Wäajen wie onse biblische Bieekja, Videos un aundret nich vekjeepen, denkjen eenje, daut es nich orrajcht, dee opp aundre Websieden nopptoloden ooda opp soone Websieden ooda Apps, wua eena sikj met aundre unjahoolen kaun. Oba daut es gaunz jäajen de Räajlen un Rechtlienjes * fa onse Websieden un daut haft aul goot Trubbel aunjerecht. Soo aus daut en de Räajlen un Rechtlienjes sajcht, es doa nich Frieheit, “irjent Bilda, ellektroonische Bieekja, jesazlich enjeschräwne Nomes ooda Simboolen, Musikj, Videos ooda Artikjels von dise Websied oppem Internet nopptostalen (endoont opp waut vonne Websied, File-Sharing-Sied, Video-Sharing-Sied ooda Social Network).” Wuarom es daut needich, daut auftosajen?

Aules opp onse Websieden es derch Copyright jeschizt. Aufjefolne un aundre Jäajna wellen onse Bieekja opp äare Websieden brucken toom Jehova siene Zeijen un aundre doa hanlocken. Dee wellen de Läsa oppem Twiewel brinjen (Psa. 26:4; Spr. 22:5). Aundre brucken biejlikj waut von onse Bieekja, Videos ooda daut jw.org-Simbool toom waut bekauntmoaken ooda doonen daut opp Sachen nopp, waut see vekjeepen, ooda brucken daut en Apps fa Fons un Tablets. Soont es nich rajcht, un wäajen onse Sachen derch Copyright jeschizt sent un de Nomes un Simboolen jesazlich enjeschräwen sent, kjenn wie doa met de Help von daut Jesaz waut jäajen doonen (Spr. 27:12). Wan wie biejlikj eenen Brooda ooda sestwäm de Frieheit jeewen, onse Sachen opp aundre Websieden nopptoloden ooda daut jw.org-Simbool to brucken toom waut vekjeepen, dan kunn daut bat doa komen, daut daut Jerecht ons nich mea holp, wan  doa Jäajna wieren ooda soone, waut met onse Sachen wullen Haundel driewen.

Daut kaun eene Jefoa sennen, onse Bieekja, Videos ooda aundret von irjent Websieden rauftoloden, buta von jw.org. Jehova deit bloos derch dän truen un weisen Kjnajcht jeisteljet Äten jäwen (Mat. 24:45). Dis trua Kjnajcht brukt bloos de Websieden www.pr418.com, tv.pr418.com un wol.pr418.com toom jeisteljet Äten utdeelen. Un Jehova siene Zeijen haben bloos dree Apps fa Fons un Tablets jemoakt: JW Language^®, JW Library^® un JW Library Sign Language^®. Wie kjennen ons doaropp veloten, daut doa nich Aunjebots väakomen un daut dän Soton siene Welt doa nich irjentwaut aun jedonen haft. Wan daut jeistelje Äten von sestwua kjemt, dan weet wie nich, aus daut nich vedreit ooda veorreinicht es (Psa. 18:27; 19:9).

Wan eena onse Bieekja, Videos un aundret opp Websieden noppdeit, wua jieda eena siene Meenunk jäwen kaun, dan kjennen Aufjefolne un aundre Jäajna daut uk utnutzen toom schlajcht äwa Jehova siene Organisazion räden. Eenje Breeda wellen dan opp soone Sieden utlajen, woo daut werkjlich es, un daut jeft bloos een langet Han- un Häajestried un brinjt noch mea Schaund opp Jehova sienen Nomen. Eene Unjahoolunk äwa Internet, wua jieda eena waut sajen kaun, es nich de rajchta Wajch toom “Jäajna leeftolich trajchtwiesen” (2. Tim. 2:23-25; 1. Tim. 6:3-5). Daut jeft uk soont, daut onopprechtje Menschen eene Websied moaken ooda sikj bie eene Websied ooda App aunmalden, wua eena sikj met aundre unjahoolen kaun, un daut soo hanstalen, aus wudd daut von de Organisazion, vom Väastaunt ooda von eenselne Breeda em Väastaunt sennen. Oba kjeena vom Väastaunt haft siene ieejne Websied ooda es bie irjenteene Websied ooda App aunjemalt toom doa met aundre vetalen.

De Menschen no jw.org wiesen halpt “daut Evangelium” bekauntmoaken (Mat. 24:14). De ellektroonische Bieekja un aundre Sachen, waut wie em Deenst brucken kjennen, woaren emma bäta jemoakt. Wie wenschen ons, daut aulem daut togood kjemt. Doawäajen sajcht daut en de Räajlen un Rechtlienjes, daut eena wäm biejlikj Bieekja ooda Videos derch een E-Mail schekjen kaun ooda daut eena wäm eenen Link schekjen kaun fa irjentwaut opp jw.org. Wan wie Intressieede opp Jehova siene Zeijen äare Websieden hanwiesen, dan halp wie dee, de eensje Grupp to finjen, waut daut woare jeistelje Äten utdeelt, un daut es “de trua, weisa Kjnajcht”.