1. Мар верамын Библиын кыл кутытон сярысь?

 МАР сярысь тӥ малпаськоды, куке «вӧсь карон» яке «кыл кутытон» кылъёсты кылӥськоды? Библиын кутӥськись «вӧсь карон», яке «кыл кутытон», кылъёсты озьы ик «визьман, дышетон, тупатон» шуыса берыктыны луэ. Ӵем дыръя со кылъёс умоеныз герӟаськемын, кылсярысь, тодон-валанэн, визьлыкен, яратонэн но улонэн (Мад. 1:2—7; 4:11—13). Малы? Малы ке шуоно Инмар кыл кутытэ ке, со возьматэ, со асьмемыз яратэ но солэн милемлы пырак улон кузьмамез потэ шуыса (Евр. 12:6). Куке Иегова кыл кутытэ, со ассэ ноку но лек но сюлэмтэм уг возьы. «Кыл кутытон» кылъёс, кудъёсыз Библиын кутӥсько, нырысь ик возьмато визьманэз, кылсярысь, яратоно нылпиез будэтыку.

2, 3. Мар пыре кыл кутытон пӧлы? (Учке статья кутсконысь туспуктэмъёсты.)

² Эскеромы одӥг примерез. Джонни нимо пияш корка пушкын тупен шудэ. Анаез солы вера: «Джонни, тон тодӥськод ук, коркан тупен шудыны уг яра шуыса! Тон мае  ке но пильыны шедьтод». Нош Джонни анайзэ кылэм-адӟем ик уг кары но тупен шудэмысь уг дугды. Шӧдтэк шорысь со сяськаен вазаез пиле. Мар кароз анаез? Со пиеныз вераськоз но сое кыл кутытоз, вылды. Со валэктоз Джоннилы, малы солэн ассэ воземез шонертэм вал. Анаез вералоз пиезлы, анай-атайлэсь кылзӥськоно шуыса но анай-атайёслэн куронъёссы, кудъёссэ соос быдэсъяны косо, чик юнме уг луо, нош пайда ваё шуыса. Пиез сое мед валалоз шуыса, со сое кыл кутытоз, вылды, кылсярысь, огдырлы тупсэ басьтоз. Озьы пияш адӟоз, кытчы вуттӥз кылзӥськымтэез.

³ Ми христианъёс луиськомы бере, «Инмарлэн корказ» улӥськомы, яке солэн семьяез пӧлы пыриськомы (1 Тим. 3:15). Соин ик валаськомы, Иеговалэн правоез вань шуыса куронъёс пуктыны но милемыз умоен тупатыны, ми янгышаськомы ке но куронъёссэ ум ке быдэсъяське. Нош асьмеды умойтэм воземенымы сэрен умойтэм бервылъёсын пумиськиськомы ке, Иеговалэн кыл кутытэмез тодамы вайытоз, макем кулэ инмысь Атаймылэсь кылзӥськыны (Гал. 6:7). Иегова туж яратэ асьмемыз, но солэн уг поты, ми мед курадӟомы шуыса (1 Пётр 5:6, 7).

4. а) Кызьы дышетэмез Иегова бакель каре? б) Мае ми эскеромы та статьяын?

⁴ Библия вылэ пыкиськыса тупатон юрттоз пиналлы яке солы, кин Библиез дышетэ, Христослэн дышетскисез луыны. Инмарлэн Кылызтэк ми ум быгатэ кинэ ке дышетыны Инмарлы ярамон улыны, малы ке шуоно Библия со валтӥсь дышетон тӥрлык. Библилэн юрттэменыз, пинал яке Библиез дышетӥсь адями быгатэ валаны ваньзэ, мае Иисус быдэсъяны косӥз, но соя улыны (Матф. 28:19, 20; 2 Тим. 3:16). Озьы дышетэмез Иегова бакель каре, малы ке шуоно, солы луыса соос, кинъёс Библиез дышето, асьсэос но Христослэсь дышетскисьёссэ дасяны быгато. (Лыдӟе Титлы 2:11—14.) Ойдолэ эскеромы куинь валтӥсь юанъёсты: 1) Малы вераны луоз, Инмарлэн кыл кутытэмез солэсь яратэмзэ возьматэ шуыса? 2) Малы ми дышетскыны быгатӥськомы соослэсь, кинъёсты Инмар кыл кутытӥз? 3) Кызьы ми Иеговалэсь но солэн Пиезлэсь адӟем карыны быгатӥськомы, куке кинэ ке тупатӥськомы?

