Rhunmwuda ne ima i na fian ive ye ebe ọghomwa, emwa eso keghi roro ẹre wẹẹ, ọ ma de emwi nọ rhiae vbe iran gha post ẹre ye wẹbsait ọvbehe. Vbọrhirhighayehẹ, te uyinmwẹ vbenian rraa uhi ọghe Ilele Ne A Ya Loo * e wẹbsait ọghomwa. Ọ ka vbe si ọlọghọmwa nọkhua nẹ vbe ẹghẹ eso nọ gberra. Sokpan, Ilele na khare wẹẹ, a ma kpasẹ yọ nọ ọmwa rhọkpa gha viọ “efoto, ebe ọghomwa nọ rre itanẹt, eni e wẹbsait ọghomwa nọ re jw.org, evba kpee kevbe e video ọghomwa ye wẹbsait ovbehe.” Vbọzẹe ne uhi vbenian na khẹke?

Te uhi gbogba gae emwi hia ne ima mwẹ vbe wẹbsait ọghe ima. Emwa okeke kevbe emwa ni khọ ẹko ima keghi viọ ebe ọghomwa ye wẹbsait ọghe iran, ne iran mieke na yae mu Avbe Osẹe Jehova kevbe emwa ovbehe rẹrẹ. Emwi nibun ni rre wẹbsait vberriọ keghi re ni ya ọmwa gbawawẹ, deghẹ otu e Jehova ẹre ọ gele odẹ ọghe ẹmwata. (Psm 26:4; Itan 22:5) Emwa eso vbe loo ako eso vbe ebe ọghomwa ni rre itanẹt ya wewe emwi ne iran khiẹn, vbene eso na loo eni e wẹbsait ọghe ima nọ re jw.org. Eso vbe loo efoni ọghe iran ya do ẹki vbenian. Ne ima na mwẹ uhi nọ gbogba gae wẹbsait ọghe ima, emwa i ghi sẹtin loo ẹre vbene iran rhirhi miẹn. (Itan. 27:12) Sokpan, ma gha kue yọ ne emwa ọvbehe ra etẹn ima gha post emwi ni rre jw.org ye wẹbsait ọvbehe, ima na vbe kue yọ ne iran yae gha do ẹki, ẹghẹ nii, arriọba i ghi sẹtin ru iyobọ ne ima ya gbogba gae wẹbsait ọghe ima vbe obọ eghian kevbe emwa ni hoo ne iran yae gha do ẹki.

  Ọ gha sẹtin zẹ ebe deghẹ ima na gha loo e wẹbsait ọvbehe ne ẹi re jw.org ya danlod ebe ọghomwa. “Ọguọmwadia esi kevbe ne ọ wan” ẹre Jehova wẹẹ nọ gha kpemehe evbare orhiọn ne eguọmwadia ọghẹe hia ni rre uhunmwu otagbọn. (Mat 24:45) E wẹbsait ne ọviẹn na loo ya kpemehe evbare orhiọn ọre www.pr418.com, tv.pr418.com, and wol.pr418.com. Ọviẹn na vbe kpemehe Application eha ne ima loo vbe efoni, nọ re JW Language^®, JW Library^®, and JW Library Sign Language^®. Ma mwẹ ilẹkẹtin wẹẹ, obẹlẹ ne a ya unu kaẹn na, keghi re nọhuanrẹn ne Esu i sẹtin mu rhia. Sokpan, evbare orhiọn gha la obẹlẹ ọvbehe rre, ẹi mwẹ ọyasin ọghe imamwaemwi ohoghe ma sin ọnrẹn.—Psm 18:26; 19:8.

Yevbesọni, emwa gha post ebe ọghe ima ye wẹbsait ne a ya gu egbe guan, vbe na ghee Facebook, ọ keghi kie ẹkpotọ ne emwa okeke ya mu emwa ekhọe rhia. Emwa vbenian sẹtin do gha gbawawẹ, deghẹ otu e Jehova ẹre ọ gele re odẹ ọghe ẹmwata. Etẹn eso ka gu emwa ọvbehe muan ẹmwẹ nẹ vbe wẹbsaiti vberriọ, sokpan uyinmwẹ nii keghi sa ọrho ya eni e Jehova. Vbene ẹmwata, ẹi re itanẹt ẹre ọ khẹke ne a na “ya urhu khuẹrhẹ tama ọmwa ne ọ gu ruẹ suan, ehe ne ọ na bae ku.” (2 Tim 2:23-25; 1 Tim 6:3-5) Aro ima vbe dae sẹrriọ wẹẹ, emwa eso ya eni otu ọghe ima nọ re Osẹe Jehova, Ẹbu Nọ Su kevbe eni ọghe etẹn eso ni ga zẹvbe Ẹbu Nọ Su kie wẹbsait, eso vbe yae kie Facebook. Sokpan, ẹmwata nọ rrọọ ọre wẹẹ, dọmwadẹ etẹn ni ga zẹvbe Ẹbu Nọ Su i mwẹ e wẹbsait obọ re, iran rhọkpa i vbe rre Facebook ra e wẹbsait ọvbehe vberriọ.

Te ima ya ikporhu “iyẹn nọ maan” vẹwae vbe ima ghaa tama emwa ne iran gha loo jw.org. (Mat 24:14) Ẹghẹ hia ẹre afiwerriẹ ya rhiegbe ma vbe jw.org. Ọ keghi maan sayọ zẹvbe ne ẹghẹ ya khian rhunmwuda ne etẹn na winna yan rẹn. Ma hoo ne emwa hia gha miẹn ere vbe wẹbsait ọghomwa. Nọnaghiyerriọ, zẹvbe ne Ilele Ne A Ya Loo e wẹbsait ọghomwa khare, u sẹtin loo e-mail ya gie ebe ima nọ rre wẹbsait gie ọmwa ọvbehe, u sẹtin vbe gie link nọ dia ọmwa lae jw.org gie ọmwa. Ma ghaa dia emwa ni mwẹ ekorhiẹnrhiẹnmwẹ ye wẹbsait ọghomwa, te ima gie ẹre ma iran ighẹ obẹlẹ ọkpa ne evbare orhiọn ọghe ẹmwata ke rre, nọ re “ọguọmwadia esi kevbe ne ọ wan.”