Ñane organisasión ndokovrái umi puvlikasión bíblicare. Upévare oĩ opensáva ikatuha okopia ha ohupi ótro sítio de Internétpe térã umi rred sosiálpe. Péro jajapóramo upéva nañakumplimoʼãi umi Términos y Condiciones de Uso, guaraníme hérava: Ojejeruréva Reipuru Hag̃ua. * Heta oĩ ndorrespetáiva umi mbaʼe heʼíva upépe, ha upéva oguerúma tuicha provléma. Upe pártepe omyesakã porã avave ndorekoiha permíso “opuvlika hag̃ua taʼanga, puvlikasión elektrónika, umi létra jw ha jw.org, músika, fóto, vidéo térã artíkulo ko sítiogui ha omoĩ ótro sítio de Internétpe (ndovaléi avei ojepuvlika umi rred sosiálpe ni ótra páhina ojepurúva oñekomparti hag̃ua vidéo térã archívo)”. ¿Mbaʼérepa tekotevẽ ojerrespeta umi Términos y Condiciones de Uso?

Entéro informasión osẽva ñande sítio de Internétpe oĩ protehído pe léi rupive (derechos de autor). Umi apóstata ha ambue persóna ndaijaʼéiva ñanderehe omoĩ ñane puvlikasión isitiokuéra de Internétpe, oleese hag̃uáicha umi testígo de Jehová ha ambue persóna. Péro ipahinakuérape omoĩ avei hikuái heta informasión ikatu hag̃uáicha ñanemboduda (Sal. 26:4; Prov. 22:5). Avei oĩ oipurúva umi informasión osẽva ñane puvlikasionkuérape térã umi létra jw.org ikatu hag̃uáicha ojapo propagánda, omoĩ iprodúkto ovendesévare, térã ojapo umi aplikasión selulár ha távletpe g̃uarã. Ñane organisasión ojevale umi léi rehe oprotehe hag̃ua umi informasión osẽva ñande sítiope ha umi márka de prodúkto jw térã jw.org (Prov. 27:12). Ñane organisasión nopermitíri avavépe, ni peteĩ Testígope jepe omoĩ umi mbaʼe osẽva ñande sítiope ótro sítiope, ni oipuru umi létra jw.org ovende hag̃ua iprodúkto. ¿Mbaʼérepa? Pórke ojapóramo koʼã mbaʼe, ikatu hína  umi trivunál nañanedefendéi umi persóna ndaijaʼéiva ñanderehe térã umi komérsio oipuru vaiséramo umi mbaʼe oĩva ñande sítiope.

Ikatu hína ipeligróso jadeskargáramo ñane puvlikasionkuéra ótra páhinagui ndahaʼéiva ñande sítio jw.org. Jehová ojevale pe tembiguái jeroviaha ha iñarandúvare añoite ikatu hag̃uáicha omeʼẽ ñandéve aliménto espirituál (Mat. 24:45). Ko “tembiguái” omoĩ pe aliménto espirituál sólamente ñande páhina ofisiálpe, haʼéva www.pr418.com, tv.pr418.com ha wol.pr418.com. Avei jareko mbohapy aplikasión añónte jaipuru hag̃ua ñande selulár ha távletpe, ha umíva hína JW Language^®, JW Library^® ha JW Library Sign Language^®. Koʼã aplikasión ha umi ñande páhina de Internet ndorekói propagánda ni mbaʼeve ikyʼáva oúva Satanás múndogui. Jarresivíramo umi aliménto espirituál ótro ládogui, ndaikatúi ñagarantisa umíva haʼeha konfiávle térã noñekambiái hague (Sal. 18:26; 19:8).

Ojehupíramo ñane puvlikasión umi páhina de Internétpe ikatuhápe ojeʼe la ojeʼeséva, oñemeʼẽ hína oportunida umi apóstatape ha avei umi otakývape ñanderehe heʼi hag̃ua la heʼiséva Jehová organisasiónre, péicha menove ojejeroviáta hese. Oĩ voi ermáno oñepyrũva ojodiskuti umi rred sosiálpe, ha péicha oñemongyʼa Jehová réra. Umi fóro oĩva Internétpe noipytyvõi oñehekomboʼe hag̃ua “pyʼaguapýpe porãnte umi naiñeʼẽrenduséivape” (2 Tim. 2:23-25; 1 Tim. 6:3-5). Avei ojepilla ojejapoha kuénta de rred sosiál ha sítio de Internet fálso. Koʼãvape oñemoĩ ñane organisasión réra, pe Kuérpo Governánte réra ha umi miémbro del Kuérpo Governánte réra. Añetehápe ni peteĩ ermáno oĩva pe Kuérpo Governántepe ndorekói páhina de Internet personál, ni noĩri peteĩ rred sosiálpe.

Jaʼe jave umi persónape omaña hag̃ua ñande sítio de Internétpe, ñaipytyvõ hína iñasãi hag̃ua pe “marandu porã” (Mat. 24:14). Umi erramiénta dihitál oñemeʼẽva ñandéve japredika hag̃ua, oñemehora ohóvo, ha hiʼãiterei ideprovécho enterovévape. Upéicharõ, heʼiháicha pe párte Ojejeruréva Reipuru Hag̃ua (Términos y Condiciones de Uso), ikatu oñemondo korréo elektróniko rupive peteĩ puvlikasión térã peteĩ enláse ojetopa hag̃ua informasión jw.org-pe. Jaʼe jave umi persóna oñeinteresávape pe añeteguáre omaña hag̃ua ñande sitiokuérare, ñaipytyvõ hína chupekuéra oñemoag̃ui hag̃ua pe tembiguái jeroviaháre, haʼéva pe úniko médio Jehová oipurúva omeʼẽ hag̃ua aliménto espirituál.