1. ¿Tuku lichuwinan Biblia xlakata tastakyaw?

¿TUKU min kmintalakapastakni akxni kgaxpata tachuwin tastakyaw? Max tunkun nalilakpuwana pi wa akxni namalakgaxokgekana tuku nitlan natlawaya, pero tastakyaw wi atanu tuku tlakg kilhchanima. Biblia ankgalhin tlan lichuwinan tastakyaw chu min kilhtamaku tamalakxtumi takatsin, liskgalala, tapaxkit chu latamat (Prov. 1:2-7; 4:11-13). Xtastakyaw Dios limasiya pi kinkapaxkiyan chu lakaskin pi kalatamaw putum kilhtamaku (Heb. 12:6). Xlikana pi akxni Jehová masta tastakyaw max malakgaxokgenan, pero nikxni malakatsali. Nachuna, tachuwin tastakyaw tatalakxtumi akxni chatum tlat stakyawa xkgawasa tiku paxki xlakata tlan nalikatsi.

2, 3. ¿Tuku pulaktiy kilhchanima tastakyaw? (Kaʼakxilhti xapulana dibujo).

² Kaʼakxilhwi akgtum liʼakxilhtit. Chatum kgawasa tiku wanikan Carlitos likgamanama xpelota kxpulakni xchik. Xtse wani: «Carlitos, katsiya pi ni milikgamanat kxpulakni chiki xlakata wi tuku natapakglha». Pero xla ni kgalhakgaxmata xtse chu chuntiya kgamanan. Kaj xalan, pelota mamakgwasa akgtum xalu chu tapakglha. ¿Tuku natlawa xtse xlakata nastakyawa? Namasiyani chu  nastakyawa. Xlakata tlan namasiyani, xla nawani pi nitlan tuku tlawalh. Lakaskin kaʼakgatekgsli pi komo nakgalhakgaxmata xnatlatni tlan nakitaxtuni chu tuku naskinikan xlakaskinka chu nitu malakatsalimaka. Nachuna xlakata namakgtayakan uma kgawasa nakatsini pi nitlan tuku tlawalh, xtse lakpuwan pi tuku naliʼakgastakyawa wa namakglhti xpelota. Maski uma max ni katilakgatilh Carlos, chuna nakatsini pi akxni ni kgalhakgaxmatkan natlatni nitlan kitaxtu.

³ Kstalaninanin Cristo makgtapakgsiyaw kxchik Dios (1 Tim. 3:15). Wa xlakata, maxkiyaw kakni pi Jehová lakgchan nawili limapakgsin chu nakinkalistakyawayan tapaxkit akxni ni kgalhakgaxmataw. Nachuna, komo nitlan tuku kinkakitaxtuniman xlakata tlawaw tuku nitlan, xtastakyaw nakinkamalakapastakayan pi lu xlakaskinka nakgalhakgaxmataw Jehová (Gál. 6:7). Dios lu kinkapaxkiyan chu ni lakaskin pi napatinanaw (1 Ped. 5:6, 7).

4. 1) ¿Tuku tamasiy sikulunatlawa Jehová? 2) ¿Tuku naʼakxilhaw kʼuma artículo?

⁴ Akxni mastayaw tastakyaw nema takilhtinit kBiblia tlan kinkamakgtayayan pi kinkamanankan chu tiku kamakgalhtawakgeyaw tlan kstalaninanin Cristo nalitaxtukgo. Biblia wa tuku tlakg xlakaskinka kgalhiyaw xlakata nakamasiyaniyaw amakgapitsin chu makgtayanan «xa’akgstitum nalistakyawanankan». Uma makgtayanan xlakata nakamakgtayakan kamanan chu tiku kalimakgalhtawakgemaka Biblia naʼakgatekgskgo tuku wanit kxTachuwin Dios chu nakgalhakgaxmatkgo putum tuku Jesús kinkalimapakgsin (2 Tim. 3:16; Mat. 28:19, 20). Jehová sikulunatlawa uma tamasiy nema kamakgtaya tiku kalimakgalhtawakgemaka Biblia xlakata na nakamasiyanikgo amakgapitsin (kalikgalhtawakga Tito 2:11-14). La uku, kakgalhtiw xatakgalhtin akgtutu lu xlakaskinka takgalhskinin: 1) ¿Tuku xlakata xtastakyaw Dios limasiya pi kinkapaxkiyan? 2) ¿Tuku kinkamasiyaniyan xliʼakxilhtitkan tiku Dios kastakyawalh? 3) ¿La tlan namakglhkatiyaw Jehová chu Jesús akxni namastayaw tastakyaw?

