1. Ka meha uagu layusurei Pábulu dimurei “guentotima” dan lariñagunbei houn kristiánugu ebüréugu lunti lan híchugun gurasu hóuniwagua?

KA UAGU lunti lubéi wéiritima lan wíchugun gurasu wóuniwagua lídantima dan le? Ariñaga lumuti apostolu Pábulu tidan gárada to labürüdüboun houn ebüréugu: “Lunti giñe wáfaagun [lun] wíderaguniña wíbirigu lun hínsiñehabu hamá, luma lun hadügüni le buídubei. Wagía afiñetiña, moun lumuti wafalaruni hénpulu hani ha héchubaña lun midin hamá lidan wadamuridagun, lubaragiñe lira, ru wamá gurasu houn wíbirigu, guentotima lau ariha wamani luagu yarafaali lan luéyuri Wabureme” (Ebü. 10:24, 25). Séingürügaali meha irumu lun lásügürün lubaragiñe harihini kristiánugu hagía layarafadun luéyuri Heowá luagun Herusalén. Híchuguba meha fe danme le lagunfuliruña lan profesía le líchugubei Hesusu libügürü liseinin lagünrichawagun Herusalén ani lidaanihalime hanurahan ñéingiñe (Adü 2:19, 20; Luk. 21:20-22). Chülüti luéyuri Heowá ligía lidan irumu 70, dan le labeichagunbaliña Bungiu lílana Herusalén lau lígirun lun hagünrinchaguni rómana uburugu ligía.

2. Ka uagu lunti lubéi wéiritima lan wíchugun gurasu wóuniwagua uguñe weyu?

² Gíbetimahali resun wama uguñe weyu lun wafiñerun luagu yarafaali lan luéyuri Heowá, leme lunbei wéiribei lan ani hanarime ligía (Hoe. 2:11). Lagunfuliruña dimurei le lariñagubei Sofoníasi uguñe weyu: “Yarafaali  lanarime luéyuri Wabureme! Yarafaali, furesegueina liña liabin!” (Sof. 1:14). Ligía lariñagunbei Pábulu woun lunti lan wáfaagun lun “wíderaguniña wíbirigu lun hínsiñehabu hamá, luma lun hadügüni le buídubei” (Ebü. 10:24). Ligía lunti lubéi wéiritima lan wetenirun lun ligaburi hasandiragun wíbirigu houngua gayara láamuga wíchugun gurasu houn danme le hemegeiruni.

3. Ka larufudubei apostolu Pábulu libügürü leresibirúniwa gurasu? (Ariha huméi dibuhu le lídanbei lagumeseha arütíkulu).

³ Ariñagatu Bíbülia: “Hírugüda lumuti idiheri gürigia; anhein dimurei buiti, gúndaaguagüda lumuti” (Ari. 12:25). Susereti lira woun súngubei. Chülüti dan lun wemegeirun lariñawagún dimurei le gíchigaditi gurasu woun. Arufudati meha Pábulu íbini lan ha íchugubaña gurasu chülüti dan lun hemegeirun heresibirun gurasu. Abürühati houn kristiánugu ha meha awinwandubaña uburugu Roma: “Busentina narihinün lun nafanreinhan abinirúnimeme le líchugubei lani Bungiu [s]ífiri nun, lúntima héredun lidan hafiñen; lun giñe wíchugun gurasu wóuniwagua lau afiñeni le wawagubei” (Rom. 1:11, 12). Ítara liña, íbini meha apostolu Pábulu le gíchigadibei gurasu houn amu chülüti dan lun lemegeirun leresibirun gurasu (aliiha huméi Rómana 15:30-32).

4, 5. Kátaña mégeibaña heresibirun gurasu uguñe weyu, ani ka uagu?

⁴ Añahein saragu íbirigu ha adügaaña óunwenbu burí áfaaguni lun gayara lan heseriwidun lun Heowá lidan dan dayarüti. Kéiburi kristiánugu úaraguatiña ha eseriwidubaña kei prekursorugu, misionerugu, óunigirutiña sirkuitu tuma hani weiriou, íbirigu ha eseriwidubaña Betelirugu o tidan burí áfisi to ñein lubéi lásügürawagüda lidoun amu burí iñeñein. Gadünatiña sun íbirigu ha lun lariñawagún houn buidu lan hadüga, ani ligía lunbei wadügüni. Añahein íbirigu ha meha eseriwidubaña lidan dan dayarüti ani guentó siñaali hadügüni, wéiriti giñe eteingiruni le hasandirubei íbirigu ha dan le lariñawagún dimurei burí le ruti gurasu houn.

