U kaajal Jéeobaeʼ maʼatech u konik le publicacionoʼob ku beetkoʼ, le oʼolal yaan máax tuklikeʼ jeʼel u páajtal u tsʼáaik tiʼ yaanal sitio teʼ Internetoʼ wa teʼ redes socialesoʼ. Baʼaleʼ leloʼ ku bin tu contra le baʼax aʼalaʼan tiʼ bix unaj u meyajtoʼon le sitioʼob yaantoʼon ich Internetoʼ, lelaʼ tsʼoʼok u taasik yaʼab talamiloʼob. Jeʼel u páajtal a wilik le jaats Bix unaj u Meyajtech, tu kabalil le sitio jw.org/yua yaantoʼon ich Internetoʼ. Ichileʼ ku yaʼalik mix máak jeʼel u páajtal u naʼaksik tiʼ uláakʼ sitio wa teʼ redes sociales le «dibujoʼob, fotoʼob, publicacionoʼob, u marca le sitioʼob yaantoʼonoʼ, paaxoʼob, videoʼob wa uláakʼ baʼaxoʼob tsʼaʼan ichil». ¿Baʼaxten maʼ maʼalob ka beetaʼakiʼ?

Tuláakal le baʼaxoʼob ku taasik le sitioʼob yaantoʼonoʼ jóoʼsaʼan u derechoiloʼob. Le apostataʼob yéetel le máaxoʼob pʼekmiloʼonoʼ ku tsʼáaikoʼob k-publicacionoʼob teʼ sitioʼob u beetmoʼob utiaʼal ka taakchajak u xoʼokol tumen u j-jaajkunajoʼob Jéeoba bey xan tumen uláakʼ máakoʼob. Baʼaleʼ teʼ sitioʼob yaantiʼoboʼ ku yaʼalikoʼob baʼaloʼob utiaʼal u xaʼakʼpajal u tuukul máak (Sal. 26:4; Pro. 22:5). Uláakʼ máakoʼob xaneʼ tsʼoʼok u meyajtiʼob le baʼaxoʼob ku tsoʼolol t-publicacionoʼob wa le logotipo jw.org tiʼ anuncioʼob, tiʼ baʼaxoʼob ku konkoʼob wa tiʼ aplicacionoʼob ku meyajoʼob tiʼ celularoʼob wa tiʼ tabletoʼob. U kaajal Dioseʼ u jóoʼsmaj u derechoil le marca ku meyajtiʼoʼ, le oʼolal yaan u páajtalil tiʼ utiaʼal u yaʼalik baʼax maʼ unaj u beetaʼal tu yéeteloʼobiʼ (Pro. 27:12). Wa ka u chaʼa u tsʼaʼabal tiʼ yaanal sitioʼob le publicacioʼonoʼob wa ka meyajnak le logotipo jw.org tiʼ uláakʼ máakoʼob wa tiʼ le sukuʼunoʼob utiaʼal u koonoloʼoboʼ, le tribunaloʼoboʼ maʼ xaaneʼ maʼ ken u yáantoʼon utiaʼal ka xuʼuluk u beetaʼal baʼaloʼob maʼ unaj tumen le máaxoʼob pʼekmiloʼonoʼ yéetel le máaxoʼob ku koonoloʼoboʼ.

U descargartaʼal publicacionoʼob tiʼ yaanal sitioʼobeʼ  jeʼel u taasik talamileʼ. Jéeobaeʼ u kʼubéentmaj chéen tiʼ le «palitsil chúukaʼan u yóol yéetel yaan u naʼat» ka u tsʼáatoʼon le kaʼansaj ku keʼetel yéetel janaloʼ (Mat. 24:45). Le kaʼansaj ku tsʼáaik le ‹palitsilaʼ› chéen letiʼe ku chíikpajal teʼ jw.org, tv.pr418.com yéetel wol.pr418.com. Tsʼoʼoleʼ le óoxpʼéel aplicacionoʼob utiaʼal celular yéetel tabletoʼ chéen letiʼe jeʼeloʼobaʼ: JW Language^®, JW Library^® yéetel JW Library Sign Language^®. Le aplicacionoʼob yéetel le sitioʼobaʼ minaʼan mix junpʼéel anuncio tiʼ baʼaxoʼob ku koʼonoliʼ yéetel minaʼan mix baʼal ku taal tiʼ u kʼasaʼan yóokʼol kaab Satanasiʼ. Wa yaanal tuʼux k-kʼamik le kaʼansajoʼ, maʼ k-ojel wa maʼ kʼexaʼan baʼax ku yaʼalikiʼ (Sal. 18:26; 19:8).

Tsʼoʼoleʼ wa yaan máax ku naʼaksik k-publicacionoʼob tiʼ junpʼéel sitio tuʼux jeʼel u páajtal u yaʼalik máak baʼax ku tuklikeʼ, le apostataʼob yéetel le máaxoʼob aʼaliktoʼon baʼaloʼ jeʼel u beetik u tuklik máak maʼ maʼalob baʼax ku kaʼansik u kaajal Dioseʼ. Yaan sukuʼunoʼobeʼ ku baʼateltʼaanoʼob ich Internet yéetel máaxoʼob pʼekmiloʼon, lelaʼ tsʼoʼok u taasik suʼtsilil tiʼ u kʼaabaʼ Dios. Le sitioʼob utiaʼal u tsikbal máak teʼ Internetoʼ maʼ junpʼéel kúuchil maʼalob utiaʼal u kaʼansaʼal «yéetel jeetsʼel óolal le máaxoʼob maʼ u kʼáat u yuʼuboʼob tʼaanoʼ» (2 Tim. 2:23-25; 1 Tim. 6:3-5). Tsʼoʼok xan u yilaʼal cuentaʼob teʼ redes sociales bey xan sitioʼob tiʼ Internet tu kʼaabaʼ le organizacionoʼ, le Cuerpo Gobernanteoʼ yéetel le máaxoʼob táakaʼanoʼob ichiloʼ. Baʼaleʼ mix juntúul tiʼ le sukuʼunoʼob yanoʼob ichil le Cuerpo Gobernante yaan junpʼéel sitio tiʼob ich Internetoʼ mix u cuentaʼob tiʼ mix junpʼéel red social.

Kéen k-aʼal tiʼ le máakoʼob ka ookkoʼob teʼ sitio jw.org, táan k-kʼaʼaytik le maʼalob péektsil tiʼoboʼ (Mat. 24:14). Le baʼaloʼob utiaʼal k-kʼaʼaytaj ku tsʼaʼabal teʼ sitio yaantoʼonoʼ mantatsʼ táan u bin u maas maʼalobkíintaʼal, tumen k-kʼáat ka jóoʼsaʼak u yutsil tumen tuláakal máak. Jeʼex u chíikpajal teʼ jaats ku tsolik bix unaj u meyajtoʼon le sitio yaantoʼonoʼ, jeʼel u páajtal k-túuxtik junpʼéel publicación tu correo wa máax wa junpʼéel vínculo utiaʼal u descargartik teʼ sitio jw.org. Kéen k-aʼal tiʼ le máakoʼob taak u kaanbaloʼob ka ookkoʼob teʼ sitio yaantoʼonoʼ, k-áantkoʼob utiaʼal ka u kʼamoʼob le áantaj ku tsʼáaik le «palitsil chúukaʼan u yóol yéetel yaan u naʼat[oʼ]». Chéen letiʼ tsʼáaik le kaʼansaj ku keʼetel yéetel janaloʼ.