Kɛmɔ yɛndɔne yɛ Baebolo nwo mbuluku ne mɔ la ati, bie mɔ te nganeɛ kɛ bɛkola bɛtwe bɛgua wɛbsaete gyɛne anzɛɛ social media ne azo. (Social media a le wɛbsaete anzɛɛ app mɔɔ maa menli kola di ngitanwo wɔ mekɛ mɔɔ bɛkɛhɔ zɔhane wɛbsaete anzɛɛ app ne azo la.) Noko, ɛhye nee yɛ wɛbsaete ne Anwo Mɛla * ne ɛnyia na yeva ngyegyelɛ mgbole yera. Kɛ mɔɔ bɛha ye wienyi wɔ zɔhane Mɛla ne anu la, bɛmmaa awie biala adenle kɛ ɔva “nvoninli, ɛlɛtɔlɔneke mbuluku, gualilɛ sɛkɛlɛneɛ, edwɛne, nvoninli, vidio anzɛɛ edwɛkɛ ɔvi wɛbsaete ɛhye azo ɔgua (wɛbsaete gyɛne, wɛbsaete mɔɔ bɛfa ninyɛne bɛgua ɛkɛ bɛmaa awie mɔ twe bie anzɛɛ social network) azo.” Duzu ati a mɛla ɛhye anwo hyia ɛ?

Copyright wɔ debie biala mɔɔ wɔ yɛ wɛbsaete ne azo la anwo. Kpɔkyevolɛma nee dwazotiama bɔ mɔdenle kɛ bɛdua yɛ mbuluku mɔɔ gua bɛ wɛbsaete ne azo la azo bɛabɛlɛbɛla Gyihova Alasevolɛ nee menli gyɛne. Bɛyɛ ninyɛne mɔɔ wɔ wɛbsaete ɛhye mɔ azo la kɛ bɛfa bɛazɛkye kengavolɛma adwenle. (Edw. 26:4; Mrɛ. 22:5) Bie mɔ noko ɛva yɛ mbuluku ne mɔ anu edwɛkɛ anzɛɛ yɛ jw.org sɛkɛlɛneɛ ne ɛli gyima wɔ gualilɛ nwo nolobɔlɛ nu, ɛbeta ninyɛne adɔne nwo yɛɛ bɛva bɛgua bɛ mobaele app zo. Yɛ copyright nee yɛ sɛkɛlɛneɛ mɔɔ yɛbɔ nwolɛ bane la ati, yɛlɛ adenle wɔ mɛla nu yɛtua menli kɛ bɛmmafa yɛ ninyɛne bɛdi gyima wɔ adenle ɛtane zo. (Mrɛ. 27:12) Noko, saa yɛmaa awie mɔ mɔɔ yɛ mediema bɔbɔ boka nwo la adenle  yɛmaa bɛfa yɛ edwɛkɛ bɛgua wɛbsaete gyɛne zo anzɛɛ jw.org sɛkɛlɛneɛ ne bɛtɔne bɛ ninyɛne a, bie a kɔɔto ne ɛnrɛgyinla yɛ nzi wɔ mɔdenle mɔɔ yɛlɛbɔ kɛ yɛsi dwazotiama nee gualilɛma adenle la.

Esiane wɔ nu kɛ yɛbamaa bɛahwe yɛ mbuluku ne mɔ bɛavi ɛleka gyɛne mɔɔ tɛ jw.org azo la. “Akɛlɛ nɔhavo nee nrɛlɛbɛvolɛ ne” ala a Gyihova ɛmaa ye gyima kɛ ɔmaa yɛ sunsum nu aleɛ a. (Mat. 24:45) “Akɛlɛ” zɔhane dua ye mɛla adenle zo wɛbsaete mɔɔ bɛlie bɛdo nu la azo a siezie sunsum nu aleɛ a​—www.pr418.com, tv.pr418.com, yɛɛ wol.pr418.com. Eza yɛlɛ mɛla adenle zo app nsa ala mɔɔ bɛyɛ bɛmaa moba ngakyile la​—JW Language^®, JW Library^®, yɛɛ JW Library Sign Language^®. Yɛbahola yɛalie yɛali kɛ gualilɛ nwo ninyɛne anzɛɛ Seetan ewiade ne nyɛleɛ evinli ne bie ɛnle zo. Saa sunsum nu aleɛ ne dua wɛbsaete gyɛne zo a, daselɛ biala ɛnle ɛkɛ mɔɔ kile kɛ bɛnrɛhakyi anzɛɛ bɛnrɛzɛkye nuhua edwɛkɛ ne bie a.​—Edw. 18:26; 19:8.

Bieko, saa bɛfa yɛ mbuluku ne mɔ bɛgua wɛbsaete gyɛne mɔɔ menli kola kile bɛ adwenle wɔ ɛkɛ la azo a, ɔbamaa kpɔkyevolɛma nee tendɛtiama gyɛne aha edwɛkɛ mɔɔ bazɛkye anwodozo mɔɔ menli lɛ ye wɔ Gyihova ahyehyɛdeɛ ne anu la. Mediema bie mɔ ɛva bɛ nwo ɛwula Yintanɛte zo kpolerazulɛ nu, na ɛhye ɛmaa bɛgua Gyihova duma ne anwo evinli dɔɔnwo. Yintanɛte zo adwelielilɛ ɛnle adenle kpalɛ mɔɔ bɛdua zo bɛfa ‘bɛtɛɛyɛlɛ bɛkilehile atuadelɛma’ a. (2 Tim. 2:23-25; 1 Tim. 6:3-5) Eza bɛnwu ye kɛ bɛbuke wɛbsaete nee Yintanɛte gyɛne wɔ ahyehyɛdeɛ ne, Neazo Eku ne nee nuhua amra duma nu. Noko, Neazo Eku ne anu amra biala ɛnlɛ ɔ ti anwo wɛbsaete anzɛɛ ɛnva Yintanɛte gyimalilɛ gyɛne ɛnli gyima.

Menli mɔɔ yɛkile bɛ jw.org la maa “edwɛkpa” ne tɛlɛ. (Mat. 24:14) Bɛlɛsiezie ɛlɛtɔlɔneke ninyɛne mɔɔ yɛfa yɛyɛ daselɛlilɛ gyima ne la bɛamaa yɛayɛ mgbalɛ dahuu. Yɛkulo kɛ awie biala nyia zolɛ nvasoɛ. Ɛhye ati, kɛ mɔɔ Nwolɛ Mɛla ne kile la, ɛbahola wɔalua e-mail zo wɔava buluku bie mɔɔ wɔhwe anzɛɛ debie bie mɔɔ wɔnwu ye wɔ jw.org azo la link wɔanwa awie. Saa yɛkile anyelielɛma yɛ mɛla adenle zo wɛbsaete ne mɔ a, ɛnee yɛlɛmaa bɛanwu “akɛlɛ nɔhavo nee nrɛlɛbɛvolɛ ne” mɔɔ maa yɛ sunsum nu aleɛ la.