1. ¿Nitre kristiano hebreo rabadre ja dimike bäri kwärikwäri ye ñobätä Pablokwe niebare ietre?

KÄ NENGWANE, bäri ni rabadre kukwe kwin niere jai ja dimikakäre kwärikwäri. ¿Ñobätä? Apóstol Pablo tärä tikani nitre hebreo ie yete kukwe ne niebare kwe: “Ari ja kite ja tarere kwärikwäri amne sribi kuin nuene jakrä kwärikwäri. Mdakäre abko, nitre tödekaka Jesubti käta gätäre abko känti ni ruäre ñan tä kwen gätäbtä, ye kwrere nikwe ñan nuendre, akwa Jesukristo ni Dänkien jatadita abko köböi nükerate ja ken, ye gadre nikwe angwane, ari ja ükekrö bäri gätäbtä amne, ari ja die mike kwärikwäri näin gätäbtä” (Heb. 10:24, 25). Kä kwärike nikani ta ye bitikäre, nitre kristiano “köbö kri Jehovakwe” jatai nökrö ja ken Jerusalén ye tuai. Kukwe jatai nemen bare niebare Jesukwe ye ere nämäne nemen bare ye rabai gare ietre aune niaratre gitiadre juta yebätä mento (Hech. 2:19, 20; Luc. 21:20-22). Nitre romano käkwe juta Jerusalén ganinte kä 70 te ye ngwane, köbö kri Jehovakwe nükani.

2. ¿Ñobätä ni rabadre ja töi mike bäri ja dimikabätä kwärikwäri?

² Kä nengwane köbö Jehovakwe “kri aune ni töi mikakäre niä” ye nibira no ye niena gare nie (Joel 2:11). Aune kukwe nieta Sofonías 1:14  nekänti ye tä nemen bare kä nengwane: “Köbö kri Jehovakwe ye nibira ja ken. Köbö ye nibira nökrö bäri ja ken. Köbö Jehovakwe ye tare krubäte. Yete ni rükä käkwe ñäkäi ja dibiti”. Ye medenbätä, Pablo tä niere nie: “Ari ja kite ja tarere kwärikwäri amne sribi kuin nuene jakrä kwärikwäri” (Heb. 10:24). Ja mräkätre tätre ja di ribere yebätä nikwe ja töi mikadre ne kwe nikwe niaratre dimikadre arato.

3. ¿Kukwe niedre ja dimikakäre kwärikwäri yebätä Pablokwe dre niebare? (Üai bämikani kena mikadre ñärärä).

³ Biblia tä niere: “Ni tä töbike krubäte ye brukwä tä nemen ulire, akwa kukwe kwin nieta ye tä kä mike jutobätä” (Prov. 12:25). Aisete, kukwe kwin niedre ni dimikakäre ye ni jökrä tä ribere jai. Pablo mikani gare, nire tä kukwe kwin niere ni mada dimikakäre ni ye ie kukwe kwin niedre arato ye tä ribere jai. Nitre kristiano nämäne nüne Roma yei kukwe ne tikani kwe: “Ti tö mun tuai angwane, ti köböire Ngöbö Üai rabadre ja di bien munye, mun moto mikakäre nuäre amne mun mikakäre nüne bäri dite Ngöbökrä, abkokäre ti tö näin mun känti yete. [...] Munta tödeke Jesukristobti amne tita tödeke bti arato, yebti nikwe ja die mikadre abko ie ti tö” (Rom. 1:11, 12). Nibira gare nie erere, ruäre ngwane apóstol Pablo dimikadre ye nämäne ribere jai (ñäkädre Romanos 15:30-32 yebätä).

4, 5. ¿Nire nire ie kukwe kwin niedre dimikakäre kä nengwane aune ñobätä?

⁴ Ja mräkätre kwati tätre ja di ngwen krubäte sribikäre köbö täte Jehová kräke. Niaratre ye nitre prekursor, nitre misionero, nitre sribikä Betelte, nitre circuito tuabitikä aune muko kwetre aune ja mräkätre sribikä oficina kukwe kwitakäre yekänti. Niaratre jökrä ie ni rabadre kukwe kwin niere aune ye erere nikwe nuaindre. Ja mräkätre käkwe sribibare köbö täte Ngöbö kräke akwa kukwe madabätä ñaka niena nuainne yei kukwe kwin niedre arato.

