1. Pirang’o jakwenda Paulo ukwayu nia Jukristu ma Juebrania gitiel cwinygi i kindgi “ma sagu apila?”

I RUNDI ma kwong’a, jakwenda Paulo uketho cwiny Jukristu ma Juebrania kumae: “Man dong’ iwa pidu piwa ku jukojuk ma ku mer ku tic ma dre de; man ku wawek cokra giwa karacelo, ma calu kura mi jumoko, ento ajuka dong’ wajukra; man ma sagu apila, ka waneno cenguni dhingo.” (Ebr. 10:24, 25) Saa moko nyo umego gigam gipenjiri nia pirang’o Paulo ubeyero nia gijukiri, niwacu gitiel cwinygi i kindgi. Gibin ging’eyo thelembe acel mi wec maeno i ng’ei oro ma tundo ngo abic. I saa ma gibino nikwo i ie, gineno kamaleng’ nia nindo mi pokolembe pa Yehova iwi Yerusalem udhingo. Gineno nia ubekwayu giring kud i adhurane calu ma Yesu ular uyero igi. (Lk. 21:20-22; Tic. 2:19, 20) Nindo pa Yehova ne ugam uromo i oro 70, kinde ma Juroma gibin ginyotho Yerusalem.

2. Pirang’o wacikara nitielo cwinywa i kindwa asagane tin eni?

² Tin eni, lembe mwa de urombo ku mi Jukristu maeno. Nindo pa Yehova ma ‘dit man ma ng’oyo ndiri’ udhingo. (Yoe. 2:11) Bende, wabeneno kite ma wec pa jabila Zefania  ubepong’o ko i rundi mwa eni: “Ceng’ ma dwong’ pa Yehova ni ceng’ni, eni ceng’ni man ebetimbre pio!” (Zef. 1:14) Pi thelembe maeno re m’ubekwayu iwa ‘pid piwa ku jukojuk ma ku mer ku tic ma dre de.’ (Ebr. 10:24) Wacikara nitwio mer ma ceng’ini mandha kud umego mwa, kara watund nikonyogi ka gitie ku yeny mi kony.

3. Paulo uyero ang’o iwi tielocwiny? (Nen cal mir acaki.)

³ Biblia uyero kumae: “Pidoic ma i adunde ng’atu moko nure; ento lembe ma ber nyayu mutoro i ie.” (Rie. 12:25) Saa moko, wan ceke wabed wabedo ku yeny mi tielocwiny. Jakwenda Paulo uyero kamaleng’ nia, kadok dhanu ma ginwang’u rwom mi tielo cwiny jumange de gitie ku yeny mi tielocwiny. Ekiewo ni umego mi Roma kumae: “Ava nenowu benega dit, kara ami iwu giramia moko mi tipo, kara lembe cung i iwu; lembene eni, kara an ku wun de wajukra i kumwu, ng’atuman kum yioyic pa wadi man kum pa wadi, mu ku para de.” (Rum. 1:11, 12) Andha, kadok Jakwenda Paulo de saa moko ubino ku yeny mi tielocwiny.​—Som Jurumi 15:30-32.

4, 5. Tin eni waromo tielo cwiny jukani, man pirang’o?

⁴ Tin eni, waromo tielo cwiny ju ma gibetimo ni Yehova i tic mi saa ceke, calu ve juyab yo. Ju ma pol m’i kindgi gitwoniri ku lembe dupa mi kwo ma nwang’u gimaru, kara gitim tic pa jayab yo. Wacikara bende nitielo cwiny bamisioner, juliew mi twodiri ku mon migi, ju ma gitimo i biro mi filial man ma gitimo i biro mi loko dhok. Dhanu maeno ceke gimiiri gigi pi nitimo lee i tic pa Yehova. Bende, umego ku nyimego gitie dupa ma nwang’u gibemito gimediri asu ku tic mi saa ceke, ma re dong’ ecopere igi ngo. Gin de anyong’a negogi lee ka jubetielo cwinygi.

