1. Heburu minw tun kɛra kerecɛnw ye, mun na ciden Pol ko u ka ɲɔgɔn jija sisan ka tɛmɛ sanga ni wagati bɛɛ kan?

HEBURU minw tun kɛra kerecɛnw ye, ciden Pol ye ladili dɔ di olu ma saan kɛmɛkulu fɔlɔ la. A ko: “An ka jija ka ɲɔgɔn dɛmɛ ka kanuya sira taama, ka koɲuman kɛ. An kana ban ka taga an ka ɲɔgɔnlajɛnyɔrɔ la, i n’a fɔ dɔw be to k’a kɛ cogo min na. Nga an ka ɲɔgɔn jaa gwɛlɛya [‘sisan ka tɛmɛ sanga ni wagati bɛɛ kan,’ NW] bari aw yɛrɛ ɲaa b’a la ko Matigi ka loon surunyana ka ban.” (Eburuw 10:24, 25). N’a sɔrɔ balimaw tun b’u yɛrɛ ɲiningara fɛɛn min kama Pol ko u ka ɲɔgɔn jija sisan ka tɛmɛ sanga ni wagati bɛɛ kan. Saan 5 ɲɔgɔn o kɔ, u y’o faamu. U y’a faamu ko Jehova tun ko a bena kiti min tigɛ Zeruzalɛmu kan, o loon surunyana. U y’a faamu fana ko u tun ka ɲi ka boli ka bɔ Zeruzalɛmu i ko Yezu tun y’a fɔ u ye cogo min na (Kɛw. 2:19, 20; Luka 21:20-22). Jehova ka loon sera saan 70 K.T.L., tuma min na Ɔrɔmukaw ye Zeruzalɛmu halaki.

2. Mun na an ka ɲi ka ɲɔgɔn jija kosɔbɛ bi?

 ² Jehova “ka loon ye lonba ye, siranyalon lo.” An lanin b’a la fana bi k’o loon surunyana (Zowɛli 2:11). Kira Sofoni ko: “A surunyana, Masaba ka lonba surunyana! A be nana ni karama ye!” (Sof. 1:14). O kiraya kuma ɲɛsinna an ka wagati ma fana. Komi o loon surunyana, Pol ko “an ka jija ka ɲɔgɔn dɛmɛ ka kanuya sira taama, ka koɲuman kɛ.” (Eburuw 10:24). O kɔrɔ, an ka ɲi k’an janto an balimaw na kosɔbɛ walisa ka se k’u jija n’u mako be jijali la.

3. Ciden Pol ye mun lo fɔ jijali koo la? (Jaa lajɛ, barokun daminɛ na.)

³ “Haminako be mɔgɔ barika ban. Nga kumaɲuman be mɔgɔ nisɔn diya.” (Talenw 12:25). An bɛɛ mako be jijali la tuma dɔw la. Pol y’a yira ka gwɛ ko hali minw ka kunkanbaara lo ka tɔɔw jija, olu yɛrɛ mako be jijali la fana. A balima minw be Ɔrɔmu, a ye bataki ci olu ma k’a fɔ u ye ko: “Ne b’a fɛ kosɔbɛ k’aw ye, ka Nii Senuman ka seko dɔ fɔ aw ye waasa aw ka se ka fanga sɔrɔ, walima, ka ɲɔgɔn jaa gwɛlɛya an jigi barika la.” (Ɔrɔm. 1:11, 12). Tiɲɛn na, Pol min tun be mɔgɔw jija koɲuman, ale fana mako tun b’a la u k’ale jija tuma dɔw la.—Ɔrɔmukaw 15:30-32 kalan.

4, 5. An be se ka jɔn ni jɔn lo jija bi? Mun na do?

⁴ Bi, minw be kudayi cidenya baara la i n’a fɔ piyɔniye kantigiw, olu mako be jijali la. U ye fɛɛn caaman saraka walisa ka se k’o baara kɛ. O kelen lo ni misɔndenw, kafokulu kɔrɔsibagaw n’u musow ani minw be baara kɛ Betɛliw la wala an ka sɛbɛw bayɛlɛma birow kɔnɔ. Olu bɛɛ ye fɛɛn caaman saraka walisa ka se ka wagati caaman kɛ Jehova ka baara la. U bɛɛ ka kan ni jijali ye. Mɔgɔ caaman ye kudayi cidenya baara dabila sabu u bolomako tɛ. N’an b’olu fana jija, a ka di u ye.

