1. Misamaanay o tarokos ci Pawlo hano palimoˈot to Hiprayay a Krisciyang, ‘tongalen ko pisaˈicel a pakalalolalok’ saan hani?

HANO mamisaˈicel kita a pakalalok to tao hani? Pacaˈofay ko sapatikami no tarokos ci Pawlo to Hiprayay a Krisciyang. Sanay ko sowal ni Pawlo: ‘O nika sasipaˈicel ita a kaciharateng ko ngaˈay to sakasasiolah ato sakangaˈayaw no demak ita. Aka ka matiya kita o romaroma a tamdaw a misawad to saˈopo. O nika sasipaˈicel ita ko ngaˈay. Nawhani mahapinang namo ko nika ngatato noya romiˈad. Saka, tongalen ko pihaen to demak.’ (Hipray 10:24, 25) Somowal ci Pawlo toniya sowal caho ka lima miheca, mahapinangay no itiniay i Yirusalim Yutaya a Krisciyang to mangataay ko romiˈad ni Yihofa, maharatengayho ko misowalan ni Yis a tahapinangan, mafanaˈ to mamilaliw tayra potal no niyaroˈ ngaˈ, madipot ko ˈorip. (Dmak 2:19, 20; Luka 21:20-22) Isaka 70 miheca, o romiˈad ni Yihofa pakaynian i sofitay no Loma a misawkit to Yirusalim a mafekad.

2. Misamaanay hano mamisaˈicel kita a pakalalolalok hani?

² Anini, iraay ko lalangian ita a pasoˈlin to mangataayto ko katalawan a romiˈad ni Yihofa. (Yoil 2:11) Ya pairasolay ci Cifaniya pasowalay:  “Mangataayto koya tadaromiˈad no Tapang, maraodayto!” (Cifaniya 1:14) Oniya sapairasol milingatay kitaanan. Mangataayto ko romiˈad ni Yihofa, mihaenay ‘sasipaˈicel ita a kaciharateng ko ngaˈay to sakasasiolah ato sakangaˈayaw no demak ita.’ (Hipray 10:24) Matongal ko kaciharateng ita to salikaka, ano misaali ko salikaka i, wa mafanaˈto kita sasamaan a pakalalok cangranan.

3. Pakayni i sapakalalok, somowalay ci Pawlo to maanan? (Nengnengen ko satapangan coka.)

³ Sowal i Taneng 12:25 sanay: “O sakatoled no tamdaw ko rawraw no falocoˈ, o sakalipahak no tamdaw ko ngaˈayay a sowal.” (Taneng 12:25) Mihadakay koniya sinael to nafalocoˈan ita a sowal, samanen misaaliay ko cecacecay tamdaw to sapakalalok. Mikitini sapatikami ni Pawlo to i Lomaay a Krisciyang mahapinangay ita, ano oya mikeriday pakalalok to salikaka a tamdaw, misaaliay to sapakalalok no tao, sanay ko sowal ni Pawlo: ‘Sakatayraan kako a minengneng i tamowanan, nawhani o sapaladaˈaw ako i tamowanan tono Kawas a rocek to sakaciˈicel namo a tanektek. Ta ano itira kako i tamowanan i, pakayni i nipitiˈer ita i ci Kristoan a masasipaˈicel kita.’ (Loma 1:11, 12) Mafanaˈay ci Pawlo to sasamaan a pakalalok to tamdaw, kawra misaaliay cingra to sapakalalok nolatekay.​—ˈOsien ko Loma 15:30-32.

4, 5. O cima ko ngangaˈay pakalaloken no mita? Hano citatodongay to pakalaloken no mita cangra?

⁴ Patafangay to niyah ko ˈalomanay tamdaw malo misakafahay, madimadi a mihodop to Kawas, citodongay to papakahemeken no mita. Pakayni sapieminaw to toki a dademak, paihekalay to kinafalahay to niyah a harateng. O milakowitay to riyar a saliakaka, matayalay i Pitil, kasakilac kantok ato fafahi nangra, ato matayalay i RTO a salikaka, makahiay a patafang to niyah, mipalak to adihayay toki dademak ci Yihofaan, oha papakalaloken ita cangra. O roma salikaka makalimay sapadotocaw miemin to toki a dademak, kawra iraay ko pasangar hato paselaˈ sanay, ano cangrato misaaliay to sapakalalok no mita.