5. Малы вераны луоз, милемыз тупатэменыз Иегова яратэмзэ возьматэ шуыса?

⁵ Иегова милемыз яратэ, соин ик со милемыз тупатэ, дышетэ но визьма, милям соин матысь кусыпъёсмы мед луозы но ми улон сюрес вылысь медам  коже шуыса (1 Иоанн 4:16). Со ноку но милемыз уг ултӥя но уг мыскылля, малы ке шуоно соку ми асьмеды номырлы ярасьтэм адямиен шӧдысалмы (Мад. 12:18). Нош со милесьтым умой сямъёсмес адӟе но бырйыны правомес лыдэ басьтэ. Лыдъяськоды-а тӥ, Библия пыр, со вылэ пыкиськыса гожтэм публикациос пыр, христиан луись анай-атайёс но тӧроос пыр тупатыса, Иегова аслэсьтыз яратэмзэ возьматэ шуыса? Куддыръя ми валатэк но кылиськомы, кызьы сьӧлык лэсьтӥськомы. Соку тӧроос тыршо милемыз зӥбыт-востэм, яратӥсь духен тупатыны. Озьы соос Иеговалэсь милемыз яратэмзэ возьмато (Гал. 6:1).

6. Кызьы Инмарлэн яратэмез адӟиське со учыръёсы но, куке кинэ ке секыт сьӧлыкамез понна кыл кутытоно луэ?

⁶ Нош куддыръя, кинэ ке визьман понна, визь-кенеш сётыса яке янгыш сярысь вераса гинэ тырмыт ӧвӧл. Адями секыт сьӧлыка ке, сое кенешын куд-ог оскем ужъёсты нуыны уг лэзё ни. Та учырын но Инмарлэн яратэмез адӟиське. Малы ке шуоно озьы адями валаны быгатэ, макем кулэ бадӟым саклык висъяны ас поннад Библиез дышетонлы, малпаськонлы но вӧсяськонлы. Нош со солэсь осконзэ юнматыны быгатэ (Пс. 18:8). Дыр ортчыса, со выльысь кенешын оскем ужъёсты нуыны быгатоз. Инмарлэн яратэмез адӟиське соку но, куке адямиез кенешысь потто, малы ке шуоно кенешысь поттон кенешез урод кусып воземлэсь уте (1 Кор. 5:6, 7, 11). Инмар котьку шонер кыл кутытэ. Соин ик кенешысь поттон юрттэ адямилы валаны, макем секыт сьӧлык со лэсьтӥз, но мылкыдзэ ӝутэ ӧпкельыны (Ап. уж. 3:19).

7. Кин вал Севна но кыӵе урод сямыз солэн пумен потӥз?

⁷ Тупатэмлэсь пайдазэ адӟон понна, ойдолэ эскеромы кык пиосмуртъёслэсь примерзэс, кудъёссэ Иегова  тупатӥз. Со Езекия эксэй улон вакытысь Севна но Грэм нимо христиан мурт. Севна кузёйыр вал. Со Езекия эксэйлэн юртэныз, вылды, кузёяськыны пуктэмын вал, но солы бадӟым власть сётэмын вал (Ис. 22:15). Жаляса верано луэ, но, дыр ортчыса, со вылтӥяськись луиз но аслыз дан утчаны кутскиз. Со аслыз узыр шӧй возён инты дасяз но туж чебересь ожмаськон уробоосын ветлӥз (Ис. 22:16—18).

8. Кызьы Иегова Севнаез тупатӥз но кыӵе емышъёс со вайиз?

