From iumi givim free nomoa olketa pablikeson bilong iumi long pipol, samfala tingse hem olraet nomoa for copyim or postim olketa pablikeson hia long olketa website or long social media. Bat wei for duim datwan hem againstim Terms of Use * insaed website bilong iumi, and tu, hem mekem olketa big problem kamap. Insaed Terms of Use, hem talem klia hao hem tambu for “postim long Internet (wea minim eni website, file-sharing site, video-sharing site, or social network) eni piksa, electronic pablikeson, trademark, music, photo, video, or olketa article from disfala website.” Why nao olketa stopem datwan?

Evri samting wea stap long website bilong iumi garem copyright. Olketa apostate and narawan wea againstim iumi savve putim pablikeson bilong iumi long website bilong olketa mekem Olketa Jehovah’s Witness and narawan go long datfala website. Olketa putim information long olketa website hia for mekem man wea readim datwan for daotem samting hem bilivim. (Sams 26:4; Provebs 22:5) Samfala pipol iusim olketa samting from pablikeson bilong iumi or iusim jw.org logo for advertisem samting, salem samting, or putim long olketa app for mobile and tablet. From organization garem olketa copyright and trademark diswan savve mekem olketa fit for iusim law for stopem pipol for duim diswan. (Provebs 27:12) Bat sapos olketa letem nomoa pipol or olketa brata for postim information from website bilong iumi long olketa nara website, or for iusim jw.org trademark for salem samting, bae kot no savve sapotim organization for  stopem pipol wea againstim iumi for duim datwan, and for stopem olketa bisnis wea laek for mek selen long diswan.

Hem danger for daonlodim olketa pablikeson bilong iumi from eni website wea hem no jw.org. Jehovah markem “wakaman wea faithful and wise” nomoa for garem responsibility for provaedem spiritual kaikai. (Matt. 24:45) Datfala “wakaman” iusim nomoa thrifala website hia for provaedem spiritual kaikai: www.pr418.com, tv.pr418.com, and wol.pr418.com. And olketa garem nomoa thrifala app for mobile and tablet: JW Language^®, JW Library^®, and JW Library Sign Language^®. Iumi savve trustim hao olketa website and app hia no garem eni advertisement bilong world and hem no join witim eni samting long world bilong Satan. Sapos disfala spiritual kaikai hem kam thru long eni nara website or app, maet olketa changem or spoelem datfala information.—Sams 18:26; 19:8.

And tu, sapos iumi postim pablikeson long olketa website wea pipol savve koment long hem, datwan givim chance for apostate and nara pipol wea ting daonem iumi for putim koment wea mekem pipol no trustim organization bilong Jehovah. Samfala brata join insaed wei for raoa long internet, and diswan mek shame long nem bilong Jehovah. Diskaen wei for raoa long online forum hem no kaenfala wei for teachim olketa wea no agree witim iumi. (2 Tim. 2:23-25; 1 Tim. 6:3-5) Samfala pipol iusim tu nem bilong organization, Governing Body, and olketa member long Governing Body for wakem olketa laea social media account and website. Bat no eni member long Governing Body garem eni website bilong olketa seleva or joinim social media.

Wei for helpem pipol go long jw.org mekem staka pipol savve long “gud nius.” (Matt. 24:14) Organization gohed for updatem olketa website and app wea iumi iusim for helpem iumi duim ministry. Iumi laekem olketa samting hia for helpem evriwan. Dastawe datfala Terms of Use hem sei iumi savve emailim go long narawan copy bilong pablikeson bilong iumi or sharem link for eni samting long jw.org. Taem iumi helpem pipol wea interest for go long olketa website bilong iumi, iumi helpem olketa for kasem spiritual kaikai from “datfala wakaman wea faithful and wise,” wea olketa nomoa trufala sekson wea provaedem spiritual kaikai.