⁵ O roma Krisciyang misetekay to falocoˈ, “deng o mitooray to Tapang a tamdaw” ko hararamod, tahaniniay a caka ciraramod, oha papakalaloken ita cangra. (1 Korinto 7:39) O roma, o malalokay a fafahi citatodongay to papakahemeken ato papakalaloken no faˈinay. (Taneng 31:28, 31) O roma salikaka tahacada to sapalak anca adada ko tireng, kamayan a mitafo to madimadiay, misaaliay cangra to sapakalalok no mita. (2 Tisalonika 1:3-5) Mafanaˈay kita, ci Yihofa aci Yis cowa ko mamapawan a mihinom toniya madimadiay a sikawdan.​—ˈOsien ko 2 Tisalonika 2:16, 17.

6. Itini Isaya 32:1, 2, o malohemay malitengay iraay ko maanan a ˈinorong nangra?

⁶ ˈOsien ko Isaya 32:1, 2. Anini, pakaynian ni Yis i mapasimalay salikaka ningra, ato i lalomaˈay no lopayˈay siri a ‘ˈalomanay kakeridan,’ mikayat ato pakalalok ko matoleday ko falocoˈ a tamdaw toniya pasangaray a lintad. Mihaenay, o malohemay malitengay cowa ko ‘malo tawki’ a mikowan to pasoˈlinay falocoˈ no salikaka, oha ‘kapot matayal’ pakahemek cangranan.​—2 Korinto 1:24.

7, 8. O malohemay malitengay cowa ko tano sowal aca a pakalalok to tamdaw, wa ngaˈayayho misamaan to demak?

⁷ Patirengay ko tarokos to ngaˈayay a taˈarawan. Patikamiay cingra to tahacadaay to sapalak a Krisciyang i Tisalonika a kasakopang: “Tona maolah kami i tamowanan saka, caay ka deng o ngaˈayay a ratoh no Kawas a cecay ko sapaini niyam i tamowanan. Halo ˈorip han niyam a kinafalah to saki tamowanan saan ko harateng niyam. Nawhani tada maolah kami i tamowanan.”​—1 Tisalonika 2:8.

⁸ Tolatekay, O noka pasowal aca a pakalalok  to tamdaw caayho ka edeng. Pasowalan ni Pawlo ko malohemay malitengay no Ifiso: “Pakaynien ako i masamaamaanay a demak ko nipipahapinang i tamowanan to nika o hahaenen ita a matayal a mipadama ko rarimaay a tamdaw. O romasato, o haharatengen ita koya sowal no tapang ci Yis toya, ‘Ikaka no nika lemed no milayapay ko nika lemed no mipafeliay,’ sanay.” (Dmak 20:35) Cowa ko pakalalok aca ni Pawlo to salikaka, makahiyay pakayra cangranan a kinafalah to kihecod no niyah. (2 Korinto 12:15) Wa mihaen ko malohemay malitengay, cowa ko tano sowal aca cangra a pakalalok, ato mihinom to salikaka, wa tano waywayan a paihekal to nika ciharateng cangranan.​—1 Korinto 14:3.

9. Sasamaan tano pakalalokay a pakayraan ko malohemay malitengay misadak to sapirikec?

⁹ Mihadak to sapirikec wa ngaˈay pakalalok to tamdaw. Kawrira, wa minanam ko malohemay malitengay to taˈarawan i Fangcalay Cudad, ngaˈ ngaˈay tano pakalalokay a pakayraan a mihadak to sapirikec. Toniya pakayraan, patirengay ci Yis to mikiriwiˈay a taˈarawan, sinanoten ko ihekalay a sapalimoˈot ningra to Aciyaay a kasakopang, ikor no patikol maˈorip cingra. ˈAyaw no papalimoˈot ci Yis to Ifiso, Pirkamum, Tiyatira a kasakopang i, salakatayho a pakahemek cangraanan. (Paˈarawan 2:1-5, 12, 13, 18, 19) Mihaenan ni Yis a pasowal ko Laotikiya kasakopang: “Kaketeren ako a palatamdaw ko kaolahan ako a tamdaw. Orasaka, aka ka ˈisang kiso. Liyasen ko raraw iso.” (Paˈarawan 3:19) Pakayni pisadak to sapalimoˈot, o taˈarawan ni Yis tada o ngaˈayay nanamen no malohemay malitengay.