⁸ Севна аслыз дан утчаны кутскиз бере, Инмар сое вылӥ санысьтыз куштӥз но со интые Елиакимез пуктӥз (Ис. 22:19—21). Со вал, куке Ассириялэн Сеннахирим эксэез Иерусалимлы пумит потӥз. Со Иерусалиме аслэсьтыз адямиоссэ бадӟым войскоен ыстӥз, иудейёслэсь осконзэс быдтыны но Езекияез кышкатыса сётскыны косыны (4 Экс. 18:17—25). Соосын вераськыны Елиакимез ыстӥзы. Соин ӵош кык мурт мынӥз на. Одӥгез соос пӧлысь вал секретарь Севна. Соин ик вераны луоз, Севна ӧз йыркуръяськы но кӧтсэ ӝож ӧз кары шуыса, нош зӥбытэн дано луисьтэм ужъёсты быдэсъяны кутскиз. Эскеромы, малы дышетэ милемыз солэн примерез.

9—11. а) Малы милемыз дышетыны быгатэ Севнаен луэм учыр? б) Кызьы Иегова Севнаез тупатӥз но кыӵе шӧдонъёсты тӥляд кылдо со пумысен?

⁹ Нырысетӥез — Севна санысьтыз куштэмын вал. Со умой возьматэ та кылъёслэсь зэм луэмзэс: «Кулонлэн-быронлэн азьпалтӥз вылтӥяськон ветлэ, усёнлэн-погранлэн мугез — возьытэз тодытэк улон» (Мад. 16:18). Тӥледлы кенешын кыӵе ке ужъёсты оско но мукетъёсыз тӥледыз кызьы ке нимысьтыз висъяло ке, тыршиськоды-а тӥ зӥбыт-востэм луыны? Данъяськоды-а тӥ Иеговаез быгатонлыкъёсты но азинлыкъёсты понна? (1 Кор. 4:7). Апостол Павел гожъяз: «Котькуддылы мон шуисько: кӧня сётэмын, солэсь вылӥе асьтэдыз эн пуктэ. ...Зӥбыт-востэм кариськыса, визьмо малпанэн улэ» (Рим. 12:3).

¹⁰ Кыкетӥез — Севнаез тупатыса, Иегова оскемзэ возьматӥз, вылды, Севна воштӥськыны быгатэ шуыса (Мад. 3:11, 12). Макем умой пример соослы, кинъёслы кенешын кыӵе ке нимысьтыз оскем ужъёсты быдэсъяны ӧз лэзе ни! Тӥ сыӵе учыре сюриды ке, кулэ ӧвӧл, вождэс поттыса но кӧттэс ӝож карыса, улыны. Умойгес луоз выль югдуръёсын карыны Иеговалы ваньзэ, мае быгатӥськоды, но кыл кутытон шоры Иеговалэн яратэмзэ возьматэмез шоры кадь учкыны. Зӥбыт-востэм луимы ке, Атаймы одно ик милемыз бакель кароз. (Лыдӟе 1 Пётрлэсь 5:6, 7.) Яратыса тупатэменыз, Инмар дышетэ милемыз. Соин ик ойдолэ солэн кияз небыт горд сюй кадь луомы.

¹¹ Куинетӥез — Севнаен луэм учыр пыр Иегова умой пример возьматӥз соослы, кинъёслы мукетъёссэ тупатыны право сётэмын, кылсярысь, анай-атайёслы но христиан кенешысь тӧроослы. Малы соос дышетскыны быгато? Иегова сьӧлыкез адӟемпотостэм каре, нош сьӧлыкам адямиез тупатыса, со сюлмаське со сярысь. Тӥледлы пиналдэс яке кенешысь вын-агаез яке сузэр-апаез тупатоно ке, адӟем кароды-а тӥ Иеговалэсь, кудӥз адямилэсь умой сямъёссэ адӟыны тырше,  нош сьӧлыко ужез адӟемпотостэм каре? (Иуда 22, 23).

12—14. а) Кызьы куд-огъёсыз Иеговалэн кыл кутытэмез шоры учко? б) Кызьы одӥг вын-агай, Инмарлэн юрттэменыз, аслэсьтыз сямзэ воштыны быгатӥз но кыӵе емышъёс со вайиз?