5. ¿La limasiya Jehová pi kinkapaxkiyan chuna la kinkastakyawayan?

⁵ Jehová kinkastakyawayan xlakata kinkapaxkiyan. Lakaskin pi xʼamigo nawanaw chu nachuna pi kalatamaw putum kilhtamaku (1 Juan 4:16). Nikxni kinkawaniyan tuku nitlan nalimakgkatsiyaw chu ni tlawa pi ni lhuwa xtapalh nalitaxtuyaw (Prov. 12:18). Wata kinkamalankiyan xlakata akxilha xatlan kintayatkan chu maxki kakni tuku laksakaw. ¿Nachuna akxilha wix xtastakyaw nema Jehová kinkamaxkiyan anta kBiblia, kkilikgalhtawakgakan, chu akxni kinkastakyawakgoyan kinatlatnikan chu lakgkgolotsin? Akxni max ni kuentajtlawayaw chu tlawayaw tuku nitlan, lakgkgolotsin limasiyakgo tapaxkit akxni kinkastakyawakgoyan. Akxni chuna tlawakgo limasiyakgo xtapaxkit Jehová (Gál. 6:1).

6. Maski akxni wi tiku stakyawakan makglhtikan tuku lakgaya kcongregación, ¿tuku xlakata tlan nawanaw pi Jehová limasiyama tapaxkit?

⁶ Min kilhtamaku, akxni wi tiku stakyawakan ni kajwatiya maxkikan tastakyaw. Komo wi tiku tlawanit lanka talakgalhin, max namakglhtikan tuku xlakgayawakanit kcongregación. Maski chuna, xtastakyaw Jehová limasiya pi kinkapaxkiyan. Akxni wi tiku makglhtikan tuku xlakgaya kcongregación namakgtaya xlakata nakatsi pi lu xlakaskinka tlakg nalimaxtu kilhtamaku nakgalhtawakga, nalilakpuwan tuku likgalhtawakgama chu natlawa oración. Uma namakgtaya tlakg namatliwakglha la talalin Jehová (Sal. 19:7). Max alistalh wi tuku tlan nalakgatayapara kcongregación. Nachuna, Jehová limasiya xtapaxkit akxni wi tiku  tamakxtukan, uma kamakgtaya amakgapitsi ni nakapasa nixatlan tayat (1 Cor. 5:6, 7, 11). Xlakata xtastakyaw Jehová xaʼakgstitum, tiku tamakxtukan tlan namakgtaya naʼakgatekgsa pi lu nitlan tuku tlawanit chu uma natlawa pi nataspitpara (Hech. 3:19).

7. 1) ¿Tiku xwanit Sebná? 2) ¿Tukuya tayat kgalhilh Sebná?

⁷ Xlakata naʼakgatekgsaw pi tastakyaw lu xlakaskinka, kaʼakxilhwi akgtiy liʼakxilhtit tiku Jehová kastakyawalh: Sebná, tiku latamalh kxkilhtamaku mapakgsina Ezequías, chu Graham, chatum tala xalak kinkilhtamakujkan. Pulana kalichuwinaw Sebná. Wa tiku xlakgayawakanit nakuentajtlawa xchik Ezequías, wa xlakata xkgalhi lhuwa limapakgsin (Is. 22:15). Lu nitlan, pero tsukulh tlankajwanan chu putsalh pi xmalankika. Asta lu xastlan tlawalh xputaknun chu asta xpaxialhnan kxastlan xputlaw (Is. 22:16-18).

8. ¿La stakyawalh Jehová Sebná chu tuku kitaxtulh?