⁵ Jukani bende m’uromo jutiel cwinygi? Wacopo bende nitielo cwiny umego ku nyimego ma ging’io nibedo jumusuma pilembe gibemito giwor Yehova, man gigamiri “ndhu i Rwoth.” (1 Kor. 7:39) Jumamon de nwang’u tielocwiny ka weg udi migi ubeyero igi nia gimarugi, man nia gibefoyo lembe ceke ma gibetimo. (Rie. 31:28, 31) Jukristu ma gibeciro amulaic kunoke twoyo bende gitie ku yeny mi tielocwiny. (2 Tes. 1:3-5) Yehova giku Yesu gibetielo cwiny umego ku nyimego maeno ma gigwoko bedopwe migi.​—Som 2 Jutesaloniki 2:16, 17.

6. Buku pa Isaya 32:1, 2 ubenyutho iwa lembang’o iwi tic mi judong cokiri?

⁶ Som Isaya 32:1, 2. I nindo ma wabekwo i ie eni, peko utie dupa; pieno can copo mondo i iwa, man cwinywa copo tur nyatuko tuko. Re Yesu Kristu ubetielo cwinywa nikadhu kud i bang’ “judongomawijo,” niwacu judong cokiri ma gitie Jukristu ma juwiro ku tipo man ma gitie i kind rombe mange. Judong cokiri maeno gitie ngo “rwodhi” mi yioyic mwa, ento gitie jurutic wadwa pi mutoro mwa. Gibemito gikonywa kara wabed ku mutoro man kara wamedara nigwoko bedopwe mwa.​—2 Kor. 1:24.

7, 8. Wec man timo mi judong cokiri copo tielo cwiny jumange nenedi?

⁷ Judong cokiri giromo lubo lapor pa jakwenda Paulo, ma saa ceke ubed utielo cwiny umego. Ekiewo ni Jukristu mi Thesaloniki ma nwang’u gibekadhu kud i ragedo kumae: “Wan ma waketho cwinywa i kumwu ku mer, ebedo ni mutoro ma dit iwa ya wami iwu, lembanyong’a ma juboth ko pa Mungu kende ngo, ento kwo mwa bende, kum wudoko ju ma kacwinywa.”​—1 Tes. 2:8.

 ⁸ Wec mi judong cokiri copo tielo cwinywa lee akeca. Re nyo niyero wec kende kende uromo? Paulo uyero ni judong cokiri mir Efeso kumae: “Ku tic ma wumulu ko kumeni maku wukony ju ma ng’ic, wupoi de kum lembe pa Rwoth Yesu, nia ewacu en kumae, mio en e mugisa ma sagu gamu.” (Tic. 20:35) Paulo ubino ayika ‘nidaru tegone’ pir umego. Lembe m’etimo unyutho nia andha ebino ayika nimiere zoo pigi. (2 Kor. 12:15) Kumeno bende, judong cokiri gicikiri niketho cwiny jumange man nitielogi, ku wec kende ngo ento ku timo bende. Eno re ma nyutho nia andha gibedieng’ pir umego ku nyimego.​—1 Kor. 14:3.

9. Judong cokiri gicopo mio juk nenedi i ayi ma tielo cwinyjo?

⁹ Pi nitielo cwiny umego, saa moko judong cokiri gibed gimio juk. Biblia copo konyogi ning’eyo kite ma gicopo mio ko jukne i ayi ma tielo cwinyjo. I lembe maeno, Yesu uweko lapor ma ber mandha, kinde m’emio juk ni cokiri ma tung’ tung’ ma nwang’ere i Asia ma Nok, i ng’ei tho man cer pare. Emio juk ma lee ni cokiri mir Efeso, mi Pergamo, man mi Thuatera. Re i wang’ mio jukne, elar efoyogi pi lembe ma beco ma gibino nitimo. (Nyu. 2:1-5, 12, 13, 18, 19) Ni cokiri mi Laodikia, eyero kumae: “Ku ba ju m’amaru ceke, ajukogi man aponjogi: ka kumeno bed k’amora, man ilok cwinyi.” (Nyu. 3:19) Judong cokiri mwa bende gibed gitimo kero nilubo lapor pa Yesu, kinde ma gibemio juk.

