Sambu beto ke kabulaka mikanda na beto ya ke tendulaka Biblia ya ofele, bantu ya nkaka ke yindulaka nde kubaka yo mpi kutula yo na basite Internet ya nkaka kele mbi ve. Kansi, kusala mutindu yina kele ve kuzitisa bantuma ya ke monisa mutindu ya kusadila * site Internet na beto mpi yo ke nataka makambu mingi. Mutindu bantuma yango ke monisa yo pwelele, ata muntu mosi ve kele ti nswa ya “kubaka bifwanisu, mikanda, bidimbu (logos), bankunga, bafoto, bavideo to masolo ya nkaka ya site na beto mpi kutula yo na basite ya nkaka.” Sambu na nki bantuma yai kele mfunu?

Banswa yonso ya mambu yina kele na basite na beto kele ya bansoniki. Ba-aposta mpi bambeni ya nkaka ke salaka ngolo na kusadila mikanda na beto na basite Internet na bo sambu na kubenda Bambangi ya Yehowa mpi bantu ya nkaka na kuvukana ti bo. Lukanu ya basite Internet na bo kele ya kupusa bantu yina ke tangaka mikanda na beto na kukuma ti badute. (Nk. 26:4; Bing. 22:5) Bantu ya nkaka ke sadilaka mambu yina kele na mikanda na beto to kidimbu (logo) ya jw.org yina kele na site na beto sambu na kusala bapiblisite na bima na bo ya kuteka mpi na ba-application ya ba-apareyi. Kana beto ke tanina banswa ya bansoniki mpi kidimbu na beto, yo ta sadisa beto na kupesa ve bantu nzila ya kusadila site na beto na mutindu ya mbi. (Bing. 27:12) Kansi kana beto ke pesa bantu nzila, yo vanda bampangi, na kubaka bima na site na beto mpi kutula na basite ya nkaka to kusadila kidimbu ya jw.org sambu na kusadila mumbongo, bazuzi ta sadisa  beto ve na kubuyisa bambeni mpi bakompani ya ke salaka mumbongo na kusadila mambu ya kele na site na beto.

Kubaka mikanda na beto na basite ya nkaka kele kigonsa. Yehowa me pesaka mukumba ya kupesa madia ya kimpeve kaka na “mpika ya kwikama mpi ya mayele.” (Mat. 24:45) Sambu na kupesa beto madia ya kimpeve, “mpika” ke sadilaka kaka basite yai ya organizasio ke sadilaka—www.pr418.com, tv.pr418.com, mpi wol.pr418.com. Beto ke sadilaka kaka ba-application yai tatu na batelefone to na batablete—JW Language^®, JW Library^®, mpi JW Library Sign Language^®. Beto ke ndima nde mambu ya kele na basite mpi na ba-application yai kele ve sambu na kusala bapiblisite mpi bantu ya nsi-ntoto ke tulaka ve mambu ya mbi na kati. Kana beto ke baka madia ya kimpeve na basite ya nkaka, basite yina lenda soba to kuyika mambu ya nkaka.—Nk. 18:26; 19:8.

Diaka, kutula mikanda na beto na basite Internet ya nkaka yina ke pesaka bantu nzila ya kusolula ke pesaka bambeni dibaku ya kutuba mambu ya mbi to kuvweza dibundu ya Yehowa. Bampangi ya nkaka ke tulanaka bantembe ti bantu ya nkaka na Internet mpi yo ke salaka nde bantu kuvweza zina ya Yehowa. Kusala mpidina kele ve mutindu ya mbote ya ‘kulonga bankolami ti mawete.’ (2 Tim. 2:23-25; 1 Tim. 6:3-5) Beto me bakisaka nde bantu ya nkaka me kangulaka basite Internet na bo na zina ya dibundu ya Yehowa, ya Nto-Kimvuka mpi bo me kudipesaka bazina ya bampangi ya Nto-Kimvuka. Kansi ata mpangi mosi ve ya Nto-Kimvuka ke sadilaka site Internet na yandi mosi.

Kuzabisa bantu na kukota na jw.org ke sadisaka na kumwanga ‘nsangu ya mbote.’ (Mat. 24:14) Beto ke landa na kutomisa mambu mingi na basite mpi na ba-application na beto sambu na kutomisa mutindu na beto ya kusamuna. Beto ke zolaka nde bantu yonso kubakila yo mambote. Yo yina, mutindu bantuma ya kusadila site Internet na beto ke monisa yo, nge lenda tindila muntu mosi mukanda na Internet to kusonga yandi kisika yandi lenda baka yo na jw.org. Kana beto ke zabisa bantu basite Internet na beto, pana beto ke songa bo nto mosi ya kieleka ya kubaka madia ya kimpeve disongidila “mpika ya kwikama mpi ya mayele.”