Ðó mǐ nɔ xwlé nǔ e junjɔn Biblu jí lɛ é mɛ vɔ̌nu wutu ɔ, mɛɖé lɛ lin ɖɔ è sixu yí ye bo sɔ́ ɖó tɛn ɛntɛnɛti tɔn ɖevo lɛ jí, alǒ, tɛn ɛntɛnɛti tɔn e jí è nɔ zun xɔ́ntɔn ɖè lɛ é jí. Amɔ̌, mɔ̌ biblo t’afɔ sɛ́n e ɖɔ nǔ dó tɛn ɛntɛnɛti tɔn mǐtɔn lɛ zinzan wu lɛ é * jí, bo ko hɛn tagba syɛnsyɛn lɛ wá. Lee Sɛ́n enɛ lɛ xlɛ́ gbɔn céɖécéɖé é ɔ, è na gbè mɛɖebǔ bonu é na “sɔ́ nǔ e ɖò Tɛn Ɛntɛnɛti Tɔn elɔ jí é ɖě ɖó . . . (Tɛn Ɛntɛnɛti Tɔn e jí è nɔ má nǔ gbɔn é, Tɛn Ɛntɛnɛti Tɔn e jí è nɔ zun xɔ́ntɔn ɖè lɛ é, alǒ Tɛn Ɛntɛnɛti Tɔn ɖebǔ)” jí ǎ. Etɛwu sɛ́n mɔhun lɛ ka ɖò dandan?

Nǔ e ɖò tɛn ɛntɛnɛti tɔn mǐtɔn jí lɛ é bǐ jí wɛ acɛ nǔ nɔ ɔ tɔn ɖè. Gǔfɔndómawujitɔ́ lɛ kpo gbeklanxamɛtɔ́ ɖevo lɛ kpo nɔ tɛ́n kpɔ́n bo na zán wema mǐtɔn lɛ ɖò tɛn ɛntɛnɛti tɔn yetɔn lɛ jí, bo na dó flú Kúnnuɖetɔ́ Jehovah tɔn lɛ kpo mɛ ɖevo lɛ kpo. Linlin e wu ye sɔnǔ nú tɛn ɛntɛnɛti tɔn enɛ lɛ é wɛ nyí ɖɔ ye na bló bɔ nǔxatɔ́ lɛ na xò nǔ kpɔ́n. (Ðɛh. 26:4; Nùx. 22:5) Mɛ ɖevo lɛ ko zán nǔ e ɖò wema mǐtɔn lɛ mɛ lɛ é, alǒ, wuntun jw.org tɔn mǐtɔn dó jla ajɔ̌ na, bo lɛ́ sɔ́ ɖó nǔ e ye jló na sà lɛ é jí alǒ tuto ɔdinatɛ́ɛ jí tɔn kabǐ tablɛti jí tɔn lɛ jí. Enyi mǐ sɔ́ acɛ nǔ nɔ ɔ tɔn kpo wuntun mǐtɔn kpo ɖó nǔ mǐtɔn lɛ jí ɔ, mǐ nɔ ɖó nǔ e jí mǐ na zɔ́n dó ɖò sɛ́n linu dó sú ali dó nǔ zinzan nyì dò mɔhun é. (Nùx. 27:12) Amɔ̌, enyi mǐ na tɛn mɛ lɛ, kaka jɛ nɔví mǐtɔn lɛ jí bonu ye sɔ́ nǔ e ɖò tɛn ɛntɛnɛti tɔn mǐtɔn jí lɛ é ɖó tɛn ɛntɛnɛti tɔn ɖevo lɛ jí, alǒ zán  wuntun jw.org tɔn dó sà nǔ na ɔ, hwɛɖɔxɔsa lɛ sixu gbɛ́ ɖɔ emi kún na nɔ gudo nú gǎn e dó wɛ mǐ ɖè, bo na sú ali dó gbeklanxamɛtɔ́ lɛ kpo ajɔxwé lɛ kpo é ó.

