1. Ngatta kinagi ni apostol Pablo ta ollu-siglo ira nga Hebreo nga Cristiano nga pasikannadda i nono na kataggi-tadday mas ngana taw nga tiempo?

NGATTA nakuan nga mas mappursigi ittam nga mamasikan ta nono? Niyawa ni apostol Pablo i rason nittam ta turana ta Hebreo ira nga Cristiano. Kinagina nira: “Ay nonopat-tam nu kunnasi na pakka-uffu-uffut-tam nga mangipasingan ta aya anna pangngua ta mapia. Ariat-tam nga immangan i paggarammammung tam, kagitta na kuan na karuan ira. Makkapasa-pasikan ittam lallagu tu nono, netallugaring ta masingat-tam tu aranni ngana i Aggaw na Yafu.” (Heb. 10:24, 25) Lima ragun ngana laman, memammatan na Judio ira nga Cristiano ta Jerusalem i dattal na “Aggaw na Yafu” anna matakkilalan i seniales nga niyawa ni Jesus nira sonu mawag tu panawadda yatun nga siudad. (King. 2:19, 20; Luc. 21:20-22) Zimittal yatun nga aggaw ni Jehova turi ta 70 C.E. tagga ta sinuppal na Romano ira i pangukum ni Jehova ta Jerusalem.

2. Ngatta mawag tu mas nonopattam nu kunnasi nga makkapasa-pasikan ittam?

² Taw nga tiempo, kumbinsidu ittam nga aranni ngana i “dakal anna kuruga kappabbaw” nga aggaw ni Jehova. (Joel 2:11) Kinagi ni profeta Zefanias: “Aranni ngana i dakal nga aggaw ni Jehova!  Aranni ngana anna talaga mabbibibi nga duttal!” (Zef. 1:14) Meyaplika gapa yatun nga profesiya ta tiempo tam. Megafu ta aranni ngana yatun nga aggaw ni Jehova, ipagaram ni Pablo nittam nga “nonopat-tam nu kunnasi na pakka-uffu-uffut-tam nga mangipasingan ta aya anna pangngua ta mapia.” (Heb. 10:24) Mawag gafu tu mas interesadu ittam ta wawwaragi tam, tapenu mapasikattam ira kada kawagadda yatun.

3. Anni i nitura ni apostol Pablo meyannung ta pamagaram? (Innan i letratu ta gafu na artikulo.)

³ “I pavvuru-vurung ta futu na tolay i mamakkummag sa, ngem i mapia nga uvovug i mamagayayya tatun.” (Prov. 12:25) Mesimmu nittam ngamin yatun. Egga ira i tiempo nga mawag tam i pamasikan ta nono. Nipasingan ni Pablo nga maski danuri makarresponsibilidad nga pagaramman i tanakuan ay mawagda gapa i pamagaram. Niturana ta Cristiano ira ta Roma: “Kuruga ikakaya takamu nga masingan ngana tapenu mebillay takamu ta nespirituan nga bendision nga mamasikan nikamu. Ikaya ku nga kagian tu makkapasa-pasikan ittam ta angngurug—pasikannak-ku i angngurug nu, anna pasikannan nu gapa i angngurug ku.” (Roma 1:11, 12) Wan, si Pablo nga kappabbaw i pinamasikanna ta nono na tanakuan ay nagawag gapa tu pamasikan na nono.​—Bibbigan i Roma 15:30-32.

4, 5. Sinni ira i awayya tam pasikannan i nonoda taw nga tiempo, anna ngatta mepangngo ira tatun?

⁴ Makomendan danuri minassakrifisio. Kasali tatun i matalo ira nga payunir. Dakal i nisakrifisio na aru nira ta pattoleda tapenu makapappayunir. Kunnatun gapa ta misionero, manangngal ira ta sirkito anna i gi-attawadda, anna danuri mattrabahu ta panga nga ofisina onu ta remote translation office. Massassakrifisio ngamin danaw tapenu mas aru i tiempoda ta sagradu nga serbisio. Mawag gafu nga makalawa ira tu pamasikan na nono. Maappresia gapa i pakalawà tu pamasikan na nono danuri dati nga egga ta ngamin-tiempo anna kayàda paga nakuan nga masserbi tu kunnatun, ngem megafu ta nadduruma nga rason ay imposible ngana.

