1. Wai di apasl Paal tel di bradaz bak den fi “inkorij wan anada moa”?

WAI wi shuda werk haada fi inkorij wan anada? Di apasl Paal tel wi wai eena ih leta tu di Heebroo Kristyanz. Ih seh: “Ahn mek wi inkorij wan anada fi shoa lov ahn du gud. Ahn noh mek wi mek it wahn habit fi noh meet tugeda laik weh som a dehn du. Insteda dat, wi shuda inkorij wan anada moa, now dat wi si dat di Day . . . di kohn kloasa ahn kloasa.” (Heeb. 10:24, 25) Eena jos faiv yaaz, di Jooish Kristyanz mi wahn si di en a da sistem a tingz bak den. Dehn mi wahn si di sainz weh Jeezas mi tel dehn bowt. Dehn wuda ga nof taim fi lef di siti ahn sayv dehn laif. (Aks 2:19, 20; Look 21:20-22) Jehoava mi yooz di Roamanz fi dischrai Jeroosalem eena 70 C.E.

2. Wai wi need fi inkorij wan anada eevn moa?

² Tudeh, wi noa dat di day a Jehoava di geh kloasa ahn kloasa. (Joel 2:11) Di prafit Zefanaiya seh: “Di grayt day a Jehoava deh kloas! Ih kloas an ih di kohn kwik-wan!” (Zeph. 1:14)  Da prafesi aplai tu fi wee taim tu. Bikaaz ih deh soh kloas, Paal tel wi fi “shoa kansaan” fi wan anada an inkorij wan anada fi shoa lov ahn du gud. (Heeb. 10:24, NW, ftn.) Soh, wi need fi shoa inchres eena wi bradaz soh dat wen di taim kohn fi gi dehn inkorijment, wi wahn dehdeh fi dehn.

3. Weh di apasl Paal mi seh bowt inkorijment? (Koment pahn di picha da di biginin a dis aatikl.)

³ Di Baibl seh: “Woriz eena wahn man haat way ahn dong, bot wahn gud werd mek ih feel hapi.” (Prov. 12:25) Dis hapm tu aala wi. Evribadi need inkorijment evri now an agen. Paal mi seh dat eevn di persn hoo ga di rispansabiliti fi gi inkorijment tu adaz need sombadi fi inkorij ahn tu. Ih mi tel di Kristyanz weh mi liv da Roam: “Ah waahn kohn si unu bad, soh dat Ah ku shayr som a di gif dehn fahn di Hoali Spirit, weh wahn schrentn unu. Laik dat, wi wahn di inkorij wan anada.” (Roam. 1:11, 12) Soh eevn doa Paal mi gi inkorijment tu adaz, hihn mi need adaz fi bil hihn op tu.—Reed Roamanz 15:30-32.

4, 5. Hoo need inkorijment tudeh, ahn wai?

⁴ Bradaz ahn sistaz weh mek sakrifais fi put di Kingdom fos shuda geh inkorijment. Wi ga wahn lata faytful painyaaz weh mek big sakrifais fi stay eena ful-taim servis. Ada bradaz hoo mek di saym kaina sakrifais da mishineriz, Betelaits, serkit oavaseeya ahn dehn waif, ahn bradaz ahn sistaz weh werk da di rimoat chranslayshan aafis dehn. Aala dehn mek sakrifais soh dat dehn ku spen moa taim eena dehn servis tu Jehoava. Soh, wi fi gi dehn inkorijment. Ahn wi ga bradaz hoo wuda waahn deh eena ful-taim servis, bot, fi som reezn er di ada dehn kyaahnt, ahn dehn wuda apreeshiayt inkorijment tu.

⁵ Wi bradaz ahn sistaz hoo stay singl bikaaz dehn waahn obay di koman fi marid sombadi weh “bilangz tu di Laad,” need inkorijment tu. (1 Kor. 7:39) Wahn waif apreeshiayt wen ih hozban tel ahn tingz weh bil ahn op. (Prov. 31:28, 31) Ahn, Kristyanz hoo stay faytful chroo persikyooshan ahn siknis need fi geh inkorijment. (2 Tes. 1:3-5) Jehoava ahn Jeezas komfert aala dehnya faytful bradaz ahn sistaz.—Reed 2 Tesaloanyanz 2:16, 17.

6. Weh eldaz need fi du akaadn tu weh Isaiah 32:1, 2 seh?

⁶ Reed Isaiah 32:1, 2. * Wi di liv eena haad taimz an ih eezi fi geh sad er diskorij. Soh Jeezas di yooz di Govanin Badi ahn di faytful “prins dehn” fahn di ada sheep fi inkorij wi. Dehnya kangrigayshan eldaz da noh maasta oava nobadi, bot dehn “werk tugeda” wid dehn bradaz fi help dehn bee hapi ahn stay faytful.—2 Kor. 1:24.