⁸ Xlakata Sebná putsalh pi xmalankika, Dios makglhtilh tuku xlakgaya chu makamaxkilh Eliaquim (Is. 22:19-21). Uma chuna lalh akxni mapakgsina Senaquerib xʼakgchipaputun Jerusalén. Alistalh Senaquerib malakgachalh laklanka napuxkun chu lhuwa soldados xlakata nakamakgapekuan judíos chu xtlawaputun pi Ezequías xpekualh (2 Rey. 18:17-25). Ezequías malakgachalh Eliaquim xlakata nakatachuwinan soldados asirios. Chatum tiku na malakgachaka wa Sebná, tiku kskujma la k’secretario mapakgsina. Uma masiya pi Sebná ni mastalh talakaskin pi tasitsi namatlawi tuku nitlan, wata xtaktujunit chu xmakglhtinanit akgtum taskujut nema ni lu xlakaskinka xwanit nixawa tuku xkgalhi xapulana. ¿Tuku tlan nakatsiniyaw xlakata uma? Kaʼakxilhwi pulaktutu.

9-11. 1) ¿Tuku tlan nakatsiniyaw xlakata tuku titaxtulh Sebná? 2) ¿La makgkatsiya wix akxni lilakpuwana la stakyawaka Sebná?

⁹ Pulana, xlakata Sebná makgatsankgalh tuku xlakgaya kinkamalakapastakayan pi «pulana wi tatlankit chu alistalh nitlan kitaxtu; chu tlanka tamakgkatsit, wi akxni nina akgchakgxkan» (Prov. 16:18). Max wix wi tuku lakgayat kcongregación chu amakgapitsin nalakpuwankgo pi lu xlakaskinka. Komo chuna, ¿naliskuja xlakata nataktujuya? ¿Namaxki kakni Jehová xlakata tuku tlan tlawaya? (1 Cor. 4:7). Apóstol Pablo tsokgli: «Kkaliwaniyan nchatunu wixin, ni tlakg tlanka nalakapastakatit nkaj mimpalakatakan mpala nalakatsalayatit wa lantla ntu ntlan, wampi wa lantla nchuna xlilat nkalakapastaktit mimpalakatakan» (Rom. 12:3).

 ¹⁰ Xlipulaktiy, tastakyaw nema makglhtinalh Sebná max masiya pi Jehová xkatsi pi tlan xtalakgpalilh (Prov. 3:11, 12). Uma lu tlan tuku kamasiyani tiku kamakglhtikan tuku xlakgayakgolh kcongregación. Ni nasitsikgo, wata chuntiyaku naskujnanikgo Jehová chu naʼakxilhkgo pi tastakyaw nema kamaxkika limasiya xtapaxkit Jehová. Kalakapastakwi pi Jehová nakinkasikulunatlawayan komo nataktujuyaw (kalikgalhtawakga 1 Pedro 5:6, 7). Litaxtuputunaw xatsatata tiyat kxmakan Jehová chu namastayaw talakaskin pi xtastakyaw nalakgpali kilatamatkan.

¹¹ Xlipulaktutu, chuna la Jehová likatsinilh Sebná wi tuku lu xlakaskinka kamasiyani tiku mastakgo tastakyaw, natlatni chu lakgkgolotsin xalak congregación. Maski xtastakyaw Jehová masiya pi xla xkajni talakgalhin, nachuna masiya pi chuntiya paxki tiku tlawanit talakgalhin. Nachuna, Jehová kaʼakxilhni xatlan xtayatkan latamanin. Komo wix wi tiku nastakyawaya, ¿natlawaya chuna la Jehová? (Jud. 22, 23).

12-14. 1) ¿Tuku kitaxtu akxni chatum lataman makglhtinan xtastakyaw Jehová? 2) ¿La makgtayalh Biblia chatum tala nalakgpali xtayat chu tuku kitaxtulh?

