Pakuti tikugaŵira mabuku ghithu ghakulongosora Baibolo kwambura kulipiliska, ŵanyake ŵakuwona kuti ntchakuzomerezgeka kughaŵika pa mawebusayiti ghanyake panji pa malo ghakuchezgerapo gha pa Intaneti. Kweni kuchita nthena nkhuswa Malango * gha webusayiti yithu ndipo kungapangiska masuzgo ghakuru. Malango gha pa webusayiti yithu ghakuti ‘ivyo mwatora pa webusayiti iyi, ma EPUB, PDF, mavidiyo, sumu, matrademark, vithuzithuzi na vinyake, kuŵika pa Intaneti yayi (webusayiti yiliyose, file-sharing site, video-sharing site, panji social network).’ Chifukwa wuli ntchakukanizgika kuchita nthena?

Vyose ivyo vili pa webusayiti yithu ni vyakuvikilirika. Ŵakugaluka na ŵanthu ŵanyake awo ŵakutisuska ŵakutemwa kuŵika mabuku ghithu pa mawebusayiti ghawo kuti ŵakope Ŵakaboni ŵa Yehova na ŵanthu ŵanyake. Kweniso mawebusayiti agha ghakuŵa na vinthu vinyake ivyo vingapangiska ŵanthu kuti ŵambe kukayikira visambizgo vithu. (Sal. 26:4; Zinth. 22:5) Ŵanyake ŵakugwiliskira ntchito vinthu vya mu mabuku ghithu panji pa webusayiti yithu pakusaska malonda, panji ŵakuŵika chimanyikwiro cha jw.org pa vinthu ivyo ŵakuguliska, panji pa ma app gha foni panji vinthu vinyake. Malango ghakuvikilira vinthu vya pa webusayiti yithu ghakovwira kuti ŵanthu ŵaleke kugwiliskira ntchito uheni vinthu vya pa webusayiti yithu. (Zinth. 27:12) Kweni para tikuzomelezgera dala ŵanthu, nanga ŵangaŵa ŵabali, kuti ŵaŵikenge pa mawebusayiti ghanyake vinthu vya pa webusayiti yithu panji kuŵika chimanyikwiro cha jw.org pa ivyo ŵakuguliska, makhoti ghangatovwira yayi kulekeska ŵakususka na ŵamalonda kugwiliskira ntchito uheni vinthu vya pa webusayiti yithu.

 Kuchita dawunilodi mabuku ghithu pa mawebusayiti ghanyake padera pa webusayiti yakuzomerezgeka ya jw.org nkhwakofya. Yehova wali kupeleka kwa “muzga wakugomezgeka na wavinjeru” pera mulimo wa kupeleka chakurya chauzimu. (Mat. 24:45) “Muzga” uyu wakugwiliskira ntchito mawebusayiti ghakuzomerezgeka pakupeleka chakurya chauzimu. Mawebusayiti ghakuzomerezgeka ni agha: www.pr418.com, tv.pr418.com, na wol.pr418.com. Kweniso tili na ma app ghatatu pera ghakuzomerezgeka ghakugwiliskira ntchito pa mafoni na vinthu vinyake. Ma app agha ni JW Language^®, JW Library^®, na JW Library Sign Language^®. Tili na chigomezgo chose kuti mawebusayiti na ma app ghakuzomerezgeka agha ghandakazuzgike na charu cha Satana. Para chakurya chauzimu chingizira mu mawebusayiti ghanyake, tingamanya yayi usange ŵasinthamo panji chakazuzgika.—Sal. 18:26; 19:8.

Kweniso para tingaŵika mabuku ghithu pa mawebusayiti agho ŵanthu ŵangalembapo maghanoghano ghawo, ŵakugaluka na ŵakususka ŵangasangirapo mwaŵi wa kulembapo vinthu ivyo vingapangiska ŵanji kukayikira gulu la Yehova. Ŵabali ŵanyake ŵakwamba kugazgana na ŵanthu pa mawebusayiti ghanthena ndipo ichi chikutukiska zina la Yehova. Kususkana pa Intaneti ni nthowa yiwemi yayi ‘yakulongozgera mwakuzika awo ŵakususkana nase.’ (2 Tim. 2:23-25; 1 Tim. 6:3-5) Pasangika kuti pali mawebusayiti na malo ghanandi ghakuchezgerapo gha pa Intaneti agho ghali kupangika mu zina la gulu, Wupu Wakulongozga, ndiposo mazina gha ŵabali ŵa mu Wupu Wakulongozga. Kweni manyani kuti palije mubali wa mu Wupu Wakulongozga uyo wali na webusayiti yake panji malo ghakuchezgerapo gha pa Intaneti.

Kulongora ŵanthu webusayiti ya jw.org kukovwira kuti tithandazge “makani ghawemi.” (Mat. 24:14) Vinthu vyakugwiliskira ntchito mu uteŵeti ivyo tikuŵika pa Intaneti vikulutilira kunozgeka. Tingatemwa kuti waliyose wagwiliskirenge ntchito vinthu ivi. Ntheura, nga umo Malango gha pa webusayiti yithu ghakulongolera, mungatumira ŵanyinu malinki panji ma EPUB, PDF, vyakupulikizga na vinyake ivyo vikusangika pa jw.org. Para tikulongora ŵakunweka webusayiti yithu yakuzomerezgeka, ndikuti tikuŵalongozgera uko ŵangasanga chakurya chauzimu chakufuma kwa “muzga wakugomezgeka na wavinjeru.”