⁵ Ka amu íbirigu mégeibaña heresibirun gurasu? Wügüriña hama würiña ha mamarieidungiñabaña ladüga busén hamá gaganbadi hamá lun gumadi tídangiñeti Bíbülia luáguti hámarügübei lan Gefentiña háledi hamarieida (1 Ko. 7:39). Mégeitu giñe würi maríeitu lun lariñaguni tani weiriei tun weiri lan tínsiñe lun ani gebegi lan sun áfaaguni le tadügübei lun (Ari. 31:28, 31). Moun lumuti giñe wabulieiduni wíchugun gurasu houn kristiánugu ha akipurubaña úaraguni lun Heowá lau sun hagagibudaguña lan luma sandi o luma éibaahouni (2 Tesa. 1:3-5). Ruti Heowá luma Hesukrístu dǘgüdaguaü houn sun íbirigu úaraguatiña ha (aliiha huméi 2 Tesalónikana 2:16, 17).

6. Ka wadagimanu ichugúbei houn wéiyaaña lidan afiñeni según Isaíasi 32:1, 2?

⁶ (Aliiha huméi Isaíasi 32:1, 2). Kei wawinwanduña lubéi lidan dan hénrenguti, gayaraati wabuinchun lau íruni o maguraasuni lau lumenrengun. Ligíati, lun weresibirun gurasu luma adundehani, yusu lumutiña Hesukrístu líbirigu kristiánugu ha anuadirúaaña hama wéiyaaña lidan afiñeni hameme únbaña tagúara Bíbülia “gumadimatiña”. Hádangiñetiña amu mudún wéiyaaña úaraguatiña ha. Rúati wadagimanu le houn lun hídehan “lúntima laganwoundun” hagundan hábirigu, mama lun hariñagun houn: “Anihánba hafiñera”. Sun hagía, busentiña híderaguniwa lun gunda wamá luma lun úaraguameme wamá lun Heowá (2 Ko. 1:24).

7, 8. Ka amu katei lunbei hadügüni wéiyaaña lidan afiñeni?

⁷ Ruti apostolu Pábulu aban buiti hénpulu houn wéiyaaña lidan afiñeni. Abürühati meha houn kristiánugu ha éibaahoubaña Tesalónika: “Wéiriti hínsiñe woun darí lun mámarügüñein lan hamuga luganute Bungiu wabusenra wíchugun hun, busentiwa hamuga wíchuguni wabagari guánarügü hun, le lueirin hínsiñe woun” (1 Tesa. 2:8).

⁸ Arufuda lumuti Pábulu anihein lan dan ua lan buídurügü lan wariñagun dimurei le ruti dǘgüdaguaü. Ariñagati houn wéiyaaña lidan afiñeni ha meha uburugubaña Éfesu: “Súnwandan  narufudahan hun luagu ítara liña lan luadigimaríniwa lun híderawagun ha aniheinbei hemegeirun, luagu giñe lunti lan laritawagún luagu dimurei le lariñagubei Wabureme Hesusu dan le lariñagunbei: ‘Fuleseiwatimati [o gúndaatimati] le íchugubei sügǘ lau le eresibirubei’” (Adü 20:35). Magufurumadunti meha Pábulu láurügü líchugun gurasu houn líbirigu, busenti meha ladügün lóugiñe lira. Ariñagati: “Newesirubei le númabei lau ugundani huagu, ani íbini nuguya guánarügü newesiraguba nungua luagu hufulesein” (2 Ko. 12:15). Ítarameme, moun lumuti giñe hagufurumadun wéiyaaña lidan afiñeni láurügü hariñagun dimurei lánina gurasu luma dǘgüdaguaü houn hábirigu, lunti giñe híchugun dǘgüdaguaü houn lau harufuduni houn luagu berese hamá hau tídangiñe sun hanigi (1 Ko. 14:3).

9. Kaba íderaguaña wéiyaaña lidan afiñeni lun hererehan lidan aban igaburi le ruti dǘgüdaguaü?

⁹ Anihein dan mosu lan hererehan wéiyaaña lidan afiñeni houn hábirigu o híchugun adundehani houn lun gayara lan híchugun iderebugu houn. Anhein busén habéi wéiyaaña lidan afiñeni hadügüni lira lidan aban igaburi le ruti dǘgüdaguaü, mosu haritaguni le tarufudahabei Bíbülia. Lárigiñebei meha lounwen Hesusu ani águyugua ligía, chülüti dan lun hemegeirun lílana saragu lídangiñe damuriguaü le meha lídanbei Liraüraü Asia lun lererehan houn, ani ruti Hesusu aban lubuidun hénpulu lau ligaburi ladügüni. Ariñaga lumuti houn lílana damuriguaü le Éfesubei, le Pérügamubei luma le Tiatirabei furumiñe ka lan buiti hadügübei lubaragiñe lererehan houn (Aruf. 2:1-5, 12, 13, 18, 19). Ariñagati houn lílana damuriguaü le Laodiséabei: “Ébecha numutiña ha hínsiñebaña nun lau iderei, arufudaha au houn. Lunti lubeiti seriu humá, asaküriha huguyame” (Aruf. 3:19). Chóuruti buídubei lan lidin houn wéiyaaña lidan afiñeni anhein háyeiha Kristu dan le hererehan houn hábirigu.