¹² Lhuwa latamanin lu nitlan makgkatsikgo akxni kastakyawakan, wa xlakata tamakgatlinikgo Jehová chu congregación (Heb. 3:12, 13). ¿Tlan nakamakgtayakan umakgolh latamanin? Xlakata nakgalhtiyaw uma takgalhskinin, kaʼakxilhwi xliʼakxilhtit Graham. Xla tamakxtuka kcongregación, titaxtulh kilhtamaku taspitpa chu alistalh nialh xlichuwinan Dios. Titaxtulh makgapitsi kata, wanilh chatum kgolotsin tiku xʼamigo xlitaxtunit pi xlakaskin xmakgalhtawakgeka.

¹³ Uma kgolotsin lakapastaka: «Taʼakglhuwit nema xkgalhi Graham wa pi lu xtlankajwanan. Nitlan xkalichuwinan lakgkgolotsin tiku laksakkgolh natamakxtukan. Wa xlakata klimaxtuw kilhtamaku naklikgalhtawakgayaw tuku wan Biblia xlakata tatlankit chu tuku kitaxtu nakgalhiya uma tayat. Graham liwana akxilhli anta kBiblia tuku tayat xkgalhi chu ni lakgatilh tuku akxilhli. Lu tlan tuku kitaxtulh. Xlakata katsilh pi tatlankit xlitaxtu la komo wi “ntu lakpitanuma” chu uma xtlawa pi nitlan xkalichuwinalh amakgapitsin. Wa xlakata tsukulh lakgpali xtayat. Tsukupa an ktamakxtumit, chu tsukupa likgalhtawakga Biblia chali chali. Nachuna tlakg liwana tsukulh kuentajtlawa xtakanajla xfamilia, uma makgapaxuwalh xpuskat chu xlaktsuman» (Luc. 6:41, 42; Sant. 1:23-25).

¹⁴ Tala chuntiya lichuwinalh: «Akgtum kilhtamaku, Graham wi tuku kiwanilh nema kimakgpuwantinilh: “Makgasata la klakgapasa tuku xaxlikana chu asta precursor klitaxtunit. Pero tlan nakwan pi la uku xlikana kpaxki Jehová”. Ni makgas kilhtamaku titaxtulh wanika pi xmakgtayanalh akxni matitaxtikan micrófonos ktamakxtumit, chu xla lhuwa xtapalh akxilhli uma taskujut. Xliʼakxilhtit masiya pi akxni chatum lataman taktuju kxlakatin Jehová makgamakglhtinan lhuwa tasikulunalin».

15. ¿Tuku natlawayaw xlakata amakgapitsin nakinkakgaxmatnikgoyan akxni nakastakyawayaw?

¹⁵ Xlakata tlan makgalhtawakgenanin nawanaw, namastayaw talakaskin pi pulana nakinkamasiyanikanan (1 Tim. 4:15, 16). Nachuna, komo Jehová limaklakaskinan xlakata nakastakyawaya amakgapitsin, talakaskin nataktujuya chu namastaya talakaskin pi Jehová napulalinan. Akxni amakgapitsin naʼakxilhkgo pi wix xataktujun, namaxkikgoyan kakni chu nakgaxmatnikgoyan akxni nakastakyawaya. Kaʼakxilhwi liʼakxilhtit nema wililh Jesús.

16. ¿Tuku tlan nakatsiniyaw chuna la Jesús xmasiya chu kstakyawanan?

¹⁶ Jesús ankgalhin kgalhakgaxmatli xTlat  asta akxni lu tuwa xwanit (Mat. 26:39). Chu putum kilhtamaku xkatsi pi xliskgalala chu tuku xmasiya wa xmaxkinit Dios (Juan 5:19, 30). Xlakata xtaktuju chu xkgalhakgaxmatnan, xapaxkina makgalhtawakgena litaxtulh, chu latamanin tlan xmakgkatsikgo akxni akxtum xkatatawila (kalikgalhtawakga Lucas 4:22). Xtachuwin Jesús tlan xkamamakgkatsini tiku xtaxlajwanikgonit chu nialh xkgalhikgo litliwakga, la kgantum kgatit xatalaktukxni o la xatsinit akgtum lampara xla aceite nema mixputuna (Mat. 12:20). Asta maski akxni xʼapóstoles limasiyakgolh ni xatlan tayat chu lhuwa tuku xkgalhiputunkgo, Jesús nikxni katasitsilh. Wata lakatsuku kastakyawalh (Mar. 9:33-37; Luc. 22:24-27).

