Hakuwana nge tweji kuhananga vatu vinoma vyetu hawana wakanyombo, ngocho vamwe vashinganyeka ngwavo chapwa chakutamo kuhaka vinoma kana hajikeyala jeka jahainternet. Oloze, kulinga chuma kana chapwa hikuhokola lushimbi lwakeyala yetu, kaha nawa cheji kunehenga ukalu. Nganomu lwahanjika lushimbi kana, kakweshi mutu vetavisa “kuhaka mivwimbimbi, namikanda, nachinjikizo cha jw.org, namyaso, najifwato, najivindiyo chipwe vihande vyahakeyala yetu hajikeyala jekako.” Mwomwo ika vahakilako lushimbi kana?

Vyuma vyosena vyatwama hakeyala yetu twavitambwila lisesa kufulumende. Vaka-kusosoloka kulufwelelo navatu veka veji kuhakanga vinoma vyetu hajikeyala javo mangana vahanjike vyuma vyavipi hali Vinjiho jaYehova nakuhungumwisa vatu. Vyuma veji kuhanjikanga vyeji kulingisanga vatu vashinganyeke nge Vinjiho jaYehova vapwa vatu vavapi. (Samu 26:4; Vishi. 22:5) Vatu vamwe vanazachisanga mikanda yetu chipwe keyala yetu ya jw.org hakusaka kukulisa vyuma vali nakulanjisa. Ngocho lisesa lize twatambula nachinjikizo tweji kuzachisanga vikiko vyeji kutuhananga ngolo jakukanyisa vatu kuzachisa keyala yetu mujila yakuhenga. (Vishi. 27:12) Oloze nge natwechelela vatu chipwe vene vandumbwetu vahakenga vinoma vyetu hajikeyala jeka chipwe kuzachisa chinjikizo cha jw.org mangana vachizachise hakulanjisa vyuma vimwe, kaha nge natuvatwala kuzango, vaka-zango kaveshi kutuhakwilako.

Chapwa chaponde kututulula vinoma vyetu hajikeyala jeka. Yehova ahana “ndungo wakushishika wakuzangama” mulimo wakutuhana kulya  chakushipilitu. (Mateu 24:45) Ou “ndungo” eji kutuhananga kulya kana kuzachisa kaha jikeyala jetu jakufwana nge www.pr418.com, na tv.pr418.com, na wol.pr418.com. Kaha nawa twatwama navisete vitatu kaha vyakufwana nge Chisete Chakuzachisa haKulinangula Lilimi^®, naChisete cha JW^®, na JW Library Sign Language^®. Hajikeyala nahavisete kana hakiko kaha tunahase kuwana mijimbu yakwoloka yize kavakundwiza kuli vaka-kusosoloka kulufweleloko. Shikaho nge natutangilanga vinoma vyetu hajikeyala jeka, kaha tunahase kutanga vyuma vyamakuli vize vinahase kutuhungumwisa.—Samu 18:26; 19:8.

Kaha nawa nge natuhakanga vinoma vyetu hajikeyala jeka jize najilingisa vatu vakumbululeho, kaha nachilingisa vaka-kusosoloka kulufwelelo navaka-kutufwefulula vahanjike vyuma vyavipi haliuka lyaYehova. Vandumbwetu vamwe veji kulipulanga jipami navatu kana hainternet, ngocho echi cheji kunehanga katombo halijina lyaYehova. Shikaho katwatela kushinganyeka ngwetu tunahase kuzachisa internet mangana “[tunangule] vaze veji kulikanganga nakuvolola namuchima wauvwovu[ko].” (Chimo. 2, 2:23-25; Chimo. 1, 6:3-5) Kaha nawa vatu veji kusonekesanga jikeyala javo mulijina lyaliuka lyetu, naLizavu Lyakutwaminyina, namumajina avandumbwetu vamuLizavu Lyakutwaminyina. Oloze tachikizenu ngwenu vandumbwetu vamulizavu lyakutwaminyina kavatwama najikeyala javo jainternet mutu himutu jize veji kuzachisangako.

Kulweza vatu keyala ya jw.org cheji kutukafwanga kutandakanyisa “mujimbu wamwaza” (Mateu 24:14) Vinoma tweji kuzachisanga mumulimo wakwambulula vili nakwalumukilako lika. Ngocho tuli nakusaka vatu vosena vanganyale kuvinoma kana. Nganomu lwahanjika lushimbi lwakeyala yetu, munahase kutumina mutu mukanda halikina lyenyi chipwe kumulweza keyala yetu ya jw.org. Kulweza vatu vakuwahilila keyala yetu nachivakafwa vatambule kulya chakushipilitu chakufuma kuli “ndungo wakushishika wakuzangama” keshi kuli mutu wekako.