Bambiko gupai nga ani nafuka gu gaani awaraga du mburuhe rii Ziazia Kekeapai fu aboro zanga i tumo atumo tipaha, kura aboro nabihe nga si ruaru kaa maaha rogo kura abangiriba nga ga Internet watadu rogo kura aũfugo dagbase nga gu nakoda dungu aboro. Ono tie, mangaha wo nakuo agu Andiko du Tipa * gaani abangiriba nga ga Internet na si ima kusa kereapai. A wa i napekehe ziazia rogo agu aNdiko re, boro ho si aida ni “moi gbakigbaki asura, awaraga, agu apai i aino rani ti ni, manzigo, asura, avidio, watadu kekeapai rogo gi bangiriba nga ga Internet re ku rogo kura bangiriba nga ga Internet te (ai bangiriba nga ga Internet, gu bangiriba nga ga Internet i akeda avidio rogoho, watadu gu bangiriba nga ga Internet dungu aboro afura rogoho).” Tipagine i namoi gu rugute re ti ni?

Arengo kusa awirina agu ahe dunduko du rogo gaani bangiriba nga ga Internet kina ku be gaani riigbu sa. Abasamungu kuti ndikidi pambori gbiati gu kura aboro nga aguyo nasoga rani naasada ka mangasunge na gaani awaraga rogo gayo abangiriba nga ga Internet tipa ka gbe aDezire Yekova koyo du yo ni gbiati kura aboro. Gu gayo abangiriba nga ga Internet re na agu ahe rogoho narimiso kapa ku berã agu aboro yo nagedaha. (Tam. 26:4; Snz. 22:5) Kura aboro kinaho namangasunge na agu apai du rogo gaani awaraga watadu na rimo gaani bangiriba nga ga Internet nga jw.org tipa kaa takapande gayo ahe, kaa kehe ti gayo bagibagiahe watadu rogo agu ambakadapai yo nga ga terefuni. Ho du arengo kusa wirina agu ahe dunduko du rogo gaani bangiriba nga ga Internet ni ni bandabandaha gbiati agu apai i aino rani ti ni, ani na rengo berani kuti ndiko ka banda gaani ahe tipa ka kura aboro mangingo sunge na ni ngba gbegberẽ gene ya. (Snz. 27:12) Ono ka ani ta ino aino kini mbu kura aboro, zavura awirinarani i naamaa gaani ahe rogo kura abangiriba nga ga Internet watadu i naamangasunge  na rimo gaani bangiriba nga ga Internet nga jw.org ti gayo bagibagiahe, agbiangbanga ima rengba ka ka ka undo rani ho ani amanga ome ni ka rugusa asogorani gbiati ababagiahe ti mangasunge na gaani ahe gbegberẽ.

Si ima rengba kadu ni kerepai kaa kusa gaani awaraga rogo kura abangiriba nga ga Internet nga gu angianga jw.org ya. Yekova fu sunge kusa riahe nga ga toro fu kina “kangara moyambu” sa. (Mt. 24:45) Gu “moyambu” re namangasunge sa na kina gaha ndikidi abangiriba kaa kparaka gu riahe nga ga toro​—agu abangiriba nga ga Internet re nga www.pr418.com, tv.pr418.com, gbiati wol.pr418.com. Na ambakadapai berani gbua biata tipa terefuni, si nga JW Language^®, JW Library^®, gbiati JW Library Sign Language^®. Ani ima rengba kadu na gu kido nga agi ahe re na pa takapande bagibagiahe watadu gu biriko nga ga ga Satana zegino rogoho te. Ka si du nga ani nagbia gu riahe nga ga toro rogo kura abangiriba kia, si ima rengba kadu ni guhe aboro naima ariaha watadu i naima birikosihe.​—Tam. 18:26; 19:8.

Kurigure, maa gaani awaraga rogo agu abangiriba nga ga Internet aboro afu gayo aberãpai afu rogoho tipa agu ahe i amaaha rogoho nambugene fu abasamungu kuti ndikidi pambori gbiati kura asogorani i peke agu apai nika sa aboro ka i dunga na kido kuti ga Yekova riigbu ya. Kura awirina aima biti yo i nitikango na aboro rogo abangiriba nga ga Internet, na gipai re ima ye na kura gbarasarimo kuti rimo Yekova. Abangiriba nga ga Internet nga ndikidi ba tipa ‘ruga agu yo nati kangu ni zera’ te. (2 Tim. 2:​23-25; 1 Tim. 6:​3-5) Kura aboro kinaho a nakusa iraira abangiriba nga ga Internet ni rimo gaani riigbu, Riigbu Bipasunge, gbiati agu aboro du rogoho ni basasa. Ono tie, boro ho dagba agu aboro yo du rogo Riigbu Bipasunge du na bangiriba beni nga ga Internet nga gu ni akoda ti ni na dungu aboro rogoho te.

Yugo pa jw.org fu aboro naundo na gbandaka “wene pangbanga.” (Mt. 24:14) Agu aũsunge ani agbiaha rogo gaani abangiriba nga ga Internet tipa mangasunge na ni gene tungusapai yo, i nambakadaha si naangba kina kumbatayo. Ani naida gupai nga aboro dunduko gbia undo ti ni. Sidu, a wa agu aNdiko du tipa gaani ahe ayugoho, mo ima rengba ka keda gaani waraga fu boro rogo e-mail, watadu ka keda gupai funi nika ndu na ni ku rogo jw.org ni gbia guhe ni aidaha. Ho ani ayugopa gaani abangiriba nga ga Internet ni fu aboro, gure nga ani nasayo i inipa gu bangisa gene riahe nga ga toro aye ngbaha nga, vurube “kangara moyambu.”