Mena rokutja tu yandja omambo wetu otjari, ovandu tjiva ve muna kutja okuherengurura poo okutwa omambo wetu kotungovi twarwe poo kotungovi twomahakaeneno, otjiṋa otjiyakurwa. Posi yokutja, okutjita nao ku teya Omazeva wokuungurisa * orungovi rwetu, nu kwa eta omauzeu omanene. Otja tji pa raisiwa oukahu mOmazeva wokuungurisa orungovi rwetu, kape nomundu ngu nousemba “wokutwa oviperendero, omambo nge ri morungovi, ena rotjira poo omasusuparisiro wa ro, omisiki, oviperendero, ozovidio, poo otupa okuza morungovi ndwi kotungovi twarwe (orungovi ngamwa aruhe rwarwe, orungovi ndu yenena okuhinda oviṋa poo ozovidio ku varwe, norungovi rwomahakaeneno).” Ongwaye omazeva wokuungurisa nga tji ye hepwa?

Pe nomirari vyokotjiveta mbi ṱuna komaungurisiro woviṋa avihe mbi ri morungovi rwetu. Ovandu mba poka kongamburiro novapirure varwe, ve ungurisa omambo wetu motungovi twawo, okupukisa na wo Ovahongonone va Jehova novandu varwe. Motungovi two, mu noviṋa mbya ungurirwa okukuna omakeyakeyero mouripura wovalese. (Eps. 26:4; Omiano 22:5) Varwe va ungurisa oviṋa poo otupa okuza momambo wetu poo otjiraisiro tjetu hi o-jw.org, mokutjivisa oviṋa vyawo oveni, momarandisiro, na mozoprograma zomouyendjezewa. Mena rokutja tu nousemba wokotjiveta ohunga noviṋa vyetu avihe noviraisiro vyetu vyo-jw.org, eṱe wina tu nouyara wokotjiveta wokutjaera ovandu okuungurisa oviṋa vyetu momuano omuvi. (Omiano 27:12) Posi yokutja tji matu yandjere ovandu, nandarire ovakambure ovakwetu, okutwa oviṋa vyetu vyomorungovi kotungovi twarwe, poo okuungurisa otjiraisiro tjetu hi o-jw.org okurandisa na tjo oviṋa vyawo oveni, ovyombanguriro mape ya avi he tu  vatere mozongondjero zetu zokuvanga okutjaera ovapirure, novandu mbe vanga okuungurisa oviṋa vyetu mbi, kouwa wawo oveni.

Okunana omambo wetu okuza korungovi rwarwe ndu heri ndwi o-jw.org, ku eta oumba ounene. Jehova wa yandja omerizirira wokuyandja ovikurya vyombepo ‘komukarere omuṱakame nomunazondunge’ erike. (Mat. 24:45) “Omukarere” ngo u ungurisa otungovi twetu twokotjiveta tu matu kongorere mba uriri, okupitisa ovikurya vyombepo—o-www.pr418.com, o-tv.pr418.com, no-wol.pr418.com. Nu tu nozoprograma 3 nḓa uriri zokotjiveta nḓe yenena okuungurisiwa mouyendjezewa—o-JW Language^®, o-JW Library^®, no-JW Library Sign Language^®. Matu yenene okukara nongamburiro okuura kutja oviṋa mbi, kamaavi kara neṋi ngamwa arihe rouye wa Satan. Indu ovikurya vyombepo tji vya zu kotuveze twarwe, kamaatu yenene okukara nongamburiro okuura yokutja ovikurya mbyo kavi ya rundururwa nondando yokumupukisa.—Eps. 18:26; 19:8.

Tjarwe wina, okutwa omambo wetu kotungovi tu tu yandjera ovandu okuyandja oumune wawo, ku yandjera ovandu mba isa okurikotamena ku Jehova poo ovapirure okutjita kutja varwe ve pandjare ongamburiro motjira tja Jehova. Ovakambure tjiva va nanukirwa i okukara nozombata motungovi otja itwo, nave etere ko ondjambu kena ra Jehova. Orungovi karuveze oruwa ‘rwokuvyura nomutima omupore imba mbe mu pirukira.’ (2 Tim. 2:23-25; 1 Tim. 6:3-5) Wina pa munikwa kutja, pa patururwa otungovi twoposyo kehi yena rotjira tja Jehova, kehi yena rOrutu Orunane, poo kehi yena rouṋepo wOrutu orunane. Posi yokutja, kape nokaṋepo kOrutu Orunane ku kena orungovi rwako oruni, poo nandarire ku keri korungovi romahakaeneno.

Okutunduuza ovandu okuyenda korungovi rwetu ndwi jw.org, ku vatera okuhandjaura “Ombuze Ombwa.” (Mat. 24:14) Oviungurisiwa vyomouyendjezewa wetu mbi tu pewa okuungurisa motjiungura tjetu tjokuzuvarisa, vi ṱunwa oruveze aruhe. Tu vanga kutja ovandu avehe ve mune mo ouwa. Kunao, otja Omazeva wokuungurisa orungovi rwetu tji ya raisa, mo yenene okuhindira omundu otjiherengururwa tjomambo wetu nge ri morungovi, poo okumuhindira olinka yoviṋa mbi ri morungovi rwetu ndwi jw.org. Mokutunduuza ovandu okuyenda kotungovi twetu twokotjiveta, matu ve vatere okutjiwa oruveze aruyerike ndu yandja ovikurya vyombepo vyatjiri. Ovikurya mbi, vi za ‘komukarere omuṱakame nomunazondunge’ erike.