Nǔ mǐtɔn lɛ yíyí ɖò tɛn ɛntɛnɛti tɔn ɖevo jí zɛ jw.org wu sixu nyí awovinú ɖé. “[Deví] gbejinɔtɔ́, ayiɖotenanɔ” ɔ kɛɖɛ wɛ Jehovah sɔ́ azɔ̌ nǔsisɔ nú nùɖuɖu gbigbɔ tɔn ɔ d’alɔ mɛ na. (Mat. 24:45) Tɛn ɛntɛnɛti tɔn deví enɛ tɔn ɖěɖee sɛ́n tuùn lɛ é kɛɖɛ wɛ é nɔ zán dó ɖè nùɖuɖu gbigbɔ tɔn lɛ tɔ́n​—www.pr418.com, tv.pr418.com, kpo wol.pr418.com kpo. Tuto ɔdinatɛ́ɛ jí tɔn alǒ tablɛti jí tɔn atɔn géé wɛ mǐ ɖó, ye wɛ nyí​—JW Language^®, JW Library^®, kpo JW Library Sign Language^® kpo. Mǐ sixu ɖeji ɖɔ tuto enɛ lɛ kún na jla ajɔ̌ ó, gbɛ̀ Satáan tɔn ka na lɛ́ hɛn ye blí ǎ. Enyi nùɖuɖu gbigbɔ tɔn gbɔn ali ɖevo nu bo wá ɔ, ganjɛwu ɖebǔ ɖè ɖɔ è kún huzu ada na alǒ hɛn blí ó ǎ.​—Ðɛh. 18:27; 19:9.

Gɔ́ na ɔ, wema mǐtɔn lɛ alǒ video mǐtɔn lɛ sísɔ́ ɖó tɛn ɛntɛnɛti tɔn ɖěɖee nɔ na tɛn, bɔ è nɔ ɖɔ nǔ e è lin é jí nɔ zɔ́n bɔ gǔfɔndómawujitɔ́ lɛ kpo xómɔɖɔdónǔwutɔ́ ɖevo lɛ kpo nɔ ɖɔ xó e na zɔ́n, bɔ è ma na ɖeji dó tutoblonunu Jehovah tɔn wu ǎ lɛ é. È ko dɔn nɔví mǐtɔn ɖé lɛ dó xóɖɔɖókpɔ́ ɛntɛnɛti jí tɔn lɛ mɛ, bɔ enɛ ko zɔ́n bɔ mɛ lɛ mɔ xó ɖɔ dó nyikɔ Jehovah tɔn wu d’eji. Xóɖɔɖókpɔ́ gbɔn ɛntɛnɛti jí wɛ nyí ali ɖagbe e nu è na “sɔ́ xomɛ fífá dó kplɔ́n nǔ mɛ e ma ɖò xó ɖokpo ɔ ɖɔ xá [mɛ] wɛ ǎ lɛ” é ǎ. (2 Tim. 2:23-25; 1 Tim. 6:3-5) È lɛ́vɔ ɖó ayi wu ɖɔ è hun kɔ́ntu masɔgbe ɖé lɛ ɖó tɛn ɛntɛnɛti tɔn e jí è nɔ zun xɔ́ntɔn ɖè é kpo tɛn ɛntɛnɛti tɔn masɔgbe lɛ kpo dó tutoblonunu ɔ, Hagbɛ̌ Alixlɛ́mɛtɔ́ ɔ kpo mɛ e ɖ’emɛ lɛ é kpo takúnmɛ. Amɔ̌, mɛ e ɖò Hagbɛ̌ Alixlɛ́mɛtɔ́ ɔ mɛ lɛ é ɖě ɖó tɛn ɛntɛnɛti tɔn yeɖesunɔ tɔn, alǒ, ye ɖě ɖò tɛn ɛntɛnɛti tɔn e jí è nɔ zun xɔ́ntɔn ɖè lɛ é jí ǎ.

Ali xíxlɛ́ mɛ lɛ yì jw.org jí na d’alɔ bɔ “Wɛnɖagbe” ɔ na gbakpé. (Mat. 24:14) Nǔ e nɔ tɔ́n ɖò tɛn ɛntɛnɛti tɔn mǐtɔn jí bɔ mǐ nɔ zán ɖò sinsɛnzɔ́ mǐtɔn mɛ lɛ é ɔ, è nɔ ɖò vìvɔ́ jlaɖó wɛ hwebǐnu. Mǐ jló ɖɔ mɛ lɛ bǐ ni ɖu lè yetɔn. Enɛ wu ɔ, lee Sɛ́n E Ðɔ Nǔ Dó Zinzan Tɔn Wu lɛ É xlɛ́ gbɔn é ɔ, a sixu sɛ́ wema mǐtɔn ɖé dó mɛɖé gbɔn ɛntɛnɛti jí, alǒ, sɛ́ fí e è na gbɔn bo mɔ wema ɔ ɖò jw.org jí é dó mɛ ɔ. Nú mǐ xlɛ́ ali jlǒɖotɔ́ lɛ yì tɛn ɛntɛnɛti tɔn mǐtɔn ɖěɖee sɛ́n tuùn lɛ é jí ɔ, ali xlɛ́ ye wɛ mǐ ɖè yì nùɖuɖu gbigbɔ tɔn sín jɔtɛn nugbǒ ɔ kɔn nɛ, enɛ wɛ nyí “[Deví] gbejinɔtɔ́, ayiɖotenanɔ” ɔ.