10. Kita maemin, sasamaan pakalalok to tao?

¹⁰ O pakalalokay to tamdaw a demak, cowa ko malohemay malitengay aca ko mamidemak, palimoˈotay ci Pawlo to Krisciyang, “akato ko tatiihay ko sowal namo. Kao paˈicelay, o palatamdamdaway ato sakaciepoc no mitengilay a tamdaw a cecay ko sowal namo.” (Ifiso 4:29) Kita o cecacecay tamdaw oha mamisinanot to  pakayraan ato saali no roma tamdaw, mahaen o nano sowal ni Pawlo to Hiprayay a Krisciyang: “Orasaka, fiyacen ko marorayay a kamay ato rarimaay a tosor namo. Kararid a pakayra i moecelay a lalan a romakat. Ta caay ka ngalef ko piˈiw no waˈay iso. Ta maadahto ko waˈay iso.” (Hipray 12:12, 13) Mihaenay, kita o polong a tamdaw, mahaopay ko kaemangay tamdaw, wa ngaˈay somowal a pakalalok to roma tamdaw.

11. Tiya matoled ko falocoˈ ni Marte, macadaay ningra ko maanan a sapadama?

¹¹ O cecay fafahiyan salikaka ci Marte * halafinay a matoled ko falocoˈ, sanay ko mitilidan ningra: “Cecay romiˈad, micangacangay kako to Kawas pakalalok takowanan, teloc malitemohay ako ko cecay matoˈasay fafahiyan salikaka, itiniay cingra i katoˈolan ako a paˈicel, mihinom takowanan. Na tahalifaay ko niyah to mahecaday a demak sanay cingra, tada misayaray to falocoˈ ako.” Oniya matoˈasay salikaka cowa ka fanaˈ, o sowal ningra tada taˈangayay ko sadama ci Martean!

12, 13. Wa ngaˈay kita misamaan misaka dademak to safalod no Filipi 2:1-4 hani?

¹² Pakalalokan ni Pawlo ko Filipiay a salikaka: ‘Ano pakayniay kamo ci Kristoan a mapakalalok, mahinom i olah, itini noˈadingoan a malacacawmaˈ, ira ko rihaday no falocoˈ i, o mamisaheci a palipahak i takowanan. Ano mihaen i, palecaden ko harateng namo, palecaden ko olah, cecayen ko harateng, cecayen ko falocoˈ. Itini i kihecod a demak, aka halicongis, aka pisaidahidahi, sapoeneren ko falocoˈ, ikakaay ko tao to niyahan han ko pinengneng. Aka pisikor tono niyah aca a demak, sikoren ko demak no tao.’​—Filipi 2:1-4.

¹³ Oha mamisaˈicel kita ciharateng to salikaka, padama cangranan ‘mahinom i olah, itini noˈadingoan a malacacawmaˈ, ira ko rihaday no falocoˈ’ i cangranan, ano mihaen ko demak, o pakalalokayto cangraanan.

14. Sasamaan kita pakalalok to tamdaw?

¹⁴ Ano matengil ko na padamaan no niyah a tamdaw madimadi to Kawas, wa taˈangayay ko sapakalalok kitaanan, mahaen o sowal no tarokos ci Yohani: “Ano matengil ako ko nipidoedo no wawa ako to sowal no Kawas i, awaay ko ikakaay nonini a lipahak ako.” (3 Yohani 4) Ngaˈayay misawacay ko ˈalomanay misakafahay tonini. Ano tahatengil cangra to padamaan no niyah a tamdaw, mitafoay to madimadi, malo misakafahay, maedeng mahemekay a mapakalalok cangra. Mihaenay, ano matoled ko cecay misakafahay, ngaˈayay lomalen ko makapahay minaroˈan no demak nangra i salakat, oha papaira to sahinom cangranan konini.

