1. Ha ano nga paagi kasagaran nga iginhuhulagway han Biblia an disiplina?

KON nababatian mo an pulong nga “disiplina,” ano an imo nahuhunahuna? Bangin nahuhunahuna mo dayon an may kalabotan ha sirot, pero labaw pa hito an nahiuupod. Ha Biblia, an disiplina kasagaran nga iginhuhulagway ha positibo nga paagi, usahay kaupod han kahibaro, kinaadman, gugma, ngan kinabuhi. (Prob. 1:2-7; 4:11-13) Tungod ito kay an disiplina han Dios ebidensya han iya gugma ha aton ngan han iya hingyap nga mabuhi kita ha waray kataposan. (Heb. 12:6) Bisan kon an iya disiplina usahay nag-uupod hin sirot, diri ito madarahog o nakakadaot. Ngani, an nangunguna nga kahulogan han “disiplina” konektado ha pagtutdo, sugad han pagtutdo nga nahiuupod ha pagpadaku hin hinigugma nga anak.

2, 3. Paonan-o an disiplina mahimo mag-upod hin pagtutdo ngan sirot? (Kitaa an retrato hini nga pahina.)

² Hunahunaa ini nga ehemplo: An bata nga hi Johnny nag-iinuyag hin bola ha sulod han balay. Ginsidngan hiya han iya nanay: “Johnny, maaram ka nga diri ka sadang mag-uyag han imo bola ha sulod han balay! Bangin ka makabuong.” Pero waray niya sunda an sugo han iya nanay, padayon hiya nga nag-inuyag han iya bola ngan nakabuong hin plorera. Paonan-o hiya didisiplinahon han iya nanay? An pagdisiplina han iya nanay bangin mag-upod hin pagtutdo ngan sirot. Basi matutdoan  hi Johnny, bangin ipahinumdom ha iya han iya nanay kon kay ano nga sayop an iya ginbuhat. Karuyag han nanay ni Johnny nga masabtan niya nga maaramon an pagsugot ha iya mga kag-anak ngan nga an ira mga patakaran importante ngan makatadunganon. Ngan basi ipakita nga seryoso hiya ha iya mga ginyakan, bangin magpadapat hiya kan Johnny hin angayan nga sirot. Pananglitan, bangin kuhaon niya kan Johnny an bola ngan itago ito ha sulod hin pipira ka panahon. Mahimo ini magtutdo kan Johnny nga an pagin diri masinugtanon may magraot nga resulta.

³ Sugad nga membro han Kristiano nga kongregasyon, bahin kita han panimalay han Dios. (1 Tim. 3:15) Salit ginrirespeto naton an katungod ni Jehova ha paghimo hin mga suruklan ngan paghatag hin mahigugmaon nga disiplina kon gintatalapas naton ito. Dugang pa, kon an aton mga buhat nagkaada magraot nga resulta, an iya disiplina magpapahinumdom ha aton kon mationan-o kaimportante an pagsugot ha aton langitnon nga Amay. (Gal. 6:7) Hinigugma gud kita han Dios ngan diri niya karuyag nga mag-antos kita.—1 Ped. 5:6, 7.

4. (a) Ano nga klase hin pagtutdo an ginbibendisyonan ni Jehova? (b) Ano an aton hihisgotan hini nga artikulo?

⁴ Pinaagi ha paghatag hin Kasuratanhon nga disiplina, mabubuligan naton an aton anak o an usa nga estudyante ha Biblia nga makab-ot an tumong nga magin sumurunod han Kristo. An Pulong han Dios, nga aton nangunguna nga garamiton ha pagtutdo, nabulig ha aton ha “pagdisiplina uyon ha katadongan.” Salit mabubuligan naton an aton anak o estudyante ha Biblia nga masabtan ngan ‘tumanon an ngatanan nga iginsugo ni Jesus ha aton.’ (2 Tim. 3:16; Mat. 28:19, 20) Ginbibendisyonan ni Jehova an sugad nga pagtutdo, nga nabulig ha mga estudyante ha Biblia nga magin andam ha pagtutdo ha mas damu pa nga tawo nga magin mga disipulo han Kristo. (Basaha an Tito 2:11-14.) Hisgotan naton inin tulo nga importante nga pakiana: (1) Paonan-o an disiplina han Dios nagpapakita han iya gugma ha aton? (2) Ano an aton mahibabaroan mahitungod ha mga tawo nga gindisiplina han Dios hadto? (3)  Kon naghahatag kita hin disiplina, paonan-o naton masusubad hi Jehova ngan an iya Anak?

