Kemej amo tiknamakaj tamachtilis tein mokixtia, sekin kinemiliaj ke uelis kitaliskej itech okseki páginas itech Internet oso itech redes sociales. Sayoj ke nejin kitapanauilia tein kijtoua Términos y Condiciones de Uso * tein moixtalia itech páginas tein tiktekitiltiaj itech Internet uan kiualkuini uejueyi kuejmolmej. Ompa senkis moijtoua ke amo akin uelis kitalis ixneskayomej, amaixmej, tajtolmej jw uan jw.org, tatsotson, taixkopimej, videos oso teisa tein onkak itech nejin página itech okse página itech Internet (nion itech redes sociales nion itech páginas kampa ueli se kitalia videos oso okseki taman tein oksekin uelis kiitaskej). ¿Keyej moneki nejin tanauatil?

Nochi tein moajsi itech páginas tein tiktekitiltiaj itech Internet ixyetok ininixpan tekiuanij akoni iaxka. Akin kikaujkej uan kiixnamikij tamachtilis tein melauak uan okseki taixnamikinij kichijchiuaj okseki páginas kampa kitaliaj tamachtilis tein toaxka porin kitemouaj maj itaixpantijkauan Jiova uan oksekin kinekikan kiitaskej. Sayoj ke ompa no kitaliaj seki taman tein ika kitemouaj taomeyolotiskej (Sal. 26:4; Prov. 22:5). Oksekin kitekitiltianij tamachtilis tein toaxka oso tajtolmej jw.org itech tein kinamakaj uan itech aplicaciones tein motekitiltia itech teléfonos uan tabletas. Kemej ixyetok ininixpan tekiuanij akoni iaxka, ueli tikijtouaj maj amo akin ijkon kitekitilti (Prov. 27:12). Komo tikauaskiaj maj sekin, maski no itaixpantijkauan Jiova, kitalikan tamachtilis tein toaxka itech okseki páginas oso maj kitekitiltikan tajtolmej jw.org itech tein kinamakaj, tekiuanij xa amo techpaleuiskej maj tikintsakuilikan taixnamikinij oso tanamakanij.

  Okseko tiktemouiskej tamachtilismej uan amo itech jw.org uelis yeski tamouilil. Jiova sayoj kinauatij takeual takuaujtamach uan tamatkej maj kitemaka tamachtilis tein moajsi itech iTajtol (Mat. 24:45). Nejin takeual kitalia tamachtilis sayoj itech páginas tein kitekitiltia. Nejin yejua jw.org, tv.pr418.com uan wol.pr418.com. Uan no, sayoj moajsij eyi aplicaciones tein motekitiltia itech teléfonos uan tabletas: JW Language^®, JW Library^® uan JW Library Sign Language^®. Uelis titakuaujtamatiskej ke itech nejin aplicaciones uan páginas itech Internet amo moteixmatiltia tanamakalis uan amo kipia tanemilil tein onkak itech taltikpak kampa taixyekantok Satanás. Komo okseko tikixtiaj tamachtilis tein Jiova techmaka, amo uelis tikmatiskej ox kipatakej oso kitamajxitilijkej (Sal. 18:26; 19:8).

Uan no, komo aksa kitalia tamachtilis tein toaxka itech páginas kampa miakej ueli tajkuilouaj, akin kikaujkej uan kiixnamikij tamachtilis tein melauak uan akin techijijtouaj uelis taomeyolotiskej uan kichiuaskej maj amo se takuaujtamati itech inechikol Jiova. Seki tokniuan motajtolteuianij iniuan oksekin itech Internet, uan nejin kichiuani maj okachi amo kuali ika motajto itokay Jiova. Kampa miakej ueli sentajtouaj itech Internet amo uelis se kinmachtis ika “yolyemanalis naken kixtopeuaj in tanextililis de Tajtoltsin de Dios” (2 Tim. 2:23-25; 1 Tim. 6:3-5). Uan no, sekin takajkayauanij uan kichijchiuanij cuentas itech redes sociales uan páginas itech Internet ika itokay inechikol Dios, Oloch Taojtokaltianij uan ika inintokay akin ompa pouij. Tein melauj, nion semej akin poui iniuan Oloch Taojtokaltianij kipia se página itech Internet nion kitekitiltiaj nion se red social.

Keman tikiniluiaj taltikpakneminij maj kiitakan jw.org, titapaleuiaj maj moteixmatilti kuali tanauatilmej (Mat. 24:14). Nepaleuilmej tein tikseliaj itech Internet tein tiktekitiltiaj itech tanojnotsalis okachi moyektalijtiyouij. Uan tiknekij maj nochin kinpaleui. Yejua ika, kemej moixtalia itech Términos y Condiciones de Uso, kemaj uelis se kititanilis aksa itech correo electrónico se taman tein moajsi itech jw.org oso kampa sayoj kipatskilis uan ompa kitemouis. Keman akin kinekij okachi kiixmatiskej tein melauak tikiniluiaj maj kiitakan páginas tein tiktekitiltiaj itech Internet, tikinpaleuiaj maj motokikan iuan takeual takuaujtamach uan tamatkej, akin sayoj yejua ixyetok maj kitemaka tamachtilis.