7, 8. How eldaz ku bil op adaz, bisaidz gi dehn inkorijment?

⁷ Wi ku fala di egzampl a di apasl Paal. Hihn mi rait tu di bradaz da Tesalonaika weh mi-di goh chroo persikyooshan: ‘Da bikaaz a fi wee lov fi unu wai wee mi redi fi shayr noh onli di Gud Nyooz fahn Gaad, bot wi oan laif.ʼ—1 Tes. 2:8.

⁸ Paal mi seh dat wi need fi du moa dan  jos inkorij wan anada. Ih tel di eldaz da Efisos: “Eena evriting weh Ah mi du, Ah lef wahn egzampl fi unu fala dat unu fi tek kayr a dehn wan weh week, bikaa memba seh dat da di Laad Jeezas ihself mi seh, ‘Gaad bles yu moa wen yu gi dahn wen yu get.ʼ” (Aks 20:35) Paal mi wilin fi noh jos inkorij ih bradaz, bot fi ‘eevn gi ihself tu, fi help dehn.ʼ (2 Kor. 12:15) Jos laik Paal, eldaz fi noh onli inkorij ahn komfert bradaz, bot bil dehn op. Dehn ku du dis wen dehn tek wahn persnal inchres eena dehn.—1 Kor. 14:3.

9. How eldaz ku bee inkorijin eevn wen dehn di gi kongsl?

⁹ How eldaz bil op adaz? Eldaz noh jos kongsl, bot dehn fi fala di difrent egzampl eena di Baibl pahn how fi gi kongsl eena wahn inkorijin way. Jeezas da di bes egzampl a dis. Ih mi gi sohn schrang kongsl tu sertn kangrigayshanz da Aysha Maina, bot noatis how ih mi du it. Bifoa ih mi kongsl dehn, ih prayz di kangrigayshan da Efisos, Pergamom, ahn Taiyataira. (Rev. 2:1-5, 12, 13, 18, 19) Ih mi tel di kangrigayshan da Layodiseeya: “Di peepl dehn weh Ai lov, dehn da di wan dehn weh Ai tel seh dat dehn di du di rang tingz, ahn dat Ai wahn ponish dehn. Soh wid aala unu haat unu mos du weh rait, ahn ton fahn unu sin dehn.” (Rev. 3:19) Soh eldaz, fala Jeezas egzampl wen yu di gi kongsl.

10. Weh aala wi ku du fi bil op wan anada?

¹⁰ Aala wi ga di rispansabiliti fi inkorij wan anada, noh jos di eldaz. Paal mi tel aal Kristyanz fi ‘seh werdz weh wahn help adaz, weh wahn bil dehn op, akaadn tu weh dehn need fi yehr. Eena da way, wi wahn bee wahn blesin tu peepl weh di yehr wi.ʼ (Ifee. 4:29) Eech wan a wi fi luk owt fi weh adaz “need fi yehr.” Wen Paal mi kongsl di Heebroo Kristyanz, ih tel dehn: “Unu lif op unu taiyad han dehn,  ahn mek unu shayki fut dehn stan op schrang! Kip di waak pahn wahn schrayt road, soh dat dehn wan hoofa fut week weh di fala unu noh wahn geh weeka, bot insteda dat, dehn wahn geh heel.” (Heeb. 12:12, 13) Aala wi, eevn di yong wan dehn, ku gi inkorijment.

11. How wahn sista mi help Martha wen shee mi-di goh chroo dipreshan?

¹¹ Martha * da wahn sista weh gaahn chroo dipreshan. Shee seh: “Wahn day wen Ah mi-di pray fi mek sombadi inkorij mi, Ah meet wahn lee oal sista hoo mi shoa mi di lov ahn kompashan weh Ah mi reeli need. Shee tel mi weh shee mi gaahn chroo, ahn da-mi di saym ting weh Ai mi-di deel wid. Wen wi don taak, Ah neva feel soh loanli afta dat.” Maybi da lee sista neva riyalaiz how fi shee werdz mi inkorij Martha.

12, 13. Eena weh wayz wi ku aplai di advais da Filipiyanz 2:1-4?

¹² Paal mi gi dis advais tu aala di bradaz eena di kangrigayshan da Filipai: “Di laif weh unu ga wid Jeezas Krais noh inkorij unu? Ih lov noh komfert unu? Aala unu noh ga di sayhn Hoali Spirit di liv eena unu haat? Unu haat noh saaf? Unu noh kay bowt wan anada? Wel den, Ah wuda moa dahn glad if aala unu wuda tink wid wan hed, lov wan anada di saym, ahn agree wid wan anada eena evriting weh unu du. Unu mosn du notn owta selfishnis er praid. Unu sopoas tu bee hombl ahn unu noh fi tink dat unu beta dahn enibadi els. Unu mos luk owt fi wan anada, ahn noh oanli fi unu oanself.”—Fil. 2:1-4.