⁵ ¿Nire nire mada ie kukwe kwin niedre dimikakäre? Ja mräkätre aune ja ngwaitre tä kaibe yei kukwe kwin niedre dimikakäre, ñobätä ñan aune “ni tödekaka Jesubti aibe ben” ja mäkädrete nieta ye niaratre tö mikai täte (1 Cor. 7:39). Meritre tö muko kwe tuai ja tarere krubäte aune tätre ja di ngwen ye mikadre tuin ütiäte kwe jai ie tö arato (Prov. 31:28, 31). Nitre kristiano rüere ja mikata o tätre bren, akwa yebiti ta tätre ja ngwen metre ye ñaka käi kwitadrekä jabiti arato (2 Tes. 1:3-5). Ja mräkätre ja ngwanka metre ye Jehová aune Jesús tä töi mike jäme (ñäkädre 2 Tesalonicenses 2:16, 17 yebätä).

6. ¿Sribi meden nuainta nitre umbre ji ngwanka yekwe nieta Isaías 32:1, 2 yekänti?

⁶ (Ñäkädre Isaías 32:1, 2 yebätä). * Nita nüne kä tare te, yebätä ja raba nemen ruin ulire o di nekä nie. Jesukristo tä ni dimike aune ni jie ngwen “nitre ji ngwanka” yebiti, ye abokän nitre dianinkä nänkäre kä kwinbiti aune nitre umbre ji ngwanka tä obeja mada ngätäite meden gärätä. Nitre umbre ji ngwanka ye ñaka tä “ja mike mun dänkiene” ñakare aune tätre kä mike “bäri nuäre munbtä”. Niaratre tö ni dimikai ne kwe kä tädre juto nibätä aune nikwe ja ngwandre metre (2 Cor. 1:24).

7, 8. Nitre umbre ji ngwanka tätre kukwe kwin niere ja mräkätre dimikakäre, ¿akwa rabadre dre nuainne mada?

⁷ Apóstol Pablo kukwe kwin bämikani ye erere nitre umbre ji ngwanka tätre ja ngwen. Nitre kristiano Tesalónica rüere ja mika nämäne yei kukwe ne tikani kwe: “Mun tare bäri kri nunkwe, aisete ñan nunkwe kukwe kuin Ngöbökwe aibe mikaba gare munye, amne nun töi ño ño abko käi rababa nuäre nunbtä mike gare jökrä munye, ñobtä ñan angwane mun tare kri nunkwe” (1 Tes. 2:8).

⁸ Pablo mikani gare, ruäre ngwane ñan kukwe  kwin niedi ye aibe käkwe nitre dimikai. Nitre umbre ji ngwanka juta Éfeso yei niebare kwe: “Ni mda mdakwe jändrän ñakare abko die mikadre [...]. Kukwe ne kwrere, btä ni Dänkien Jesu käkwe blitabare bati, [...] niebare krörö kwe: Nita jändrän bien ni mdaye, btä käta neme bäri nuäre nibtä ni jändrän kaka ngäbti ye ngwä” (Hech. 20:35). Pablo ñan nämäne juto biare kukwe kwin aibe niekäre ja mräkätre dimikakäre, ñakare aune kukwe mada nuainkäre bäri. Niebare kwe ietre: “Ja moto kuinbti ti tö jändrän tikwe gainte jökrä munkrä amne, ti ne ara jire bike ja gaente au mun kräke” (2 Cor. 12:15). Ye erere arato, nitre umbre ji ngwanka ñan rabadre kukwe kwin aibe niere ja mräkätre dimikakäre, ñakare aune rabadre kukwe mada nuainne arato. Yebiti bämikai kwetre niaratre töita bökän ja mräkätre yebätä (1 Cor. 14:3).

9. ¿Dre käkwe nitre umbre ji ngwanka dimikai mäträre töi jämebiti ja mräkätre yebätä?

⁹ Ruäre ngwane, nitre umbre ji ngwanka rabadre mäträre ja mräkätre yebätä dimikakäre. Niaratre tö nuaindi töi jämebiti ngwane, Biblia tä dre driere ye rabadre ngwen törö jai. Jesús murie ketani aune ganinkröta ye bitikäre, konkrekasion keta kabre Asia Menor yebätä mäträbare bökän kwe ye ngwane, kukwe kwin bämikani kwe. Konkrekasion Éfeso, Pérgamo aune Tiatira yebätä jämi mäträre ye känenkri, kukwe kwin niebare kwe töi jämebiti ietre (Apoc. 2:1-5, 12, 13, 18, 19). Aune konkrekasion Laodicea ie niebare kwe: “Nire nire tareta tikwe abko btä tita mäträre töi diankäre. Ne aisete, munkwe ja di mikata kri kärekäre nünakäre ja di ngöibti tikrä amne, munkwe kukwe käme kita jökrä temen amne munkwe ja mäkäta Ngöböbe amne tibe” (Apoc. 3:19). Nitre umbre ji ngwanka tätre mäträre nitre madabätä ye ngwane, tätre ja ngwen Kristo erere.

