Kei le maguburahan tubéi wóundarun tuagu agumeiraguagüdüni, añahein asaminarutiña gayara lan takopiarún luma lun tichugún lidoun amu burí páhina lidan Internet. Lau hadügüni katei le hadüraaguñein Lúrudu luáguti Layusurún Páhina lánina Internet * le tani wóundarun ani barühali katei le turobuli wéinamuti. Furanguti lariñagun ñein ua lan ni aban ibihiti üma lun “lagumeiraguagüdün dibuhu, agumeiraguagüdüni to lídanboun Internet, lumakün programa, músika, iyawaü, bidéu o arütíkulu le lánina páhina le lidan ni aban páhina lidan Internet (ni lidan páhina le ñein lubéi hadügǘwa umadagu, ni lidan páhina le ñein lubéi lichugúa bidéu o ariñahani lun harihini amu)”. Ka uagu mégeiwa lubéi lúrudu le?

Sun ariñahani le lídanbei wani páhina lidan Internet góunigi lumuti copyright. Áfaaguatiña ha agarabaagubaña lun Bungiu hama ha ebedaagubaña tun wóundarun lun híchugunu wani agumeiraguagüdüni lidoun hani páhina lidan Internet lun hachawahaniña gefentiña luagu Heowá hama amu gürigia lun hebelurun lidoun hani páhina. Gama lumoun, anihein ariñahani mabuidunti lidan páhina le le gayaraabei ladügün lun ledebilidagüdüni hafiñen lumutuniña Heowá (Sal. 26:4; Ari. 22:5). Añahein amu gürigia yusu hamuti ariñahani le tídanbei wani agumeiraguagüdüni o jw.org, le tumakünbei óundaruni, lidan hagumeraguagüdüni le halugurahabei, luma programa burí lun gágamuru tuma konputadora. Garichatu wóundarun ani anihein ubafu tuma lun tadüraaguni layusurún páhina le lau lídehan copyright luma lumakün programa (Ari. 27:12). Lun hamuga tígirun wóundarun lun hayusuruni gürigia, íbini gefentiña, wani páhina lun hasagarun ariñahani lun hafidiruni lidan amu páhina lidan Internet o hayusuruni makü jw.org lun halugurahani hebegidina, gayaraabei hamuga míderagun lániwa liñun-agei lúrudu lidan áfaaguni le wadügübei lun wararamuniña gürigia  ha ebedaagubaña tun wóundarun o kónpeni to lánina bísinisi lun madügün hamani.

Denchati larariragüdünu gürigia wani agumeiraguagüdüni lídangiñe furumiñeguarügü páhina le mama jw.org. Lúnrügüñein “musu úaraguati ani gunfuranda ligía” líchigei Heowá buligasion lun líchugun ariñahani tídangiñeti Bíbülia le ítarabei kei éigini lidan dan (Mat. 24:45). “Musu” le ligía íchugubei ariñahani lúmagiñeti Bungiu lídanrügü páhina www.pr418.com, tv.pr418.com, luma wol.pr418.com. Ǘrüwarügüñein programa wama lunti gágamuru luma tun konputadora: JW Language^®, JW Library^® luma JW Library Sign Language^®. Gayaraati wachoururuni ua lan ariñahani ñein luagu ebegidinaü ani úati giñe ariñahani ñein le ñǘbuinbei lídangiñe ubóu le lábugiñebei lubafu Satanási. Anhein achülüra ariñahani woun lídangiñe amu oubaü, siñati lachoururún anhein maranserawagungili lubéi o gagana lan ariñahani le ñǘbuinbei hámagiñe láganiñu inarüni (Sal. 18:26; 19:8).

Gama lumoun, anhein lamudeiragüda gürigia wani agumeiraguagüdüni lidan páhina le ñein lubéi habürühein gürigia le hasaminarubei, líchuguña chansi houn ha agarabaagubaña lun Bungiu luma houn ha ayanuhabaña wuriba wawagu lun hadügün lun machourun lan warihini ariñahani le tíchugubei lóundarun Heowá. Añahein íbirigu asigenehatiña hama láganigu inarüni lídangiñe Internet ani adügati katei le lúntima ladaseirun liri Heowá. Mama aban fulasu buiti páhina lidan Internet lun larufudahan gürigia “houn ha mabuchahabaña tau anigi ǘnabugutu” (2 Tim. 2:23-25; 1 Tim. 6:3-5). Luagu le aban oubaü, dariwaali anihein lan páhina lidan Internet le mama inarüniti lau tiri wóundarun, liri Musu Úaraguati o lau hiri lílana. Le linarün katei, úatiña ni aban lílana Musu Úaraguati gánitiña páhina houngua lidan Internet ani úatiña giñe lidan ni aban páhina le lánina hadügǘn umadagu.

Dan le wariñagun houn gürigia lun hebelurun lidoun páhina jw.org wídehaña apurichihei “uganu buiti” (Mat. 24:14). Eibu dan tabuidurun tulu burí to lídanboun wani páhina lidan Internet to ichugúboun woun lun wapurichihan. Ani busentiwa lun hasagarun sun gürigia buiti lídangiñe ariñahani le. Ligíati, kei lariñaguni Lúrudu luáguti Layusurún Páhina lánina Internet le, rúati üma lun lóunahan gürigia luéigiñe koréu lidan Internet agumeiraguagüdüni o fánreinti le anügübaliña gürigia sügülügü tidoun agumeiraguagüdüni lun gayara lan larariragüdünu lídangiñe jw.org. Dan le wariñagun houn gürigia ha hínsiñehabutiña lun inarüni lun hebelurun lidoun wani páhina lidan Internet, wadügüña lun haliihani ariñahani le ñǘbuinbei lúmagiñe “musu úaraguati”, le úmagiñebei liabin ariñahani le inarüniti lúmagiñeti Bungiu.