⁵ Kasali gapa ta mawag tu pagaramman danuri brother anna sister nga mattalupaddian nga awan tu atawada megafu ta pattuppalda ta tabarang nga mangatawa laman ta kapangngurug. (1 Cor. 7:39) Appresian gapa na malappo ira nga atawa nga babay i pamasikan ta nono na gi-attawada. (Prov. 31:28, 31) Maski danuri Cristiano nga matalo lagapa maski madara-darum onu mataki ay mawagda nga makaginna tu pamagaram. (2 Tes. 1:3-5) Banna-bannayan ni Jehova anna ni Cristo ngamin danaw nga matalo nga aripan.—​Bibbigan i 2 Tesalonica 2:16, 17.

6. Anni i papel na elder ira nga gittana mabibbig ta Isaias 32:1, 2?

⁶ Bibbigan i Isaias 32:1, 2. Mangiyawa tu pamagaram anna pangigiya si Jesu-Cristo gukaban na “prinsipe ira” nga nelagum danuri elder ira nga nazelugan nga wawwaragina anna elder ira na tanakuan nga karneru. Uffunadda danuri nakkafi i nonoda anna nadismaya taw nga tiempo na pakawagadda. Kunnatun nakuan talaga megafu ta danaw nga elder ay ari tu “pakiyafuan” na pangurug na tanakuan nu ari “makipattrabahu” ira para ta pagayayya na wawwaragida.​—2 Cor. 1:24, NW.

7, 8. Fuera paga ta makapagaram nga uvovug, kunnasi mapasikan na elder ira i tanakuan?

⁷ Makasta nga ammarigan si apostol Pablo. Niturana ta napeppersigi ira nga Cristiano ta Tesalonica: “Megafu ta pangaya mi nikamu, sigga-parak-kami nga mangibillay nikamu, ari laman ta Mapia nga Dumug na Dios, nu ari maski paga ta pangiserbi mi ta mismu nga baggi mi, ta kuruga napafutu i pagiddu mi nikamu!”​—1 Tes. 2:8.

 ⁸ Nipasingan ni Pablo nga ari kanayun nga makalanno i puru simu nga pamasikan ta nono. Kinagina ta manakam ira ta Efeso: “Megafu ta mapia nga pattrabahu ay moffunan i mazziga-riga ira. Daddamman nu i uvovug na Yafu Jesus nga yaya mismu i nakkagi, ‘Mas dakal i pagayaya ta pangiyawa anne ta pangalawa.’” (King. 20:35) Sigga-paran si Pablo ari laman nga pagaramman i wawwaragi, nu ari, ‘gastowan ngamin i egga nisa, anna maski paga iyawana i inango na megafu laman nira.’ Masingan ta kingnguana ira nga sigga-paran yayya nga kuan i maski anni para nira. (2 Cor. 12:15) Kunnatun gapa ta elder ira taw nga tiempo. Pagarammadda i wawwaragi ari laman nga ta uvovug, nu ari, gukaban na pangipasingan tu sinsero nga personal nga interes.​—1 Cor. 14:3.

9. Kunnasi nga manabarang i elder ira ngem makapagaram lagapa?

⁹ Kasali ta pakkapasa-pasikan i panabarang, ngem taw mangana, mawag nga tuttulan na elder ira i ehemplo ta Biblia meyannung ta panabarang nga makapagaram. Makakkasta nga ehemplo taw si Jesus mismu kabalin na patay anna paginnolena. Madammo i tabaranna ta karuan nga kongregasion ta Asia Minor, ngem innattam nu kunnasina niyawa yatun. Nigena nga nanabarang, nangiyawa labbi yayya tu sinsero nga komendasion ta kongregasion ira ta Efeso, Pergamo, anna Tiatira. (Nep. 2:1-5, 12, 13, 18, 19) Kinagina ta kongregasion ta Laodicea: “Porayak-ku anna kastigowak-ku ngamin i iddeddukak-ku ira. Yatun tu mattalikarag kamu anna mabbabawi kamu.” (Nep. 3:19) Makasta nu parigan na elder ira i ehemplo ni Cristo nu kawagadda i manabarang.