5. Ha ano nga mga paagi an disiplina ni Jehova nagpapakita han iya gugma ha aton?

⁵ Tungod kay hinigugma kita ni Jehova, iya kita ginsasaway, gintututdoan, ngan ginbabansay basi magpabilin kita ha iya gugma ngan ha dalan ngadto ha kinabuhi. (1 Juan 4:16) Diri gud kita niya ginmiminos o gin-iinsulto basi diri kita umabat nga waray kita bili. (Prob. 12:18) Lugod, gintatagan kita ni Jehova hin dignidad, ginkikita niya an aton mag-opay nga kalidad, ngan ginrirespeto niya an aton kagawasan ha pagbuot. Ini ba an imo panhunahuna ha disiplina han Dios, pinaagi man ito ha iya Pulong, mga publikasyon nga basado ha Biblia, Kristiano nga mga kag-anak, o mga tigurang ha kongregasyon? Ngani, kon an mga tigurang nangangalimbasog nga tadungon kita ha buotan ngan mahigugmaon nga paagi antes pa naton hibaroan nga nakahimo kita hin “sayop nga pitad,” iginpapakita nira an gugma ni Jehova ha aton.—Gal. 6:1.

6. Kon an disiplina nag-uupod hin kawad-i hin pribilehiyo o pagpaiwas ha kongregasyon, paonan-o ito nagpapakita han gugma han Dios?

⁶ Pero ha panapanahon, an disiplina ni Jehova bangin mag-upod hin labaw pa kay han sagdon o pagsaway. Kon an usa nakabuhat hin seryoso nga sala, an disiplina ha iya bangin mag-upod hin kawad-i hin pribilehiyo ha kongregasyon. Pero bisan kon ito an mahitabo, an sugad nga disiplina nagpapakita han gugma han Dios ha iya. Pananglitan, an kawad-i hin pribilehiyo mahimo makabulig ha usa nga masantop kon ano kaimportante an paggahin hin dugang nga panahon para ha personal nga pag-aram ha Biblia, pagpamalandong, ngan pag-ampo. An pagbuhat hini makakabulig ha iya nga magkaada marig-on nga espirituwalidad. (Sal. 19:7) Ha urhi, bangin maibalik ha iya an iya pribilehiyo. Bisan an pagpaiwas ha kongregasyon nagpapakita han gugma ni Jehova, kay nagpapanalipod ito ha kongregasyon tikang ha magraot nga impluwensya. (1 Cor. 5:6, 7, 11) Ngan tungod kay makatadunganon an disiplina han Dios, an pagpaiwas makakabulig  ha nakasala nga mahunahuna kon ano kaseryoso an iya sala ngan magpapagios ha iya nga magbasol.—Buh. 3:19.

7. Hin-o hi Sebna, ngan ano nga maraot nga kalidad an iya napatubo?

⁷ Basi pabug-atan an kapulsanan han disiplina, hisgotan naton an duha nga indibiduwal nga gindisiplina ni Jehova: hi Sebna, nga nabuhi ha panahon ni Hadi Hesekia, ngan hi Graham, usa nga bugto ha aton panahon. Sugad nga tinaporan han panimalay—nga posible kan Hesekia—daku an awtoridad ni Sebna. (Isa. 22:15) Pero makasurubo kay nagin mapahitas-on hiya ngan naghingyap hin himaya para ha iya kalugaringon. Nagpahimo pa ngani hiya hin magarbo nga lubnganan para ha iya kalugaringon, ngan sinakay ha magarbo nga mga karuwahe!—Isa. 22:16-18.

