Ka ge re nea batho dikgatišo tša rena le dilo tše dingwe tšeo di theilwego Beibeleng mahala, ba bangwe ba nagana gore go phara dilo tše diwepesaeteng tše dingwe le mekerong ya poledišano ga go na bothata. Lega go le bjalo, go phara dilo tšeo diwepesaeteng tše dingwe ke go tshela Melao ya Tirišo * ya diwepesaete tša rena, e bile go bakile mathata a magolo. Melao ya Tirišo e bolela ka mo go kwagalago gore ga go na motho yo a dumeletšwego go phara dilo tše di latelago Inthaneteng: “Diswantšho, dikgatišo, maswao, mmino, dinepe, dibidio, goba dihlogo tšeo di lego diwepesaeteng tša rena. Se se akaretša go di phara wepesaeteng le ge e le efe, mekerong ya inthanete ya go abelana difaele, mekerong ya inthanete ya go abelana dibidio goba mekerong ya poledišano inthaneteng.” Ke ka baka la’ng melao ye e nyakega?

Dilo ka moka tšeo di lego wepesaeteng ya rena di šireleditšwe ka melao ya go gatiša (copyright). Bahlanogi le baganetši ba bangwe ba leka go diriša dikgatišo tša rena diwepesaeteng tša bona go fora Dihlatse tša Jehofa le batho ba bangwe. Morero wa diwepesaete tšeo ke go dira gore batho bao ba tsenago go tšona ba thome go belaela mokgatlo wa rena. (Ps. 26:4; Die. 22:5) Ba bangwe ba diriša dilo tšeo di lego dikgatišong tša rena goba ba diriša leswao la jw.org go bapatša dilo, go rekiša dilo le go dira mananeo a didirišwa tša elektroniki. Ka go dira gore wepesaete ya rena e šireletšege molaong, re ba le mabaka a semolao a go thibela batho gore ba se diriše gampe wepesaete ye. (Die. 27:12) Eupša ge re ka dumelela batho, gaešita le bana babo rena, go phara dikgatišo tša rena le dilo tše dingwe diwepesaeteng dišele, goba  go diriša maswao a jw.org go rekiša dilo, se se ka dira gore dikgoro tša tsheko di se re emelele ge baganetši goba babapatši ba dikgwebo ba tshetše Melao ya Tirišo.

Go kotsi go taonelouta dikgatišo tša rena mafelong a mangwe ntle le go jw.org. Jehofa o file feela “mohlanka yo a botegago le wa temogo” boikarabelo bja go hlokomela batho ba gagwe ka dijo tša moya. (Mat. 24:45) “Mohlanka” yoo, o diriša feela diwepesaete tša wona tša semmušo, bakeng sa go aba dijo tša moya. Diwepesaete tšeo ke www.pr418.com, tv.pr418.com, le wol.pr418.com. Le gona re na le mananeo a mararo feela ao a lego a semmušo bakeng sa didirišwa tša rena tša elektroniki. Mananeo ao ke JW Language^®, JW Library^® le JW Library Sign Language^®. Re ka tshepa gore didirišwa tše ga di na dipapatšo goba dilo tšeo di šilafaditšwego ke lefase la Sathane. Ge e ba re ka hwetša dijo tša moya go tšwa methopong e mengwe go na le kgonagalo e kgolo ya gore re di hwetše di fetošitšwe.—Ps. 18:26; 19:8.

Go oketša moo, go phara dikgatišo tša rena diwepesaeteng tšeo batho ba kgonago go ngwala dikgopolo tša bona, go dira gore bahlanogi le baswayadiphošo ba ngwale dikgopolo tša bona tšeo di dirago gore batho ba bangwe ba se sa tshepa mokgatlo wa Jehofa. Bana babo rena ba bangwe ba ile ba ikhwetša ba tsenatsene dingangišano tša inthaneteng ba sa lemoge gomme seo sa dira gore leina la Jehofa le gobošwe kudu. Inthanete ga se lefelo le lebotse la go “[ruta] ka boleta bao ba rabelago.” (2 Tim. 2:23-25; 1 Tim. 6:3-5) Le gona go hweditšwe gore go dirilwe mekero ya bofora ya dipoledišano le diwepesaete tša bofora go dirišwa leina la mokgatlo, Sehlopha se Bušago le ditho tša sona. Lega go le bjalo, ga go na setho sa Sehlopha se Bušago seo se nago le Wepesaete ya sona goba mokero le ge e le ofe wa poledišano.

Go botša batho gore ba ye go jw.org go thuša gore ‘ditaba tše dibotse’ di phatlalale. (Mat. 24:14) Mokgatlo o dula o kaonefatša dilo tšeo re di dirišago tšhemong. Ka gona, re thabela gore motho yo mongwe le yo mongwe a holwe ke dilo tšeo. Ka baka leo, go etša ge Melao ya Tirišo e bontšha, o ka romela motho dikgatišo tša rena ka e-mail goba wa mo romela linki ya kgatišo yeo e lego go jw.org. Ge re botša batho bao ba thabelago gore ba ye diwepesaeteng tša rena tša semmušo, re ba kgokaganya le “mohlanka yo a botegago le wa temogo,” e lego sehlopha se nnoši seo se re neago dijo tša moya.