Nga tsín baténa je naxinandále Jeobá je xo̱n xi bʼasje xi ya Biblia yʼangini, tjínkʼa xi kʼoasʼin síkjaʼaitsjen nga koa̱n ya koatiotʼa pájina xi kjaʼaínile xi tiyani Internet kʼoa tsa ya redes sociales. Tonga ʼyani xi kʼoasʼín tífaʼatone Josʼin koa̱n koa̱nchjén * pájina jebi kʼoa jetse kjoa tíbichómani nga kʼoakjima. Je kjoatéxoma xi faʼaitʼa pájina jebi kʼoatso nga tsín ʼya xi tiʼndele nga kjaʼaí pájina koatiotʼa “je sén, xo̱n xi faʼaitʼa, músika, je dibujo, video kʼoa jmesani xi faʼaitʼa pájina jebi (ni ya redes sociales, kʼoa niyajinla pájina jñani ma nikasénlee xíngiaa video kʼoa tsa jmesa xo̱nni)”. Ánni kui kjoatéxoma jebi tjínnile.

Ngayeje jmeni xi satíotʼa je pájina xi tíjnaná ya Internet kjoatéxoma tjínle. Je chjota xi yátsʼi̱n binyále Niná kʼoa xi kontra batiole yaa batíotʼa pájina xi tjíole ya Internet jmeni xi basje naxinandále Niná, ánni nga yaa skótsensínile je testigole Jeobá kʼoa kao xi kjaʼaí chjota. Tonga kʼoati batíotʼa xi kjaʼaísanile, nga̱ kui xi mele nga to jao katasatío tokoán (Sal. 26:4; Prov. 22:5). Kʼoa tjín je chjota xi kui síchjén jmeni xi bʼasje naxinandále Niná kʼoa tsakuije̱ logotipo xi tsʼe jw.org kʼianga ya batíotʼa jmeni xi baténa. Kʼoati kui síchjén nga batíonda je aplicación xi ma batioya teléfono kao tableta. Nga kjoatéxoma tjínle jmeni xi faʼaitʼa je pájina xi tíjnaná ya Internet, je naxinandále Niná tjínle ʼnde ngixko̱n chjotaxá nga kʼoechjoale nga kʼoasʼín je chjota (Prov. 27:12). Tsa totsjoáʼnde je naxinandále Niná, ninga testigole Jeobá ma je xi kʼoasʼin, nga kjaʼaí pájina xi tsʼe Internet koatiotʼa jmeni xi faʼaitʼa je pájina xi tíjnaná ya Internet kʼoa tsakuije̱ nga kʼoasʼin sichjén je logotipo xi tsʼe jw.org nga tjín xi koatena, je chjotaxá tsakui nichxin likui kuinyakao je naxinandále Niná nga koatechjoale  je chjota xi kontra batio kʼoa kao xi negosio síkao jmeni xi faʼaitʼa je pájina xi tíjnaná ya Internet.

Xkón tíjna tsa xin pájina xi tsʼe Internet chʼa̱jenñá je xo̱n xi nichjén. Je Jeobá tojekjoán “je choʼnda xi nʼiotʼakon xi nda be xá” tíbánele nga kuitsoyale je choʼndale xi tʼatsʼe Niná (Mat. 24:45). Je “choʼnda” jebi totsen tjíole pájina xi tsʼe Internet jñani nga batíotʼa je xo̱n xi Énle Niná yʼangini. Kui je www.pr418.com/mau, tv.pr418.com kao wol.pr418.com. Kʼoa je aplicación xi bʼasje naxinandále Niná xi ma satíoya teléfono kao tableta tokuikjoán jebi: JW Language^®, JW Library^®, kao JW Library Sign Language^®. Je aplicación jebi kʼoa kao pájina xi tjíoná ya Internet alikui jme anuncio faʼaijin joma xi kjaʼaí aplicación kʼoa alikui kui tíkʼójin kjoafaʼaitsjen xi tjín sonʼndele Na̱i. Kʼiatsa xinlani pájina xi tsʼe Internet kjoásjee je xo̱n xi nichjén kʼoa tsa kjaʼaí aplicación si̱chjén, alikuijin ñaki sʼe̱jngo tokoán nga kui si̱chjén, nga̱ tsakui nichxin jebʼantjaiyajin kʼoa jekui tíkʼójin je kjoafaʼaitsjen xi tjín sonʼnde (Sal. 18:26; 19:8).

Xi ijngosani, kʼiatsa ʼyani xi ya pájina xi tsʼe Internet jña ma tsjoá énle chjota koatiotʼa je xo̱n xi nichjén, jé tsjoále ʼnde nga kʼoati tsjoá je énle chjota xi kontra batiole naxinandále Niná kʼoa kao je chjota xi yátsʼi̱n binyále Jeobá. Tjínkʼa ndsʼee xi ya tjen Internet kjántʼani tʼatsʼe Énle Niná, kʼoa nga kʼoasʼín sijndí je jaʼaínle Jeobá. Alikui koa̱n nga ya kʼuínyanile “kao kjoanda” je chjota xi tsín sasénle je Énle Niná (2 Tim. 2:23-25; 1 Tim. 6:3-5). Kʼoati ʼyale nga tjín je pájina xi tsʼe Internet kao redes sociales jñani kui síchjén je jaʼaín xi yʼa naxinandále Niná, tsʼe Cuerpo Gobernante kʼoa kao joʼmi je ndsʼee xi ya tjíojin Cuerpo Gobernante. Tonga nijngojinla ndsʼee xi ya tjíojin Cuerpo Gobernante xi tsen tjínle jngo pájina ya Internet kʼoa tsa ya redes sociales.

Kʼianga kʼoaʼmilee je chjota nga katafaʼasʼen ya pájina jw.org, bʼainganʼioñá nga tiʼmiyason “je énnda chjotse” (Mat. 24:14). Ngayeje xi nichjén nga ʼmiyasoán xi faʼaitʼa ya pájina xi tíjnaná ya Internet kjitʼaa kjimachjotseya. Kʼoa kui xi mená nga katabinyakao ngatsʼi chjota. Tojo tso je kjoatéxoma xi tjínle pájina jebi, je xi tiʼnde nga koa̱n kʼoasʼiaan, kʼiatsa kao correo electrónico si̱kasénnilee tsa ʼyani jngo xo̱n xi Énle Niná yʼangini kʼoa tsa enlace si̱kasénlee nga koa̱n ya jw.org kʼaonjenni. Kʼianga kʼoaʼmilee je chjota xi mandosinle je Énle Niná nga katasíchjén je pájina xi tjíoná ya Internet, yaa nikaséntʼalee “je choʼnda xi nʼiotʼakon xi nda be xá”, nga̱ tojéní xi tsoyaná xi tʼatsʼe Niná.