Komë Diosë kyäjpn kyaj ttoogyë ëxpëjkpajn diˈib yajpëtsëëmpy, ta nääk wyinmaytyë ko mbäät tkopyarattë ets dyajpattët wiink sitio o mä redes sociales. Perë tyäˈädë yëˈë kyutëjpy extëm jyënaˈanyë Términos y Condiciones de Uso * diˈib miimp mäjatyë sitio nmëdäjtëm, ets të dyajjaˈˈaty mëjwiin kajaa jotmay. Jap yajxon tnigajpxy ko nipën tkamëdatyë permisë parë dyajjënakëdë “ijxpajtën, dibujë, ëxpëjkpajn diˈib miimp mä Internet, marcas de productos, ëy, bideo o tijaty jap miimp etsë net dyajpatët wiink sitio (nan kyaj mbäät dyajpety mä redes sociales ets ni wiink pajina mä nyaytyukˈixëdë bideo o archivos)”. ¿Tiko jyëjpˈamëty ets duˈun yajpëjtäˈägëdë tyäˈädë anaˈamën?

Tukëˈëyë tijaty pëtsëëmp mäjatyë sitio nmëdäjtëm, myëdäjtypyë permisë diˈib të yaˈˈamdoy mä gobiernë. Apostatas ets pënaty xymyëtsipˈäjtëm pyëjtaktëbë ëxpëjkpajn diˈib yajpëtsëëmbyë Diosë kyäjpn mä tmëdattë sitio parë japë Jyobaa tyestiigëty tyëkëdët etsë wiink jäˈäy. Per nan tap të tpëjtäˈäktë diˈib mbäät xyyaˈˈamajtsk xyyajjotmajtskëm (Sal. 26:4; Prov. 22:5). Nan ta jäˈäy diˈib yajtuundëp tijatyë miimp mä ëxpëjkpajn etsë logotipo diˈib mä jw.org, parë tpëjtäˈäktë anunsyë mä Internet, parë dyajkëxkojtë mä tijaty tyoˈk yäjktëp, o nanduˈun ttukxëˈattë aplicación diˈib jënäjkp mä telefënë o tabletë. Diosë kyäjpn të tˈamdoyë permisë mä gobiernë parë tkuwäˈänëdë ëxpëjkpajn etsë logotipo diˈibë yajtukˈijxwëˈëmp, ets nipën mbäät tkayajnikojtuˈuty o tkayajtuny (Prov. 27:12). Ko yajnasˈixëdë jäˈäy, axtë diˈib Testiigëty, ets tpëjtäˈägët mä wiink sitio tijatyë Diosë kyäjpn yajpëtsëëmpy o dyajnikojtuˈudëdë logotipo diˈib mä jw.org mä tijaty  tyoˈkypy, mbäät kyaj nëjkx xypyuwäˈkëm ja yajkutujkpë ko nyajtuˈuˈadukäˈänëm pënaty xymyëtsipˈäjtëm o pënaty tyuknegosyëtuundëp.

Kujotmay ko nyajjënäjkëmë ëxpëjkpajn wiinktsoo ets kyaj jyapëty mä jw.org. Jyobaa yëˈëyë të ttuknipëkyë tuumbë diˈib kuwijy parë dyakët ja käˈäy ukën (Mat. 24:45). Etsë tyäˈädë tuumbë diˈib kuwijy jap jeˈeyë të tpëjtaˈagyë käˈäy ukënë mä tyäˈädë tëgëëkpë sitio: jw.org, tv.pr418.com etsë wol.pr418.com. Nan jeˈeyë jyaˈˈaty tëgëëgë aplicación diˈib mbäät nyajjënäjkëm mä telefënë o mä tabletë: JW Language^®, JW Library^® etsë JW Library Sign Language^®. Mbäät nˈijtëm seguurë ko tyäˈädë sitio diˈib nmëdäjtëm etsë aplicación, kyaj tmëminy mä yaˈˈawan yaˈˈayääxë tijaty yajtoˈkp ets kyaj të dyajmäˈätyë Satanásë jyaˈay. Per pën wiinktsoo nyajtsoˈonëm ja käˈäy ukën, mbäät të yajwijtsmäˈäty o të yˈaxëëgë (Sal. 18:26; 19:8).

Ko nyajpajtëmë ëxpëjkpajn mä Internet mä mbäädë jäˈäy tkujayëdë wiˈix wyinmaytyë, mbäädë netë apostatas ets pënaty xyˈëbat xykyäjpxpatëm tkujayëdë diˈib mbäät xyyaˈˈamajtsk xyyajjotmajtskëm mä Jyobaa kyäjpn. Ta näägë nmëguˈukˈäjtëm diˈib jap të tyëkëdë naygyajpxytsyiˈkëbë ets niˈigyë axëëk të dyajwëˈëmdë Diosë xyëëw. Mä Internet kyaj mbäät yajtukniˈˈixë mëdë “tudaˈakyˈäjtën” ja diˈib kyaj tmëdowäˈäny (2 Tim. 2:23-25; 1 Tim. 6:3-5). Nan tapë kuentë të dyajkojtë mä redes sociales etsë sitio diˈib tyukxëwˈäjttëp extëm diˈib mëët yaˈijxwëˈëmyë Diosë kyäjpn o Diˈib wyoowˈyoˈoytyëbë Jyobaa tyestiigëty o mëdë xyëëw niduˈugë tyäˈädë nmëguˈukˈäjtëm. Per nituˈugë tyäˈädë nmëguˈukˈäjtëm tkamëdaty tuˈugë pajina mä Internet ets ni kyayajpääty mä tuˈugë red social.

Ko jäˈäy nˈanmäˈäyëm ets tyëkëdët mä sitio jw.org, ta ngäjpxwäˈkxëm ja “oybyë ayuk” (Mat. 24:14). Diosë kyäjpn niˈigyë dyaˈˈajamë ja tuumbajn diˈib nyajtuˈunëm mä selulaar ets mä tabletë parë ngäjpxwäˈkxëm. Ntsojkëm parë niˈamukë jäˈäy ttukˈoyˈattët. Pääty extëm jyënaˈany mä Condiciones de Uso, mbäät nduknigajxëmë jäˈäy mä correo electrónico tuˈugë ëxpëjkpajn o tuˈugë link diˈib mënëjkxëdëp mä jw.org parë dyajjënakët. Ko jäˈäy nˈanmäˈäyëm ets tyëkëdët mä sitio oficial diˈib nmëdäjtëm, yëˈë nety ndukniwoˈowëm ja käˈäy ukënë diˈib jantsy tsoˈomp mä tuumbë diˈib kuwijy.