10. Ka gayaraabei ladügüni kada aban wádangiñe lun wíchugun gurasu wóuniwagua?

¹⁰ Añahein giñe amu lílana damuriguaü, bóugudin hawéi wéiyaaña lidan afiñeni, ha gayaraati híchugun gurasu houn amu. Ariñagati Pábulu woun súngubei lun wadimurehan “dimurei buiti, le íderagutiña ha híbiri lidan hafiñen” (Efe. 4:29). Ligía mosu lubéi wetenirun lun ligaburi hasandiragun wíbirigu houngua lun wasubudiruni anhein anihein lubéi hemegeirun. Ariñagati meha Pábulu houn  kristiánugu ebüréugu: “Ru humá lubeiti iseri erei lun harüna le buchaalibei uagu lárigi asufuriruni, luma lun burí higachürügü le débilihalibei; ani áluaha huméi üma le surubei lun hugudi, lun máluguchagun lan ugudi le damadamabei, lubaragiñe lira lun areidaguarügü lan” (Ebü. 12:12, 13). Ligíati, súngubei wagía, íbini nibureintiña, gayaraati wariñagun dimurei le ruti dǘgüdaguaü houn amu.

11. Ka ídemuei teresibirubei aban íbiri to meha lauboun saragu íruni?

¹¹ Luagu aban dan, aba ladagarun saragu íruni tuagu aban wábiri gíritu Marta. * Abürühatu: “Aban weyu, lárigiñe namuriaha ídemuei luma Heowá lidan furíei, aba nadunragun tuma aban íbiri derebuguharu to arufuduboun ínsiñehabuni nun luma gunfurandaü le nemegeirubei oura ligía. Abahüdagua tumuti giñe nun winwan tan meha aban sügǘ libe le ídangiñebei násügüra, ábati maweirinhali lan nasandiragun nungua nábugua”. Másiñati míchugun tan íbiri derebuguharu tuguya fe weiri lan ídemuei le tíchugubei tun Marta lau dimurei burí le tariñagubei tun.

12, 13. Ida luba wafalaruni adundehani le lídanbei Filipuna 2:1-4?

¹² Ru lumuti Pábulu adundehani le houn sun lílana damuriguaü le Filipubei: “Ánheinti rúhali lubéi Kristu ubafu hun lun híchugun gurasu, anhein íderagua lubalün línsiñehabu lun híchugun dǘgüdaguaü houn amu, anhein gafanran hubéi súngubei lidan ábanmeme [s]ífiri, anhein anihein lubéi gudemehabu tidan hanigi, gúndaaguagüda humana lau haganóun lidan úarani luma ínsiñehabuni húmawagua, óundarañu lau ábanmeme [s]ífiri luma ábanmeme saminaü. Madüga humá ni kata huouguarügü lun hanügǘniwa weiri, ni lau pantaü; lubaragiñe lira lau lan ǘnabuguni, ani buidulá hanügüniña amu gürigia huéi guánarügü. Mámarügüla katei le buídubei hun háluaha, áluaha huméi giñe le buídubei houn amu” (Fili. 2:1-4).

¹³ Furendeitiwa lídangiñe bérusu burí le lunti lan wáfaagun lun wáluahani le buídubei houn amu lau wíchugun gurasu houn wíbirigu, warufudun ínsiñehabuni houn, waganóun lidan úarani hama, óusera wamañame lau gudemehabu.

14. Ka katei gayaraabei líchugun saragu dǘgüdaguaü?

¹⁴ Wéiriti ugundani le wasandirubei dan le wíchugun fe añahagua lan gürigia ha meha wíderagubaña eseriwida lun Heowá. Susereti woun kei meha lun apostolu Huan, le abürühabalin dimurei le: “Úati amu katei agundaaraguagüdütina keisi [...] naganbun luagu habagariduña lan nirahüñü úaragua luma inarüni” (3 Huan 4). Arufuda hamaali saragu prekursorugu luagu inarüni lan dimurei burí le lugundun ibihaaña dǘgüdaguaü dan le híchugun fe anihagua lan somu gürigia le meha unbei híchiga aturiahani tídangiñeti Bíbülia eseriwida lau úaraguni lun Heowá o íbini leseriwiduña lan kei prekursoru. Ligíati, gayaraati wíchugun dǘgüdaguaü lun aban prekursoru le féridi láalibei luguraasun, láurügü wadügün lun laritaguni sun le adüga láalibei hawagu amu.