10. ¿Ni jökrä raba dre nuainne ja di mikakäre kwärikwäri?

¹⁰ Nitre umbre ji ngwanka ye ñan aibe rabadre kukwe kwin niere nitre mada dimikakäre. Nitre kristiano jökrä ie Pablokwe kukwe ne niebare: “Ni mda mda käkwe mun kukwei nuadre blite angwane, rabadre mate nuäre olote, käkwe die mikadre nüne bäri metre” (Efes. 4:29). Erametre, ni jökrä tädre juto biare ja mräkätre tätre dre ribere jai ye  dimikakäre. Nitre kristiano hebreo ie Pablokwe niebare: “Nire nire küde tä nebe dräre ie amne ngüreta nebe di ñakare ie, ye kwrere mun di kitera krüte ja tare nikabtä ne ngwane, ja di miketa munkwe amne, ji ükete kuin metre ja käne munkwe, ye köböire ni mda mda ngüre bren ie, kisete tä näin ni nakwente kwrere ye abko ngüre rabadreta kuin metre dikekä amne ñan di krütadre” (Heb. 12:12, 13). Monsotre bati raba kukwe kwin niere ja mräkätre dimikakäre arato.

11. ¿Meri Testiko iti nämäne töbike krubäte ye ngwane dimikani ño?

¹¹ Meri testiko kädekata Marthe * nämäne nemen töbike krubäte yebätä ani blite. Niarakwe tikani: “Bati, ti nämä ja di kärere Jehovai ye bitikäre, eteba iti käkwe ti dimikaba. Ti nämä dre ribere jai ye erere niarakwe nuainba ti kräke: niarakwe ja töi mikaba kwin ti kräke aune ti mikaba tuin bobre kwe jai. Niara ja tuani kukwe ye erere ben arato nieba kwe tie ye ngwane, ja ñaka rababa ruin kaibe tie”. Meri testiko käkwe kukwe niebare yekwe ja ngwai Marthe dimikani ye ñaka namani gare ie raba ruin nie.

12, 13. ¿Filipenses 2:1-4 tä kukwe niere ye ni raba mike ño täte?

¹² Nitre nämäne konkrekasion Filipos ye jökrä ie Pablokwe kukwe ne niebare: “Ti mräkätre, munta ketetibe Kristobe, aisete ja motota neme ruen nuäre nuäre munye amne, Ngöböta mun tarere, ye tä mun moto mike jäme. Erere arato, Ngöbö Üai tä munbtä abko tä mun mike ketetibe jökrä amne, mun ruentari tare Ngöböye amne Ngöböta ja moto mike jäme mun kräke abko gare tie. Ye mden kisete, munkwe kä mikadre bäri nuäre tibtä, abkokäre munkwe nüna krörö: Munkwe ja töi mika ja näre jökrä. Munkwe ja tare ruäre kwärikwäri. Munkwe nüna jäme jökrä jabe kwärikwäri. Erere arato, jändrän ketetibe btä munkwe töbika gwaire jökrä. Munkwe ñan jändrän nuen jire kaibe jakrä amne ja dikaikäre, akwa bika tidrä ni mda mdabtä amne ni mda mda mika bäri ütiäte jakrä. Mdakäre abko, munkwe ñan töbika jändrän kuinbtä kaibe jakrä akwa, munkwe töbika jändrän kuinbtä ni mda mdakrä arato” (Filip. 2:1-4).

¹³ Texto ye tä mike gare nie, ni jökrä käkwe ja di ngwandre ja töi mikakäre ja mräkätre dimike. Ni raba kukwe kwin niere ietre dimikakäre, tarere, ja töi mike ja kete bentre, ja töi mike kwin kräketre aune mike tuin bobre jai.

14. ¿Dre raba ni dimike krubäte?

¹⁴ Nikwe nire nire dimikani ye täbe sribire Jehová kräke ye tä kä mike juto krubäte nibätä. Apóstol Juan tikani: “Kukwe era metre Ngöbökwe tä nünamna nie, ye kwrere ti ngäbriänkätre tikwe Jesu käbti ma kwrere tä nüne abko tita gain angwane, bäri käta neme nuäre tibtä” (3 Juan 4). Nitre prekursor kwati krubäte tä mike gare, ja mräkätre ruäre niaratre tötikani ye täbe Jehová mike täte o tä sribi prekursor nuainne ye tä niaratre dimike krubäte. Aisete, nitre prekursor tä nemen di nekä ye ngwane niaratre nitre mada dimikani ye nikwe ngwandre törö ietre ye raba niaratre dimike.

