Ligongo lyakuti tukusagaŵa mabuku ni yindu yine yakutagulila Baibulo kwalulele, ŵandu ŵane akusaganisya kuti nganikuŵa kulemwa kuyijigala ni kuŵika pa mawebusayiti gane, pa malo gakungulucila ga pa Intaneti kapena m’mapologalamu ga pa foni. Nambo yeleyi tukusakanya. Ligongo kweleku kuli kasa malamusi * getu gakwamba kakamulicisye masengo ka webusayiti jetu, mwamti yeleyi yikusatandisya yakusawusya yejinji. M’malamusigo twasasile mwakupikanika cenene kuti jwalijose akajigala pa webusayiti jetu “mabuku, yimanyilo ya likuga lyetu, nyimbo, yiwulili, mafidiyo, kapena ngani ni kuyiŵika pa Intaneti (webusayiti jine jilijose, kapena malo gakungulucila ga pa Intaneti).” Ligongo cici tukusakanya?

Cilicose ca pa webusayiti jetu twalembesye kuti cili cetu. Ŵandu ŵakusapuka nambosoni ŵakusisya akusaŵika mabuku getu pa mawebusayiti gawo pakusaka kwasokonasya Ŵamboni sya Yehofa ni ŵandu ŵane. Pa mawebusayitiga pakusasimanikwa yindu yakwatendekasya ŵandu kuti akayicileje likuga lyetu. (Sal. 26:4; Miy. 22:5) Ŵandu ŵane akusajigala yindu m’mabuku getu kapena cimanyilo ca jw.org ni kuyiŵika payindu yawo yamalonda. Ŵanesoni akusalinganya mapologalamu gawo ga pa kompyuta kapena pafoni ni kugaŵicila cimanyiloci. Ligongo lyakuti twalembesye kuti yinduyi ni cimanyilo ca jw.org yili yetupe, nikuti mpaka tumjimbe magambo jwalijose jwakuyikamulicisya masengo mwakulemweceka. (Miy. 27:12) M’yoyo, ngatukwakunda ŵandu, atamose abale, kujigala cilicose pa webusayiti jetu  kapena cimanyilo ca jw.org ni kuyiŵika payindu yawo yamalonda. Naga tukwakunda, nikuti ŵakunganya sya magambo nganaŵa atukamucisye kumasya mtetowu.

Yehofa ŵaŵisile ukumu wakupeleka cakulya causimu m’miyala mwa “kapolo jwakulupicika ni jwalunda” basi. (Mat. 24:45) ‘Kapoloju’ akusakamulicisya masengo mawebusayiti gatatupe, www.pr418.com, tv.pr418.com, ni wol.pr418.com. Nambosoni tukwete mapologalamu gatatupe ga pa foni, tabuleti kapena kompyuta. Mapologalamu gakwe gali, JW Language^®, JW Library^®, ni JW Library Sign Language^®. Payindu yeleyi pangasimanikwa yamalonda kapena cilicose cakutyocela m’cilambo ca Satanaci. Nambo naga tukujigala mabuku getu pa mawebusayiti gane, nganituŵa tumanyilile naga nganagacenga pane ni pane.—Sal. 18:26; 19:8.

Konjecesya pelepa, pa mawebusayiti gane ŵandu akusaŵikapo yindu ni kutagulilanaga. Kuŵika mabuku getu pa malo mpela gelega mpaka kuŵe kwapa lipesa ŵakusapuka ni ŵandu ŵane ŵakusakala kuti ŵatendekasye ŵandu kuleka kulikulupilila likuga lya Yehofa. Abale ŵane pakwete pajinjilile nawo yakutagulilana mpela yeleyi. Nambo kwinjilila nawo peko, kuli konjecesya kusakasya lina lya Yehofa. Malo mpela gelega nganigaŵa gambone ‘kwiganyila mwakuwusimana mtima ŵandu ŵakusisya.’ (2 Tim. 2:23-25; 1 Tim. 6:3-5) Yikuwonekasoni kuti ŵandu ŵane akusalinganya mawebusayiti nambosoni maadilesi ga malo gakungulucila ga pa Intaneti m’lina lya likuga lyetu, Likuga Lyakulongolela kapena abale ŵa m’likugali. Nambope, pangali m’bale jwalijose jwa mu Likuga Lyakulongolela jwakwete webusayiti jakwe, soni pangali jwakusakamulicisya masengo malo gakungulucila ga pa Intaneti.

Kwalimbikasya ŵandu kwinjila pa jw.org kukusakamucisya kuti ŵajinji asipikane “ngani syambone.” (Mat. 24:14) Likuga lyetu likwawula pasogolo mwakutupa yindu yasambano yakutukamucisya paundumetume wetu. Tuli ŵakusacilila kuti yeleyi yimkamucisye jwalijose. M’yoyo, mpaka amtumicisye mjawo pa imelo cindu cajigele pa webusayiti jetu, kapena kumtumicisya litala lyakucipatila cinduco. Naga tukwasalila ŵandu ŵalung’wanu kuti ajigaleje mabuku ni yindu yine pa webusayiti jetu, nikuti tukwalanjila kwa “kapolo jwakulupicika ni jwalunda,” jwali msyene masengo gakupeleka cakulya causimu.