¹² Жаляса верано луэ, куд-ог христианъёс соосты тупатэм бере кӧт ӝожзэс уг вунэто но Инмар дорысь но солэн калыкез дорысь палэнско (Евр. 3:12,  13). Возьматэ-а со, соослы юрттыны уг луы ни шуыса? Тани Грэмлэн примерез. Сое кенешысь поттӥзы. Нош берлогес сое выльысь кенеше пыртӥзы ке но, со тодытон уже пыриськемысь дугдӥз. Кӧня ке ар ортчыса, Грэм одӥг тӧроез, кудӥз азьло соин эшъяськыны турттӥз, соин Библиез дышетыны куриз.

¹³ Со тӧро тодаз вае: «Грэмлы вылтӥяськон сямыз люкетэ вал. Со тэрга вал тӧроосты, кудъёсыз сое кенешысь поттыны ужпум кутӥзы. Соин ик ми соин кӧня ке пол пумиськылӥмы, эскерон понна, мар со сыӵе вылтӥяськон сям но кытчы со вуттэ. Грэм ассэ Инмарлэн Кылысьтыз синучконысь кадь адӟыны кутскиз. Но со, мае со отысь адӟиз, солы туж ӧз кельшы! Куке со валаз, солы люкетэ шуыса вылтӥяськон, кудӥз солэн синмаз „кор“ луэ, но солы тэргаськон сямызлэсь куштӥськоно шуыса, со соку ик тупатскыны тыршиз. Со кутскиз христиан пумиськонъёсы кельтылытэк ветлыны, Инмарлэсь Кылзэ мур дышетыны но котькуд нунал вӧсяськыны. Со сяна, со семьялэн йырыз бере, со кутскиз юрттыны семьяезлы Инмарен кусыпъёссэ юнматыны. Со туж шумпоттӥз солэсь кышнозэ но нылзэ» (Лука 6:41, 42; Иак. 1:23—25).

¹⁴ Со тӧро азьланьтэ: «Одӥг пол Грэм вераз сое, мар мынам сюлмам ик пыриз. Со шуиз: „Зэмлыкез мон трос аръёс ӵоже тодӥсько ини, пионер луыса но ужай-тырши. Но али гинэ мон зэмзэ ик вераны быгатӥсько, Иеговаез яратӥсько шуыса“. Кӧня ке дыр ортчыса, сое куризы Эксэйлык юртын микрофонэз нуллыны. Со туж дунъя со оскем ужез. Солэн примерез дышетэ монэ: адями ассэ Инмар азьын зӥбыт-востэм каре но Инмарлэсь тупатэмзэ санэ понэ ке, бакель каронъёс озьы ик кисьтӥсько со вылэ».

15. Мар милемлы кароно, милям потэ ке, тупатэммы адямилы пайда мед ваёз шуыса?

¹⁵ Умой дышетӥсь нырысь ачиз умой дышетскись луэ (1 Тим. 4:15, 16). Соин ик соослы, кинлы Инмар мукетъёссэ тупатыны право сётӥз, котьку мылысь-кыдысь Иеговалэн сётэм визь-кенешъёсызъя лэсьтыны кулэ. Со юрттоз соослы гажамон адями луыны, но соос, номырлэсь возьдаськытэк, мукетъёссэ дышетыны но тупатыны быгатозы. Тодамы ваёмы Иисуслэсь примерзэ.

16. Кызьы ми Иисуслэсь дышетскыны быгатӥськомы солы, кызьы дышетскисьёсты тупатоно но дышетоно?

¹⁶ Иисус Атаезлэсь кылзӥськиз соку но, куке солэсь кылзӥськыны капчи ӧй вал (Матф. 26:39). Со сяна, со вералляз, солэн дышетонэз но визьлыкез Инмар бордысь пото шуыса (Иоанн 5:19, 30). Зӥбыт-востэм но кылзӥськись сямъёсыз Иисусэз гажась-жалясь но лякыт дышетӥсь  каро вал, соин ик кылзӥськись сюлэмо адямиос со доры кыстӥськизы. (Лыдӟе Матфейлэсь 11:29.) Лякыт кылъёс вераса, со буйгатылӥз соосты, кинъёс чигтэм камыш боды яке гыбдась етӥн кадь вал (Матф. 12:20). Куке Иисуслэн дышетскисьёсыз ченгешизы, кин соос пӧлысь бадӟымез луэ шуыса, соку но Иисус соосты тупатӥз, яратэмзэ но лякыт сямо луэмзэ возьматыса (Марк 9:33—37; Лука 22:24—27).