15. Nitre tä sribire Jehová kräke ie kukwe kwin niedre ño dimikakäre ye mä raba niere keteiti.

¹⁵ Nitre circuito tuabitikä kwati krubäte aune muko kwetre ye tätre konkrekasion tuinbiti ye ngwane, ja mräkätre ruäre tätre kukwe tike debe biankäre ietre yebätä jata nemen ruin kwin ietre nieta kwetre. Nitre umbre ji ngwanka, nitre prekursor aune nitre sribikä Betelte tätre ja ngwen metre yebätä kukwe kwin nieta ietre ye tä mate kwin bätätre arato.

16. ¿Dre ribeta ni mada dimikakäre?

¹⁶ Ni ñaka blite krubäte o ni jakaire yebätä ni raba nemen nütüre ni ñan raba ni mada dimike. Akwa, ni jökrä raba ni mada dimike. Ñodre, nikwe köbö kwin niedre ja mräkä iti ie ngwane, nikwe kä mikadre kötare ja ngwärebätä. Ñaka kä mikadre kötare kwe jabätä ngwane, nane kukweta  kisete o tö blitai ni iti ben yebätä raba ruin nie. Nikwe niara kukwe nuadre jerekäbe ye raba dimike (Sant. 1:19).

17. ¿Ja mräkä Henri ye dimikani ño?

¹⁷ Ja mräkä bati kädekata Henri yebätä ani blite. Niara nämäne di nekä krubäte, ñobätä ñan aune niara mräkätre ruäre käkwe kukwe metre tuanimetre. Ñodre, niara rün nämäne sribire ni umbrere ye käkwe kukwe metre tuanimetre. Niara dimikakäre ni circuito tuabitikä käkwe nübaibare kabe ñain jabe aune nämäne blite ben ye ngwane kukwe nuani kwin kwe. Henri ie nükani gare, mräkätre jatadreta Jehová kokwäre yekäre rabadre ja ngwen metre Jehovai. Arato ñäkäbare kwe Salmo 46, Sofonías 3:17 aune Marcos 10:29, 30 (TNM) yebätä yekwe dimikani krubäte.

18. a) ¿Rei Salomón dre niebare? b) ¿Apóstol Pablo dre ribebare nuaindre?

¹⁸ ¿Henri aune Marthe yebätä kukwe namani bare ye tä dre driere nie? Nire nire tä ja di ribere ye ni jökrä raba dimike. Rei Salomón tikani: “Kukwe ribeta ye ngwane niedre, ¡ye kwin krubäte!”. Niebare kwe arato: “Ni okwä trä ngitiekä ye tä kä mike juto ni brukwäbätä; kukwe kwin mikata gare ye tä ni krä mike dite” (Prov. 15:23, 30). Nire tädre di nekä rabadre tuin nie ye ngwane, ¿nikwe dre nuaindre? Ni raba ñäke täräkwata Ni Mikaka Mokre yebätä ie o kukwe känene kräke Internet käi nikwe yete. Ne madakäre Pablo tikani: “Munkwe diri kwärikwäri jai, mäträ jabätä kwärikwäri [...]. Munkwe kanta Ji dokwäte kri ie, kanta Ngöbö Muriebiti, jondron täkärebiti, kise metare kwärä, ja brukwä kwinbiti” (Col. 3:16, NGT; Hech. 16:25). Nibira gare nie ye erere, nikwe kantiko kantaidre gwairebe ye raba ni dimike arato.

19. ¿Nikwe kukwe kwin niedre ja dimikakäre kwärikwäri ye ñobätä rabai bäri ütiäte aune nikwe dre nuaindre?

¹⁹ Köbö Jehovakwe ye jatai nökrö bäri ja ken ngwane, nikwe ja di mikadre kwärikwäri ye rabai ütiäte krubäte (Heb. 10:25). Ye medenbätä, apóstol Pablo kukwe niebare ne käre nikwe mikadre täte: “Munkwe ja moto mika nuäre kwärikwäri nünakäre dite ni Dänkien Jesukristo kräke amne, munkwe ja mika bäri dite nünakäre ni Dänkien Jesukristo kräke. Ye abko munta nuene, akwa nuen janknu munkwe” (1 Tes. 5:11).