1. Apay nga imbalakad ni apostol Pablo a nangnangruna nga agpipinnaregta dagiti Hebreo a Kristiano?

APAY nga ad-adda nga ikagumaantayo ti mangparegta? Imbaga ni apostol Pablo ti rason iti suratna kadagiti Hebreo a Kristiano. Kinunana: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian ti dadduma, no di ket agpipinnaregtatayo, ket nangnangruna a kasta bayat a makitkitayo nga umas-asidegen ti aldaw.” (Heb. 10:24, 25) Awan pay lima a tawen, makita idin dagiti Judio a Kristiano nga agnanaed idiay Jerusalem nga asidegen ti “aldaw ni Jehova” ken ammoda ti pagilasinan nga imbaga ni Jesus a pumanawdan iti dayta a siudad tapno maispalda. (Ara. 2:19, 20; Luc. 21:20-22) Dimteng dayta nga aldaw idi 70 C.E. idi impakat dagiti Romano ti panangukom ni Jehova iti Jerusalem.

2. Apay nga ad-adda a sipapanunottayo ita iti panangparegta iti maysa ken maysa?

² Kombinsidotayo nga asidegen ti “dakkel ken nakaam-amak unay” nga aldaw ni Jehova. (Joel 2:11) Kinuna ni propeta Sofonias:  “Ti dakkel nga aldaw ni Jehova asidegen. Asidegen dayta, ket mapagdardaras iti kasta unay.” (Sof. 1:14) Agaplikar met ita dayta a naimpadtuan a pakdaar. Gapu ta asidegen ti aldaw ni Jehova, imbaga ni Pablo nga “agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid.” (Heb. 10:24) Ad-adda koma pay ngarud a sipapanunottayo kadagiti kakabsattayo tapno maparegtatayo ida no kasapulan.

3. Ania ti imbaga ni apostol Pablo maipapan iti pammaregta? (Kitaen ti ladawan iti rugi ti artikulo.)

³ ‘Ti panagdanag iti puso ti maysa ti mamagrukob iti dayta, ngem ti naimbag a sao ti mamagrag-o iti dayta.’ (Prov. 12:25) Pudno daytoy kadatayo amin. Kasapulantayo ti pammaregta no dadduma. Impakita ni Pablo a kasapulan met a mapabileg uray dagidiay addaan iti responsabilidad a mangparegta iti sabsabali. Insuratna kadagiti Kristiano idiay Roma: “Il-iliwek a makitakayo, tapno maiburayankayo iti naespirituan a sagut tapno mapatibkerkayo; wenno, imbes ketdi, tapno adda koma panagsisinnukat iti pammaregta iti nagtetengngaanyo, iti tunggal maysa babaen ti pammati ti sabali, agpadpada iti pammatiyo ken kaniak.” (Roma 1:11, 12) Wen, pinaregta ni Pablo ti sabsabali, ngem kasapulanna met ti pammabileg no dadduma.—Basaen ti Roma 15:30-32.

4, 5. Siasino ti mabalin a paregtaentayo ita, ken apay?

⁴ Masapul a komendarantayo dagidiay agserserbi ken Jehova iti amin-tiempo, kas kadagiti matalek a payunir. Dakkel ti insakripisio ti adu tapno makapagpayunirda. Kasta met laeng ti inaramid dagiti misionero, Bethelite, manangaywan iti sirkito ken ti assawada, ken dagidiay adda iti remote translation office. Agsaksakripisioda amin tapno ad-adu ti tiempoda iti sagrado a panagserbi. Maikarida ngarud nga umawat iti pammaregta. Agkasapulan met iti pammaregta dagidiay mangipatpateg latta iti amin-tiempo a panagserbi a nagsardeng ta saanen nga ipalubos ti kasasaadda.

⁵ Ti sabali pay a grupo nga agkasapulan iti pammaregta ket dagiti kakabsat nga awanan pay iti asawa gapu ta kayatda a tungpalen ti balakad a ‘makiasawa laeng iti Apo.’ (1 Cor. 7:39) Maparegta met dagiti nagaget nga assawa a babbai a makangngeg iti makapabileg a sasao ti assawada. (Prov. 31:28, 31) Agkasapulan met iti pammaregta dagiti Kristiano a nagtalinaed a matalek uray no maidaddadanes wenno masaksakitda. (2 Tes. 1:3-5) Liwliwaen ni Jehova ken ni Kristo amin dagitoy a matalek a kakabsat.—Basaen ti 2 Tesalonica 2:16, 17.

6. Ania ti akem dagiti panglakayen a nailadawan iti Isaias 32:1, 2?

⁶ Basaen ti Isaias 32:1, 2. Tapno paregtaen ken iwanwanna dagiti malidliday ken maup-upay iti daytoy a narigat a tiempo, us-usaren ni Jesu-Kristo dagiti napulotan a kakabsatna ken dagiti manangsuporta a “piprinsipe” ti sabsabali a karnero. Dagitoy a panglakayen ket saan nga “appo” iti pammati dagiti kakabsatda no di ket ‘katrabahuanda’ ida para iti naragsak a panagserbi.—2 Cor. 1:24.