⁵ Bibulu b’a fɔ ko an ka furu mɔgɔ ma “min lara Krista la.” Balimacɛw ani balimamuso minw ma furu sabu u b’a fɛ k’o cikan sira tagama, olu fana ka kan ni tandoli ye (1 Kor. 7:39). O cogo kelen na, ni cɛɛ b’a fɔ a muso ye ko a koo ka di ale ye ani ko a b’a waleɲuman lɔn a ka baaraw kosɔn, o b’a muso jija kosɔbɛ (Talenw 31:28, 31). Kerecɛn dɔw fana be kantigiya kɛ Jehova ye kɔrɔbɔli ni bana bɛɛ n’a ta. An ka ɲi k’olu fana jija (2 Tes. 1:3-5). Jehova ni Yezu Krista b’o mɔgɔ kantigiw bɛɛ jija.—2 Tesalonikaw 2:16, 17 kalan.

6. Ka kɛɲɛ ni Ezayi 32:1, 2 ye, diinan mɔgɔkɔrɔw ka baara ye mun lo ye?

⁶ Ezayi 32:1, 2 kalan. An be wagati gwɛlɛw na. O kama, an dusu ka teli ka tiɲɛ ani an fari ka teli ka faga. Yezu Krista be tɛmɛ a balima kerecɛn mɔlenw ani “kuntigiw,” o kɔrɔ ɲɛminɛbagaw fɛ k’an jija. O ɲɛminɛbagaw ye diinan mɔgɔkɔrɔw ye minw ka jigiya ye ka ɲɛnamaya kɛ dugukolo kan. U tɛ ‘koo dɔ wajibiya an kunna lanaya faan fɛ.’ Nka, u ye an baarakɛɲɔgɔnw lo ye.—2 Kor. 1:24.

7, 8. Ka fara jijali kumaw kan, diinan mɔgɔkɔrɔw be se ka tɔɔw jija cogo di?

⁷ Diinan mɔgɔkɔrɔw be se ka ciden Pol ladegi. Ale tun b’a seko kɛ tuma bɛɛ k’a balimaw jija. Tesaloniki kerecɛnw tun be tɔɔrɔla ani a ye bataki sɛbɛ u ma. A ko: “Aw ka koo tun ka gwɛlɛ an ma kosɔbɛ, o le y’a to, an tun labɛnnin lo ka Ala ka kibaru diman fɔ aw ye, hali k’an yɛrɛ nii  di aw kosɔn. Bari aw koo tun b’an dusu la kosɔbɛ.”—1 Tes. 2:8.

⁸ Pol y’a yira ko ka mɔgɔ jija kumaw dama fɛ, o tɛ bɔri kɛ. A y’a fɔ Efɛzi kafo ka diinan mɔgɔkɔrɔw ye ko: “Aw . . . ka dɛsɛbagatɔw dɛmɛ. O la, an hakili be to Matigi Yezu yɛrɛ ka dalakuma nin na ko: ‘Nisɔndiya be mɔgɔ sɔnni na ka tɛmɛ sɔrɔli kan.’” (Kɛw. 20:35). Pol sɔnna k’a “bololafɛnw” di a balimaw kosɔn, ka tila ‘k’a yɛrɛ di k’u dɛmɛ.’ A y’a yira a ka kɛwalew fɛ ko a b’a fɛ k’a seko kɛ k’u dɛmɛ (2 Kor. 12:15). O cogo kelen na, diinan mɔgɔkɔrɔw man kan k’u balimaw jija ni kumaw ye dɔrɔn, nka u ka ɲi k’u mako don u la sɔbɛ la.—1 Kor. 14:3.

9. Diinan mɔgɔkɔrɔw be se ka ladili di cogo di walisa ka mɔgɔw jija?

⁹ Walisa ka balimaw jija, tuma dɔw la, diinan mɔgɔkɔrɔw ka ɲi k’u ladi. U be se ka ladili dicogo ɲumanw sɔrɔ Bibulu kɔnɔ. Yezu suu kununin kɔ, a ye ɲɛyirali ɲuman di o koo la. A tun be ni ladili barikaman dɔw ye k’a di kafo dɔw ma Azi mara la. A kɔrɔsi a y’o kɛ cogo min na. A kɔnna ka Efɛzi, Pɛrigamu ani Tiyatiri kafow tando u ka kɛwale ɲumanw kosɔn (Yir. 2:1-5, 12, 13, 18, 19). Yezu y’a fɔ Lawodise kafo ye ko: “Minw koo ka di ne ye, ne be olu ladi k’u kolo. Ayiwa, aw ye jija, ka nimisa ka faran aw ka kojugu la.” (Yir. 3:19). Diinan mɔgɔkɔrɔw b’u jija ka Yezu ladegi n’u be mɔgɔw ladira.

