Lapud libre iray iyoopresi tayon publikasyon ya base ed Biblia, iisipen na arum ya ayos labat ya kopyaen tan i-post iratan ed arum ya website odino diad social media. Balet no gawaen itan, nasusumlang so Kondisyon ed Pangusar * parad saray website tayo tan manresulta itan ed seryoso iran problema. Malinlinew so ibabaga na Kondisyon ya agnayarin “i-post iray artwork, electronic iran publikasyon, trademark, musika, litrato, video, o artikulo na sayan website diad Internet (ed antokaman ya website, file-sharing site, video-sharing site, o social network).” Akin et kaukolan itan ya restriksion?

Amin ya walad website tayo et aka-copyright. Uusaren na saray apostata tan arum nin onsusumpad sikatayo iray publikasyon tayo diad saray website da pian patitan iray Tasi nen Jehova tan arum ni. Adisenyo iratan ya site pian panduaruwaen so nonot na saray manbabasa. (Sal. 26:4; Pro. 22:5) Saray arum et uusaren da ray walad publikasyon tayo odino say logo na jw.org diad advertisement, ed saray ilalako da, tan ed saray app parad mobile device. No proprotektaan tayoy copyright tan trademark tayo, walay legal ya basiyan tayon ag-abuloyan iratan ya panangusar. (Pro. 27:12) Balet no paulyanan tayo labat iray totoo, anggan saray agagi tayo, ya i-post ed arum ya website so antokaman ya walad website tayo, odino paulyanan tayo labat iran usaren so trademark tayon jw.org ed saray ilalako ra, ompan aglaingen suportaan na korte  so pansasagpot tayon patundaen iray onsusumpa tan saray negosyante ed saratan ya gagawaen da.

Mapeligro no aliwan diad jw.org tayo i-download iray publikasyon tayo. Say angimatalekan labat nen Jehova na responsabilidad ya itarya so espiritual ya naakan et say “matoor tan makabat ya aripen.” (Mat. 24:45) Say uusaren labat na satan ya “aripen” pian i-publish iray espiritual ya naakan et saray official website to​—www.pr418.com, tv.pr418.com, tan wol.pr418.com. Tan wala labat so taloran official app tayo parad saray mobile device​—JW Language^®, JW Library^®, tan JW Library Sign Language^®. Makaseguro tayo ya sarayan website tan apps et anggapo ray advertisement tan ag-alaokan na pakana nen Satanas. No duman site so nanlapuan na espiritual ya naakan, agtayo segurado no malinis odino ag-inuman itan.​—Sal. 18:26; 19:8.

Sakey ni, no i-post tayo ray publikasyon tayo ed arum nin website ya ditan et nayari mankomento, pankanawnawa itan na saray apostata tan kritiko ya ibaga iray ideya ra, ya posiblin maneral na talek tayod organisasyon nen Jehova. Wala ray agagi ya asagyat a midebati diad online, kanian mas apabanday laingen so ngaran nen Jehova. Aliwan matukoy sirin ya paraan so online forum pian ‘maulimek tayon nibangat iramay agmipakna.’ (2 Tim. 2:23-25; 1 Tim. 6:3-5) Naimano met ya wala ray peke ya account ed social media tan wala ray ginawan website ya inngaran ed organisasyon tayo, ed Mananguley ya Ulop, tan ed saray membro na satan. Balet diad tua, anggapoy membro na Mananguley ya Ulop ya walaan na personal ya Web page tan ag-ira manguusar na anggan anton social media.

No idirekta tayod jw.org iray totoo, makatulong itan pian nipulong so “maong a balita.” (Mat. 24:14) Saray walad website tayo ya uusaren tayod ministeryo et tuloytuloy ya papaaligwasen. Labay tayon nagunggonaan so amin ed satan. Kanian, singa nabasa tayod Kondisyon ed Pangusar, sarag moy mangipawit na in-download iran kopya na publikasyon tayo panamegley na e-mail odino mangi-share na link ya walad jw.org. No idirekta tayod saray official website tayo iray interesadon totoo, ikokonekta tayo rad saksakey ya tuan panlalapuan na espiritual ya naakan, say “matoor tan makabat ya aripen.”