Ona ko te mea e ofo atu ne tatou a ‵tou tusi faka-te-Tusi Tapu e aunoa mo se ‵togi, e mafau‵fau a nisi tino me i te ‵kopi kae faka‵pa atu o mea konā i nisi fakatuatusi io me ko nisi mea tau fesokotakiga i te itaneti e talia eiloa. Kae ko te faiga tenā e ofa i ei te Fakanofoga * mō ‵tou fakatuatusi kae ne iku atu eiloa ki fakalavelave ‵lasi. E pelā mo te mea ne fakaasi mai i Fakanofoga konā, e seai se tino e talia ke “faka‵pa a ata, tusi, fakamailoga, pese fakatagi‵tagi, ata, vitio mo mataupu mai te fakatuatusi tenei i te itaneti (so se fakatuatusi i te itaneti, mo nisi vaegā fesokotakiga i te itaneti).” Kaia e manakogina i ei a fakataputapuga konā?

A tusi katoa i ‵tou fakatuatusi i te itaneti e isi se saolotoga ke ‵lomi. E taumafai eiloa a aposetate mo nisi tino ‵teke o fakaaoga a ‵tou tusi i olotou fakatuatusi ke fakamasei ei a Molimau a Ieova mo nisi tino aka. I loto i fakatuatusi konā e maua i ei a tusi kolā ko oti ne fakatoka ke ‵toki ki mafaufau o tino fai‵tau a manatu fakalotolotolua. (Sala. 26:4; Faata. 22:5) Ne fakaaoga ne nisi tino a fakamatalaga mai ‵tou tusi io me ko te fakamailoga a tatou ko te jw.org i olotou faka‵pulaga kolā e fakasalalau ne latou, io me ko mea ‵togi a latou, penā foki loa mo apps i mea tau komupiuta. Mai te puipuiga o te copyright mo te fakailoga o tatou, ko maua ei ne tatou se pogai ‵lei ke puipui ‵tou fakatuatusi mai te fakaaoga valevale. (Faata. 27:12) Kae kafai la e talia ne tatou a tino, ke oko foki ki ‵tou taina, ke faka‵pa a ‵tou fakamatalaga  i luga i nisi fakatuatusi io me ke fakaaoga a te fakailoga o te jw.org ke fakatau atu a mea, e mafai o se talia ne fono a ‵tou taumafaiga ke taofi aka a tino ‵teke mo tino faipisinisi.

A te ‵kopi mai o ‵tou tusi mai nisi fakatuatusi i lō te jw.org se mea fakamataku. Ne tuku atu ne Ieova ki te “tavini fakamaoni kae poto” a te tiute ke fakasoa ne latou a mea‵kai faka-te-agaga. (Mata. 24:45) E fakaaoga fua ne te “tavini” tenei a te ‵tou fakatuatusi totino ke ‵lomi ei ‵tou mea‵kai faka-te-agaga—www.pr418.com, tv.pr418.com, mo te wol.pr418.com. Kae e tolu fua a ‵tou apps mō tivaisi kese‵kese—JW Language^®, JW Library^®, mo te JW Library Sign Language^®. E mafai o tali‵tonu tatou ki mea konei kolā e seai ne ‵togi io me se fakamaseiga mai te lalolagi a Satani. Kafai a mea‵kai faka-te-agaga e maua i se isi auala aka, e mafai eiloa o se fakatalitonugina io me ‵fuli a fakamatalaga i ei.—Sala. 18:26; 19:8.

E se gata i ei, a te faka‵pa ne tatou a ‵tou tusi ki fakatuatusi i te itaneti kolā e talia ke fai i ei au fakamatalaga, e mafai o ‵tala atu i ei te avanoaga ke fai ne aposetate mo nisi tino fakatauemu a manatu fakalotolotolua e uiga ki te fakapotopotoga a Ieova. Ko oti ne tosina atu a nisi taina ki tītīgā manatu i luga i te itaneti, kae ne fakamasiasi atu fua ki te igoa o Ieova. So se fakasau‵talaga i te itaneti se fakatokaga sē ‵lei ke “akoako atu mo te agamalu ki tino kolā e se fia‵fia.” (2 Timo. 2:23-25; 1 Timo. 6:3-5) Ko oti foki ne fai a iloiloga me ko oti ne faite aka a nisi fakatuatusi i te igoa o te fakapotopotoga, te Potukau Pule, mo sui taki tokotasi. Kae e seai eiloa se sui o te Potukau Pule e fakaaoga ne ia se fakatuatusi telā e faka‵pa i ei a ata, fakasau‵talaga mo nisi mea aka i luga i te itaneti.

A te takitaki atu o tino ki te jw.org e fesoasoani atu i ei ke fakasalalau atu te “tala ‵lei.” (Mata. 24:14) A mea faigaluega i te itaneti kolā e fakaaoga ne tatou i ‵tou galuega talai koi tumau eiloa i te momea aka te ‵lei o latou. E ma‵nako eiloa tatou ke maua ne tino katoa a mea aoga mai i ei. Tela la, e pelā mo te mea e fakaasi mai i Fakanofoga, e mafai ne koe o meli atu ki se tino se ‵kopi o ‵tou tusi mai te komupiuta io me tuku atu se link ki tusi kolā e mafai o maua ne koe i te jw.org. Mai te takitaki atu o tino fia‵fia ki ‵tou fakatuatusi tonu i te itaneti, ko fai ne tatou ke fesokotaki latou mo te koga telā e maua tonu i ei ne tatou a mea‵kai faka-te-agaga, “te tavini fakamaoni kae poto.”