Akɛnɛ wa jua we wa Baiblo kasemi ní ɔmɛ he je ɔ, ni komɛ susu kaa tɔmi be he kaa a maa gbla ní nɛ ɔmɛ kɛ fɔ wɛbsaiti kpahi aloo Intanɛti huɛ bɔmi hehi a nɔ. Se ke nɔ ko pee jã a, e tɔ̃ wa wɛbsaiti ɔ mlaahi nɛ ngɛ E He Mlaahi * blɔ he ɔ nɔ. Nihi pee jã nɛ e ngɔ nyagbahi fuu kɛ ba. Kaa bɔ nɛ a tsɔɔ mi heii ngɛ Mlaa nɛ ɔ mi ɔ, wa ha we nɔ ko he blɔ kaa e “ngɔ níhi nɛ a tɛni, Baiblo kasemi níhi, kadimi níhi, lahi, fonihi, videohi, aloo munyuhi nɛ a ngɛ Intanɛti ní tsumi he nɛ ɔ nɔ ɔ kɛ ya fɔ Intanɛti ní tsumi he kpahi a nɔ (Intanɛti ní tsumi he saisaa, sɛ gbi manemi hehi, video manemi hehi, aloo huɛ bɔmi hehi).” Mɛni he je nɛ wa ha we nihi he blɔ kaa a pee jã a?

Níhi tsuo nɛ ngɛ wa wɛbsaiti ɔ nɔ ɔ ngɛ copyright mlaa sisi. Hemi kɛ yemi kuali kɛ nihi nɛ a teɔ si kɛ woɔ Yehowa Odasefohi ɔ bɔɔ mɔde kaa a maa ngɔ wa Baiblo kasemi níhi kɛ fɔ a wɛbsaitihi a nɔ nɛ a kɛ mlɔɔ Yehowa Odasefohi kɛ ni kpahi. A pee wɛbsaiti nɛ ɔmɛ konɛ a ha nɛ ní kaneli a yi mi nɛ pee mɛ enyɔɔnyɔ. (La 26:4; Abɛ 22:5) Ni komɛ ngɔɔ níhi ngɛ wa Baiblo kasemi ní ɔmɛ a mi, aloo a ngɔɔ jw.org okadi ɔ kɛ tsɛɔ jua. A kɛ mɛtɛɔ níhi nɛ a ngɛ juae a he, a kɛ peeɔ app komɛ kɛ haa tablɛti kɛ mobile fon. Akɛnɛ waa kɛ wa ní ɔmɛ wo copyright mlaa sisi he je ɔ, wa ngɛ he blɔ ngɛ mlaa nya kaa wa maa tsi nihi a nya nɛ a kɛ wa kadimi ní ɔmɛ ko tsu ní ngɛ jamɛ a blɔ ɔ nɔ. (Abɛ 27:12) Se ke wa ngmɛ wa nyɛmimɛ kɛ nihi blɔ nɛ a gblaa videohi loo lahi ngɛ wa wɛbsaiti ɔ nɔ kɛ fɔɔ wɛbsaiti kpahi a nɔ, aloo a ngɔɔ jw.org okadi ɔ kɛ mɛtɛɔ níhi a he nɛ  a juaa a, kojomi hehi be wɔ ye buae ke si temi kɛ woli kɛ jua yeli ngɔ wa níhi kɛ ngɛ ní tsue ngɛ blɔ yaya nɔ.