17. Кыӵе сямъёс юрттозы тӧроослы кенеш сярысь умой сюлмаськыны?

¹⁷ Соос, кинъёслы право сётэмын Библия вылэ пыкиськыса тупатыны, визьмо лэсьто, Христослэсь адӟем каро ке. Озьы соос возьмато, Инмарлы но солэн Пиезлы соосты дышетыны лэзё шуыса. Апостол Пётр гожтӥз: «Тӥледлы оскыса сётэм Инмарлэсь уллёзэ тыршыса, нокин косытэк-ёртытэк, сюлэмдэс-мылкыддэс поныса, кызьы кулэ Инмарлы, озьы чаклалэ-уте сое. Отысь асьтэлы возьыттэмлыко пайда эн утчалэ. Инмарлэн тӥ киулэ сётэм муртъёсызлы кужымдэс эн возьматэ, уллёлы адӟем карымонэсь луэ» (1 Пётр 5:2—4). Веранэз ӧвӧл, тӧроос Инмарлэсь но Христослэсь, кенешлэн йырызлэсь, мылысь-кыдысь кылзӥсько ке, со пайда вае асьсэлы но ваньмызлы, кинъёс сярысь соос сюлмасько (Ис. 32:1, 2, 17, 18).

18. а) Мае Иегова анай-атайёслэсь возьма? б) Кызьы Инмар анай-атайёслы сётэм ужзэс быдэстыны юрттэ?

¹⁸ Семьяын но озьы ик лэсьтӥд ке, со пайда ваёз. Библия семьяослэсь йыръёссэс ӧте: «Асьтэлэсь нылпиостэс эн керӟегъяськытэ, Кузё-Инмарлэн дышетонэз, валэктон-визьманъёсыз вылэ пыкиськыса, соосты будэтэ» (Еф. 6:4). Макем со кулэ? Библия возьматэ, анай-атайёс нылпиоссэс ӧз дышетэ ке озьы, кызьы кулэ, Иегова соосты кыл кутытоз шуыса (1 Экс. 3:12—14). Иегова анай-атайёслы визьлык но кулэ луись кужым сётэ, куке соос зӥбыт-востэм луыса Инмарлы со сярысь вӧсясько, солэн Кылысьтыз визь-кенеш но юрттэт утчало но святой духлы соосты валтыны лэзё. (Лыдӟе Иаковлэсь 1:5.)

19, 20. а) Кызьы Иегова милемыз бакель кароз, ми солэсь тупатэмзэ санэ понӥмы ке? б) Мае ми эскеромы мукетаз статьяын?

¹⁹ Иеговаез милемыз тупатыны лэзимы но солэсь но Иисуслэсь адӟем каримы ке, кызьы мукетъёссэ тупатоно, ми трос бакель каронъёс басьтомы. Семьяос, нош озьы ик кенешъёс но, кышкыттэм инты луозы, кытын котькудӥз шӧдоз, сое ярато но дунъяло шуыса (Пс. 71:7). Зэм, Иеговалэн тупатэмез дася асьмемыз со дырлы, куке ми пырак дауръёс ӵоже одӥг семья кадь тупаса уломы, кудӥз сярысь Иегова Атаймы сюлмаське. (Лыдӟе Исаиялэсь 11:9.) Сое тодамы возьыса, ми котьку лыдъяломы, тупатэменыз Иегова яратэмзэ возьматэ шуыса.

²⁰ Мукет статьяысь ми тросгес тодомы, кызьы анай-атайёс нылпиоссэс визьманы быгато но кызьы кенеш милемлы умой пала воштӥськыны юрттэ. Озьы ик, ми эскеромы, кызьы возиськись луоно, но вераськомы со сярысь, мар кыл кутытонлэсь но вӧсьгес карыны быгатэ.