Talu ai e lē faatauina a tatou lomiga ma vitiō faale-Tusi Paia, ua manatu ai nisi e leai se afāina o le kopi mai ma tuu i luga o a latou lava itulau, po o tuatusi e fesootaʻi ai ma isi i le Initaneti. Peitaʻi, o le faia faapea ua tele ai faafitauli ua tulaʻi mai ona e solia ai Tuutuuga i le Auala e Faaaogā Ai (Terms of Use) * a tatou upega tafaʻilagi. E pei ona taʻua ma le manino i lenā Tuutuuga, e lē faatagaina se tasi e na te “kopiina so o se ituaiga ata, lomiga, faailoga faaletulafono, musika, vitiō, po o ni mataupu mai i lenei upega tafaʻilagi ma tuu i luga o le Initaneti (o so o se upega tafaʻilagi, polokalame e fefaasoaaʻi ai manatu ma vitiō, po o se tuatusi e fesootaʻi ai ma isi).” Aiseā ua faia ai nei tuutuuga?

O mea uma o loo i luga o a tatou upega tafaʻilagi e iai aiā e puipuia ai. O ē ua fulitua i le upu moni ma isi tagata tetee, ua latou taumafai e faaaogā a tatou lomiga ina ia faatosina atu ai Molimau a Ieova ma isi tagata e faitau i a latou itulau. Peitaʻi, o le fuafuaga o na itulau e faatupu ai masalosaloga o le ʻaufaitau. (Sala. 26:4; Faata. 22:5) Ua faaaogā foʻi e isi tagata a tatou lomiga po o le faailoga aloaʻia o le jw.org i a latou faasalalauga, o oloa e fia faatau atu, ma polokalame e maua i masini feaveaʻi. O lenei faailoga faaletulafono ma aiā e puipuia ai, ua avea ma faavae faaletulafono e taofia ai le faaaogā sesē o a tatou upega tafaʻilagi. (Faata. 27:12) Peitaʻi, pe afai e tatou te faatagaina tagata e aofia ai ma o tatou uso, ina ia tuu a tatou lomiga ma vitiō i isi itulau pe faataga foʻi i latou e faaaogā la tatou faailoga aloaʻia o le jw.org ina ia fai ai a latou faiga faapisinisi, atonu o le a lē lagolagoina e faamasinoga a tatou  taumafaiga e taofi tagata tetee ma tagata faipisinisi.

E iai lamatiaga o le faaaogā o isi upega tafaʻilagi ma polokalame e kopi mai ai a tatou lomiga, e ese mai i le jw.org. E na o “le pologa faamaoni ma le faautauta” ua tuuina mai ai e Ieova le tiute tauave ina ia saunia meaʻai faaleagaga. (Mata. 24:45) E faaaogā e lenei “pologa” upega tafaʻilagi aloaʻia o le www.pr418.com, tv.pr418.com, ma le wol.pr418.com ina ia maua ai e tagata meaʻai faaleagaga. E lē gata i lea, e na o le tolu a tatou polokalame aloaʻia mo masini feaveaʻi. O nei polokalame o le JW Language^®, JW Library^®, ma le JW Library Sign Language^®. E mafai ona tatou mautinoa o nei upega tafaʻilagi ma polokalame e leai ni faasalalauga o iai, po o ni faamatalaga taufaasesē a le lalolagi a Satani. Pe afai e tatou te kopiina meaʻai faaleagaga mai i isi upega tafaʻilagi ma polokalame i le Initaneti, e lē mafai ona tatou faamautinoa po ua suia, po ua aafia foʻi i faamatalaga taufaasesē.​—Sala. 18:26; 19:8.

E lē gata i lea, o le tuu o a tatou lomiga i luga o tuatusi i le Initaneti lea e fefaasoaaʻi ai manatu o tagata, o le a faigofie ai i ē ua fulitua i le upu moni ma tagata faitio ona faatupu ni masalosaloga iā i tatou e faatatau i le faalapotopotoga a Ieova. O nisi uso ua fefinauaʻi ma isi i luga o nei tuatusi, ma atili faalumaina ai le suafa o Ieova. O nei tuatusi i le Initaneti e lē o ni siʻomaga talafeagai ia e ʻfaatonu ai ma le agamalu i latou o ē e tetee.’ (2 Timo. 2:23-25; 1 Timo. 6:3-5) Ua mātauina foʻi e faapea, ua iai tuatusi pepelo i le Initaneti po o upega tafaʻilagi pepelo ua faia e nisi ma tuu i ai le igoa o Molimau a Ieova, le Vaega Pule, po o sui o le Vaega Pule. Peitaʻi, e leai se sui o le Vaega Pule e iai sana itulau faapitoa po o sana tuatusi e fesootaʻi ai ma isi i le Initaneti.

O le faailoa atu i tagata o le upega tafaʻilagi o le jw.org, e fesoasoani e faasalalau atu ai le “tala lelei.” (Mata. 24:14) O loo faaauau ona faaleleia a tatou meafaigaluega i le jw.org e faaaogā i la tatou faiva. E tatou te mananaʻo e faitau ma matamata tagata i a tatou lomiga ma vitiō. O lea, e pei ona taʻua i Tuutuuga i le Auala e Faaaogā Ai, e mafai ona tatou lafoina atu e ala i le imeli se kopi o se lomiga, pe faailoa atu se link e tataʻi ai tagata i se mataupu i le jw.org. Pe afai e tatou te faailoa atu a tatou upega tafaʻilagi aloaʻia i tagata fiafia, o lona uiga ua tatou tataʻi i latou i “le pologa faamaoni ma le faautauta,” o le auala autū lea o loo saunia mai ai meaʻai faaleagaga.