Ra mẹriẹn taghene a vwa rhẹ ẹbe ukoko na-a, ihworho buebun ne roro taghene ọ sọ ne fiẹ ẹbe na rhẹ iwẹbsaiti omobọ aye yanghene iwẹbsaiti erọrọ ra ha dje urhomu vwe ihworho-o. Ọrẹn, ọnana o serhọ rhẹ oborẹ a fọkiẹ ruẹ iwẹbsaiti na-a, * ọ ji suẹ okpetu vrẹn ne. Uvuẹn Urhi ro suẹn iwẹbsaiti ọwan, a dabu djeyi fiotọre taghene e kwenu rẹn ohworho owuorowu no fiẹ “ifoto, ẹbe, oka ra ha vwrurhe ame, ikpekporo, ividio, yanghene ẹbe ri ha uvuẹn iwẹbsaiti ọnana rhẹ uvuẹn itanẹti-i (jerẹ iwẹbsaiti re dje urhomu yanghene ividio vwe awọrọ).” Mesoriẹ e fi aruẹ ughwru ọnana rhọye?

E vwo urhi taghene ihworho i vwa kpare oborẹ ọ ha uvuẹn iwẹbsaiti ọwan riẹ iwẹbsaiti ọrọrọ-ọ. Idibo ẹkparehaso ọrhẹ ihworho erọrọ a damoma rẹ aye ina ha ekwakwa ukoko na o fomu phia ruiruo uvuẹn iwẹbsaiti aye, neneyo, aye i riẹriẹ Iseri Jehova ọrhẹ ihworho erọrọ ba oma. Aye e ruẹ ekwakwa enana nọ lẹrhẹ ihworho vwo ẹhẹn eveva. (Ps. 26:4; Prov. 22:5) A ji mẹrẹnvwrurhe ne taghene ihworho ezẹko a ha ekwakwa ri ha uvuẹn ẹbe ọwan, ilogo i jw.org, yanghene ekwakwa ukoko na i ruru rhẹ ifonu e jiri eyẹsuọ aye. Nime e vwo urhi taghene ihworho i vwa kpare oborẹ ọ ha uvuẹn iwẹbsaiti ọwan riẹ iwẹbsaiti ọrọrọ-ọ, ana sabu kpare ihworho riẹ ẹghware aye i rhe ru omaran. (Prov. 27:12) Ọrẹn, erhe kwe nẹ ihworho erọrọ yanghene imizu uvuẹn ukoko na, i ha ekwakwa ri ha uvuẹn iwẹbsaiti ọwan yanghene ilogo i jw.org na ruẹ eyẹsuọ, erhe te  ẹghware, iguẹnzọn na i sabu brorhiẹn na serhọ rẹn ọwa-an.

Imwofẹn ọ havwiẹ wu rha danlodu ekwakwa ukoko na i fomu phia nẹ ekete ọrọrọ ro vwo rhiẹ iwẹbsaiti ukoko na. Jehova ọ yẹ “ọvrẹn ra hẹrosua ro ji vwo ẹghwanren na,” owian rẹ aye ine tiobọnu ọkpọvi rẹn ọwan. (Matt. 24:45) “Ọvrẹn” na o tiobọnu ọkpọvi enana nyoma iwẹbsaiti rẹ aye i kwerhọ, enana yẹ www. jw.org, tv.pr418.com, ọrhẹ wol.pr418.com. O ji vwo app esa ra ha ruiruo uvuẹn ifonu, enana yẹ JW Language^®, JW Library^®, ọrhẹ JW Library Sign Language^®. Ọwan i hẹrosuẹ enana fọkime e rheri taghene e vwe jiri eyẹsuọ yanghene iyono efian uvuie-en. Arha haye nẹ ekete erọrọ ri vrẹn enana, ana sabu ha iyono efian ghwa aye.—Ps. 18:26; 19:8.

Habaye, erhe fi ẹbe ukoko na rhẹ iwẹbsaiti rẹ ihworho ina sabu tẹmro kpahen aye, ono rhiẹ uphẹn firhọ nẹ idibo ẹkparehaso i ta erharhere ẹmro, ri na sabu lẹrhẹ ihworho vwo ẹhẹn eveva kpahen ukoko i Jehova. A riẹriẹ imizu ezẹko ne, neneyo aye i frẹfro uvuẹn itanẹti, ọnana nọ rhua ekan vwe odẹ i Jehova. Habaye, itanẹti orhiẹ ekete re ne “yono eri vwe rhe te, rhẹ ẹhẹn [ọfọfọ-ọ].” (2 Tim. 2:23-25; 1 Tim. 6:3-5) A mẹrẹnvwrurhe ne taghene ihworho a ha odẹ ukoko na, Ugboma Usuon na yanghene odẹ owuọwan usuẹn Ugboma Usuon na, e rhie iwẹbsaiti ọphiẹrhọ yanghene ekete re dje urhomu vwe ihworho. Ọrẹn, o vwo owuorọwan usuẹn Ugboma Usuon na ro vwo iwẹbsaiti ọkọnẹye-en, yanghene ekete re dje urhomu vwe awọrọ-ọ.

Erhe dje iwẹbsaiti ukoko na ro rhiẹ jw.org rẹn ihworho, ọ lẹrhẹ “iyẹnrẹn esiri” na kerabọ. (Matt. 24:14) Ekwakwa itẹknọlọji ra ha ruiruo uvuẹn owian aghwoghwo na e rhomẹrhọ ọke ephian. A guọlọre nẹ ihworho ephian i mẹrẹn erere nie rhe. Omarana, jerẹ oborẹ Urhi ro sun iwẹbsaiti na o djephia, wu na sabu dje ọbe ukoko na wu danlodu ne vwe ohworho nyoma ikọmputa yanghene ifonu, wu na ji sabu dje ekete wa mẹriẹn uvuẹn i jw.org riẹn. Nyoma a ta rẹn ihworho kpahen iwẹbsaiti na, na lẹrhẹ aye rhe kpahen ekete aye ine ru sabu mẹrẹn obọdẹn ọkpọvi ro nẹ abọ “ọvrẹn ra hẹrosua ro ji vwo ẹghwanren na” rhe.