17. ¿Tuku xlitlawatkan lakgkgolotsin xlakata liwana nakakuentajtlawakgo congregación?

¹⁷ Lakgkgolotsin xlimakglhkatitkan Jesús akxni namastakgo tastakyaw nema takilhtinit kBiblia. Komo chuna natlawakgo, limasiyakgo pi lakaskinkgo pi Jehová chu Jesús nakapulalin. Apóstol Pedro tsokgli: «Kamakgtakgalhpitit nkgamputum xKgalhnilu Dios wa nti nkamakwintajlikanitantit, ni kaj fuerzaj, wampi xlipaks mintapaxuwankan nalitlawayatit; ni wa mpala kaj natlajaputunatit ntumin, wampi xlipaks mintakgpuwantinkan nalitlawayatit. Ni kaj xaʼaklan timapakgsikgoyatit wa nti ntamakwintajlinitan, chi wampi kaj xaliʼukxilhtit nawanatit xpalakatakan nkgamputum xkgalhnilu Dios». Xlikana, akxni lakgkgolotsin tapaxuwan kgalhakgaxmatkgo Jehová chu Cristo, tiku xʼakgxakga congregación, tlan kitaxtunikgo chu na tlan kakitaxtuni tiku kakuentajtlawamakgolh (Is. 32:1, 2, 17, 18).

18. 1) ¿Tuku limapakgsin kamaxki Jehová natlatni? 2) ¿La kamakgtaya Jehová natlatni xlakata tlan namakgantaxtikgo tuku kalakgayawanit?

¹⁸ ¿Tuku tlan nawanaw xpalakata tastakyaw kfamilia? Jehová kalimapakgsi xʼakgxakga familia: «Ni kakamakgasitsitit minkamanankan, wata chuntiya kakamakgastaktit kxtastakyaw chu kxtalakapastakni Jehová» (Efes. 6:4). Uma lu xlakaskinka. Proverbios 19:18 wan pi natlatni linkgo kuenta komo namakgatsankga xlatamat xkgawasakan xlakata ni stakyawakgolh. Jehová nakaskini kuenta umakgolh natlatni (1 Sam. 3:12-14). Pero Jehová kamaxki liskgalala chu litliwakga natlatni tiku skinikgo xtamakgtay chu tiku mastakgo talakaskin pi nakapulalin xTachuwin chu xʼespíritu santo (kalikgalhtawakga Santiago 1:5).

19, 20. 1) ¿Tuku tasikulunalin nakinkamaxkiyan Jehová komo namakglhtinanaw xtastakyaw? 2) ¿Tuku naʼakxilhaw kʼatanu artículo?

¹⁹ Akxni tapaxuwan makglhtinanaw xtastakyaw Jehová chu akxni mastayaw tastakyaw chuna la xla chu Jesús tlawakgo, lhuwa tasikulunalin namakglhtinanaw. Putum akinin makgkatsiyaw pi lapaxkiyaw, lhuwa xtapalh la liʼakxilhaw chu ni pekuanaw, uma kaj tsinu tasikulunalin nema kgalhiyaw la uku nixawa tuku namakglhtinanaw kkilhtamaku nema aku mima. (Sal. 72:7). Xtastakyaw Jehová kinkamakgtayayan nakatsiniyaw la nakgalhiyaw takaksni putum kilhtamaku la akgtum familia nema wa nakuentajtlawa (kalikgalhtawakga Isaías 11:9). Komo kuenta natlawayaw uma, tlan naʼakxilhaw pi xtastakyaw Jehová wa: tuku kinkalimasiyaniyan pi kinkapaxkiyan.

²⁰ Kʼatanu artículo tlakg nakatsiniyaw xlakata tastakyaw kfamilia chu kcongregación. Nachuna naʼakxilhaw la kiʼakstukan nakinkastakyawakanan chu tuku natlawayaw xlata ni nakinkaʼakspulayan tuku tlakg nitlan nixawa putum atanu tastakyaw nema nakinkamaxkikanan.