Calu ma wabed wamio girasoma mwa m’ujengere iwi Biblia m’umbe cul, dhanu moko beparu nia uyiere niketho girasoma kunoke video mwa i kusika mange mir Internet. Ento, nitimo kumeno tie nituro Cik mi tio ku kusika mwa * mir Internet, man udaru nyayu lembe ma dongo. Calu ma cikne uyero terere, ukwerere magwei ‘niketho cal m’akuba, girasoma mir elektronik, ayi mi jw kunoke jw.org, mizik, fotho, video, kunoke lembe moko ci mi kusika maeni iwi kusika mange mir Internet (kusika moko ci, kusika ma jutio ko pi nipoko lembe i kindjo, man kusika mange mi weco ku jurimo).’ Pirang’o cik maeno?

Piny ceke ma nwang’ere i kusika mwa mir Internet utie i the twero (copyright) mwa kende. Ju m’ujai i kum lemandha man judhogwa gibed gipimo niketho girasoma man video mwa i kusika migi mir Internet pi nitelo nen mi Jumulembe pa Yehova man mi dhanu mange. Giyabu kusika migine pi niroyo jiji i dhanu ma gibed gisomo girasoma mwa. (Zab. 26:4; Rie. 22:5) Jumange ke gibed gitio kud ayi mi jw.org pi niyawu pi piny ma gibelworo, kunoke pi program (applications) mi telefon kunoke mi tablette. Re ukwayu ning’eyo nia cik umio iwa twero mi cero man mi twiyo dhanu m’ubetio rac ku piny ceke mi kusika mwa man ayi mi jw.org. (Rie. 27:12) Ento ka wabeweko nia dhanu mange, kadok umego mwa, giketh piny mwa mir elektronik i kusika mange mir Internet, kunoke gitii kud ayi mwa mi jw.org pi nilworo piny migi, cik copo konyowa ngo pi nituro cwiny judhogwa man jukuloka ma gibetio rac ku piny mwa.

 Nitoko girasoma kunoke video mwa niai kud i kusika mange m’uweko jw.org tie kud ariti. Yehova umio rwom mi mio cam mi tipo ni ‘jamiru mandha man ma riek’ kende. (Mat. 24:45) “Jamiru” maeno betio kende kende ku kusika pare m’anzilo man ma cik de ng’eyo pigi, pi nimio cam mi tipo. Kusikane gini e: www.pr418.com, tv.pr418.com, and wol.pr418.com. M’uweko maeno, watie kud applications adek kende pi telefon kunoke tablette. Gini e: JW Language^®, JW Library^®, man JW Library Sign Language^®. Wacopo geno jamtic maenogi, pilembe gimbe i igi ku lembkuloka man lembe mange ma reco mi ng’om maeni ma rac pa Sitani. Ento ka wabenwang’u cam mi tipo nikadhu kud i yo mange, saa moko nyo nwang’u judaru nyothe kunoke juloko lembe moko mi ie.​—Zab. 18:26; 19:8.

M’umedo maeno, niketho girasoma kunoke video mwa i kusika mir Internet ma copo ketho ng’atuman umii paru pare, mio kaka ni ju m’ujai i kum lemandha man dhanu mange bende pi nituro cwiny dhanu i kum dilo pa Yehova. Umego ku nyimego moko gituc nimondo i piem man teliri karacelo ku dhanu mange iwi Internet, uketho gimedo acidi ameda iwi nying’ Yehova. Internet utie ngo kaka ma jucopo ponjo i ie dhanu ma gitie ngo ayika pi niwinjowa. (2 Tim. 2:23-25; 1 Tim. 6:3-5) Dhanu moko giyabu gin gigi kont man kusika mir Internet ku nying’ dilo mwa, ku nying’ Guriri m’utelowic, man ku nying’ umegoman acel acel mi Guriri m’utelowic. Eno tie lembe ma winjere ngo, pilembe umego mi Guriri m’utelowic gimbe ku kusika migi gigi mir Internet, man gimbe i réseaux sociaux.

Ninyutho jw.org ni dhanu konyowa nirweyo “lembanyong’a.” (Mat. 24:14) Jamtic mir elektronik ma wabed wanwang’u pi tic mwa mi rweyo lembanyong’a, jubed judwokogi nyen thirithiri. Wamaru dhanu ceke ginwang’ bero mi tio kugi. Pieno, calu ma Cik mi tio ku kusika mwa uyero, icopo oro girasoma moko mir elektronik ni ng’atini nikadhu kud i e-mail kunoke iromo oro ire yo (lien) m’ecopo nwang’u ko piny moko i jw.org. Ka wabeoro dhanu i kusika mwa ma tung’ tung’ mir Internet, nwang’u wabeketho gin bende ginwang’ cam mi tipo niai kud i bang’ ‘jamiru mandha man ma riek,’ ma en kende re m’ebemio cam mi tipo.