8. Paonan-o gindisiplina ni Jehova hi Sebna, ngan ano an resulta hito?

⁸ Tungod kay nangalimbasog hi Sebna nga makakarawat hin himaya para ha iya kalugaringon, ginkuha hiya han Dios ha iya katungdanan ngan ginsaliwnan hiya kan Eliakim. (Isa. 22:19-21) Nahitabo ini han nagplano an Hadi han Asirya nga hi Senakerib nga atakehon an Jerusalem. Ha urhi, nagpadara hi Senakerib hin mga opisyal ngan damu nga kasundalohan ngadto ha Jerusalem, basi hadlukon an mga Judio ngan pasurenderon hi Hesekia. (2 Hadi 18:17-25) Hi Eliakim an ginsugo nga makiistorya ha mga opisyal, pero diri hiya nag-uusahan. May duha pa niya nga kaupod, usa ha ira hi Sebna, nga amo na an sekretaryo hito nga panahon. Posible ba nga iginpapakita hini nga waray masina ngan magdumot hi Sebna, lugod mapainubsanon nga ginkarawat an mas ubos nga katungdanan? Kon oo, ano nga mga leksyon an aton mahibabaroan hini nga rekord? Hisgotan naton an tulo hito.

9-11. (a) Ano nga importante nga mga leksyon an aton mahibabaroan ha eksperyensya ni Sebna? (b) Paonan-o ka naparig-on han pagtratar ni Jehova kan Sebna?

⁹ Siyahan, nawad-an hi Sebna han iya posisyon. An nahitabo ha iya nagpapakita nga tinuod an pahamangno nga “an palabilabi naguuna han pagkagunaw, ngan an mapahitas-on nga espiritu naguuna han pagkaholog.” (Prob. 16:18) Kon may-ada ka mga pribilehiyo ha kongregasyon, bangin prominente ka pa ngani, mangangalimbasog ka ba nga magpabilin nga mapainubsanon? Ihahatag mo ba kan Jehova an pasidungog ha anoman nga abilidad nga may-ada ka o ha imo mga kalamposan? (1 Cor. 4:7) Hi apostol Pablo nagsurat: “Ginsusumatan ko an tagsa ha iyo nga diri maghunahuna mahitungod ha iya kalugaringon hin labaw kay ha angay niya hunahunaon, lugod ipakita niyo nga may maopay nga panhunahuna kamo.”—Roma 12:3.

¹⁰ Ikaduha, bisan kon mapwersa nga ginsaway ni Jehova hi Sebna, posible nga iginpapakita hito nga naglalaom hi Jehova nga magbabag-o hi Sebna. (Prob. 3:11, 12) Maopay gud ito nga leksyon para hadton nawad-an hin mga pribilehiyo ha  kongregasyon han Dios yana! Imbes nga masina ngan magdumot, hinaot padayon hira nga mag-alagad ha Dios ha ira bug-os nga mahihimo ha ira bag-o nga kahimtang ngan hunahunaon nga an disiplina ni Jehova ebidensya han iya gugma. Tigamni nga diri gud huhunahunaon han aton Amay nga waray na kita paglaom nga magbag-o kon magpapabilin kita nga mapainubsanon. (Basaha an 1 Pedro 5:6, 7.) An mahigugmaon nga disiplina mahimo magin paagi ni Jehova ha pagmolde ha aton, salit magpabilin kita nga masayon moldehon ha iya mga kamot.

¹¹ Ikatulo, an pagtratar ni Jehova kan Sebna nagtututdo hin birilhon nga leksyon ha mga may awtoridad ha paghatag hin disiplina, sugad han mga kag-anak ngan Kristiano nga mga paramangno. Ano ito nga leksyon? Bisan kon an disiplina ni Jehova nagpapakita nga nangangalas hiya ha sala, iginpapakita liwat hito nga hinigugma niya an nakasala. Kon kinahanglan niyo magpadapat hin disiplina sugad nga mga kag-anak o mga paramangno, susubaron ba niyo hi Jehova, nga ginkakangalasan an sayop nga buhat pero ginkikita an maopay nga kalidad han iyo anak o igkasi-tumuroo?—Jud. 22, 23.

12-14. (a) Ano an reaksyon han pipira ha disiplina han Dios? (b) Paonan-o an Pulong han Dios nakabulig ha usa nga bugto nga bag-uhon an iya disposisyon, ngan ano an mga resulta hito?

