Leswi hi nyikaka vanhu minkandziyiso ya hina mahala, van’wana va anakanya leswaku ku yi kopa ni ku yi veka eka ti-website tin’wana kumbe eka social media swa pfumeleriwa. Hambiswiritano, ku endla tano swi lwisana ni Milawu Yo Tirhisa Website ya hina * naswona ku endla tano se swi vange swiphiqo leswikulu. Hilaha swi hlamuseriweke kahle ha kona eka milawu yoleyo, a nga kona la pfumeleriwaka ku “veka swifaniso, minkandziyiso ya elektroniki, logo, vuyimbeleri, tivhidiyo, kumbe swihloko leswi nga eka website ya Timbhoni ta Yehovha, eka Internet (eka website yihi na yihi kumbe social network).” Hikwalaho ka yini swipimelo sweswo swi fanerile?

A swi pfumeleriwi leswaku rungula leri nga eka website ya hina ri tlhela ri kandziyisiwa handle ka mpfumelelo (copyrighted). Vagwinehi ni vakaneti van’wana va ringeta ku tirhisa minkandziyiso ya hina eka ti-website ta vona leswaku va kanganyisa Timbhoni ta Yehovha swin’we ni vanhu van’wana. Rungula leri nga eka ti-website teto ri endliwe hi xikongomelo xa leswaku vahlayi va sungula ku va ni ku kanakana ko karhi. (Ps. 26:4; Swiv. 22:5) Van’wana va tirhisa rungula leri humaka eka minkandziyiso ya hina kumbe logo ya jw.org eka swinavetiso, eka swilo leswi va swi xavisaka hambi ku ri eka ti-app ta switirhisiwa swa elektroniki. Hi ni mfanelo ya le nawini yo sivela matirhiselo wolawo yo biha ya rungula ni logo ya hina. (Swiv. 27:12) Kambe loko hi pfumelela vanhu van’wana hambi ku ri vamakwerhu va veka minkandziyiso ya hina eka ti-website tin’wana kumbe va tirhisa logo ya jw.org ku xavisa swilo, khoto a yi nge ma seketeli matshalatshala ya hina yo sivela vakaneti swin’we ni van’wamabindzu.

 Swi ni khombo ku kopa minkandziyiso ya hina eka ti-website tin’wana handle ka le ka jw.org. Yehovha u nyike “hlonga ro tshembeka ni ro tlhariha” ntsena, vutihlamuleri byo phamela swakudya swa moya. (Mat. 24:45) “Hlonga” rero ri tirhisa ti-website ta le nawini ntsena ku hangalasa rungula leri sekeriweke eBibeleni ku nga www.pr418.com, tv.pr418.com na wol.pr418.com. Naswona hi ni ti-app tinharhu ntsena ta le nawini ta switirhisiwa swa elektroniki ku nga JW Language^®, JW Library^® na JW Library Sign Language^®. Ti-website ni ti-app leti, a ti na swinavetiso kumbe ku thyakisiwa hi misava ya Sathana. Loko hi amukela rungula leri sekeriweke eBibeleni hi tindlela tin’wana, a hi nge tiyiseki loko ri nga cinciwanga kumbe ku thyakisiwa.—Ps. 18:26; 19:8.

Ku tlula kwalaho, ku veka minkandziyiso ya hina eka ti-website leti pfumelelaka vanhu ku tsala mavonelo ya vona, swi nga endla leswaku vagwinehi va kuma nkarhi wo endla leswaku hi sungula ku kanakana nhlengeletano ya Yehovha. Vamakwerhu van’wana va kale va nghenela minjhekanjhekisano ya le ka social media naswona va tise swisandzu leswi engetelekeke eka vito ra Yehovha. Mintlawa ya le ka social media a hi ndhawu leyi faneleke yo “letela hi ku rhula lava nga ni mboyamelo lowu nga riki wunene.” (2 Tim. 2:23-25; 1 Tim. 6:3-5) Hi tlhele hi xiya leswaku hi vuxisi van’wana va endle akhawunti ya le ka social media ni ti-website hi vito ra nhlengeletano, ra Huvo leyi Fumaka kumbe ra xirho xa yona. Hambiswiritano, a xi kona xirho xa Huvo leyi Fumaka, lexi nga ni website ya xona kumbe akhawunti ya le ka social media.

Ku kongomisa vanhu eka website ya jw.org swi pfuna ku hangalasa “mahungu lamanene.” (Mat. 24:14) Rungula leri kumekaka eka elektroniki leri hi ri tirhisaka ensin’wini ri tshamela ku antswisiwa. Hi lava leswaku un’wana ni un’wana a vuyeriwa eka rona. Hikwalaho, hilaha swi kombisiweke hakona eka Milawu Yo Tirhisa Website Leyi, u nga ha rhumela munhu un’wana nkandziyiso wa elektroniki hi e-mail kumbe u n’wi rhumela linki ya rungula leri kumekaka eka j.w.org. Loko hi kongomisa vanhu lava tsakelaka eka website ya hina ya le nawini, hi va hi va kongomisa endhawini leyi faneleke laha swakudya swa moya swi humaka kona ku nga eka “hlonga ro tshembeka ni ro tlhariha.”