¹³ Soh, aala wi fi chrai fi luk owt fi wan anada. Mek wi spen taim wid wan anada, komfert wan anada wid lov, ahn shoa kansaan fi wi bradaz ahn sistaz. Wen wi du dehnya tingz, wi di inkorij wan anada.

14. Wat da wan way wi ku inkorij adaz?

¹⁴ Som a wi ga Baibl styoodents weh kom eena di chroot ahn now da wi bradaz ahn sistaz. Wen wi hyaa how dehn di stay faytful, ih onli inkorij wi, noh chroo? Di apasl Jan mi ekspeeryens dis. Ih seh: “Notn kuda mek mi moa hapi dan fi yehr seh dat mi chiljren dehn di fala di chroot.” (3 Jan 4) Wen painyaaz si bradaz ahn sistaz weh dehn yoostu stodi wid di stay faytful tu Jehoava an eevn serv az painyaaz, ih mek dehn feel soh gud. Soh wen yu rimain wahn painyaa weh diskorij bowt how haad ih mi werk an aala di jai ih mi feel, ih ku komfert ahn wahn lat.

15. Wat da wahn way weh aala wi ku inkorij wi bradaz weh di stay faytful eena dehn asainment?

¹⁵ Wahn lata serkit oavaseeya ahn dehn waif feel inkorij wen dehn geh wahn lee noat di tank dehn fi dehn vizit tu di kangrigayshan. Dehn seh dehndeh lee noat onli bil dehn op. Eldaz, mishineriz, painyaaz, ahn Betelaits feel inkorij tu wen wi tel dehn humoch wi apreeshiayt dehn faytful servis.

16. Weh wi ku du fi inkorij sombadi?

¹⁶ Wi wudn waahn tink dat wi kyaahn inkorij sombadi jos bikaaz wi noh noa weh fi seh. Ih noh tek wahn lat fi inkorij sombadi. Maybi jos wahn smail wen wi di greet da persn. If dehn noh smail bak, noh wori, ih ku bee dat dehn di deel wid wahn prablem. Wi noh need fi seh eniting, jos lisn tu da persn, ahn dat ku komfert dehn.—Jay. 1:19.

17. How wahn yong brada mi geh help wen ih mi-di goh chroo wahn prablem?

 ¹⁷ Henri, wahn yong brada, mi feel sad wen som a ih kloas famili memba, inkloodin ih pa, hoo da-mi wahn elda, mi lef di chroot. Wahn serkit oavaseeya mi inkorij Henri. Ih kehr Henri da wahn lee restorant fi jrink kaafi. Dis mi alow Henri fi taak bowt weh mi deh pan ih main ahn haat. Ih riyalaiz dat di onli way fi help ih famili fi kohn bak tu di chroot da fi mek hihn stay faytful. Skripchaz laik Psalm 46; Zephaniah 3:17; ahn Maak 10:29, 30 mi reeli komfert ahn.

18. (a) Weh King Salaman mi seh bowt inkorijment? (b) Weh di apasl Paal seh fi mek wi chrai du?

¹⁸ Martha ahn Henri egzampl shoa wi dat wi ku inkorij wahn brada er sista hoo need komfert. King Salaman seh: “Ih feel gud wen sombadi seh sohnting at di rait taim! Wahn frenli luk mek di haat hapi, wahn gud ripoat schrentn di boanz.” (Prov. 15:23, 30.) Wee ku schrentn wiself tu wen wi reed Di Wachtowa er infamayshan fahn aafa wi websait. Paal mi seh dat wen wi sing Kingdom sang tugeda, ih ku inkorij wi. Ih seh; “Mek di mesij bowt Jeezas Krais aalwayz liv rich-wan eena unu haat; teech wan anada, advaiz wan anada, ahn du it eena wahn waiz way. Sing saamz, ahn sing di him dehn, ahn sing prayz sang tu Gaad, ahn aalwayz tel ahn tanks eena unu haat.”—Kol. 3:16; Aks 16:25.

19. Wai ih di geh moa impoatant fi mek wi gi inkorijment? Ahn weh wi shuda du?

¹⁹ Ih di geh moa ahn moa impoatant fi mek wi inkorij wan anada. Wai? Bikaaz di day a Jehoava “di kohn kloasa ahn kloasa.ʼʼ (Heeb. 10:25) Paal mi inkorij ih felo bradaz ‘fi kip aan di inkorij wan anada, ahn help wan anada fi bee schranga eena di Laad, jos laik weh dehn don mi-di du.ʼ—1 Tes. 5:11.