Pa mulandu wa kuti tatushitisha impapulo shesu ishilanda pali Baibolo, abantu bamo bamona kwati caliba fye bwino ukubika impapulo shesu pa mawebusaiti yambi nelyo pa intaneti apo abantu batumishanya ifyebo na mavidio. Lelo ukucita ifi kupula mu Ifyo Mufwile Ukukonka * pa kubomfya amawebusaiti yesu, kabili ici calilenga twakwata amafya ayakalamba. Mu Ifyo Mufwile Ukukonka balilondolola bwino bwino ukuti takuli uufwile “ukubika ifikope fya kulenga, impapulo sha pa foni, pa tabuleti na pa kumpyuta, ishina ne fishibilo ifyo tubomfya, inyimbo, ifikope, amavidio, nelyo ifipande fya pa webusaiti yesu no kufibika pa intaneti (pa webusaiti iili yonse, pa webusaiti apo batumishanya ifyebo, pa webusaiti apo batumishanya amavidio, nelyo inshila ishalekanalekana isho abantu babomfya pa kutumishanya ifyebo na mavidio pa intaneti).” Mulandu nshi tushisuminishisha ukucita ifi?

Impapulo shonse na mavidio ifyaba pa webusaiti yesu fyalicingililwa na mafunde. Abasangu na bantu bambi abatupata balabika impapulo shesu pa mawebusaiti yabo pa kuti balufye Inte sha kwa Yehova na bantu bambi. Ico bapangila aya amawebusaiti ni co bafwaya abantu ababelenga impapulo shesu baletwishika ifyo tulemba. (Amalu. 26:4; Amapi. 22:5) Abantu bamo balibomfya ifyebo fya mu mpapulo shesu nelyo icishibilo ca webusaiti yesu iya jw.org ku kusabankanishishako amakwebo, ifintu baleshitisha, na amaprogramu aya pa mafoni na matabuleti. Apo ifishibilo fyesu ne fyebo fyalicingililwa  na mafunde, twalikwata insambu sha kulesha abafwaya ukufibomfya bubi bubi. (Amapi. 27:12) Lelo nga ca kuti tuleleka abantu nangu fye aba bwananyina balebika ifyebo fyesu pa mawebusaiti yambi nelyo balebomfya icishibilo ca jw.org pa kushitisha ifintu, ifilye te kuti fitwafwe ukulesha abatusuusha na bashimakwebo.

Mulingile ukulakopolola impapulo shesu pa jw.org te pa mawebusaiti yambi aya pa intaneti. Uo Yehova apeela umulimo wa kulapekanya ifya kulya fya ku mupashi “musha wa cishinka kabili uwashilimuka” epela. (Mat. 24:45) Pa kusabankanya ifya kulya fya ku mupashi uyu “musha” abomfya fye amawebusaiti ayo apanga, e kutila www.pr418.com, tv.pr418.com, na wol.pr418.com. Kabili twakwata amaprogramu ya kubomfya pa mafoni na pa matabuleti yatatu fye epela, na aya ni JW Language^®, JW Library^®, na JW Library Sign Language^®. Kuti twacetekela ukuti ifi umusha apanga tafyakoweshiwa ne calo ca kwa Satana kabili umusha tafibomfya ku kusabankanya amakwebo. Nga ca kuti ifya kulya fya ku mupashi tafifumine ku musha wa cishinka ninshi balyalulamo fimo nelyo ninshi fyalikowela.—Amalu. 18:26; 19:8.

Na kuba, ukubika impapulo shesu pa mawebusaiti ayakwata apo abantu bengalemba ifyo baletontonkanya pali isho mpapulo kuti kwalenga abatusuusha na batupata balalembapo ifingalenga abantu baleka ukucetekela icilonganino ca kwa Yehova. Bamunyinefwe bamo balatendeka ukukansana na bantu pa intaneti, kabili ifi bacita na fyo filalenga ishina lya kwa Yehova lyasaalulwa. Na kuba iyi te nshila iisuma iya ‘kufundilamo mu kunakilila abasuusha.’ (2 Tim. 2:23-25; 1 Tim. 6:3-5) Na kabili abantu bamo balisula amaakaunti pa intaneti aya bufi e lyo na mawebusaiti ayo bapanga ukubomfya ishina lya cilonganino, ilya Ibumba Litungulula e lyo na mashina ya baba mwi Bumba Litungulula. Lelo takwaba uwaba mwi Bumba Litungulula uwakwata webusaiti yakwe nelyo uubomfya inshila shalekanalekana isha kutumishanishishamo ifyebo na mavidio pa intaneti.

Ukutungulula abantu ku jw.org kulenga “imbila nsuma” yaishibikwa. (Mat. 24:14) Amawebusaiti yesu na maprogramu ya pa foni na pa tabuleti ayo tubomfya mu mulimo wa kubila imbila nsuma balatwalilila ukuyawamya. Tufwaya bonse tulenonkelamo. Kanshi nga fintu Ifyo Mufwile Ukukonka fyalanda, kuti mwatumina umuntu ulupapulo nelyo kuti mwamutumina linki ya apo engasanga ifyebo pa jw.org. Nga tuletungulula abantu kuli webusaiti yesu iya pa intaneti, ninshi tulebatungulula uko bengasanga ifya kulya fya ku mupashi ifya cine e kuti ku “musha wa cishinka kabili uwashilimuka.”