Nikech wachiwoga bugewa kod vidio ma lero Muma nono ma onge chudo, jomoko paro ni ginyalo anyala ketogi e websait mamoko kata kuonde mitudruokie gi osiepe e intanet. Kata kamano, timo kamano ketho Chikewa * (Terms of Use) mag websait duto ma wan-go kendo osekelo chandruok mang’eny. Ka luwore gi chikego, onge ng’ato ang’ata moyiene golo “gik mogor, buk, trademarks, thum, picha, vidio, kata sula moro amora e websaitwa kendo ketogi e Intanet (mano oriwo websait moro amora, gi kuonde ma ji ketoe buge kod vidio).” Ang’o momiyo oket chik ma kamano?

Nitie chike ma tayo kaka onego oti gi gik moko duto manie websaitwa. Joma ong’anyo moweyo adiera kod joma kwedo tijwa temo tiyo gi bugewa e websaitgi giwegi mondo giywago Joneno mag Jehova kod jomamoko. Weche miketo e websaitgo olos mondo oket kiawa e chuny joma somogi. (Zab. 26:4; Nge. 22:5) Nitie joma tiyo gi gik ma yudore e bugewa kata picha mar jw.org (jw.org logo) e lando gik mopogore opogore, e gik miuso, kata e program mag simo (mobile device apps.) Keto chike ma tayo kaka itiyo gi gik ma yudore e websaitwa miyo wabedo gi ratiro mar geng’o ng’ato ang’ata ma dwaro tiyo marach gi websaitwa. (Nge. 27:12) Kata kamano, ka wayie ne jomoko moriwo kata owete mondo oket gik ma gigolo e websaitwa e websait mamoko, kata mondo giti gi picha mar jw.org e gik miuso, mano nyalo miyo kes lowa e kot sama wadhi donjo ne joma kwedowa  kata jolok ohala ma tiyo gi websaitwa e yo ma ok owinjore.

Golo bugewa kata vidio kama opogore gi jw.org nyalo kelo chandruok maduong’. “Jatich mogen kendo mariek” kende e ma Jehova omiyo ting’ mar ikonwa chiemb chuny. (Mat. 24:45) ‘Jatijno’ tiyo mana gi websait ma gisepwodho kende mondo gitigo e chiwo chiemb chuny. Websaitgo gin www.pr418.com/luo, tv.pr418.com, kod wol.pr418.com. Bende, wan mana gi programbe adek kende ma wanyalo tiyogo e simo, tablet, kata kompyuta ma gin JW Language^®, JW Library^®, kod JW Library Sign Language^®. Websaitgo kod programgo ok landie ohala kendo ok ochidgi e yo moro amora gi piny Satan. Ka ng’ato oyudo chiemb chuny e websait mamoko mopogore gi magwa mopwodhi, nyalo bedo ni osegweny weche moko e iye.—Zab. 18:26; 19:8.

E wi mano, keto bugewa kata vidio e websait mamoko ma miyo ji thuolo mar chiwo pachgi miyo joma ong’anyo ne adiera kod jomamoko ma kwedowa thuolo mar ndiko gik ma miyo ji keto kiawa e wi riwruok mar oganda Jehova. Owete gi nyimine moko osedonjo e ywaruok gi joma kamago e intanet, ma en gima medo kelo achaya ne nying Jehova. Tudruok gi ji e websait kaka mago ok mi ng’ato thuolo maber mar “puonjo jo akwede e yor muolo.” (2 Tim. 2:23-25; 1 Tim. 6:3-5) Osefwenyore ni nitie joma loso websait ka gitiyo gi nying riwruok mar oganda Jehova, Bura Matayo, kata gi nying owete manie Bura Matayo. Kata kamano, owete duto manie Bura Matayo onge gi websait ma maggi giwegi to bende ok giti gi kuonde mitudruokie gi osiepe e intanet.

Nyiso ji kaka ginyalo tiyo gi jw.org konyowa e lando “wach maber.” (Mat. 24:14) Gigewa mag lendo manie intanet imedoga los kaka kinde medo kalo. Wadwaro ni gigo okony ji duto. Omiyo, mana kaka owach e chike mag websaitwa, inyalo oro ne ng’ato buk kata vidio e e-mail, to bende inyalo orone adres ma tere e jw.org. Sama wanyiso ji kaka ginyalo yudo weche manie websaitwa mopwodhi, watudogi gi kama chiemb chuny madier yudoree, tiende ni “jatich mogen kendo mariek.”