10. An kelen kelen bɛɛ be se ka ɲɔgɔn jija cogo di?

¹⁰ Diinan mɔgɔkɔrɔw dɔrɔn lo man kan ka tɔɔw jija. Ciden Pol ye kerecɛnw bɛɛ jija k’u ka kuma ɲuman fɔ “min be se k’a mɛnbagaw dɛmɛ ani k’u mako ɲa.” (Efɛz. 4:29). An kelen kelen bɛɛ ka ɲi ka miiri k’a filɛ an be se ka min kɛ walisa ka tɔɔw dɛmɛ. Yahutu minw tun ye kerecɛnw ye, Pol y’olu ladi ko:  “Aw k’aw bolo faganin nunu kɔrɔta, aw seen minw be yɛrɛyɛrɛ, k’o lɔ ka ɲa, ka siratilennin tagama, o la, minw seen kelen ma ɲi, u seen kana mugu, nga a ka suma.” (Eburuw 12:12, 13). Tiɲɛn na, an kelen kelen bɛɛ be se ka ɲɔgɔn jija an ka kumaw fɛ, hali denmisɛnw yɛrɛ.

11. Mun lo ye Marthe dɛmɛ tuma min na hakiliɲagami bana tun b’a la?

¹¹ Hakiliɲagami bana tun be balimamuso Marthe * la. A y’a sɛbɛ ko: “Loon dɔ, n’ ye delili kɛ ko Ala ka barika don n’ na. O loon yɛrɛ la, n’ ye balimamuso dɔ kunbɛn min kɔrɔla. A y’a mako don n’ na ani k’a janto n’ na. N’ mako tun b’o lo la tigitigi o wagati la. O koo ɲɔgɔn tun y’o balimamuso sɔrɔ ani a y’o lakali n’ ye. O kama, n’ tun t’a miiri ko n’ be n’ kelen na.” O balimamuso ka kumaw ye Marthe dɛmɛ cogo min na, n’a sɔrɔ ale yɛrɛ t’o kala ma!

12, 13. An be se ka Filipikaw 2:1-4 ka ladiliw sira tagama koɲuman cogo di?

¹² Pol ye ladili di Filipi kafodenw bɛɛ ma ko: “Ni jigitugu be sɔrɔ Krista fɛ, ni jagwɛlɛya be sɔrɔ a ka kanuya la, ni jɛnɲɔgɔnya be aw ni Nii Senuman cɛ, ni ɲumanya ni hinɛ be sɔrɔ a la, aw k’aw ka miiriya kɛ kelen ye kanuya la, ani k’aw kɔnɔ kɛ kelen ye ka bɛn koo bɛɛ la, o la, ne ka nisɔndiya be taga ɲa kosɔbɛ. Aw kana foyi kɛ ni kɔnɔnajuguya ye, ani yɛrɛboɲa ye, nga aw k’aw yɛrɛ majigi k’aw tɔɲɔgɔn filɛ ko a ka fisa n’aw ye. Aw la, mɔgɔ si kana miiri a yɛrɛ la dɔrɔn, aw ka miiri aw tɔɲɔgɔn na fana.”—Filip. 2:1-4.

¹³ An kelen kelen bɛɛ ka ɲi ka sababuw ɲini ka tɔɔw dɛmɛ. Walisa k’an balimaw jija, an be se k’u dusu saalo ni kanuya ye, k’an janto u la, k’u kanu ani ka makari u la.

14. An be se ka mɔgɔw jija cogo di?

¹⁴ Ninsɔndiya lo k’a mɛn ko an ye mɔgɔ minw dɛmɛ ka kɔrɔ, olu bele be kantigiya kɛra Jehova ye. Ciden Zan y’a sɛbɛ ko: “Ni ne y’a mɛn ko n deenw tagamacogo bɛnnin lo ni Ala ka tiɲɛ ye, o le ka di n ye ka tɛmɛ fɛɛn bɛɛ kan.” (3 Zan 4). Piyɔniye caaman ko olu dusu diyara kosɔbɛ k’a mɛn ko u ye mɔgɔ minw dɛmɛ ka tiɲɛn lɔn a mɛɛnna, u caaman bele be tiɲɛn sira kan ani dɔw yɛrɛ ye piyɔniyew ye. O la, ni piyɔniye dɔw fari fagara, an be se k’u hakili jigi u ye koo ɲuman minw kɛ ka tɔɔw dɛmɛ.