Ngɛ jw.org se ɔ, oslaa ngɛ he kaa nɔ ko maa gbla wa Baiblo kasemi ní ɔmɛ ngɛ wɛbsaiti kpahi a nɔ. “Tsɔlɔ anɔkualetsɛ kɛ ní lelɔ ɔ” pɛ nɛ Yehowa ha lɛ he blɔ kaa e ha e we bi mumi mi niye ní. (Mat. 24:45) Intanɛti ní tsumi hehi nɛ “tsɔlɔ” ɔ nitsɛ pee ɔ nɔ nɛ e ngɔɔ mumi niye ní nɛ e toɔ he blɔ nya a kɛ fɔɔ. Intanɛti ní tsumi he nɛ ɔmɛ ji, www.pr418.com, tv.pr418.com, kɛ wol.pr418.com. App etɛ nɛ tsuɔ ní ngɛ fon kɛ tablɛti nɔ nɛ tsɔlɔ ɔ pee ji JW Language^®, JW Library^®, kɛ JW Library Sign Language^®. Wa ma nyɛ ma ná nɔ mi mami kaa jua tsɛmi nɔ́ ko be wa wɛbsaiti ɔmɛ kɛ wa app ɔmɛ a nɔ, nɛ níhi nɛ Satan je ɔ kɛ mlɔɔ nihi ɔ hu, eko be a nɔ. Se ke nɔ ko ya gbla wa Baiblo kasemi níhi ngɛ he kpa ko ɔ, lɛɛ wa be nyɛe maa ma nɔ mi kaa a tsake níhi ngɛ mi loo a tsakee we níhi ngɛ mi.​—La 18:26; 19:8.

Jehanɛ se hu ɔ, ke nɔ ko ngɔ wa Baiblo kasemi ní ɔmɛ eko kɛ ya fɔ wɛbsaiti ko nɛ nihi tsɔɔ a juɛmi ngɛ níhi a he ɔ nɔ ɔ, hemi kɛ yemi kuali kɛ si temi kɛ woli náa he blɔ nɛ a deɔ níhi nɛ ma ha nɛ nihi nɛ a ná susumi nɛ dɛ ngɛ Yehowa asafo ɔ he. Nyɛmimɛ komɛ ngɔ a he kɛ wo nya sami mi ngɛ wɛbsaiti nɛ ɔmɛ ekomɛ a nɔ, nɛ lɔ ɔ ha nɛ nihi gbe Yehowa biɛ ɔ he guɛ. Tsa pi hehi kaa jã nɛ waa kɛ ‘he jɔmi maa tsɔɔ nihi nɛ a be su kpakpa a ní’ ngɛ. (2 Tim. 2:23-25; 1 Tim. 6:3-5) Wa to he hɛ kaa nihi ngɔ asafo ɔ kɛ Blɔ Tsɔɔmi Ajla Toli ɔmɛ a biɛhi kɛ bli wɛbsaitihi kɛ huɛ bɔmi hehi ngɛ Intanɛti ɔ nɔ konɛ a kɛ sisi nihi. Se Blɔ Tsɔɔmi Ajla Toli ɔmɛ a kpɛti nɔ ko be lɛ nitsɛ e wɛbsaiti, nɛ a ti nɔ ko kɛ e biɛ bli we account ngɛ Intanɛti huɛ bɔmi he ko nɔ.

Ke wa gbla nihi a juɛmi kɛ ya jw.org ɔ nɔ ɔ, “sane kpakpa” a maa su tsitsaa. (Mat. 24:14) A pɔɔ kɔmpiuta blɔ nɔ tomihi nɛ waa kɛ tsuɔ ní ngɛ wa sɔmɔmi ní tsumi ɔ mi ɔ a hɛ mi tsakemi konɛ a tsu ní saminya. Wa suɔ nɛ nɔ fɛɛ nɔ nɛ ná he se. Enɛ ɔ he ɔ, kaa bɔ nɛ a tsɔɔ ngɛ E He Mlaahi blɔ he ɔ, o ma nyɛ maa mane nɔ ko Baiblo kasemi níhi kɛ gu e-mail nɔ aloo o ma nyɛ maa mane lɛ nɔ́ ko nɛ o suɔ kaa e kane aloo e hyɛ ngɛ jw.org ɔ nɔ ɔ he link. Ke wa ha nɛ nihi nɛ a bua jɔ anɔkuale ɔ he ɔ ya jw.org ɔ nɔ ɔ, a maa na Mawu he anɔkuale tsɔɔmihi nɛ da nɛ je “tsɔlɔ anɔkualetsɛ kɛ ní lelɔ ɔ” pɛ ngɔ ɔ.