Er se ne ior ityakerada yase i pasen Bibilo man uvidio asev gbilin yô, ior mbagen hen ér vea fatyô u tôôn akaa ne za veren sha ajiir agen sha Intanet, kpa a lu kwaghbo ga. Nahan cii kpa, aluer or er nahan yô, nan per Atindi a Eren Kwagh Hen Ijiir * yase i sha Intanet la. Shi kwagh ne va a mbamzeyol mba vesen kpishi. Er i ôr ken Atindi la nahan, i na or ian i tôôn “Kwagh u hen ijiir ne za veren hen ijiir i sha Intanet igen ga (hanma ijiir i sha Intanet cii, kua ajiir a tindin a ilyoho man ajiir a lamen a ior her cii).” Er nan ve i vende kwagh ne?

Akaa a a lu sha ijiir yase i sha Intanet la cii ka i tese ér i na orgen ian i eren ga. Mbavendan mimi kua mbaahendanev mbagen ka ve nôngo ér vea ver ityakerada yase sha ajiir ve a sha Intanet sha u hônon Mbashiada mba Yehova kua ior mbagen. Awashima ve yô, ka i lu u nan ior mba ve za ôr akaa hen ajiir shon la ve hingir u lun a akperan shin tsumen a ve. (Ps. 26:4; Anz. 22:⁠5) Ior mbagen di tôô akaa a ken ityakerada shin uvidio asev gayô anikyav wase u jw.org la, za er tom a mi u yôôn kasua shin wan sha akaa a ve soo u teen yô, kua sha mba apelekeshen vev mba sha hanseeti shin tablet. Er se soo ser i dondo atindi ne shi i de nzughul a akaa a hen ijiir ne ga yô, se mba a ian i yangen ior u nzughul a akaa a hen ijiir yase ne man ka sha tindi je. (Anz. 27:12) Kpa aluer se de ior mbagenev shin anmgbianev je kpaa, mba tôôn ityakerada shin uvidio man akaa agen hen ijiir yase ne za veren sha ajiir agen sha Intanet, shin mba eren tom a ikyav i jw.org u teen kasua yô, zum u se lu nôngon ser se yange mbaahendanev shin  mbakasua u eren tom a akaa ne yô, koti una ta ikyaa a vese ga.

Aluer u za danlood ityakerada shin uvidio asev hen ijiir igen sha Intanet ka sha jw.org ga yô, kwagh la a fatyô u bulan we. Ka “wanakiriki u jighjigh man u fan kwagh” tseegh Yehova a ne un tom u nan kwaghyan u ken jijingi ye. (Mat. 24:45) “Wanakiriki” ne ngu a ajiir a na sha Intanet. Shi ka hen ajiir shon tseegh a ne kwaghyan ne her ye. Ka a je ne: www.pr418.com, tv.pr418.com, man wol.pr418.com. Shi se mba a apelekeshen mba wan sha hanseeti shin tablet utar tseegh, ka JW Language^®, JW Library^®, man JW Library Sign Language^®. Doo u se fa ser apelekeshen mban kua ajiir a sha Intanet ne cii nga a akaa a yôôn kasua ga, shi tar u Satan ne kpa hôngor a ga. Kpa aluer kwaghyan u ken jijingi kar sha ajiir agen yô, alaghga or a fatyô u geman kwagh shami shin a hôngor a mi sha atseregh.​—⁠Ps. 18:26; 19:⁠8.

Bee kera yô, aluer u ver ityakerada yase sha ajiir a sha Intanet a ior a fatyô u wan zwa sha akaa a her yô, mbavendan mimi kua mbapuunakaa vea na ior a kera na nongo u Yehova jighjigh ga. Anmgbianev mbagen ka ve za hingir u gban anyiman vea ior sha Intanet, nahan kwagh ne a seer van a ilyahan sha iti i Yehova. Intanet ka ijiir i injaa i “kôôm mbahendan kwagh a . . . ishima i legh legh” ga. (2 Tim. 2:​23-25; 1 Tim. 6:​3-5) Shi se kav nahan ser ior mbagenev bugh ajiir a sha Intanet ken iti i nongo u Yehova shin ken iti i Mbahemenev mba Shin Itine, gayô ken iti i môm ken anmgbianev mban sha u tsumen a ior. Nahan kpa, or môm ken anmgbianev mba ken Mbahemenev mba Shin Itine la nan ngu a ijiir sha Intanet shin hen ajiir a lamen a ior sha Intanet ga.

Aluer se mba tesen ior ijiir yase i sha Intanet i jw.org la yô, se mba samber a “Loho u Dedoo.” (Mat. 24:14) Akaa a sha Intanet a ka se lu a mi ken hanseeti shin tablet sha u eren tom a mi ken tom wase la, ka i seer akaa sha mi hanma shighe sha er aa hemba doon yô. Se soo ser hanma or nana zua a mtsera ken akaa ne. Sha nahan yô, er Atindi a Eren Kwagh Hen Ijiir yase i sha Intanet la a tese nahan, u fatyô u tindin or a ityakerada yase shin uvidio ken loho, gayô tindin nan a adereshi u nana kighir sha mi maa nana za nenge shin nana danlood iyol i nan sha jw.org yô. Aluer se mba tesen mba i sar ve u fan mimi ijiir yase i sha Intanet la yô, se mba tesen ve ijiir i mimi i vea za zua a kwaghyan u ken jijingi sha ikyev i “wanakiriki u jighjigh man u fan kwagh” yô.