai Graham husu nia atu estuda Bíblia ho nia.

¹³ Katuas neʼe konta: “Graham iha problema kona-ba foti-an. Nia kritika katuas sira neʼebé foti desizaun hodi hasai nia husi kongregasaun. Tan neʼe iha ami-nia estudu ba tempu balu ami koʼalia hamutuk eskritura sira kona-ba hahalok foti an no rezultadu husi hahalok neʼe. Graham komesa leno ninia an tuir Maromak nia Liafuan no nia rasik la gosta haree hahalok neʼebé nia hatudu! Neʼe lori rezultadu neʼebé diʼak tebes! Bainhira nia haree katak iha hahalok foti an hanesan ‘ai-kabelak’ mak taka hela ninia matan, no katak nia mak sala hodi kritika katuas sira, lalais deʼit nia komesa halo mudansa ba ninia an. Nia hahú tuir beibeik reuniaun sira, estuda Maromak nia Liafuan ho laran, no haburas toman hodi halo orasaun loron-loron. Nia mós simu hodi halaʼo didiʼak ninia responsabilidade nuʼudar família nia ulun, no neʼe halo ninia feen no oan sira kontente tebes.”​—Lucas 6:41, 42; Tiago 1:23-25.

¹⁴ Katuas neʼe hatutan: “Loron ida, Graham koʼalia buat ida neʼebé book tebes haʼu-nia laran. Graham dehan, ‘Haʼu aprende lia-loos ba tinan barak ona, no haʼu mós serbí nuʼudar pioneiru iha tempu uluk. Maibé agora mak haʼu bele hatete ho loloos katak haʼu hadomi Jeová.’” Lakleur, Graham simu knaar hodi lori mikrofone iha reuniaun, no nia kontente tebes hodi halaʼo knaar neʼe. Irmaun katuas neʼe dehan: “Ninia esperiénsia hanorin haʼu katak se ema ida mak hatudu haraik-an ba Maromak hodi simu dixiplina, bensaun sei fakar tun ba nia nabanaban deʼit!”

15. Se ita hakarak dixiplina neʼebé ita fó atu kona ema nia laran, ita tenkesér halo saida?

¹⁵ Se ita hakarak sai mestre neʼebé diʼak, primeiru tenkesér sai uluk alunu neʼebé diʼak. (1 Timóteo 4:15, 16) Hanesan neʼe mós ho ema sira neʼebé simu responsabilidade husi Jeová atu fó dixiplina ba ema seluk, tenkesér hatudu haraik-an hodi halo tuir beibeik matadalan sira husi Jeová. Se ema seluk haree katak Ita mak ema neʼebé haraik-an, sira sei hatudu respeitu ba Ita no neʼe halo fasil ba sira atu simu sujestaun ka konsellu husi Ita. Ita bele aprende husi Jesus nia ezemplu.

16. Ita bele aprende saida husi dalan diʼak neʼebé Jesus fó dixiplina no hanorin ema?

¹⁶ Jesus sempre halo tuir ninia Aman maski  susar tebes atu halo nuneʼe. (Mateus 26:39) Nia fó-hanoin ba ema neʼebé rona nia katak ninia hanorin no matenek mai husi ninia Aman. (João 5:19, 30) Tanba Jesus haraik-an no sempre halo tuir buat neʼebé ninia Aman hakarak nia atu halo, neʼe ajuda nia sai mestre neʼebé laran-diʼak tebes. Ema neʼebé laran-maus gosta tebes hamutuk ho Jesus. (Lee Mateus 11:29.) Jesus nia liafuan diʼak sira anima tebes ema neʼebé hasoru laran-susar no sente kbiit-laek. (Mateus 12:20) Tuir loloos nia bele sai hirus ba ninia apóstolu sira tanba sira diskute beibeik kona-ba sé mak boot liu iha sira-nia leet, maibé Jesus korrije sira iha dalan neʼebé diʼak no domin.​—Marcos 9:33-37; Lucas 22:24-27.

17. Hahalok saida deʼit mak bele ajuda katuas sira atu tau matan ba kongregasaun?

¹⁷ Bainhira katuas sira fó dixiplina husi Bíblia ba ema seluk, sira presiza banati-tuir Jesus nia ezemplu. Halo hanesan neʼe hatudu katak sira hakarak halo tuir matadalan husi Maromak no ninia Oan-Mane. Apóstolu Pedro dehan: “Tau matan ba Maromak nia bibi sira neʼebé iha imi-nia liman, laʼós hodi obriga an, maibé ho hakarak rasik; laʼós hodi manán buat ruma ho kaan-teen, maibé ho laran tomak; laʼós hodi domina sira neʼebé Maromak nian, maibé sai nuʼudar ezemplu ba bibi-lubun.” (1 Pedro 5:2-4) Katuas sira neʼebé halo tuir Maromak no Kristu sei lori benefísiu ba sira-nia an no mós ba ema seluk neʼebé sira tau matan daudaun.​—Isaías (Yesaya) 32:1, 2, 17, 18. 

18. (a) Jeová hakarak inan-aman atu halo saida? (b) Oinsá mak Maromak bele fó ajuda ba inan-aman?

¹⁸ Oinsá kona-ba fó dixiplina no treinu iha uma laran? Jeová hatete ba família nia ulun sira: “Keta halo imi-nia oan sai laran-hirus, maibé kontinua haboot sira hodi fó dixiplina no matadalan neʼebé tuir Jeová nia hakarak.” (Éfeso 6:4) Tanbasá mak fó treinu no dixiplina importante? Eskritura iha Provérbios 19:18 hatete: “Fó dixiplina ba ó-nia oan kuandu sei iha oportunidade, se lae ó mak sei simu responsabilidade kona-ba ninia mate.” Jeová entrega responsabilidade ba inan-aman atu fó dixiplina oan. Se inan-aman la kaer didiʼak sira-nia responsabilidade neʼe, sira sei hatán ba Jeová! (1 Samuel 3:12-14) Maibé, se inan-aman husu ajuda husi Jeová ho haraik-an liuhusi orasaun no sadere ba ninia Liafuan no espíritu santu atu fó matadalan ba sira, Jeová sei fó matenek no forsa ba sira.​—Lee Tiago 1:5.

19, 20. (a) Simu dixiplina husi Maromak sei lori bensaun saida deʼit? (b) Ita sei koʼalia kona-ba saida iha lisaun tuirmai?

¹⁹ Se ita simu dixiplina husi Maromak no banati-tuir dalan neʼebé Jeová no Jesus fó dixiplina ba ema, ita sei hetan bensaun barak tebes! Ita-nia família no kongregasaun sei sente hakmatek, no ema hotu sei sente domin, iha folin, no seguru. Neʼe mak ezemplu balu deʼit kona-ba dame no ksolok neʼebé ita sei hetan iha futuru. (Salmo [Mazmur] 72:7) Loos duni, dixiplina husi Jeová hanorin ita atu moris hamutuk ba nafatin nuʼudar família neʼebé iha dame no unidade iha Maromak nia umakain. (Lee Isaías [Yesaya] 11:9. *) Se ita hanoin beibeik kona-ba neʼe, ita sei haree katak dixiplina mak dalan furak neʼebé Maromak hatudu ninia domin mai ita.

²⁰ Iha lisaun tuirmai, ita sei koʼalia liután kona-ba dixiplina iha família no kongregasaun, oinsá ita bele fó dixiplina ba ita-nia an, no mós oinsá atu hasees an husi buat neʼebé sei halo ita laran-kanek liu fali dixiplina neʼebé ita simu.