¹² Makasurubo nga katapos makakarawat hin disiplina, may pipira nga nasakitan hinduro ngan nagpahirayo pa ngani ha Dios ngan ha iya katawohan. (Heb. 3:12, 13) Nagpapasabot ba ito nga waray na makakabulig ha ira nga magbag-o? Hunahunaa an eksperyensya ni Graham. Ginpaiwas hiya ha kongregasyon, ngan ha urhi nakabalik, katapos nagin diri aktibo ha pag-alagad. Paglabay hin pipira ka tuig, ginhangyo niya an usa nga tigurang nga nakigsangkay ha iya nga dumarahan hiya hin pag-aram ha Biblia.

¹³ An tigurang nagsiring: “Nakukurian hi Graham ha pagpaubos. Negatibo an iya panhunahuna ha mga tigurang nga nagpaiwas ha iya. Salit ha amon sumunod nga mga pag-aram, ginhisgotan namon an mga teksto nga may kalabotan ha pagpahitaas ngan an mga epekto hito. Klaro nga nakita ni Graham an iya kalugaringon ha espiho han Pulong han Dios, ngan waray gud niya maruyagi an iya nakita! Daku gud an nagin epekto hito ha iya! Han nasantop niya nga nabutahan hiya han ‘usa nga daku nga kahoy’ han pagin mapahitas-on ngan nga an iya pagin kritiko amo an hinungdan han iya problema, nangalimbasog dayon hiya nga magbag-o. Nagtikang hiya pagtambong hin regular ha mga katirok, nagin maduruto ha pag-aram han Pulong han Dios, ngan nangalimbasog nga mag-ampo adlaw-adlaw. Gintuman liwat niya an iya espirituwal nga mga responsabilidad sugad nga ulo han pamilya, ngan nalipay gud hito an iya asawa ngan mga anak.”—Luc. 6:41, 42; San. 1:23-25.

¹⁴ An tigurang dugang nga nagsiring: “Usa ka adlaw, may ginsiring ha akon hi Graham nga nakabantad gud han akon kasingkasing. ‘Maiha na ako nga maaram han kamatuoran,’ siring niya, ‘ngan nagin payunir pa ngani ako. Pero yana ko gud la masisiring nga hinigugma ko hi Jehova.’ Waray pag-iha, gintokahan hiya nga magin microphone server ha Kingdom Hall—pribilehiyo nga iya gud ginpabilhan. An iya susbaranan nagtutdo ha akon nga kon an usa magpapaubos ha atubangan han Dios pinaagi ha pagkarawat hin disiplina, hura hiya nga bibendisyonan!”

15. Kon karuyag naton nga magin epektibo an disiplina nga aton iginhahatag ha iba, ano an kinahanglan naton buhaton?

¹⁵ Basi magin maopay nga magturutdo, kinahanglan anay kita magin maopay nga estudyante. (1 Tim. 4:15, 16) Ha pariho nga paagi, adton gintagan han Dios hin awtoridad ha pagdisiplina ha iba kinahanglan padayon nga magin andam ha pagsunod han giya ni Jehova. An ira mapainubsanon nga pagpasakop mabulig nga respetuhon hira ngan maghahatag ha ira hin kagawasan ha pagyakan kon nagtututdo o nagsasagdon ha iba. Hunahunaa an ehemplo ni Jesus.

16. Ano an pipira nga leksyon nga aton mahibabaroan kan Jesus mahitungod ha paghatag hin angayan nga disiplina ngan epektibo nga pagtutdo?

 ¹⁶ Hi Jesus pirme namamati ngan nasugot ha iya Amay, bisan kon makuri an pagbuhat hito. (Mat. 26:39) Ngan iya ginsusumatan an iya mga mamarati nga an iya mga katutdoan ngan kinaadman tikang ha iya Amay. (Juan 5:19, 30) An pagpaubos ngan pagkamasinugtanon ni Jesus nagpagios ha sinsero nga mga tawo nga humirani ha iya, ngan nakabulig ito ha iya nga magin mapinairon ngan buotan nga magturutdo. (Basaha an Lucas 4:22.) An iya mahigugmaon nga mga pulong nagparig-on ha mga tawo nga sugad hin mga rumok nga tangbo o pabilo nga tikaparong na. (Mat. 12:20) Bisan ha panahon nga nasasarihan an iya pagpailob, nagpabilin hi Jesus nga buotan ngan mahigugmaon. Nakita ini han ginsaway niya an iya mga apostol tungod han ira pagin makikalugaringon ngan pagin ambisyoso.—Mar. 9:33-37; Luc. 22:24-27.