7, 8. Malaksid iti makaparegta a sasao, kasano a mapabileg dagiti panglakayen ti sabsabali?

⁷ Nangipakita ni apostol Pablo iti pagtuladan. Insuratna kadagiti naidadanes a Kristiano idiay Tesalonica: “Adda kinalailomi kadakayo, naay-ayokami unay a mangiburay kadakayo, saan laeng a ti naimbag a damag ti Dios, no di ket kasta met dagiti bukodmi a kararua, agsipud ta nagbalinkayo a dungdungnguenmi.”—1 Tes. 2:8.

 ⁸ Saan a kanayon nga umdas ti makaparegta a sasao isu nga imbaga ni Pablo kadagiti panglakayen iti Efeso: “Masapul a badanganyo dagidiay nakapuy, ket masapul a laglagipenyo ti sasao ni Apo Jesus, idi isu kinunana, ‘Ad-adu ti kinaragsak iti panangted ngem iti panangawat.’” (Ara. 20:35) Saan laeng a situtulok ni Pablo a mangparegta kadagiti kakabsatna, no di ket situtulok pay a “mangbusbos ken naan-anay a mabusbos” para kadakuada. (2 Cor. 12:15) Kasta met, dagiti panglakayen, saanda laeng a paregtaen ken liwliwaen dagiti kakabsatda babaen ti sasao no di ket pabilgenda pay ida babaen ti panangipakita iti pudpudno a personal nga interes.—1 Cor. 14:3.

9. Kasano a makaipaay dagiti panglakayen iti makaparegta a balakad?

⁹ Mabalin a karaman iti panangpabileg ti panangipaay iti balakad. Suroten koma dagiti panglakayen ti ulidan iti Biblia maipapan iti makaparegta a panangbalakad. Impakita ni Jesus ti nagsayaat nga ulidan maipapan iti dayta kalpasan ti ipapatay ken panagungarna. Adda nadagsen a balakadna kadagiti kongregasion iti Asia Menor, ngem kitaentayo no kasano nga impaayna. Sakbay a binalakadanna dagiti kongregasion iti Efeso, Pergamo, ken Tiatira, kinomendaranna ida. (Apoc. 2:1-5, 12, 13, 18, 19) Imbagana iti kongregasion iti Laodicea: “Amin dagidiay dungdungnguek tubngarek ken disiplinaek. Gapuna agregta ken agbabawika.” (Apoc. 3:19) Nagsayaat a tuladen dagiti panglakayen ti ulidan ni Kristo no masapul a mangbalakadda.

10. Kasano a makiramantayo amin iti panangpabileg iti maysa ken maysa?

¹⁰ Saan laeng a responsabilidad dagiti panglakayen ti mangparegta. Imparegta ni Pablo iti amin a Kristiano nga agsaoda iti “naimbag a maipaay a pangpabileg kas iti kasapulan, tapno maipaayna no ania ti mainugot” iti sabsabali. (Efe. 4:29) Alertotayo koma amin a mangkita iti “kasapulan” ti dadduma. Imbalakad ni Pablo kadagiti Hebreo  a Kristiano: “Paglintegenyo dagiti ima a nalpay ken dagiti aglulupoy a tumeng, ket agtultuloykayo a mangaramid kadagiti nalinteg a dana maipaay kadagiti sakayo, tapno ti pilay saan koma a maligos, no di ket mapaimbag.” (Heb. 12:12, 13) Amintayo, uray dagiti ubbing, mapabilegtayo ti maysa ken maysa babaen ti makaparegta a sasao.

11. Kasano a natulongan ni Marthe idi nagsagaba iti depresion?

¹¹ Insurat ti sister a ni Marthe, * a nagsagaba iti depresion: “Naminsan, idi ikarkararagko a maparegtaak koma, naam-ammok ti maysa a nataengan a sister a nangiparikna kaniak iti pammateg ken asi a kasapulak unay idi. Inyestoriana pay ti nakasuotanna a kas iti problemak, isu a nariknak a saanak nga agmaymaysa.” Mabalin a saan nga ammo ti nataengan a sister a naparegta ni Marthe iti imbagana.

12, 13. Kasanotayo a mayaplikar ti balakad iti Filipos 2:1-4?

¹² Imbalakad ni Pablo iti amin a miembro ti kongregasion idiay Filipos: “No, ngarud, adda aniaman a pammaregta ken Kristo, no adda aniaman a pangliwliwa ti ayat, no adda aniaman a panangiranud iti espiritu, no adda aniaman a kinalailo ken panangngaasi, an-anayenyo ti rag-ok iti panagmaymaysayo iti panunot ken panagmaymaysayo iti ayat, a mapagtitiponkayo a sangsangkamaysa iti kararua, a salimetmetanyo ti maymaysa a panunot iti isip, nga awan ti aniaman nga aramidenyo gapu iti rinnupir wenno gapu iti panangipasindayaw iti bagi, no di ket buyogen ti kinapakumbaba iti isip nga ibilangyo a ti dadduma nangatngatoda ngem dakayo, nga itultuloyyo a kitaen, saan a ti personal a panaginteres iti laeng bukodyo a bambanag, no di ket kasta met ti personal a panaginteres iti bambanag ti sabsabali.”—Fil. 2:1-4.

