Bu mututu katuyi tupanyisha mikanda yetu ne bintu bikuabu bidi ne malu a mu Bible, bamue bantu badi bamona ne: kubiangata mu site wetu ne kubiela mu site mikuabu anyi miaba ya dipetelangana ya ku Enternete nkuanyishibue. Kadi kuenza nunku nkubenga kunemeka Malu a kulonda * adi atangila site yetu ne nkukebeshe bilumbu binene. Anu mudi Malu a kulonda au aleja patoke, muntu nansha umue kena ne bua “kuangata bimfuanyi, mikanda ya mu biamu, bimanyinu, mijiki, foto, filme, anyi biena-bualu bidi mu site eu bua kubiela ku Enternete (mu site kayi yonso, ni ngwa diabanyinangana bintu, wa diabanyinangana filme, anyi miaba ya dipetelangana ya ku Enternete).” Bua tshinyi mbele mukenji eu?

Bantu kabena ne bukenji bua kuenza mudimu ne tshintu tshia mu site yetu kakuyi dianyisha dia benatshi. Batontolodi ne baluishi betu bakuabu batu benza mudimu ne bintu bidi mu site yetu bua kupambuisha Bantemu ba Yehowa ne bantu bakuabu. Bintu bidi mu site yabu mbienza bua kujula dielakana mu mitu ya babadi. (Mis. 26:4; Nsu. 22:5) Bakuabu badi bangata bintu bidi mu site wetu anyi tshimanyinu tshietu tshia jw.org bua kuenza madisuisha a bintu biabu, bua kubifunda ku bintu biabu bia kupana ne pa programe ya mu tablete ne ya mu telefone. Patudi tukandika bantu bua kuenza malu abu ne bintu bidi mu site yetu anyi ne bimanyinu bietu, tudi tupeta bualu bua kudibingisha nabu bilondeshile mikenji, bua kupangisha bantu bua kuenza nabi mudimu bibi. (Nsu. 27:12) Kadi tshidi mua kuenzeka ntshinyi tuetu bamanye kadi tulekela bantu kampanda, nansha bena Kristo netu, bangata bintu bia mu site yetu babiela mu site mikuabu anyi benza mudimu ne tshimanyinu tshia jw.org bua kupana bintu  biabu? Dîba adi, tubadi katuena mua kutuakuila bua kupangisha baluishi betu anyi bangenda mushinga bua kuenza nabi mudimu bibi nunku to.

Kuambuila bintu bietu mu site mikuabu pa kumbusha mu site wa jw.org kudi ne njiwu. Yehowa mmupeshe anu “mupika wa lulamatu udi mudimuke” bujitu bua kufila biakudia bia mu nyuma. (Mat. 24:45) “Mupika” au udi wenza mudimu anu ne site yende idi mianyishibue eyi bua kufila biakudia bia mu nyuma: site wa www.pr418.com, tv.pr418.com, ne wol.pr418.com. Tudi kabidi ne programe anu isatu idi mianyishibue eyi ya mu tablete ne ya mu telefone: programe wa JW Language^®, JW Library^®, ne JW Library Sign Language^®. Tudi tueyemena bintu ebi bualu kabiena ne madisuisha ne ki mbinyanga kudi bulongolodi bua Satana to. Biakudia bia mu nyuma ebi biobi biangatshila miaba mikuabu, kakuena tshijadiki tshia ne: ki mbishintulula anyi binyanga to.​—Mis. 18:26; 19:8.

Kupita apu, kuela bintu bietu mu site idi bantu mua kufunda yabu ngenyi bua bintu ebi, kudi kuambuluisha batontolodi ne baluishi betu bakuabu bua kufikisha bantu ku dibenga kueyemena bulongolodi bua Yehowa. Bamue bana betu mbafike ku dishintakajangana ngenyi ya malu a mu Bible ku Enternete ne bantu bakuabu, kuenza nanku nkupendeshishe kabidi dîna dia Yehowa. Muaba wa dishintakajilangana ngenyi ku Enternete ki mmuaba mukumbane bua muena Kristo ‘kulongesha bonso badi kabayi badiakaje bua kuteleja muikale ne bupole’ to. (2 Tim. 2:23-25; 1 Tim. 6:3-5) Luapolo ludi luleja ne: kudi bantu badi bakangule miaba ya dipetelangana ya ku Enternete ya mafi ne site ya mafi mu dîna dia bulongolodi buetu, dia Kasumbu kaludiki, anyi dia benamu. Kadi muena mu Kasumbu kaludiki nansha umue katu ne wende muaba wa ku Enternete ne katu ne kende kaba mu muaba nansha umue wa dipetelangana ku Enternete to.

Kulomba bantu bua babuele mu jw.org kudi kuambuluisha bua kumuangalaja “lumu luimpe.” (Mat. 24:14) Badi benda anu bakajilula bintu bia mu biamu bitudi tupeta bua kuyisha nabi. Tudi tujinga ne: bintu ebi biambuluishe bantu bonso. Nunku, anu mudi Malu a kulonda aleja, udi mua kutumina muntu tshintu tshia mu site yetu mu mesaje, anyi adrese udi mua kumufikisha muaba uditshi mu jw.org. Patudi tulomba bantu badi banyisha bulelela bua bikale babuela mu site yetu idi mianyishibue, tudi tubatuangaja ne “mupika wa lulamatu udi mudimuke,” kasumbu ka bantu kamuepele kalelela kadi kafila biakudia bia mu nyuma.