15. Mɔgɔ minw be baara kɛra Jehova ye kantigiya la, an be se k’olu jija cogo di?

¹⁵ Balima dɔw ye lɛtɛrɛw sɛbɛ ka kafokulu kɔrɔsibagaw n’u musow waleɲuman lɔn sabu u nana bɔ u ka kafo ye. Kafokulu kɔrɔsibaga caaman ko o lɛtɛrɛ ɲɔgɔnw b’olu n’u musow jija kosɔbɛ. An ka ɲi ka diinan mɔgɔkɔrɔw, misɔndenw, piyɔniyew ani betɛlidenw jija fana sabu u be baara kɛra Jehova ye ni kantigiya ye.

16. Fɛɛn fitinin juman lo be se ka mɔgɔ jija?

¹⁶ Nka, n’a ka gwɛlɛ i ma k’a fɔ tɔɔw ye i be min miiri u koo la do? A lɔn ko a man gwɛlɛ kojugu ka tɔɔw jija. Walisa k’o kɛ, a daminɛ ka yɛlɛmisɛn kɛ n’a tigi ye. N’a tigi ma yɛlɛmisɛn kɛ, o kɔrɔ ko koo dɔ lo be yen ani a mako b’a la ka kuma ni mɔgɔ dɔ ye o koo la. N’o lo, i be se k’a tigi lamɛn. O dama be se k’a dusu saalo.—Zaki 1:19.

17. Mun lo ye balimacɛ dɔ jija?

¹⁷ Balimacɛ dɔ tɔgɔ ko Henri. Tuma  min na a facɛ n’a somɔgɔ dɔw ye Jehova batoli dabila, a dusu kasira kosɔbɛ. A facɛ tun ye diinan mɔgɔkɔrɔ ye ka kɔrɔ. Kafokulu kɔrɔsibaga dɔ y’a kɔrɔsi ko Henri dusu tun man di ani a ko u ka taga kafe min. Henri y’a kɔnɔkow fɔ a ye ani a y’a lamɛn koɲuman. O ye Henri jija yɛrɛ le! A y’a faamu ko n’a b’a fɛ k’a somɔgɔw dɛmɛ ka kɔsegi Jehova ma, a ka ɲi ka to kantigiya la. A ye vɛrise nunu kalan ani o y’a dusu saalo kosɔbɛ: Zaburuw 46; Sofoni 3:17 ani Mariki 10:29, 30.

18. a) Masacɛ Solomani ye mun lo sɛbɛ jijali koo la? b) Ciden Pol ye ladili juman lo di an ma?

¹⁸ Marthe ni Henri ka koo b’a yira ko an balima minw mako be dususalo la, an be se k’olu jija. Masacɛ Solomani y’a sɛbɛ ko: “N’i ka fɔta fɔwaati ɲana, o ka ɲi dɛ! Dusudiyamɔgɔ filɛlikɛcogo be mɔgɔ dusu diya. Kibaru diman mɛnni be barika don mɔgɔ la.” (Talenw 15:23, 30). Yala i be mɔgɔ dɔ lɔn min dusu tiɲɛnin lo wala a fari faganin lo wa? I be se ka barokun dɔw kalan Kɔrɔsili Sangaso kɔnɔ wala an ka site web kan walisa k’o tigi jija. Pol y’a yira ko n’an be Masaya dɔnkiliw la n’an balimaw ye, o be se k’an dusu saalo. A ko: “Aw ka ɲɔgɔn kalan ani ka ɲɔgɔn [jija, NW] ni hakilitigiya bɛɛ ye. Aw ka Ala tanu ka barika la a ye ni dɔnkiliw ye minw be sɔrɔ Ala ka kuma kɔnɔ, ani dɔnkili wɛrɛw, ni dɔnkili minw be sɔrɔ Nii Senuman barika la.”—Kɔlɔs. 3:16; Kɛw. 16:25.

19. Mun na an mako b’a la kosɔbɛ ka to ka ɲɔgɔn jija? An be se k’o kɛ cogo di?

¹⁹ Komi Jehova ka loon “surunyana,” an mako b’a la kosɔbɛ ka to ka ɲɔgɔn jija bɛrɛbɛrɛ (Eburuw 10:25). Pol ka wagati la, a y’a fɔ a kerecɛnɲɔgɔnw ye ko: “Aw ka ɲɔgɔn jija ka dɔ fara ɲɔgɔn barika kan, i ko aw b’a kɛ cogo min na ka ban.”—1 Tes. 5:11, ABM.