¹³ Wen, ikagumaantayo koma amin a kitaen ti pagimbagan dagiti kakabsattayo. Tapno maparegtatayo ida, ipaayantayo ida iti naayat a pangliwliwa, pannakaseknan, nadungngo a panagayat, ken pannakipagrikna.

14. Ania ti maysa a paggapuan iti pammaregta?

¹⁴ Mabalin a maparegtatayo met no madamagtayo a matalek dagiti natulongantayo, kas iti narikna ni apostol Juan idi insuratna: “Awanen ti adda kaniak a dakdakkel pay a pakaigapuan ti kinamanagyaman ngem kadagitoy a banag, a mangngegko koma a ti annakko agtultuloyda a magna iti kinapudno.” (3 Juan 4) Paneknekan ti adu a payunir a makaparegta no maammuanda nga agtultuloy a matalek, ken nalabit payunir pay ketdin, dagiti nabayagen a natulonganda a makaammo iti kinapudno. Mabalin a maliwliwa ti maup-upay a payunir no maipalagip kenkuana dagiti naragsak a kapadasanna.

15. Ania ti maysa a pamay-an a maparegtatayo dagiti matalek nga agserserbi?

¹⁵ Imbaga ti adu a manangaywan iti sirkito a maparegtada ken dagiti assawada no makaawatda iti uray ababa laeng a surat ti panagyaman dagiti binisitada a kongregasion. Kasta met laeng ti marikna dagiti panglakayen, misionero, payunir, ken Bethelite a nakaawat iti apresasion gapu iti matalek a panagserbida.

16. Ania ti mabalintayo nga aramiden tapno maparegtatayo ti sabsabali?

¹⁶ Kamali no panunotentayo a ditay kabaelan ti mangparegta gapu ta saantayo a nalaing a makisarita. Simple laeng ti kasapulan tapno makaparegtatayo. Nalabit umdasen ti nabara nga isem kas pangkablaaw. No saandatayo nga iseman, mabalin nga adda problemada, ket mabalin a maliwliwatayo ida uray dumngegtayo laeng.—Sant. 1:19.

17. Kasano a natulongan ti maysa nga agtutubo a maup-upay?

 ¹⁷ Naupay ti agtutubo a ni Henri idi timmallikud iti kinapudno ti dadduma a kapamiliana, a pakairamanan ni tatangna a dati a mararaem a panglakayen. Naparegta ni Henri idi inawis ti maysa a manangaywan iti sirkito a mapanda agkape sa binay-anna ni Henri a mangyebkas iti rikriknana. Naamiris ni Henri a ti laeng pamay-an tapno matulonganna ti pamiliana a makasubli iti kinapudno ket ti panagtalinaedna a matalek. Naliwliwa ni Henri idi binasana ti Salmo 46; Sofonias 3:17; ken Marcos 10:29, 30.

18. (a) Ania ti napaliiw ni Ari Solomon? (b) Ania ti inrekomenda ni apostol Pablo?

¹⁸ Ipakita ti kapadasan da Marthe ken Henri a kabaelantayo a paregtaen ti kabsattayo nga agkasapulan iti liwliwa. Insurat ni Ari Solomon: “Ti sao iti umiso a tiempona O anian a nagsayaat! Ti kinaraniag dagiti mata [wenno, naragsak nga ikikita] pagrag-oenna ti puso; ti damag a naimbag palukmegenna dagiti tulang.” (Prov. 15:23, 30) Mapabileg met ti maysa a maup-upay no agbasa iti Pagwanawanan wenno iti website-tayo. Imbaga ni Pablo a makaparegta ti agkakadua nga agkanta kadagiti kanta ti Pagarian. Insuratna: “Itultuloyyo nga isuro ken bagbagaan [wenno, paregtaen] ti maysa ken maysa babaen kadagiti salmo, daydayaw iti Dios, naespirituan a kankanta buyogen ti kinaparabur, nga agkankantakayo iti puspusoyo maipaay ken Jehova.”—Col. 3:16; Ara. 16:25.

19. Apay a napatpateg pay ti agpipinnaregta iti masanguanan, ken ania koma ti aramidentayo?

¹⁹ Ad-adda a napateg ti panagpipinnaregta bayat a makitkitatayo nga “umas-asidegen” ti aldaw ni Jehova. (Heb. 10:25) Kas imbaga ni Pablo kadagiti padana a Kristiano, ‘itultuloytayo a liwliwaen ti maysa ken maysa ken pabilgen ti maysa ken maysa, a kas iti pudno nga ar-aramidentayo.’—1 Tes. 5:11.