10. Kunnasi nga makoffun i kada tadday nittam nga mamasikan ta tanakuan?

¹⁰ Ari laman tu elder i mawag tu mamasikan ta nono. Nitabarang ni Pablo ta ngamin nga Cristiano nga maguvovug tu “yuri laman i mapia, mepangngo, anna makoffun ta magginna nikamu.” (Efe. 4:29) Alerto nakuan i kada tadday nittam nga obserban i pakawagan na tanakuan. Nitabarang ni Pablo ta Hebreo ira nga Cristiano: “Pasikannan nu i  nabannag nga lima nu anna i mamippippig ira nga tug nu! Patunungan nu i dalan nga pallakaran nu tapenu ari nga magappano i kapilay nu, nu ari mammapia lallagu.” (Heb. 12:12, 13) Mapasikan na kataggi-tadday nittam i nono na tanakuan, maski abbarabbing, gukaban na uvovug nga makapagaram.

11. Kunnasi nga noffunan si Marthe turi ta nadepres yayya?

¹¹ Si Marthe, * tadday nga sister nga naka-ekspiriensa tu depresion, kunna: “Kabalikku nakimallo tu pamasikan ta nono, nakilalà i tadday nga mas manakam nga sister nga nangipasingan niakan tu pangiddu anna pangikallo, nga talaga kawagakku tatun nga tiempo. Niyistoriana gapa niakan i naekspiriensana nga gittana mesissimmu niakan, yatutta natageno ku nga ariakku magitetadday.” Ari ammu natun nga manakam nga sister i makasta nga efekto na kinagina kani Marthe.

12, 13. Kunnasi tam positibo nga meyaplika i tabarang ta Filipos 2:1-4?

¹² Yaw i nitabarang ni Pablo ta ngamin nga miembro na kongregasion ta Filipos: “Napasikan ngana i nono nu megafu kani Cristo; mabanna-bannayan kamu megafu ta pangaya na; mapia i pavvurulun nu megafu ta Espiritu; anna egga i pakka-iddu-iddu anna pakka-alla-allo nikamu. Ikiddò gafu tu kompletowan nu i pagayaya ku ta pamakatadday nu ta ginnonopan nu, ta pangaya nu, anna ta gi-urayan nu. Arian nu nga kuan i maski anni nga gannug megafu laman ta ikaya nu nga mala i karagatan nu, onu megafu ta aya nu nga meyatannang. Mappakalinno kamu lallagu, anna ipay nu nga kanayun ta nono nu tu mas mapia i karuan ira nga totolay anne nikamu. Arian nu nga nonopan i pammakapianan nu laggapa, nu ari i pammakapianan na kataggi-tadday nikamu.”​—Fil. 2:1-4.

¹³ Wan, mappursigi ittam nakuan ngamin para ta pammakapianan na tanakuan, ‘mamanna-bannay megafu ta pangaya,’ ‘mavvurulu megafu ta Espiritu’ [onu ‘ikavurungan i tanakuan’], anna ‘makka-iddu-iddu anna makka-alla-allo’ tapenu mapasikan i wawwaragi.

14. Anni i awayyana nga paggafuan na pamasikan ta nono?

¹⁴ Talaga massikan i nono tam nu madumug tam i kinamatalo danuri noffunattam ta nappasa kagitta na nitura ni apostol Juan, nga kunna: “Awan ngana tu mas paga nga makapagayaya niakan nu ari i pakadumug ku tu mattolay i ána ku ira segun ta kurug.” (3 Juan 4) Aru nga payunir i mamakurug nu kunnasi nga makapasikan ta nono nu mammuan nga i karuan ta noffunadda nga nakadde ta kinakurug ay nattalupaddian nga matalo anna awayyana nga masserbi ngana gapa ira nga payunir. I pangiperaddam ta nakkafi nga payunir ta makapagayayya nga nappasa i awayya nga paggafuan na kurug nga pamasikan ta nono.

