Bangod wala sing bayad ang aton mga publikasyon nga nabase sa Biblia, abi sang pila puede ini i-post sa iban nga website ukon sa social media. Pero, ang paghimo sini nagalapas sa Mga Kasugtanan sa Paggamit * sang aton mga website kag nagresulta sa serioso nga mga problema. Maathag nga makita sa Mga Kasugtanan nga indi puede “mag-post sa Internet (bisan ano nga website, file-sharing site, video-sharing site, ukon social network) sang mga laragway, elektroniko nga mga publikasyon, trademark, musika, retrato, video, ukon mga artikulo halin sa sini nga website.” Ngaa kinahanglan ini nga pagdumili?

Ang tanan nga makita sa aton mga website may copyright. Ginagamit sang mga apostata kag pila ka nagapamatok ang aton mga publikasyon para hayluhon sa ila mga website ang mga Saksi ni Jehova kag iban pa. Ginhimo ini nga mga website para mapatalang ang mga nagabasa. (Sal. 26:4; Hulu. 22:5) Gingamit sang pila ang aton mga publikasyon ukon ang aton jw.org nga logo sa mga advertisement, sa mga ginabaligya nga produkto, kag sa mga app para sa mobile device. Bangod may copyright ang tanan nga makita sa aton website ukon kita ang magapat-od kon paano ini gamiton, kag legal nga ginakilala ang aton mga trademark, may kinamatarong kita nga dumilian ang indi husto nga paggamit sini. (Hulu. 27:12) Pero kon tugutan naton ang mga tawo, bisan ang aton mga kauturan, nga mag-post sang makita sa aton website sa iban nga website ukon gamiton ang jw.org nga trademark para magbaligya sang mga produkto, mahimo nga indi pagpaboran sang korte ang aton mga ginahimo para punggan ang mga nagapamatok kag mga negosyante.

 Ang pag-download sang aton mga publikasyon sa iban nga website magluwas sa jw.org makatalagam. “Ang matutom kag mainandamon nga ulipon” lang ang gintugyanan ni Jehova nga mag-aman sang espirituwal nga pagkaon. (Mat. 24:45) Ang opisyal lang nga mga website nga ginagamit sini nga “ulipon” amo ang www.pr418.com, tv.pr418.com, kag wol.pr418.com. Kag may tatlo lang kita ka opisyal nga app para sa mobile device, kag ini amo ang JW Language^®, JW Library^®, kag JW Library Sign Language^®. Makasalig kita nga ini tanan wala sing mga advertisement ukon impluwensia sang kalibutan ni Satanas. Kon ipaagi sa iban nga website ang espirituwal nga pagkaon, indi naton masigurado nga wala ini ginbag-o ukon gin-islan.—Sal. 18:26; 19:8.

Dugang pa, may mga website nga nagatugot sa mga nagabasa nga magkomento. Kon i-post diri ang aton mga publikasyon, nagahatag ini sing kahigayunan sa mga apostata kag iban nga kritiko nga pakalainon ang organisasyon ni Jehova. Ang pila ka kauturan wala makapugong nga mag-entra sa mga debate sa Internet, kag bangod sini, nadugangan pa gid ang pagpakahuya sa ngalan ni Jehova. Ang pagdebate sa Internet indi nagakaigo nga paagi para ‘tudluan nga may kalulo ang mga masinupakon.’ (2 Tim. 2:23-25; 1 Tim. 6:3-5) Natalupangdan man nga may mga peke nga account sa social media kag mga website nga gingamit ang ngalan sang organisasyon, sang Nagadumala nga Hubon, kag sang mga miembro sini. Pero, wala sing bisan isa sa Nagadumala nga Hubon ang may personal nga website ukon account sa social media.

Ang pagsugid sa iban parte sa jw.org nagabulig sa pagpalapnag sang “maayong balita.” (Mat. 24:14) Ang mga makita sa aton website nga ginagamit naton sa ministeryo padayon nga ginapanami. Gusto naton nga ang tanan makabenepisyo sa sini. Gani, suno sa Mga Kasugtanan sa Paggamit sa aton website, mahimo mo mapadala sa e-mail ang elektroniko nga kopya sang publikasyon ukon ma-share ang link sang tanan nga makita sa jw.org. Kon isugid naton sa mga interesado ang parte sa aton opisyal nga mga website, ginatuytuyan naton sila pakadto sa isa lang ka matuod nga ginahalinan sang espirituwal nga pagkaon, “ang matutom kag mainandamon nga ulipon.”