10. Wan ceke waromo timo ang’o pi nitielo cwinywa i kindwa?

¹⁰ Judong cokiri kendgi ngo re ma gicikiri nitielo cwiny jumange. Paulo uyero nia Jukristu ceke gicikiri niyero wec “ma ber pi teng’oteng’ calu cande bedo; kara emi bero” ni jumange. (Ef. 4:29) Pieno, ng’atuman m’i kindwa ucikere ning’eyo yeny mi jumange pi nikonyogi. Paulo ukiewo bende ni Jukristu ma Juebrania kumae: “Kum kumeno ting’ cing’ m’uoi jeble, ku cong m’utho nding’; man wutim yo ma atira ni tiendwu, kara maeno ma won abala kud ukier kud i yo, ento ma  sagu ecangi.” (Ebr. 12:12, 13) Ma jiji mbe, ng’atuman m’i kindwa, kadok nyathin ma nyanok de, romo ketho cwiny jumange man eromo tielogi nikadhu kud i wec pare.

11. Lembang’o m’ukonyo Marthe saa ma cwinye tur?

¹¹ Nyamego moko ma nyinge Marthe cwinye ukeutur pi nindo moko. * Ekoro kumae: “Nindo moko, abino rwo kara anwang’ tielocwiny. E i ng’ei saa ma nok, wanwang’ara ku nyamego moko ma wang’e teng’ini, m’unyutho ira mer man kisa m’abino ku yenyne tap i saa maeca. Ekoro ira bende pir amulaic m’ebekadhu kud i ie, m’urombo tap ku lembe para; e awinjara nia kara atie kenda ngo.” Ecicopere nia nyamego maeno ung’eyo de ngo nia wec m’eyero utielo cwiny Marthe lee akeca!

12, 13. Waromo tio nenedi ku verse mi Jufilipi 2:1-4?

¹² Paulo ukiewo ni Jukristu mi Filipi kumae: “Ka kumeno tek juk moko nuti i Kristu, tek thokothok moko mi mer de nuti, tek ripocwiny moko mi tipo nuti, tek kisa ma ng’ic ku ngisi moko nuti, wuketh mutoro para pong’ kara pidoiwu bed calacel, ma wubedo ku mer ma calacel, ma wubedo ku cwinywu de m’uripo acel, ku pidoiwu de acel; ma wubetimo gin moko ngo kud ali kadok ku kulula mananu, ento ku pidoic ma mol wek ng’atuman ie pid ya wadi ber ma sagu en; ma wun kubeng’wu kubeng’wu ng’atuman ie ku pido kum piny pare kende ngo, ento ng’atuman ie pid kum piny mi juwadi bende.”​—Flp. 2:1-4.

¹³ Ng’atuman m’i kindwa copo yenyo yo mi konyo jumange. Pieno, wacopo mio ‘jukojuk mi mer, ripocwiny mi tipo man kisa ma ng’ic ku ngisi,’ pi niketho cwiny umego ku nyimego mwa.

14. Yo acel ma waromo ketho ko cwiny jumange utie ma kani?

¹⁴ Wanwang’u mutoro ma lee ka wabewinjo nia ju ma wagam waponjo kugi Biblia con gibemediri nigwoko bedopwe migi. Jakwenda Yohana ukiewo kumae: “Mutoro mange mbe i bang’a ma sagu maeni, ni lembe mi nyithindho para m’awinjo gibewotho i lemandha.” (3 Yoh. 4) Juyab yo ma dupa amora migi medere ka ginwang’u nia ng’atu moko ma gigam gikonyo con ning’eyo lemandha ubetimo asu ni Yehova ku bedopwe, kunoke nyo etie bende jayab yo. Pieno, ka cwiny jayab yo moko utur, wacopo nipoyo wiye i kum lembe ma beco m’edaru timo pi nikonyo jumange.

