Yumi no save salim ol buk na nius bilong Baibel, olsem na sampela i ting em orait long wokim kopi bilong ol pablikesen na putim long ol narapela Web-sait o sosel netwok. Sapos yumi mekim olsem, yumi brukim Lo Bilong Yusim * ol Web-sait bilong yumi na dispela inap kamapim hevi. Lo Bilong Yusim i tok stret olsem yumi no ken “Post Content long dispela web-sait long Intenet (olgeta narapela web-sait, file-sharing sait, o sosel netwok).” Bilong wanem dispela lo i stap?

Olgeta samting long ol Web-sait bilong yumi i gat kopirait lo. Ol apostet na ol lain i birua long yumi, ol i traim long yusim ol pablikesen bilong yumi long ol Web-sait bilong ol long trikim na paulim tingting bilong ol Witnes Bilong Jehova na ol narapela. Ol Web-sait bilong ol i gat ol tok we inap mekim na man husat i ritim ol dispela tok i holim tupela tingting. (Sng. 26:4; Snd. 22:5) Ol narapela i yusim ol pablikesen bilong yumi o logo bilong jw.org long ol edvetaismen, ol samting ol i salim, na long ol aplikesen bilong fon. Taim yumi bihainim lo bilong kopirait na treidmak, lo inap pasim ol man long mekim olsem. (Snd. 27:12) Sapos yumi larim ol narapela na ol bratasista long putim ol musik na vidio samting bilong yumi long ol narapela Web-sait, o ol i yusim treidmak bilong jw.org long salim ol samting, ating kot i no inap sapotim yumi long kotim ol birua na ol man i yusim ol samting long Web-sait bilong yumi long mekim wok bisnis.

 Taim yumi daunlodim ol pablikesen bilong yumi long ol narapela Web-sait na i no long jw.org, hevi inap kamap. Jehova i givim wok bilong redim kaikai bilong strongim bilip bilong yumi long “gutpela wokboi i gat savetingting.” (Mat. 24:45) Dispela “wokboi” i save putim ol kaikai bilong strongim bilip bilong yumi long rot bilong ol Web-sait bilong yumi, em www.pr418.com, tv.pr418.com, na wol.pr418.com. Na tu, yumi gat 3-pela aplikesen bilong yusim long mobail fon—JW Language^®, JW Library^®, na JW Library Sign Language^®. Yumi inap bilip tru olsem ol dispela Web-sait na aplikesen i no gat ol edvetaismen, o ol samting i no klin em Satan inap mekim wok long en bilong bagarapim bilip bilong yumi. Sapos yumi kisim kaikai bilong strongim bilip long narapela Web-sait o aplikesen, ating ol man inap senisim ol tok o putim ol bilip giaman bilong ol yet.—Sng. 18:26; 19:8.

Sapos yumi putim ol pablikesen bilong yumi long ol narapela Web-sait we ol man inap kamapim tingting bilong ol, dispela i opim rot long ol apostet na ol birua bilong tok i tru long mekim ol tok we inap kirapim yumi long holim tupela tingting long oganaisesen bilong Jehova. Sampela bratasista i go long ol narapela Web-sait na tok pait wantaim ol narapela, na dispela i bagarapim nem bilong Jehova. Pasin bilong yusim ol Web-sait bilong toktok wantaim ol narapela em i no rot bilong yumi long mekim “pasin isi” na “skulim ol man bilong sakim tok.” (2 Tim. 2:23-25; 1 Tim. 6:3-5) Na tu, ol brata i painimaut olsem sampela man i wokim ol giaman sosel netwok akaun na ol Web-sait na ol i putim nem bilong oganaisesen, Gavening Bodi, na ol memba bilong Gavening Bodi. Tasol i no gat wanpela memba bilong Gavening Bodi i gat Web-sait bilong em yet o em i stap long wanpela bilong ol sosel netwok.

Taim yumi stiaim ol manmeri i go long jw.org, yumi helpim wok bilong autim “gutnius.” (Mat. 24:14) Ol samting yumi daunlodim long Web-sait bilong yumi bilong yusim long autim tok, ol i wok long kamap gutpela moa. Yumi laik helpim olgeta man long yusim ol dispela tul. Lo Bilong Yusim i kamapim klia olsem, yu ken salim wanpela elektronik kopi bilong pablikesen long rot bilong e-mail, o serim link bilong buk na nius i stap long jw.org. Taim yumi stiaim ol man i gat gutpela bel i go long Web-sait bilong yumi, yumi helpim ol long kisim kaikai bilong strongim bilip i kam long “gutpela wokboi i gat savetingting.”