Fu di sma no abi fu pai gi den buku fu wi, meki son sma denki taki den mag poti den tapu tra website noso na tapu sociaal media. (Sociaal media na website noso app di e gi sma okasi fu taki nanga makandra èn fu poti fowtow nanga felem di tra sma kan si.) Ma den Gebruiksvoorwaarden * e sori taki wi no mag du dati. Fu di son sma du dati, meki na organisâsi kisi bigi problema. Den Gebruiksvoorwaarden e sori krin taki sma no mag „poti den prenki, den logo, den poku, den fowtow, den felem nanga den pdf noso epub fu den buku nanga tra sani fu a website fu wi, na tapu Internet (website noso sociaal media)”. Fu san ede den brada no wani taki wi du a sani disi?

Na den sma di abi a reti fu a website disi mag taki fa sma mag gebroiki den sani fu a website. Sma di fadon komoto na bribi nanga tra gensman e puru sani fu a website fu wi poti tapu den eigi website, fu di den wani kori Yehovah Kotoigi noso tra sma. Den sma disi abi sani tapu den website fu den di kan meki sma tweifri na san Bijbel e leri (Ps. 26:4; Odo 22:5). Tra sma gebroiki den sani fu a website fu wi noso a jw.org logo fu meki reklame. Den poti den na tapu sani di den e seri èn na ini app gi telefon. Fu di na a organisâsi abi a reti tapu ala den sani disi, meki den kan tyari sma go na krutubangi te den e du den sani disi (Odo 27:12). Dati meki srefi brada  nanga sisa no musu teki sani fu wi website poti tapu tra website èn den no musu gebroiki a jw.org logo fu seri sani. Efu den ben o du disi, dan na organisâsi no ben o man tyari gensman di e du a sani disi go na krutubangi.

Wi kan kisi problema efu wi ben o download den buku nanga tra sani fu wi fu wan tra website boiti jw.org. Na „a koni srafu di de fu frutrow” Yehovah gi a frantwortu fu gi wi leri (Mat. 24:45). A „srafu” disi e gebroiki soso den website disi fu gi wi leri: www.pr418.com, tv.pr418.com nanga wol.pr418.com. Den brada meki den dri app disi di wi kan gebroiki tapu telefon noso tablet: JW Language^®, JW Library^® nanga JW Library Sign Language^®. Wi kan frutrow den website nanga den app fu na organisâsi fu wi. Den no e meki nowan reklame èn den no abi sani di no bun. Efu wi e download den buku fu wi na wan tra website, dan a kan taki sma poti tra sani na ini di no bun.​—Ps. 18:26; 19:8.

Boiti dati, efu wi e poti den buku fu wi tapu wan tra website pe sma kan skrifi san den e denki, dan sma di fadon komoto na bribi nanga tra gensman kan skrifi sani fu Yehovah organisâsi di no tru. Son brada go haritaki nanga sma tapu den website disi èn a sani dati meki en moro ogri fu di Yehovah e kisi porinen. Na tapu den sortu website disi wi no o man gi leri na wan switifasi na sma di no wani arki (2 Tim. 2:23-25; 1 Tim. 6:3-5). Son sma meki tra website noso sociaal media account èn den gi en a nen fu a website fu wi, fu a Tiri Skin noso fu wan fu den brada fu a Tiri skin. Ma nowan fu den brada fu a Tiri Skin abi den eigi website noso wan account tapu wan sociaal media.

Te wi e gi sma deki-ati fu go na jw.org, dan dati e yepi fu prati a „bun nyunsu” (Mat. 24:14). Den brada e tan wroko na a website nanga den app fu wi so taki wi kan du a preikiwroko bun. Den wani taki ala sma kisi wini fu den sani disi. Dati meki den Gebruiksvoorwaarden e sori taki wi kan seni pdf noso epub fu den buku fu wi gi sma noso wi kan seni wan link fu wan sani tapu wi website gi den. Na so wi kan meki sma di wani sabi moro, go na a website fu wi pe den kan kisi leri fu den sma di Yehovah gi a frantwortu fu gi wi leri. Dati na „a koni srafu di de fu frutrow”.