Megafu ta ari mapagan i iyofer tam nga nebase-Biblia ira nga material, abbo na karuan nga mepamavulun nga kopian anna i-post danatun ta tanakuan nga website onu ta social media. Ngem yatun ay ari panuttul ta Regulasion na Pangiyusa * na website tam ira anna serioso ira nga problema i palattuaganna. Gittana manawag nga mabibbig tatun ira nga Regulasion, awan tu mapamavulunan nga “i-post i artwork, elektroniko nga publikasion, trademarks, musika, letratu ira, video ira, onu artikulo ira nga naggafu taw nga website ta Internet (maski anni nga website, file-sharing site, video-sharing site, onu social network).” Ngatta kawagan i kunnatun nga pangigamma?

Ngamin nga material ta website tam ira ay copyrighted. Purueban nga usan na apostata ira anna kumokkontra i publikasiottam ira ta website-da tapenu siluan i Saksi ira ni Jehova anna tanakuan paga. Gakkag naw ira nga website nga mangimula tu padduda ta nono na mabbibbig ira. (Sal. 26:4; Prov. 22:5) Usan na karuan i material nga maggafu ta publikasiottam ira onu i jw.org logo tam ta pangi-advertise, ta produkto ira nga melaku, anna ta application ira ta mobile device. Megafu ta egga i copyright tam anna trademark protection, egga i legal nga basehattam tapenu igamma i kunnatun nga mali nga pangiyusa. (Prov. 27:12) Ngem nu ipamavuluttam i totolay, maski i wawwaragi tam ira, nga mangi-post ta digital ira nga content tam ta tanakuan nga site onu usan i jw.org nga trademark tapenu mallaku, posible nga ari ginnan  na korte ira i apela tam nga fugaddan i mangokkontra anna negosiante ira.

Delikadu i pangidownload tu publikasion ira ta komforme laman fuera ta jw.org. Nipayabaga ni Jehova ta “mekatalo anna nannono nga doroban” i responsibilidad nga mangiyawa tu espiritual nga makan. (Mat. 24:45) Usu-usan natun nga “doroban” i ofisial laman ira nga website tapenu mangipublisa tu espiritual nga makan​—www.pr418.com, tv.pr418.com, anna wol.pr418.com. Egga laman gapa i tallu nga ofisial nga application tam para ta mobile device​—JW Language^®, JW Library^®, anna JW Library Sign Language^®. Makapattalo ittam nga awan tu kivuna nga negosio onu influwensia na mundo ni Satanas danaw nga produkto. Ngem nu mangalawa ittam tu espiritual nga makan maggafu ta tanakuan, posible nga natalianan onu noli yatun.​—Sal. 18:26; 19:8.

Fuera paga tatun, nu me-post i publikasiottam ira ta website nga puede nga makkomento i totolay, tiansa yatun na apostata anna kritika ira nga mangimula tu padduda ta organisasion ni Jehova. Nasiluan i karuan nga wawwaragi ta pakiddebate ta online, yatutta mas nammungan i kepasiranan na ngagan ni Jehova. Ari tu mepangngo nga lugar i online forum tapenu “mangivuya ta totolay ira nga manuria.” (2 Tim. 2:23-25; 1 Tim. 6:3-5) Egga gapa ira i naobserba nga feke nga social media account anna website ira nga nengagan ta organisasion, ta Manangngal nga Baggi, anna ta indibidual nga miembro natun. Daddamman, awan tu miembro na Manangngal nga Baggi nga egga i personal nga Web page onu social media account-na.

Makoffun ta pangiwara tu “Mapia nga Dumug” i pangidirekta ta totolay ta jw.org. (Mat. 24:14) Tulu-tuloy nga mapakasta i digital tool ira nga malawà tam para ta ministerio. Kayà tam nga mabbenefisio i ngamin. Yatutta nekagi ta Regulasion na Pangiyusa nga awayyam i-email ta tadday nga tolay i elektroniko nga kopia na publikasion onu i-share i link tatun nga material ta jw.org. Gukaban na pangidirekta ta totolay ta ofisial ira nga website tam, mekonekta tam ira ta tadday nga kurug nga paggafuan na espiritual nga makan, i “mekatalo anna nannono nga doroban.”