17. Ano nga mag-opay nga kalidad an mabulig ha mga tigurang nga magin epektibo ha pag-ataman han panon han Dios?

¹⁷ Maaramon an ngatanan nga may awtoridad ha paghatag hin Kasuratanhon nga disiplina kon ginsusubad nira an ehemplo han Kristo. Ngani, an ira pagbuhat hito nagpapakita nga karuyag nira nga moldehon hira han Dios ngan han iya Anak. Hi apostol Pedro nagsurat: “Atamana an panon han Dios nga igintapod ha iyo, diri nga napipiritan kamo, kondi kinaburut-on; diri tungod ha hingyap nga makabentaha ha malimbong nga paagi, lugod tungod han hingyap nga magserbi; diri nagmamayor-mayor ha mga panag-iya han Dios, lugod magin mga susbaranan ha panon.” (1 Ped. 5:2-4) An mga paramangno nga malipayon nga nagpapasakop ha Dios ngan ha Kristo, an ulo han kongregasyon, sigurado nga nagpapahimulos hito nga pagpasakop pati na an ira mga ginmamangnoan.—Isa. 32:1, 2, 17, 18.

18. (a) Ano an ginlalaoman ni Jehova nga bubuhaton han mga kag-anak? (b) Paonan-o ginbubuligan han Dios an mga kag-anak ha pagtuman han ira responsabilidad?

¹⁸ Ito nga mga prinsipyo aplikado liwat ha pamilya. An mga ulo han pamilya ginsusugo: “Ayaw niyo pag-aringita an iyo mga anak, lugod atamana hira uyon ha disiplina ngan sagdon ni Jehova.” (Efe. 6:4) Ano kaseryoso ini nga butang? An Proberbios 19:18 nasiring: “Badlonga an imo anak, kay mayada an paglaum; ngan ayaw igbutang an iya kasingkasing ha iya kagunawan.” Oo, may baratunon kan Jehova an Kristiano nga mga kag-anak kon mapakyas hira paghatag hin ginkikinahanglan nga disiplina ha ira anak! (1 Sam. 3:12-14) Pero, gintatagan ni Jehova an mga kag-anak hin kinaadman ngan kusog nga ira ginkikinahanglan kon mapainubsanon nga nangangaro hira hin bulig pinaagi ha pag-ampo ngan nasarig ha giya han iya Pulong ngan han iya baraan nga espiritu.—Basaha an Santiago 1:5.

19, 20. (a) Ano nga mga bendisyon an aton napapahimulosan kon ginkakarawat naton an disiplina han Dios? (b) Ano an aton hihisgotan ha sunod nga artikulo?

¹⁹ Damu gud nga bendisyon an aton napapahimulosan kon ginkakarawat naton an disiplina han Dios ngan kon ginsusubad naton an paagi han pagdisiplina ni Jehova ngan ni Jesus. An mga pamilya ngan kongregasyon nagigin mamurayawon ngan inaabat liwat han kada tagsa nga hinigugma gud hira, ginpapabilhan, ngan may seguridad. Sampol la ini han mga bendisyon nga aton mapapahimulosan ha tidaraon. (Sal. 72:7) Salit masisiring gud naton nga an disiplina ni Jehova nagtututdo ha aton kon paonan-o magkikinabuhi nga mamurayawon ngan nagkakaurosa ha waray kataposan sugad nga pamilya ilarom han iya pagmangno sugad nga aton Amay. (Basaha an Isaias 11:9.) Kon sugad hito an aton panhunahuna ha disiplina han Dios, masasabtan naton nga ito nga disiplina marig-on nga pamatuod han diri matupngan nga gugma han Dios ha aton.

²⁰ Ha sunod nga artikulo, hihisgotan naton an iba pa nga butang may kalabotan ha disiplina ha sulod han pamilya ngan han kongregasyon. Uusisahon liwat naton an mahitungod ha disiplina ha kalugaringon ngan an usa nga butang nga mas masakit pa gud kay han bisan ano nga temporaryo nga kasakit nga posible magin resulta han disiplina.