15. Wacopo timo ang’o pi nitielo cwiny ju ma gibetimo ni Yehova ku bedopwe?

¹⁵ Juliew ma dupa mi twodiri giyero nia ginwang’u tielocwiny ma lee dit ku mon migi, ka ginwang’u barua mi foyofoc i ng’ei liewo cokiri moko. Judong cokiri, bamisioner, juyab yo man ju m’ubetimo i Bethel, gin ceke gibetimo ni Yehova ku bedopwe. Ka wabefoyogi, eno bitielo cwinygi i kite ma wabing’eyo ngo.

16. Ang’o ma timo yot, ma copo tielo cwiny ng’atu ma ni peko?

¹⁶ Dong’ iromo timo ang’o ka lworo benegi niweco ku dhanu mange? Asu, icopo timo lembe moko pi nitielo cwinygi. Ku lapor, kepim nivonjo i bang’ umego kunoke nyamego moko. Tek evonjo ngo i beng’i, nyutho nia etie ku peko, man etie ku yeny pa ng’atu m’ukwayu ekore ire. Niciko kende kende ithi pi niwinje copo tielo cwinye.​—Yak. 1:19.

17. Ang’o m’utielo cwiny aradu moko?

¹⁷ Aradu ma nyinge Henri unwang’u  can ma lee i adundene, kinde ma wat pare moko giweko Yehova. I kindgi ubino won, m’ubedo jadit cokiri. Saa ma jaliew moko mi twodiri uneno nia Henri tie ku can, egam eting’e kara gicidh gimadh kawa gikude. Ewinjo kilili wec ma Henri ubekoro ire, man ekonye ninyang’ nia lembe m’eromo timo kara jupagi gidwog i lemandha utie nigwoko bedoleng’ pare en gire. Bende, gin m’utielo cwiny Henri utie giragora ma e: Zaburi 46, Zefania 3:17, man Marko 10:29, 30.

18. (a) Ubimo Suleman ukiewo lembang’o pi tielocwiny? (b) Kenyuth lembe moko ma Paulo uwacu nia wacopo timo.

¹⁸ Lembe ma Marthe giku Henri gikadhu kud i ie ubeponjowa nenedi? Ubenen terere nia, ng’atu moko ci m’i kindwa copo juko man copo tielo cwiny umego kunoke nyamego m’ubenwang’ere i peko moko. Ubimo Suleman ukiewo kumae: “Lembe i nindo ma kakare, e ber mire ma! Der mi wang’ nyayu anyong’a i adunde man rwonglembe ma ber dwoko cogo mio.” (Rie. 15:23, 30) Nyo ing’eyo ng’atu moko ma cwinye tur, man ma can umondo i ie? Nyo icopo somo ngo ire kende kende lembe moko ma nwang’ere i Otkur ma Wiw kunoke i Internet? Bende, jakwenda Paulo uyero nia ka wabewero wer mwa mi Ker karacelo, anyong’a copo mondo i iwa. Ekiewo kumae: “Ma wubeponjru man wubejukru ku lembwer man wer ku wer mi tipo, ma wubewero ku bero i adundewu ni Mungu.”​—Kol. 3:16; Tic. 16:25.

19. Pirang’o tielocwiny i kindwa pire bibedo tek magwei ceng’ini eni, man bikwayere nia watim ang’o?

¹⁹ Kinde ma dong’ wabidhingo ceng’ pa Yehova magwei, bikwayere nia watiel cwinywa i kindwa lee nisagu zoo. (Ebr. 10:25) Bende, mutoro binegowa dit ka wabetio ku juk ma e ma Paulo umio: “Kum kumeno dong’ wujukru, man wutengru, cil calu wubetimo bende.”​—1 Tes. 5:11.