Tondũ tũheanaga mabuku maitũ hatarĩ marĩhi, andũ amwe nĩ monaga atĩ kũmakobia na gũcoka kũmekĩra website-inĩ ingĩ kana social media nĩ ũndũ wĩtĩkĩrĩkĩte. O na kũrĩ ũguo, gwĩka ũguo nĩ kuuna Mawatho ma Ũhũthĩri * ma website citũ na ũndũ ũcio nĩ ũrehete mathĩna maingĩ. O ta ũrĩa honanĩtio thĩinĩ wa Mawatho ma Ũhũthĩri, gũtirĩ mũndũ wĩtĩkĩrĩtio “gwĩkĩra mbica, mabuku marĩa makoragwo website-inĩ itũ, marũũri maitũ, nyĩmbo, video, kana ekĩre icunjĩ iria irĩ website-inĩ thĩinĩ wa Intaneti, ũguo nĩ kuuga website o yothe, programu cia gũtũmanĩra bairo, cia gũtũmanĩra video, kana social media.” Nĩkĩ mũkaana ũcio nĩ wagĩrĩire?

Indo ciothe iria irĩ thĩinĩ wa website citũ nĩngitĩre nĩ watho. Aregenyũki na andũ angĩ matũkararagia nĩ mageragia kũhũthĩra mabuku maitũ thĩinĩ wa website ciao kũgucĩrĩria Aira a Jehova na andũ angĩ. Muoroto wa website icio nĩ gwĩkĩra nganja meciria-inĩ ma athomi. (Thab. 26:4; Thim. 22:5) Angĩ nao nĩ mahũthagĩra ũhoro wa mabuku maitũ kana rũũri rwa jw.org kũgathĩrĩria indo, gwĩkĩra indo-inĩ cia kwendia, kana thĩinĩ wa app cia thimũ kana tablet. Nĩguo tũgitĩre mawatho na marũũri maitũ, tũrĩ na itũmi cia kĩĩwatho cia kũgirĩrĩria ũhũthĩri ta ũcio mũũru. (Thim. 27:12) Kwoguo, tũngĩtĩkĩria andũ, nginya ariũ a Ithe witũ gwĩkĩra indo citũ website-inĩ ingĩ kana kũhũthĩra rũũri rwa jw.org kwendia indo, magooti no mage gũtũteithia rĩrĩa tũkũgirĩrĩria arĩa matũkararagia na ahũũri biacara kũhũthĩra ihooto citũ ũũru.

 Kũruta mabuku maitũ kũndũ kũngĩ tiga jw.org nĩ ũgwati. No “ngombo ĩrĩa njĩhokeku na njũgĩ” tu Jehova ehokeire wĩra wa kũheana irio cia kĩĩroho. (Mat. 24:45) “Ngombo” ĩyo ĩhũthagĩra o website ciayo iria njĩtĩkĩrĩku tu gũcabithia irio cia kĩĩroho. Website icio nĩ www.pr418.com, tv.pr418.com, na wol.pr418.com. Ningĩ tũkoragwo na app ithatũ tu iria njĩtĩkĩrĩku cia thimũ kana tablet, na nĩcio JW Language^®, JW Library^®, na JW Library Sign Language^®. Twagĩrĩirũo gũkorũo na ma atĩ indo icio ti thũkie nĩ thĩ ya Shaitani. Tũtingĩkorũo na ma atĩ irio cia kĩĩroho ti ngarũre kana igathũkio angĩkorũo no igerio handũ hangĩ.—Thab. 18:26; 19:8.

Makĩria ma ũguo, gwĩkĩra mabuku maitũ thĩinĩ wa website irĩ na handũ mũndũ angĩandĩka mawoni make nĩ kũheaga aregenyũki na akararia angĩ mweke wa gwĩkĩrĩra nganja ithondeka rĩa Jehova. Aarĩ na ariũ a Ithe witũ amwe nĩ magucĩrĩirio nĩ ndeereti Intaneti-inĩ, na ũndũ ũcio ũtũmĩte rĩĩtwa rĩa Jehova rĩcambio makĩria. Ndeereti cia Intaneti-inĩ ti handũ hega ha ‘gũtaara arĩa matarĩ na mwerekera mwega ũrĩ na ũhooreri.’ (2 Tim. 2:23-25; 1 Tim. 6:3-5) Ningĩ nĩ kũmenyekete atĩ nĩ kũrĩ na akaunti cia maheeni cia social media na website irĩ na rĩĩtwa rĩa ithondeka, rĩa Kĩama Kĩrĩa Gĩtongoragia, kana marĩĩtwa ma arĩa matungataga kĩama-inĩ kĩu. O na kũrĩ ũguo, gũtirĩ mũrũ wa Ithe witũ o na ũmwe wa Kĩama Kĩrĩa Gĩtongoragia ũkoragwo na Website yake kana ũkoragwo thĩinĩ wa social media o yothe.

Kuonia andũ kũhingũra jw.org nĩ gũteithagia gũtheremia ‘ũhoro mwega.’ (Mat. 24:14) Indo iria twamũkagĩra cia kũhũthĩra na thimũ kana tablet ũtungata-inĩ irathiĩ ikĩagagĩragio. No twende andũ othe magunĩke nĩcio. Nĩ ũndũ ũcio, o ta ũrĩa Mawatho ma Ũhũthĩri monanĩtie, no ũtũmĩre mũndũ ibuku na e-mail thĩinĩ wa Intaneti kana ũmũtũmĩre handũ angĩhihinya nĩguo athome kĩndũ thĩinĩ wa jw.org. Rĩrĩa tuonia arĩa marakenio nĩ ũhoro kũhingũra website citũ iria njĩtĩkĩrĩku, tũkoragwo tũkĩmonia ũrĩa tu ũrutaga irio cia kĩĩroho, na nĩwe “ngombo ĩrĩa njĩhokeku na njũgĩ.”