15. Anni i tadday nga metodo tapenu mapasikan danuri matalo nga massesserbi?

¹⁵ Aru nga manangngal ta sirkito anna i gi-attawadda i nakkagi nga napagaram ira kabalidda nakalawa tu tura na appresasion ta nabbisitadda nga kongregasion. Kunnatun gapa i matageno na elder ira, misionero, papayunir, anna miembro na familia na Bethel nga makalawa tu uvovug na pangappresia ta tulu-tuloy nga passerbida.

16. Anni i kawagan tapenu mapagaram mu i tadday nga tolay?

¹⁶ Ariattam nakuan nonopan nga ari ittam nga makapagaram megafu ta ari tam malalaki nga makistoria. Ari mariga i mamagaram​—awayyana nga i sinsero nga pangngizzi nu maddios ta tanakuan. Nu ari nga mangngizzi gapa nikaw, awayyana nga egga i problemana, anna makeyawa tu pamanna-bannay i pagginnam laman sa.​—Sant. 1:19.

17. Kunnasi noffunan i tadday nga kabataan nga brother turi ta problemadu yayya?

 ¹⁷ Talaga napproblema si Henri, tadday nga kabataan nga brother turi pinanawan na aranni nga paparientesna i kinakurug, nelagum ngana i yamana, nga tadday nga respetadu nga elder dati. Napagaram yayya na manangngal ta sirkito nga nangiyangay sa ta coffee shop anna nipamavulunna nga ivuvvuna i egga ta futuna. Kabalin na pinaguvovugda, nalippawa ni Henri nga i pattalupaddianna laman nga matalo i makoffun ta kafamiliana nga manoli ta kinakurug. Talaga napagaram yayya ta nabibbigna ta Salmo 46; Zefanias 3:17; anna Marcos 10:29, 30.

18. (a) Anni i obserbasion ni Patul Solomon? (b) Anni i suhestion ni apostol Pablo?

¹⁸ Ipasingan na nesimmu kada Marthe anni Henri nga awayya tam nga pagaramman i tadday nga brother onu sister nga magawag tu banna-bannay. Nitura ni Patul Solomon: “I uvovug nga nekagi ta mepangngo nga tiempo​—anni mabba kastana yatun! I masaya nga muka ay mamagayayya ta futu; i mapia nga dumug ay mamassikan ta tulu-tulang.” (Prov. 15:23, 30, ftn.) Kunnatun gapa, makapasikan ta tadday nga maraddam i pabbibbig tu Passifusifutan onu website tam. Pinakurug paga ni Pablo nga i grupo nga pakkansion tu kansion na Pappatulan ay mamasikan ta nono. Niturana: “Makkataba-tabarang anna makkatuddu-tuddu kamu ta kurug nga ka-uto. Makkansiok-kamu ta salmo anna imno ira, tuange ta nespirituan ira nga kansion. Kuan nu yaw ta napafutuan anna sigga-pabbala-balo ta Dios.”​—Col. 3:16; King. 16:25.

19. Ngatta mas paga importante i pakkapasa-pasikan tu nono ta mappange nga aggaw ira, anna anni i mawag nga kuattam?

¹⁹ Mas paga importante i pakkapasa-pasikan tu nono durante nga masingat-tam tu “aranni ngana” i aggaw ni Jehova. (Heb. 10:25) Kagittana kinagi ni Pablo ta kasi-Cristianona ira tagga, “makkapasa-pasikan kamu gafu ta nono, anna makka-uffu-uffun kamu, kunna kuan nu ngana toye ta maddagga-raggun.”​—1 Tes. 5:11.