Numuu rí náa organización ndrígúlú naxnúlú xúʼkhiín i̱yi̱i̱ʼ rí nagájnuu náa Biblia, tikhun nakumu̱ún rí ma̱ndoo mundrigú ga̱jma̱a̱ muxudanʼ náa mbá ináa ndrígóo Internet o náa redes sociales. Mú á mu nuʼni rígi̱ nanújngorámulú Xtángoo náa naʼthí rí xú káʼnii majmaa * ináa ndrígúlú ga̱jma̱a̱ rígi̱ naʼni rí marigá wéñuʼ xkujndu. Ikhí naʼthí kaʼwu rí nimbáa xándoo “makudánʼ xtiʼkhu ga̱jma̱a̱ i̱yi̱i̱ʼ eléctronico, marca rí niguma registrar, ajmúú, xtiʼkhu, videos ga̱jma̱a̱ artículos ndrígóo ináa rígi̱ náa i̱ʼwáʼ ináa ndrígóo Internet (ni má náa redes sociales o náa ináa náa ma̱ndoo mbuyáá eʼwíínʼ o i̱ʼwáʼ i̱yi̱i̱ʼ)”. Náa numuu rí xándoo muʼni rígi̱ rá.

Xúgíʼ rí natima náa ináa ndrígúlú náa Internet naxtiewa̱a̱n ga̱jma̱a̱ mbá xtángoo bi̱ kaʼyoo ku̱ma̱. Bi̱ ni̱ndxu̱ún apóstatas ga̱jma̱a̱ iʼwíínʼ xa̱bu̱ bi̱ tsíñún gúyulú nugiʼma i̱yu̱lú náa ináa ndrígu̱ún náa Internet mu mbuyáá xa̱bi̱i̱ Jeobá ga̱jma̱a̱ eʼwíínʼ xa̱bu̱. Mú náa ináa ndrígu̱ún rígá i̱ʼwáʼ ku̱ma̱ rí maʼni rí xa̱bu̱ xúnimbu̱ún (Sal. 26:4; Prov. 22:5). Eʼwíínʼ xa̱bu̱ najmún i̱yi̱i̱ʼ ndrígúlú o tsinaʼ ndrígóo jw.org náa anuncios náa naʼthí rí naxtango̱jo̱o̱, ga̱jma̱a̱ rí nugujua̱ ma̱ngaa aplicación náa teléfonos ga̱jma̱a̱ tabletas. Mu xtángoo mañewu̱u̱n rí kaʼyoo mbáa ga̱jma̱a̱ marca rí niguma registrar, rígá mbá xtángoo rí najmuu organización ndrígúlú náa naʼthí rí xándoo miʼni rí na̱nguá kaʼyoo (Prov. 27:12). Á mu organización ndrígúlú maniñuʼ muni rígi̱ tikhun xa̱bu̱, maski ajndu ni̱ndxu̱ún xa̱bi̱i̱ Jeobá, muxudanʼ i̱yi̱i̱ʼ rí kaʼyulú náa i̱ʼwáʼ ináa ndrígóo Internet o majmúún tsinaʼ ndrígóo jw.org mu mugujua,  Xa̱bu̱ Ñajunʼ xumbayúlú ga̱jma̱a̱ tsiakii rí nuʼni mu muriʼkhu̱u̱ xóo endxa̱ʼwa̱a̱ edxu̱ún bi̱ tsíñún gúyúlú ga̱jma̱a̱ i̱ʼwáʼ empresas bi̱ nugujua̱.

Rí mundrígú i̱yi̱i̱ʼ asndu náa ináa dí raʼkháa jw.org mani̱ndxu̱u̱ migamíi. Jeobá i̱ndó nirajkuáa ñawúunʼ muxna ganitsu “ñumba tsi jmbi, tsi majan indxaʼhuaminaʼ” (Mat. 24:45). “Ñumba” bugi̱ nuxna ganitsu rí na̱ʼkha̱ náa Dios i̱ndó náa ináa ndrígu̱ún rí nindxu̱u̱ jw.org, tv.pr418.com ga̱jma̱a̱ wol.pr418.com. Ma̱ngaa, i̱ndó náa ajtsú aplicación rí najmaa náa teléfono ga̱jma̱a̱ tableta rí kuaʼdáá nindxu̱u̱ rígi̱: JW Language^®, JW Library^® ga̱jma̱a̱ JW Library Sign Language^®. Nduʼyáá rí náa aplicación rígi̱ ga̱jma̱a̱ ináa ndrígóo Internet tséʼkha̱ anuncio náa naʼthí rí naxtangajo̱o̱ ga̱jma̱a̱ na̱nguá eguma tsagáá ga̱jma̱a̱ numbaaʼ ndrígóo Satanás. Á mu ganitsu rí na̱ʼkha̱ náa Dios na̱ʼkha̱ náa i̱ʼwáʼ ináa, na̱nguá xóo mbuʼyáá rí niguma gachíí o niguma tsagáá (Sal. 18:26; 19:8).

Ma̱ngaa, á mu mbáa nakudánʼ i̱yu̱lú náa Internet náa nandoo nuniraʼmáʼ rí nandún xa̱bu̱, naniñúnʼ rí apóstatas ga̱jma̱a̱ bi̱ nuta numulúʼ muniraʼmáʼ rí maʼni rí nánguá guʼnimbulúʼ kuʼyáá xuajñu Jeobá. Tikhun a̱ngiu̱lú nuniraʼmáʼ náa nagiʼdu̱u̱n gajmiún eʼwíínʼ ga̱jma̱a̱ rígi̱ naʼni maguma tsagáá itháan mbiʼyuu Jeobá. Náa nuniraʼmáʼ mu mutamijná gajmiún eʼwíínʼ xándoo miʼsngáa “ga̱jma̱a̱ májánʼ bi̱ tsíñún gúdxuun” (2 Tim. 2:23-25; 1 Tim. 6:3-5). Ma̱ngaa, nikujmaa rí niguma i̱ʼwáʼ ináa náa redes sociales ga̱jma̱a̱ ináa ndrígóo Internet rí minduwaʼ rí niguma ga̱jma̱a̱ mbiʼyuu organización, Cuerpo Gobernante ga̱jma̱a̱ bi̱ nuñajunʼ gajmiún ikhí. Mú nimbáa bi̱ Cuerpo Gobernante na̱nguá gíʼdoo ináa ndrígóo ni má na̱nguá gíʼdoo nimbá red social.

Índo̱ nuʼthúún xa̱bu̱ matu̱ʼu̱u̱n náa ináa jw.org, nuyambáá mu miʼtáraʼa “ajnga ri majan” (Mat. 24:14). I̱yi̱i̱ʼ rí najmaa náa ajua̱nʼ rí nuxnulu mu muʼtáraʼa na̱jkha̱ raʼni itháan májánʼ. Ga̱jma̱a̱ nandulúʼ rí xúgíʼ numbaaʼ mambáñun rígi̱. Xó má eʼthí náa Xtángoo náa naʼthí rí xú káʼnii majmaa, ma̱ndoo muxuʼmá i̱yi̱i̱ʼ náa mbá correo electrónico o mbá ináa náa ma̱ndoo magruigú xa̱bu̱ náa ináa jw.org. Índo̱ nuʼthúún xa̱bu̱ majmúún ináa rígi̱ bi̱ nanigu̱nʼ mbuyáá rí gajkhun, nuʼni rí muniʼniʼ “ñumba tsi jmbi, tsi majan indxaʼhuaminaʼ”, náa na̱ʼkha̱ ganitsu ndrígóo Dios rí nindxu̱u̱ gajkhun.