15. Írida humá aban lídangiñe katei le gayaraabei ladügǘniwa lun líchuguniwa dǘgüdaguaü houn íbirigu ha eseriwidubaña lau úaraguni lun Heowá.

¹⁵ Ariñagaaña saragu óunigirutiña sirkuitu buidu lan hasandiragun houngua, dandu hagía kei hani weiriou, dan le lóunahan somu íbiri aban tiraüraü gárada houn eteingiraña luagu hachülürün bisidei damuriguaü le ñein lubéi. Gayaraati giñe lariñawagún ligiaméme hawagu wéiyaaña lidan afiñeni, misionerugu, prekursorugu hama íbirigu ha eseriwidubaña Betelirugu ha únbaña wíchiga aban óunwenbu eteingiruni luagu eseriwiduni le híchugubei lau úaraguni.

16. Mégeiwati san saragu katei lun lichugún gurasu? Afuranguagüda huméi.

¹⁶ Anhein lougua wabéi luma yanu, moun lumuti ladügün lira lun wasaminarun siñá lan wíchugun gurasu houn amu. Le linarün katei, mama katei hénrenguti lira. Gayaraati wíchugun gurasu lun aban íbiri láurügü wáhayachun lau ínsiñehabuni luagun dan le wabusuragun lun. Anhein máhayachun  wawagun, másiñati ladüga lan anihein lan somu turobuli lidan libagari ani mégeiti ladimurehan luma amu gürigia. Háfuga wíderagubei lan lun lasandiragun lungua buidu láurügü waganbuni (Sant. 1:19).

17. Ka ídemuei leresibirubei aban íbiri nibureinti?

¹⁷ Ariha waméi le asuseredubei lun aban nibureinti gíriti Henri. Wéiriti meha íruni le lasandirubei ladüga habugún saragu hádangiñe liduheñu lídangiñe damuriguaü, lúguchi haganagua, lau sun meha aban lan wéiyaali lidan afiñeni le inebewati saragu. Aba lariñagun aban óunigiruti sirkuitu lun Henri lun houdin ata gafe tidan aban éigagülei, ábati laganbuni íbiri ligía le lariñagubei Henri lun sun aniha lan abahüdaguei ligarigu lun. Aba líchugun Henri fe ánheingubeirügü akipura úaraguni lun Heowá ligíarügübei gayara lan líderaguniña liduheñu lun hagiribudun lun Heowá. Sanditi giñe Henri awalidaguni lárigiñebei laliihani Sálumu 46, Sofoníasi 3:17 luma Márükosu 10:29, 30.

18. a) Ka lariñagubei urúei Salomón? b) Ka adundehani líchugubei apostolu Pábulu?

¹⁸ Ka wafurendeirubei lídangiñe le asuseredubei lun Henri luma tun Marta, to buga uáguboun layanuhóua lidan párafu 11? Sun lan wagía gayaraati wíchugun gurasu houn ha emegeirubalin. Abürühati urúei Salomón: “Ma lubuidun dan le ladarirúniwa óunabagülei le richabei; dan létima liabin lidan dan!”. Ariñagati giñe: “Gúndaaguagüda lumutu áhayachuni lanigi gürigia; ruti uganu buiti iseri erei” (Ari. 15:23, 30). Ka gayaraabei wadügüni ánhawa ariha hiru lan somu gürigia? Gayaraati waliihanu Garüdia Awisahatu lun o somu ariñahani lídangiñeti wani páhina lidan Internet. Ariñagati Pábulu: “Heremuha luagu luéirigun Bungiu lau eteingiruni lun tidan hanigi lau sálumu luma burí uremu” (Kol. 3:16; Adü 16:25). Kei aubei warihei, gayaraati giñe ladügün weremuhan uremu lun walawahani Heowá lun labuidurun wasandiragun woungua.

19. Ka uagu súdinitima lubéi wíchugun gurasu wóuniwagua eibu lásügürün dan, ani ka lunbei wadügüni?

¹⁹ Éibume ayarafadeina lan luéyuri Heowá, súdinitimabei lun wíchugun gurasu wóuniwagua (Ebü. 10:25). Ligía lunti lubéi gaganbadi wamá lun adundehani le líchugubei apostolu Pábulu: “Ligía rúmeme humá lubéi gurasu luma erei húniwagua ítara kei hadügüni guentó” (1 Tesa. 5:11).