15. Sasamaan kita a pakalalok to madimadiay dademak i Kawas a tamdaw hani?

¹⁵ ˈAlomanay kasakilac kantok somowalay, maharek cangra ato fafahi milisoˈ to kasakopang i, macadaay ko mikoˈiday a tikami no salikaka, tada taˈangayay ko sapakalalok cangranan. Miakoˈid ko salikaka to malohemay malitengay, misakafahay, milakowitay to riyar, matayalay no Pitil, wa adihay ko sapakalalok toniya madimadiay a salikaka.

16. Pakalalok to tamdaw hano cowa ko pasangaray?

¹⁶ Soˈlin cowa ka fanaˈ kita a masasowal, wa ngaˈay a pakalalok to tamdaw. Sapakalalokaw to tamdaw cowa ko pasangaray, tinakoen ngaˈayay damsayen ko pising masedi cingranan, ano caka tawa kora tamdaw tisowanan, maedeng iraay ko pasangaray no falocoˈ ningra, misaaliay to mamitengil a tamdaw. Ano tengil han iso ko sowal ningra i, wa masayar ko falocoˈ ningra halatek.​—Yakop 1:19.

17. Tiya matoled ko cecay kaemangay faˈinayay salikaka i, milifokay to maanan a sahinom?

¹⁷ O cecay kaemangay faˈinayan salikaka ci Enli, miliyasay ko salawina ningra to likakawa  no Kawas, cowa ka hatini aca, oya malo malohemay malitengay a wama ningra cowa to pihodop ci Yihofaan, tada masomaday ci Enli tonini. O cecay kasakilac kantok mitahidangay cingranan tayra pinanoman to kafi, halafinay masasowal cingranan. Mapakalalokay ci Enli, pakahapinang ano papadama to paro no lomaˈ patikol i likakawa no Kawas, edengan a pakayraan i, mitafo to madimadiay. O roma, mikitini piˈosi to Fangcalay Cudad milifokay ci Enli to taˈangayay sapakalalok, mangalef mikitini i ˈOlic 46 fedengan; Cifaniya 3:17; ato Marko 10:29, 30.

18. (1) Somowalay ci Solomon to maanan milingatay to pakalalokay a sowal? (2) Pakalalokay ci Pawlo kitaanan misamaan ko hademak?

¹⁸ Mikitini milifetan ni Marte aci Enli mahapinangay ita, o cecay cecay tamdaw ngaˈayay pakalalok to misaaliay to sahinom a salikaka, mahaen o mitilidan no hongti ci Solomon: “Ano matatodong ko sowal iso i, tada makapahay. O ngaˈayay a ratoh i, o miselakay to falocoˈ a patanektek to tireng.” (Taneng 15:23, 30) O roma, ano miˈosi ko matoleday tamdaw to Mikecolay ato minengneng to wangcan no mita, wa ngaˈay tanektek a makowad. O roma sapakalalok a pakayraan malacafay a romadiw noˈadingoan a radiw, sowal ni Pawlo: “Kao taneng ko sakasasipasifanaˈ namo a mikerid. Kao ˈolic ato fangcalay a radiw ato no ˈadingoan a radiw ko sapikansiya no falocoˈ namo to Kawas a romadiw.”​—Kolosay 3:16; Dmak 16:25.

19. Aniniay a Krisciyang hano mangalef ko pisaali to sapakalalok?

¹⁹ Samanen ‘mangataayto koya romiˈad’ ni Yihofa, tada kalimelaan ko pakalalolalok no Kriciyang. (Hipray 10:25) Pasowalay ci Pawlo to salikaka, “orasaka, haenento o demak namo anini ko nika sasipaˈicel namo a masasipadama.” (1 Tisalonika 5:11) Nanay tengilen ita ko sapalimoˈot ni Pawlo, padotoc a mapakalalok.